23/07/2022
هربس بيه فيروس 😄
الهربس دا أصلاً ملوش أهل يسألوا عنه 😢
طايح كده في العيال لا بيحترم صيف ولا شتا ولا صغير ولا كبير...😡
للي مايعرفش الهربس
دا ڤيروس رخم وهو نوعين ..النوع الأول بيجي في الجلد والحلق واللوزتين ،، و النوع التانى فى الأعضاء التناسلية
بس الأهم واللي بنشوفه كتير هو هربس الحلق واللوزتين
☝️بيبدأ بحراره وهمدان وفقدان شهية وبعد كده بيت القصيد ( قرح الفم)
دايما بتيجي من جوه ( الحلق) لبره ( الشفايف)
فبينتشر ف الفم كله ،، حلق وسقف حلق ولثه ولسان ،، وممكن ييجي علي شكل حبوب صغننه فيها ماده صفرا،، علي الفم من بره بنسميها vesicle
☝الهربس أساساً self limited
هياخد دورته يعني هياخدها من ٥-٧ أيام
المشكله كلها بتكمن في إن القُرح بتكون مؤلمة جدا فبتخلي الطفل يخاف ياكل ومن هنا تبدأ المشكله اللي أحيانا بتوصل للجفاف والحجز في المستشفي ونعلق محاليل للطفل لمجرد التغذيه ،،علي ما هربس بيه ياخد دورته ونخلص 👊
☝️علاجه واللي مجرد بس إنه بيسرع الشفاء
أسيكلوفير
زي زوفيراكس شراب ،،
أو البديل ( لوڤير-أسيكلوفير) أقراص بتدوب في ميه
بنحاول نلطف الألم للطفل بإسبراي يحتوي علي مخدر علشان يقدر ياكل
زي سولفادول- بي بي سي -أفتاميد إسبراي
الچيل الموضعي للقرح اللي نقدر نوصلها بايدينا إستخدامها هيفرق ..وافضلهم علي الاطلاق jogel أو ڤيتروكيور
لأن فيهم ماده بتساعد ع الإلتئام غير المخدر ✅
طبعا الأكل لازم يكون معظمه بارد زي العصاير والجيلي والكاستر،، لأن برودة الأكل بتساعد في تسكين الألم
الطفل المصاب بيحتاج ياخد مسكن ومضاد للإلتهاب طول فترة نشاط الفيروس واللي بيساعد علي تقليل حدة الألم.
إياكم ثم إياكم والأحماض زي البرتقال واليوسفي والليمون ..كده هتفرجى الشارع عليكى من الألم اللي هيحسه الواد😩
📍الهربس مُعدي جدا لأي حد يلمس مكان الإصابه سواء ( الرياله) اللي نازله من بق الطفل عليك مباشرة او علي حاجه بييمسكها،، أو الأكل والشرب ورا بعض أو البوس ،، كل ده ينقل العدوي ببساطه..والفتره مابين الإصابه وظهور الأعراض أسبوع تقريباً
يعني بالصلاه علي الحبيب عيل يجيله هربس يروح بس الحضانه مره واحده وتلاقي الحضانه كلها متهربسه😧 ،،تخيل
📍وعلي فكرة ٦٠٪ من حالات الإصابة بالهربس بتنتقل من شخص حامل للفيروس بس مش مصاب بيه وماظهرش عليه أعراضه ،،مناعته فُله شمعه منوره 🖐
خفّوا من البوس شويه ابوس يور هاااندز 😡
📍الهربس رخم بس علاجه سهل وبسيط ومشكلته الوحيده إنه في بعض الحالات بعد الإصابه بيفضل موجود في الخلايا العصبيه للطفل (كامن) مستني أي هفوه علشان يطلع ويمارس نشاطه من جديد وشوفنا أطفال كتير جالهم كتيير في وقت قريب 😔
📍فيه كلام جديد إنهم بيحاولوا يعملوا مصل ليه في انجلترا ..يامسهل🙏
☝️والشئ بالشئ يذكر
فيه قرحه خفيفه ظريفه كده إسمها (aphthous قلاعية) ...ودي ملهاش علاقه بالهربس تماما ..وبتيجي دايما فى الفم من بره ( الشفه من جوه أو اللثه)
وشاكين إن ليها تاريخ عائلي..بتيجى دايما في حالات نقص الفيتامينات زي الحديد وحمض الفوليك وفيتامين ب ولو فيه أي نوع من الضغوط أو التوتر النفسي ..بتيجى للكبار قبل الصغيرين 😏
بس دي بتاخد حوالي أسبوع أو أسبوعين علي ما تروح
cpd
