04/02/2026
إزاي أعلم إبني يدافع عن نفسه؟
أول حاجة لازم نفهمها إن أطفالنا طبيعي في أوقات هيتعرضوا لمواقف فيها تعدي عليهم أو ظلم أو تنمر.
إزاي بقا نعلم أولادنا يدافعوا عن نفسهم من غير ما نخليهم عدوانيين أو ضعفاء؟
الدفاع عن النفس مش معناه الضرب خالص زي ما كتير فاهم، ولا معناه يبقى ابنك عنيف أو مؤذي.
الدفاع عن النفس يعني..
يعرف يقول "لأ" بوضوح وحزم.
مايسمحش لحد يتعدى على جسمه أو خصوصيته من البداية.
يكون عنده ثقة إنه يقدر يوقف أي حد يقلل من قيمته.
تعالي نبدأ خطوة بخطوة:
1- ازرعي الثقة من البيت:
لما تمدحي ابنك على كل محاولة، حتى لو بسيطة، انتي كده بتقوليله إنت مهم، ليك قيمة، وده بيعلي ثقته بنفسه والطفل الواثق بنفسه أقل طفل ممكن يتعرض للتنمر أو التعدي، متهديش ثقة إبنك في نفسه (بالتوبيخ والضرب والعصبية والمقارنات) وتستني يعرف يدافع عن نفسه أو ياخد حقه.
2- علميه يعبر عن شعورة بالكلام:
ابنك لازم يتعلم جملة واضحة زي
*ماتعملش كده
*أنا مش بحب ده
*أنا مش موافق على ده...
الجمل البسيطة دي بتكون درع واقي ليه بعدين.
3- فرقي بين الدفاع والعدوان:
وضحي لابنك ،إحنا بندافع عن نفسنا لكن مش بنبدأ بالأذى (الدفاع عن النفس يعني يقدر يمنع اللي بيحاول يأذيه) لكن مش من حقه يبدأ هو بأذى أو ضرب غيره.
5- علميه يقول "لأ" من بدري:
في مواقف معينة وبسيطة جدًا في البيت أو البيئة بتاعته بتحتاج من الطفل يقول عليها لأ
زي لو حد أخد لعبته، قوليله قول ،دي لعبتي رجعها.
التدريب على المواقف الصغيرة هي اللي بتخليه يعرف يتصرف في المواقف الكبيرة.
6- اسمعيه وصدقيه:
لو مثلاً جه حكالك إن حد ضايقه أو ضحك عليه، مترديش عليه بكلمة ،كبر دماغك، أو إنت حساس كده ليه.
اسمعيه، وصدقيه، وادعميه، دي أكتر خطوة بتخليه يحس إنه مسموع ومهم، ومفيش طفل هيحس إنه مش مهم أو مش مسموع هيعرف يدافع عن نفسه.
7- الرياضة:
شجعيه يمارس رياضة بتزود ثقته بنفسه زي الكاراتيه، الكونغ فو، أو السباحة...
الرياضة قوة جسد وشخصية.
8- فهميه حقوقه:
من حقك تقول لأ، من حقك تبعد حد بيقرب منك بطريقة مش مريحة، من حقك تسيب مكان فيه حاجة مش حلوة
دي حقوق لازم يعرفها ابنك من وهو صغير.
خدي بالك..
ابنك مش هيدافع عن نفسه وهو بيتهان في بيته
مش هيدافع عن نفسه وهو بيتقلل منه في بيته
مش هيدافع عن نفسه وهو بيضرب ويتزعقله باستمرار في بيته
مش هيدافع عن نفسه وهو في بيئة كلها مشاكل
مش هيدافع عن نفسه وهو بيتقارن بغيره باستمرار
مش هيدافع عن نفسه وفيه أب وأم بيكسروه بالكلام والافعال
الدفاع عن النفس حاجه بتتبني في شخصيته من وهو صغير مش بتكتسب بالكلام اللي عكسه الأفعال.❤️
