مُجتمع ADHD في مصر

19/07/2025

شاركونا أخبار علاقاتكو الإجتماعية إيه ؟ 🌹🌹

19/07/2025

19/07/2025

من مشاركات الأعضاء Sahar Mohamed

👨‍👩‍👧‍👦 يا ترى عمركوا فكرتوا دماغ ابنكم أو بنتكم اللي عندهم ADHD شكلها عامل إزاي من جوا

🌪 تعالوا اخدكم لفه جوه دماغ ال ADHD

يا ماما يا بابا يا كل حد بيحبني
أنا مش دايما باخد بالي
مش دايما بركز في اللي بتقولوه مش لأني مش مهتم
بس عشان وقتها بيكون في مليون فكرة بتنط في دماغي في نفس الوقت 💭
يعني ممكن تقولولي على حاجه وأنا فعليًا مسمعتش

🧠 ممكن تسألوني لو فعلاً سمعتكم والحاجة ثبتت في دماغي

أنا مش مهمل ولا مستهتر
أنا بنسى كتير
وبكون مش فاكر كنت سايب الحاجة فين

👁👂 ممكن تساعدوني أشغل حواسي لما أسيب حاجه عشان أفتكرها بعدين

أنا مش فاشل
بس الطريقة اللي بتتعلموا بيها مش بتنفعني
أنا بتعلم بطريقتي
باللعب بالحركة بالصور بالأغاني 🎨🕺🎶

أنا مش كسول
بس عندي نقص دوبامين
فأوقات المهام بتحتاج مني مجهود مضاعف 💪

بدل ما تلوموني
ممكن تشجعوني
تقولولي كلام حلو
تحبوني حب من غير شروط 💛

أنا مش غريب
أنا مختلف
وبحتاجكم جنبي علشان أكون أفضل نسخة من نفسي 🌈






#اضطراب

19/07/2025

من مشاركات الأعضاء Sahar Mohamed

✨ عارفين إيه اللي بيحصل لما بنتعامل مع طفل عنده ADHD بطريقة مش سليمة؟

الطفل دا اللي كل يوم بيتقاله:
❌ ركز شوية!
❌ إنت مهمل!
❌ عيب كده!
❌ اقعد ساكت!
❌ كفاية حركة!

وبيتحرم من إنه يكتشف، ويغلط ويتعلم بطريقته...
وبيتحاصر بـ "لأ" أكتر ما بيتفتحله أبواب الفهم والتقبل...

الطفل دا ممكن جدا يتكوّن عنده اضطراب اسمه:
💥 *اضطراب التحدي المعارض (ODD)*
وده بيكون نتيجة *رد فعل دفاعي* تجاه النقد، والقيود، والإحساس إنه مش مفهوم.

ومع الوقت…
ومع استمرار الضغط والإهمال العاطفي…
بيكبر وهو حاسس إنه غلط ومش كفاية ومش محبوب
وده ممكن يوصله لـ:
💔 *اضطراب الشخصية الحدّية (BPD)* في الكِبَر
واللي بيحتاج وقت طويل جداً للتعافي منه.

لما بنتعامل مع الطفل المختلف على إنه "مشكلة"
إحنا مش بنحلها…
إحنا بنصنع وجع نفسي كبير ممكن يفضّل ماشي معاه سنين.

---

🎈 كل طفل محتاج:

* حد يسمعه، مش يحاكمه.
* حد يفهم طريقه تفكيره، مش يقمعها.
* حد يحتويه، حتى لو كان "زيادة شوية" عن المعتاد.

👶🏼 ADHD مش شقاوة، ومش قلة أدب…
دي طريقة عقل فريدة محتاجة طريقة حب فريدة ❤


#اضطراب

19/07/2025

من مشاركات الأعضاء Heba Muhammed

مش ببالغ… النقد بيوجعني بزيادة!"
الحساسية الزائدة للنقد مع ADHD – اللي مش كل الناس شايفاها
👂 ليه كلمة صغيرة ممكن توجعني أكتر من اللازم؟
لو عندك ADHD، فأنت غالبًا:

بتحلل الكلام كله بزيادة

بترجع تعيد الكلام في دماغك بعد ما الحوار يخلص

ممكن تنهار من كلمة "ليه اتأخرت؟" أو "مش مركّز ليه؟"

وده مش لأنك درامي…

❗ده لأنك عايش طول الوقت في حالة تقييم داخلي قاسي على نفسك
وكل كلمة بتتقال، بتأكد جواك إنك "مش كفاية"

📌 اسم الحالة دي:
Rejection Sensitive Dysphoria – حساسية مفرطة من الرفض أو النقد
وهي شائعة جدًا بين الناس اللي عندهم ADHD

🎯 النقد بالنسبة لهم مش مجرد ملاحظة
ده صوت عالي بيقول:

أنت مش قد المسؤولية

أنت خيّبت أملي

أنت فاشل

محدش هيحبك لو فضلت كده

💢 رد الفعل بيكون:
🔹 انسحاب مفاجئ
🔹 بكاء أو انهيار
🔹 انفجار في الغضب
🔹 أو تجمّد تمامًا كأنك مش موجود

👩‍⚕ طيب نتصرف إزاي؟
✔ أول خطوة: افهم إن رد فعلك مش ضعف… ده نتيجة لطريقة عصبية مختلفة
✔ ثاني خطوة: ما تصدقش الصوت اللي بيجلدك جواك
✔ ثالث خطوة: احط حدود… مش كل نقد لازم يدخل جواك
✔ وآخر خطوة: اشتغل على التقبل الذاتي والتعاطف مع نفسك

💬 رسالة ختام:
"أنا مش هشوف نفسي بعيون كل اللي بينتقدني…
أنا هتعلم أشوفني بعين أرحم،
لأن أكتر حد بيتعبني… مش اللي بينقدني،
هو أنا لما أصدق كلامه."


#اضطراب

18/07/2025

من مشاركات الأعضاء Heba Muhammed

هو سلوكنا في إيه؟! يعنى إيه علاج سلوكي لاضطراب ADHD؟
🧠 كتير بنسمع:

"اتعالج سلوكي"
"ابنك محتاج تعديل سلوك"
"سيبك من الدوا، خده علاج سلوكي"
بس... حد قالنا يعني إيه فعلاً "علاج سلوكي"؟

✅ العلاج السلوكي مش "تأديب" ولا "تهذيب سلوك"...
هو علم، مبني على فهم طريقة عمل الدماغ وتصرفاته.

📌 وبالذات مع اضطراب ADHD، العلاج السلوكي هدفه مش إنك "تغير ابنك"، لكن:

"تساعده يفهم دماغه، ويتعامل معاها بطريقة تنفعه مش تضره"

📚 طب بيشتغل إزاي؟ (حسب كتب العلاج السلوكي لـ ADHD)
🔹 بيحلل المواقف والسلوكيات اللي بتتكرر
زي مثلاً: كل ما يبدأ يذاكر يسيب الحاجة، أو يقاطع الكلام.

🔹 يعلم استراتيجيات تعديل تدريجي للسلوك
زي: التقسيم – التكرار – المكافأة – تنظيم البيئة.

🔹 يركز على المهارات التنفيذية
زي التركيز – التخطيط – ضبط الوقت – مقاومة الإغراء.

👀 يعنى بنتعلم إيه من الجلسات دي؟
🛠 للمراهق أو الطفل:

أتحكم في وقتي إزاي؟

أعمل إيه لما دماغي تشتت؟

أوقف اندفاعي إزاي من غير ما أخسر اللي قدامي؟

👨‍👩‍👦 وللأهل:

أتعامل إزاي من غير صريخ وخصام؟

إزاي أوجه ابني بطريقة تخليه يسمع مش يقفل؟

أفرق إمتى بين العناد والسلوك الخارج عن السيطرة بسبب ADHD؟

🔄 العلاج السلوكي = تدريب مستمر، مش جلسة ونتيجة فورية
"العلاج السلوكي بيبني جسر بين اللي المراهق أو الطفل يقدر يعمله، وبين اللي المجتمع بيطلبه منه."
– د. راسل باركلي

❌ لو مشيت من غير علاج سلوكي:
الدوا يساعد التركيز بس مش بيعلم المهارات.

المراهق ممكن يهدأ بس يفضل مشتت ومتوتر.

الأهل يفضلوا تايهين: "هو عنيد ولا مش قادر؟"

💬 ختام البوست:
❗"ADHD مش مشكلة سلوك… لكن لو معرفناش ندير السلوك، هيتحول لمشكلة حقيقية في كل جوانب الحياة."
العلاج السلوكي هو البوصلة اللي بتوجهنا مش العصا اللي بتوجعنا.


#اضطراب

17/07/2025

من مشاركات الأعضاء Heba Muhammed

🎯 المراهقة وADHD: لما التشتت يكبر معانا!
🧠 "المراهقة هي أكتر مرحلة بيظهر فيها اضطراب فرط الحركة وتشتت الانتباه (ADHD) بشكل معقد... مش بس لأن الدماغ بيتغير، لكن كمان لأن الضغوط بتكبر" – د. راسل باركلي، خبير في ADHD

🔍 ليه مرحلة المراهقة تعتبر الأصعب للي عندهم ADHD؟
✅ لأنها مرحلة انتقالية بين الطفولة والاستقلال.
✅ لأن الدماغ في المرحلة دي لسه في مرحلة "إعادة بناء"، خاصة المناطق المسؤولة عن اتخاذ القرار، التنظيم، وضبط النفس.

😣 أعراض ADHD في سن المراهقة بتكون مختلفة شوي عن الطفولة:
صعوبة شديدة في التركيز في المهام الطويلة (زي المذاكرة أو المحاضرات).

نسيان مستمر، فقدان أغراض، تأجيل المهام.

اندفاع في التصرفات أو الكلام، أحيانًا يؤدي لمشاكل اجتماعية.

مزاج متقلب وميول للرفض أو الجدال.

قلق، توتر، أو مشاعر بالذنب والفشل المستمر.

🧱 التحديات اللي بيقابلها المراهق مع ADHD:
🔸 ضغط دراسي أكبر وصعوبة تنظيم الوقت.
🔸 مشاكل في الصداقات أو العلاقات العاطفية.
🔸 سلوك متمرد أو عنيف أحيانًا.
🔸 خطر أكبر للإدمان أو السلوكيات الخطيرة لو مفيش دعم.

حسب CDC، 6 من كل 10 مراهقين عندهم ADHD بيواجهوا مشاكل نفسية مصاحبة زي الاكتئاب أو القلق.

🛠 طب نعمل إيه؟ (من توصيات الدكاترة والمراجع العلمية)
علاج سلوكي معرفي (CBT):
بيساعد المراهق يفهم أفكاره ويتعلم تنظيم مشاعره وسلوكياته.

دعم أسري ومدرسي:
لازم الأهل والمدرسة يكونوا شركاء في العلاج، مش مجرد متفرجين.

تقنيات التنظيم الذاتي:
زي التخطيط اليومي، التنبيهات، تقسيم المهام.

تقبل الذات وعدم جلد النفس:
مهم جدًا يفهم المراهق إنه مش "كسول" أو "فاشل"، هو بس عنده طريقة مختلفة في التفكير والتنظيم.

💡 رسالة للمراهق:
"مشكلتك مش فيك... المشكلة في إن دماغك بيشتغل بطريقة مختلفة. ولما تفهمه وتدعمه، هتوصل لأبعد مما كنت تتخيل."


#اضطراب

16/07/2025

من مشاركات الأعضاء Sahar Mohamed

🧠 لو عندك ADHD وبتحس إن المهام الكبيرة بتشلّك… جرب الحيلة دي 👇

أنا واحدة من الناس اللي مخها دايمًا كان بيشوف المهمة الكبيرة زي وحش ضخم كده بيقولي
أحسنلك تبعدي مش هتعرفي تعملي دا كله 🫠

يعني مثلًا
لو دخلت المطبخ ولقيت الحوض مليان مواعين مخي بيقف بيهنّج
وبيقرر ببساطة
مش هبدأ أصلا

لحد ما جيت في يوم وقررت أضحك على مخي 😏

قلتله
بص مش هنعمل كل المواعين بس نفضيهم من الحوض ونسيب الكوبايات ماشي سهلة

وفعلًا عملتها وفجأة حسيت إني أنجزت 🔥
لقيت نفسي ببدأ أغسل الكوبايات
ومنها دخلت على المعالق لوحدها
ومن غير ما أحس كنت خلصت كل حاجة

السر
إني قسمت المهمة الكبيرة لحاجات صغيرة وسهّلتها على مخي 💡
اسم الميكانزم دا
*Break it into baby tasks 👶*

وده واحد من الحيل اللي بتناسبنا جدًا كناس عندنا ADHD
لأن مخنا مش بيحب يشوف الجبل بس ممكن يطلع السلمة الأولى لوحدها 👣
وبعدها التانية وبالراحة نوصل فوق 💪💫

لو جربت الحيلة دي قبل كده أو عندك حيلة شبهها شاركني تجربتك في الكومنتات 💬👇
إحنا مش لوحدنا ❤‍🔥

\
\
\ #نصايح
\

#اضطراب

15/07/2025

من مشاركات الأعضاء Sahar Mohamed

انا سحر وعندي ADHD
بس مش بختزل نفسي فيه
طول عمري بحس إن طريقة مخي مختلفة 🤯
بس مكنتش فاهمة ولا لاقية تفسير للي بيحصل
غير إني محتاجة أركز أكتر
وكنت بسمع كلمة ركزي يا بنتي
أكتر ما كنت بتنفس 😂

وكنت بفضل كتير أقول إني هعمل العادة الفلانية والتزم بيها
وأعمل جداول الدنيا والآخرة
بس كنت بقعد يوم أو يومين ومبستمرش
وكنت فاكرة إن المشكلة في الإرادة
وإني عندي خلل
وكنت بجلد نفسي كتير 🥺

لحد ما اتشخصت
واتعلمت عن مخي وازاي بيشتغل 🧠
فهمت إن الوظيفة الثابتة
اللي محددة بزمان ومكان
مش ليا
فملهاش لازمة أحرق روحي فيها 🔥

اكتشفت إن أسلوب الحياة اللي الناس كلها بتقول عليه
إن لازم نصحى في الميعاد الفلاني وننام في المعاد العلاني
مش لايق عليا
ومش مناسب لدماغي

بنيت عادات كتير تساعدني في رحلتي
وتكون مناسبة لشخصيتي 💛
والمفاجأة 😮
إني قدرت التزم بيها
وبقت أسلوب حياة
بقيت بشوف تأثيرها الإيجابي عليا
على جسمي ونفسيتي وقلبي
فلما بعمل العادة دي بتحسسني بلذة معينة
فبستمر عليها لأني حبيتها 💓
ومناسباني
مش عشان لازم أو مفروض

لغيت المفروض واللازم من القاموس 🚫
وبقيت بحول كل حاجة في حياتي لـ fun 🎈
بروح الجيم مش عشان أعمل فورمة
بقيت أقنع مخي إن دا مكان إحنا رايحين نتبسط فيه
وبطبق ده على كل حاجة في حياتي

وده اللي ساعدني ألتزم
الرعاية الذاتية مهمة أوي 🧘‍♀
أنا بقول كده لأني زمان مكنتش بقدر ألتزم بأي عادة
مش عشان أنا وحشة أو كسولة
بس ببساطة
مكنتش مناسبة لروحي

احنا أذكياء جدًا
وبنقدر نخلق ميكانزمات تأقلم تساعدنا
حتى لو مش عارفين إننا ADHD 💫

وفي النهاية
كلنا في الحياة عندنا تحديات
وعندنا tools تساعدنا
المهم إننا نكون نفسنا
على طبيعتنا 🤍🥰

--


#اضطراب

14/07/2025

من مشاركات الأعضاء Heba Muhammed

"نسيبنا من الأوجاع… ونعيش المتعة خطوة بخطوة!"
دليل صغير للمتعة مع ADHD
قصص ناس لقوا متعتهم في حاجات محدش بيشوفها ممتعة غيرهم ❤
👤 1. "بحب أقعد أسمع صوت الغسالة… بحس إنه بيحضني!"
شابة 22 سنة، عندها ADHD، بتحكي إن صوت الدوران المنتظم بيريّحها وبيخلي دماغها تهدى…
كانت بتفتكر نفسها "غريبة"، لكن اكتشفت إن ده اسمه Sensory Soothing ✨

👤 2. "بحب أشم الكتب القديمة أكتر من ريحة عطر"
شاب 24 سنة، بيقول إن ريحة الكتب القديمة بتاخده لمكان دافي جواه،
بيقعد ساعات في مكتبات الأنتيك عشان يشم الكتب قبل ما يقراها.
وبيقول: "هي لحظة بيني وبين الزمن."

👤 3. "أكتر وقت بحبه… لما الدنيا فاضية والناس نايمة"
بنت عندها حساسية صوتية وADHD، بتحكي إنها بتحس بالحياة لما الشوارع تبقى نايمة
بتتمشى الفجر وبتوصف اللحظة دي كأنها ملكة في فيلم قديم 🥀

👤 4. "أنا بحب أكل مقرمشات بهدوء وأنا حافي!"
شاب 19 سنة، بيقول: "بحس إني متصل بالأرض وبالطعم وباللحظة كلها… حاجة كده ملهاش تفسير بس بتفرحني."

👤 5. "بحب أراقب الناس… مش أتفرج عليهم، أراقب!"
بنت 20 سنة، بتحب تقعد في كافيهات لوحدها وتتفرج على تصرفات الناس من بعيد،
بتقول: "كل حد له قصة… وأنا بتخيلها كلها جوا دماغي كأني بكتب فيلم."

👤 6. "بحب أكرر نفس الفيلم أو الأغنية كل يوم لمدة أسبوع!"
شاب عنده ADHD، بيقول إن التكرار بيديله أمان،
وبيفهم تفاصيل جديدة كل مرة، وده بالنسباله متعة لا توصف.

👤 7. "بحب أخلّي لون النور في الأوضة شبه لون المزاج بتاعي!"
بنت 23 سنة، عندها ADHD، بتحكي إنها عندها لمبة RGB،
كل ما تتغير حالتها النفسية بتغيّر لون الإضاءة:

أصفر لما تبقى فرفوشة ☀

بنفسجي لما تبقى بتحاول تهدى 🌙

أزرق لما تحب تعيش جو "فيلم حزين" 🎧
وبتقول إن ده بيريّح أعصابها بطريقة سحرية.

👤 8. "بحب أقعد على الأرض أكتر من الكرسي!"
شاب 21 سنة، بيحب يقعد على الأرض ويذاكر أو يرسم،
وبيقول إن إحساس القرب من الأرض بيديه راحة ودفء، وبيحس إنه أكثر "ثبات" كده.

👤 9. "بحب أعدّ المربعات على البلاط… أو خطوط الرخام!"
بنت بتحكي إنها وهي ماشية في البيت، بتبص على الأرض وتعد المربعات أو الخطوط،
وبتقول: "مش عارفة ليه، بس عقلي بينبسط!"
ده اسمه Visual Pattern Seeking، حاجة بتحفز الدماغ وتحسسك بالهدوء.

👤 10. "بحب أغيّر ترتيب الأوضة كل أسبوعين"
شاب ADHD بيقول إن التغيير بيجدد دماغه
بيغير السرير والدولاب والمكتب في أوضته كل شوية،
مش لأن في سبب منطقي… بس بيحس إنه بدأ من أول وجديد كل مرة 🔁

👤 11. "بحب ألمس حاجات ليها ملمس غريب!"
واحدة بتحب تحط إيديها في العدس، أو في الرمل، أو تمسك ستاير ناعمة،
بتقول: "ده زي سحر حسي كده… دماغي بتفصل وتنبسط."

👤 12. "بحب أصحي الفجر وأتفرج على الناس وهما لسه نايمين!"
بنت بتحب تصحى بدري جدًا، مش عشان شغل أو صلاة بس،
لأ عشان تحس إن العالم لسه هادي، والمباني نايمة، والشوارع عاملة زي لوحة فنية.

👤 13. "بحب أكتب بالخط اللي مش بفهمه!"
شاب بيحب يكتب كلمات بالإنجليزي وهو مقلّب الحروف أو عامل منها شخبطة منظمة،
وبيقول: "بحس إني بكتب بلغة سريّة… وأنا الوحيد اللي فاهمها!"

👤 14. "بحب ألبس لبس شتوي وأنا في التكييف صيفًا!"
بنت عندها حب للدفء، بتحط الشال وبتفتح تكييف على درجة بسيطة،
وبتقول: "مشهد الشاي والبطانية وسط الحر بيديني شعور بالسيطرة والراحة!"

👤 15. "بحب أمسك أوراق وكرينشها بإيدي وأنا بفكر!"
شاب ADHD بيقول إن صوت الورقة وهو بيطبقها أو يكرمشها بيساعده يركّز،
"زي ما يكون دماغي محتاجة صوت صغير عشان تهدى وتستقر."

💛 المهم مش الناس بتفهمك ولا لأ، المهم:
هل الحاجة دي بتسعدك؟ بتهدي دماغك؟ بتحسسك إنك موجود؟
يبقى هي ليك… ومش غريبة، دي هويتك الخاصة في الاستمتاع بالحياة.

🎯 لو عايز تعيش المتعة بطريقتك:
🔹 دوّن الحاجات الغريبة اللي بتحبها
🔹 جرّب واحدة جديدة كل أسبوع
🔹 خليك متقبل نفسك حتى لو محدش فهمك
🔹 شارك ده مع حد بيشوفك بعيون محبة


#اضطراب

14/07/2025

من مشاركات الأعضاء Sahar Mohamed

أنا وشبح الطوابير!"

أنا ADHD يعني شخص لا يطيق الانتظار.
أي طابور—ATM، عيادة، بنك—مجرد ما ألاقي نفسي فيه

يبدأ ألتأفأف، أبص في الساعة كل ثانيتين، أتعصب من جوايا، وأحيانًا حتى أمشي قبل ما أخلص مصلحتي، بس لمجرد إنّي مش قادرة أتحمّل الانتظار!🤷

لحد ما في يوم سألت نفسي:
"طب ما إنتِ كده كده قاعدة... ليه مش تستغلي الوقت ده بطريقة تانية؟🤔

وهنا، بدأت أجرّب💙…

بدل ما أعدّ الدقائق، بدأت أتأمل وشوش الناس... كل واحد فيهم جواه قصة، جواه مشاعر، جواه حياة كاملة.
بدل التأفأف، بدأت أقول ذكر يطمن قلبي.
بدل الغضب، بدأت أاخد نية لأي حد في المكان—"يارب يسّهل له، يارب يرزقه، يارب يخفّف عنه".
بدل التوتر، بقيت أكلم حد وحشني وأسأل عنه.

والعجيب؟ نفس الوقت اللي كان بيستهلكني، بقى وقت يشحنني!
نفس الطابور، بس بطاقة مختلفة تمامًا.

لأول مرة، حسّيت إنّ المشكلة ما كانتش في الانتظار... المشكلة كانت في إزاي أنا بعيش اللحظة دي.🦋🩷


#اضطراب

13/07/2025

من مشاركات الأعضاء Heba Muhammed

💢 "أنا مش عنيد... بس مش قادر أتبع نظام مش شايفه يناسبنى"
فيه ناس بتقول علينا متمردين
وفعلاً... إحنا ساعات بنكسر القواعد، ونرفض الأوامر، ونتحدى الشكل التقليدى للأشياء
بس السؤال الحقيقي هو:
العناد ده بيحررنا؟ ولا بيكسرنا؟

🧨 تمرد بدون وعى = دمار هادى
لما تبقى جواك طاقة رفض مستمرة…
تتمرد على كل شىء حتى الصح، بس عشان تحس إنك موجود
تدخل أماكن مش من حقك تدخلها
تفركش طوابير
تعمل العكس لمجرد إن "حد أمرك بحاجة"
وترجع تقول: "أنا مش عاجبنى الشكل ده، مش مرتاح فيه"

بس المشكلة مش هنا
المشكلة إن العناد ده ممكن يوديك لسكك سلبية جدًا
سكك فيها عدوانية، انفجار، رفض للمجتمع، وخروج عن القانون
وده مش خيال...
فى دراسات كتير ربطت بين التشتت، والاندفاع، والعناد الشديد فى الطفولة،
وبين سلوكيات إجرامية أو متمردة فى الكبر.

مش لأن أصحاب ADHD مجرمين
لكن لأنهم مش مفهوميـن، مش مدعومين، ومش قادرين يتحكموا فى ردود أفعالهم

🧭 طيب... نعمل إيه؟
✔ 1. افهم العناد جواك جاي منين
هل هو مقاومة حقيقية؟

ولا خوف من الخضوع؟

ولا تجربة قديمة مخلياك ترفض الطاعة؟

✔ 2. افصل بين الحرية والفوضى
الحرية الحقيقية مش إنك تكسر كل قاعدة…

لكنها إنك تختار القواعد اللى تناسبك، وتعيشها بإرادتك.

✔ 3. اتدرب على المرونة
مش لازم يا "رفض كلى" يا "خضوع تام"

فيه حل وسط اسمه: أنا بفهم، وبقرر بإرادتي

✔ 4. اطلب مساعدة لو الحكاية خرجت عن السيطرة
معالج نفسى أو شخص فاهم ممكن يساعدك تحط حدود داخلية تنقذك من نفسك.

العناد مش دايمًا قوة… أوقات بيبقى استغاثة مش مسموعة.
العناد غير الواعى بيغرقنا فى عزلة، أو يجرنا لطريق عنيف…
لكن الوعى هو اللى بيخلينا نرجع نتحكم فى دفّة حياتنا.

💥 تمرد بوعى… مش بدمار.
💥 كون مختلف، بس ما تكونش مؤذى لنفسك ولا لغيرك.
💥 خليك حر، بس ما تنساش إن الحرية الحقيقية مسئولية مش فوضى.


#اضطراب