03/05/2026
السلام عليكم ورحمة الله وبركاته
حبينا بس ننوه ان بسبب ارتفاع أسعار كل حاجة إحنا بكل أسف اضطرينا نعدّل ف الأسعار حاجة بسيطه عشان نحافظ ع نفس الكواليتي
حقيقي ربنا يعلم 95٪من الحاجة كلها شركات مستوردة فيه شعبي وفيه مصري ومش بنشتغل بيه مع ان هيبقى افيد ليا هكسب من وراك ك مريض كتير جدااا وهنزلك ف السعر بردو كتير جدا
لكن احنا مش هدفنا بيزنس نكسب من وراه فلوس وربنا يعلم كنا ساعات بنشتغل لحاله بالخساره ف سبيل ان تتعالج وتكون كويسة
لإن شغلنا فيه جزء كبير إنساني قبل ما يكون تجاري
احنا بنطلّع ليك نتيجة تحليل بيعتمد عليها خطّة علاجك بعد كدا
لازم تحليلك يتعمل ع جهاز كويس
كواشف Reagents كويسه ومستورده فالبتالي غليت جدا عليا وعشان النتيجة تبقى دقيقه
Control. وصيانه طول الوقت عشان منفقدش السيطره وتبتدي النتايج تبقى مش كويسه
كل دا بيحتاج وقت ومجهود وفلوس وانا لو نزلت بالجودة وتحليلك جه فيه مشكله انت هتيجي تحاكمني وانا ضميري هيبقى واجعني ان كان فيه حاجة احسن وانا مجبتهاش!
انا مش عاوزه امشي نفسي وخلاص لإن فيه كتيير بيمشي نفسه وبيشتغل والدنيا بتعدي
انا عاوزه اديك نتيجة تكون ضامن ان شاء الله انها 99.9%صح ومتراجعش ورايا
التحاليل الطبية مش مجرد رقم انا بكتبهولك ف ورقه وانت بتاخده وتمشي
دي رحلة كبيره ومجهود كبير من اول السرنجة ال بيتسحبلك بيها لحد ما بيوصلك الفايل
ف لو استعصى عليك سعر ممكن تدور على مكان بسعر اقل
لكن متجيش تضغط ع حد وتضره ف شغله وهو بيراعي ربنا فيك وجايبلك احسن جودة ف السوق
لإنه مش هيعرف ولا هيقدر ينزل بجودته ف بالتالي هيبقى خسران
وف نفس الوقت والله ما بنحب نزعلكم ف سهلوها علينا وربنا يعلم ال بنقدر عليه بنعمله مع الكل والمحتاج دا من غير كلام
احنا عنينا ليه ولو هنشيل احنا التكاليف كلها لإن دا لله
ف رجاءا محدش يزعل هي ع الكل والله وربنا يعيننا ويقوينا
