30/11/2025
أي أسرة فيها اطفال من سن kg1 لحد سن ١٠ سنين مثلا فده لازم يكون قاموس كلمات يتكرر يوميا ..
هيفرق فى حياتهم وهيبان أثره بعد كده 👌🏼
1️⃣(أخلاق النبى .. )
اى تصرف يتعمل منهم غير مقبول بدل ما نقول غلط وعيب
نقول هى دى أخلاق النبى .. هو النبى لو مكانك كان اتصرف كده .. كان رد كده .. كان قال كده ... عارف النبى كان عمل ايه .. ! ونبدأ ندور على أخلاق وصفات النبى ونتعلمها فى كل موقف ولو ألف مرة فاليوم يكون نفس رد الفعل ألف مرة
2️⃣(ادع ربنا .. )
فى كل مرة بنتك او ابنك يطلب طلب لازم الرد يكون ادع ربنا .. حتى لو فلوسى معايا واقدر اجيب او مش معايا و مقدرش لازم يترسخ جواه بالتكرار ان ربنا هو الرزاق هو المعطى هو ال بيده يرزقنى فاجبلك او يأخر الرزق فنستنى شوية وان كل ال نقدر نعمله اننا ندعى بنفس راضية
3️⃣(ربنا شايفك ..)
لما تحصل خناقة بين ولادك وكل واحد يبتدى يرمى الكارثة ال عملها على التانى لازم الجملة دى تزلزل كيانهم وتبقى مرجع انه كله يرجع يعترف فى ثانية مهما كان العقاب
ربنا شايفك هيسألك وهيحاسبك انا مش شايفة لكن ربنا شايف ... الجملة دى قانون تتلغى معاه كل العقوبات لو شفت ابنك ألتزم بيها ... ماما انا ال كسرت انا مبكدبش لان ربنا شايفنى .. خلاص وانا سامحتك لانك مخبتش عليا
علاقة واضحة وصريحة
4️⃣(حقوق العباد ..)
ضربت اختك .. هتيجى يوم القيامة تقتص منك لو مخلتهاش تسامحك .. هتاخد حسناتك .. هتلاقى نفسك معندكش ولا حسنة تدخلك الجنة so قدامك حل
لازم تعتذر منها وتطلب تسامحك وتوعدها ميتكررش بعدها ترجع تستغفر وتوعد ربنا ده ميتكررش .. كل حاجة ربنا بيسامح فيها الا حقوق العباد
5️⃣(الصلاة ال تدخلك الجنة ..)
لما يبتدى يصلى فيكروت عشان الكارتون وينقرها نقر ..
لازم تسأليه انت ايه رأيك هى دى صلاة تدخلك الجنة.. ولا صلاة تدخلك النار ..هو ينفع نقف قصاد ربنا مستعجلين عشان اى سبب .. الاهم ايه .. وسيبيه يفكر ويقرر بنفسه انه يعيد الصلاة ..ولما يبقى الموضوع صعب عليه يصلى ويعيد ويصلى ويعيد .. فالمرة التالته هيصلى صح من اول مرة
6️⃣(انت مش احسن من حد .. )
جينات العنصرية ال بيزرعها الأهالى فى ولادهم بدواعى التشجيع انت احسن من فلان انت احسن من عفريت
لا انت مش احسن من اى حد الا بدينك واخلاقك
ميهمنيش تطلع الاول قد مايهمنى اخلاقك تبقى أخلاق النبى
ربنا قال احسن واحد عندى هو اكتر واحد بيسمع كلامى حتى لو اسمر او فقير او من بلد بعيده او بيتكلم انجلش او مختلف عنك بأى شكل ولون ..
حجات كتيرة اوى لو فضلت اكتب مش هتخلص لكن الحقيقة الكلام ده لما يتقال كل يوم مع الوقت هيترسخ ويبقى أسس بالتعامل وهما نفسهم يذكروا بعض بيه ..
ابنى لنفسك ولد صالح يدعو لك .. اكبر استثمار فى حياتك
#منقول
عجبني جدا ❤️
