صحة وتغذية طفلك مع د.رضوى النجار

24/04/2024

((الجديري المائى ))

من الحالات اللي بنشوفها الأيام دى حالات الجديري المائي، طريقة العدوى عن طريق الرذاذ أو الهواء أو عن طريق ملامسة الجلد المصاب مباشرة علشان كده بيكون سريع الانتشار مابين الأطفال بالذات فى التجمعات ووللأسف العدوى ممكن تحصل قبل ظهور الطفح الجلدى وتستمر لغايه ماتختفى الحبوب والحويصلات الجلديه وفى المتوسط بتاخد تقريبا اسبوع

** علشان كده الطفل ممكن يعدى زمايله فى المدرسه فلازم يغيب لغايه ما تختفي الحبوب

* طيب ايه هى أعراض المرض؟؟

أول حاجه بتظهر قبل الطفح الجلدى هو ارتفاع خفيف فى درجة الحرارة لمدة يوم أو يومين .. ثم يظهر الطفح الجلدى وتخلى بالك إنه غالبا بيبدأ بالترتيب ده الأول فى الوجه ثم الجسم ثم الأطراف ... والطفح ده بيسبب حكة (هرش شديد) ... وغالبا الطفل أو المصاب بيعانى من فقدان الشهيه ووجع فى الزور

* هل الطفل ممكن يستحمي وهو عنده جديرى ؟

ك. تير أوى بنسمع شائعة إن اللى يجيله جديرى ممنوع يستحمى ... لكن العكس هو اللى صح ... الطفل لازم يستحمي عادي خالص وبانتظام علشان نقلل الهرش وعلشان مايحصلش عدوى بكتيريه للطفح اللى فى جسمه


* هل التطعيم ضد الجديري المائي مهم ؟

التطعيم ضد الجديري المائي بيتاخد اول جرعه عند ١٢ شهر والجرعه الثانيه من ٤ - ٦ سنين ... في معظم الحالات التطعيم بيدي مناعة ضد العدوي لفترة تصل من ١٠-١٢ سنة لكن مش في كل الحالات

رضوى النجار
استشارى الأطفال وحديثى الولادة بالتأمين الصحى
01288041509

09/01/2024

(((( الأكل الصحى ... الامتحانات ... البرد )))))

○ البليلة باللبن الدافئ والزبيب : وجبة افطار و عشاء مغذية وسهلة

○ السمك المشوى والتونه : كترى منهم فى الغدا توفيرا للوقت والجهد وطبعا علشان الاوميجا ٣ واغذية للمخ

○ الموز.... التفاح ...الجزر .... البرتقال : وجبات صغيره خفيفة ....بتمدنا بالسكر اللازم بين الوجبات علشان التركيز فى االمذاكره

○ فيشار : تسالى جميلة وبتسهل الهضم وبتحافظ على الوزن وكمان بتوفر عناصر هامه لغذاء المخ والتركيز

○ الفول السودانى: تسالى سهله وهتدفى وكمان عناصر هامه للمخ

○ خضروات غامقة زى السبانخ .... الفلفل الرومى ... نهتم بالحاجات دى علشان الحديد هام للتركيز

○ مخفوق اللبن مع الفواكه زى الموز والفراوله ... وجبه صغيره خفيفه لانعاش التركيز بسكر طبيعى من الفواكه

○ نجهز سناكس خفيفه ....مثل مينى بيتزا بالخضروات ... بطاطس مشويه وعليها اى نوع جبن ... بطاطا مشوية .. الولاد يقدروا ياكلوها ونفسهم تتفتح للمذاكره غير الاكل التقليدى الممل

○ الأكل الغنى بالحديد والبروتينات .... اللحوم الحمرا ... البيض... الحبوب الكاملة زى الشوفان

○ ماننساش نستبدل الثلاث وجبات الرئيسية بخمس او ست وجبات صغيره علشان عسر الهضم والتخمه بتقلل التركيز وبتسبب الوخم

○ كمان حاجه مهمه : شرب الميا والسوائل الكافيه

🌸🌸🌸🌸 أمنياتى بالتوفيق 🌸🌸🌸

رضوى النجار
استشارى طب الأطفال و حديثى الولاده التأمين الصحى

22/11/2022

لا تخافوا ولكن احذروا 😊😊

امهات كتير دلوقتى اول سؤال ليا بعد الكشف هو ده الفيروس الجديد بتاع الأيام دى؟؟؟ والمشكلة انهم بيكونوا مرعوبين وخايفين من الفيروس المخلوى التنفسى ( respiratory syncytial virus)

الغريبة بقى إن الفيروس ده احنا متعودين على الحالات بتاعته من زمان وبيصيب الاطفال كل سنة يعنى مش جديد ولا حاجة .... لكن صحيح السنة دى الأعداد كتيييييير والأطفال المصابة بيعدوا زمايلهم بسرعة فى المدارس ... وحالات كتير اتحولت للحجز بالمستشفى ... واحنا نبهنا على الموضوع ده بقالنا أكتر من شهر ساعة لماقولتلكم بلاش تودوا أولادكم لو لاقيتم كحة أو ارتفاع بالحرارة مع رشح ....

العيال السنة اللى فاتت واللى قبلها كانوا مابيروحوش المدرسة عند انتشار فيروس الكورونا فوارد انهم مااتعرضوش للاصابة الفيروسية دى

لكن ماتترعبوش من هذا الفيروس ... ولا من الدور ده لأن فيه ناس مابيودوش المدرسة أو الحضانة خوفا من العدوى ولكن .....

اول ما ابنك يشتكى من رشح ... حرارة ... كحة ... بلاش تودى المدرسة ولازم يكشف

نحاول ننبه على الأولاد مايقربش من زميله المريض ويغسل ايده كويس وياريت يرتدوا الكمامات تانى ... ايه المشكلة يااخوانا

ورجاءا ... بلاش دوا الكحة موسع الشعب ومذيب البلغم والمضاد الحيوى من نفسك ... دى شغلة الطبيب بعد الفحص والكشف .... لكن فقط نهتم بالتباعد والنضافه ... الأكل الصحى وشرب الميا ... تغيير ونضافة لبس المدرسة يوميا ... تعويد الطفل على غسل الايد والوجه ... ونفهم اولادنا بلاش ياكلوا مكان بعض او مع بعض نفس الأكل او الشرب ...


رضوى النجار
استشارى طب الأطفال وحديثى الولادة بالتأمين

31/07/2021

(( الظهر أثناء النوم ... البطن اثناء اللعب ))

♡ الوضع الصحى والسليم لنوم طفلك الرضيع هى النوم على الظهر ...لانه آمن أكتر من النوم على الجنب ....

♡ وضعية النوم على البطن بيقوى عضلات الطفل الرضيع منذ الولادة وبتساعد بعد كده فى تعليم الزحف والحبو وانه يتفاعل مع البيئة حوله ... علشان كده الوضعية دى هامه ... بس تكون وقت استيقاظ الطفل ... وتكونى شايفاه تحت عينيكى

♡ امتى ابتدى اخلى البيبى ينام على بطنه ؟؟

من اليوم الأول للولاده ... ولكن وهوا صاحى فقط ... علشان نقوى عضلات بطنه ... ينام على البطن من مرتين لتلاته يوميا مده من ٣ الى ٥ دقايق ...

مع نمو الطفل بنزود وقت نومه على بطنه ونخليه وقت اللعب ...

♡ اعمل ايه لو ابنى ماحبش وضعية النوم على البطن واتضايق منها؟؟
نحط قدامه لعب يقدر يوصلها

♡ ازاى احبب ابنى وادربه على النوم على البطن ؟؟؟

زى ماقلنا نحط قدامه ألعاب آمنه ومشوقه حوله يقدر يوصلها فى دايره ... علشان يغير وضعه

كمان ممكن تنامى على ضهرك وتضعى الطفل على بطنه فوقك ... الطفل هيبقى مبسوط وهيحاول يرفع راسه علشان يشوفك

كمان ممكن نخلى اخواته الاطفال يلاعبوه وهما على الأرض

♡طيب النوم المستمر على الظهر بيسبب ان راس البيبى ممكن تفلطح ؟؟؟

حاجه عاديه ان يحصل كده وكل مالطفل ده هيكبر راسه هتتعدل .... فماحدش يقلق من كده

♡ازاى اقلل تفلطح راس البيبى من كتر النوم على الظهر؟؟

حاولى تغيرى وضعه فى السرير ... بدلى الوضع اثناء الرضاعه كمان .... لما يصى ممكن تشيليه شويه مش لازم يبقى نايم على الضهر على طول ...

اخيرا لنوم آمن لطفلك الرضيع .... اهتمى انه ينام على سطح صلب ... مافيش حواليه هدوم او خداديات طريه او بطاطين .... ماتغطيش راسه

د. رضوى النجار
استشاري طب الأطفال وحديثى الولاده بالتأمين الصحى

25/06/2021

لما تقابل طفل او مراهق عنده سكر بلاش تقول ياعينى ده عنده سكر ... الطفل المسكر مش طفل بيعانى ولا اقل من الأطفال التانيين ... الحكاية كلها انه محتاج يضبط اكله يعنى يكون اكل صحى ويلعب شويه رياضه وياخد جرعته المضبوطه من الانسولين ... ومن خلال عملى بلاقى الأطفال المسكريين المهتمين ماشاء الله صحتهم افضل من أطفال تانيه كتير ... لانه ببساطه بيكون فيه اهتمام اكتر بالأكل الصحى والتحاليل الدوريه وبنكتشف اى حاجه بدرى وبنعالجها .. على عكس الاطفال التانيه اللى غرقانين فى الألوان الصناعيه والمنكهات والاكل اللى مليان سكر ودهون ...
اطفال ومراهقين مسكرين كتير متابعين معايا وماشاء الله عليهم ابطال فى الرياضه والاوائل على مدارسهم ...
ياريت نغير فكرنا عن الطفل السكرى أنه صعبان علينا او انه معرض لمشاكل صحيه ...
مضاعفات السكر بتحصل لما مايكونش فيه متابعه او يكون فيه لخبطه وعدم اهتمام ...
لكن دلوقتى غير زمان لما كان يادوب مريض السكر ياخد المرتين الميكستارد ولو قاس سكره مرتين فى اليوم يبقى تمام ...
متابعه القياسات قبل وبعد الوجبات ... اختيار نوع الانسولين المناسب لكل حاله ... حساب جرعه الانسولين المناسبه ... كل ده ظبط المسكرين وخلى حياتهم عاديه زى اى حد ...
كمان نظام النقاط او حساب الكارب بيخلى المسكر يقدر يحسب لكل وجبه هو محتاج اد ايه انسولين قبل كل وجبه ... بحيث يقدر ياخد الانسولين حسب كمية الاكل اللى عاوزه

د. رضوى النجار
استشارى الاطفال بالتأمين الصحى
شربين ش باتا برج المأمون الدور الثانى
للحجز ٠١٢٨٨٠٤١٥٠٩
٠

09/06/2021

أشهر أسباب فقدان الشهيه عند الأطفال:

•الانيميا
• الديدان المعويه
• الخناقات والضغط العصبى حول الطفل
• بعض الأدوية زى المضادات الحيوية
• الوجبات الصغيره زى الشيبسى والمقرمشات والمصاصات والحلويات الجاهزه من السوبرماركت
• العصاير الكثير
• اجبار الطفل على الأكل كأنه عقاب
• الارتباط الزائد بالموبايلات والألعاب الإلكترونيه وعدم الاهتمام بالألعاب الحركيه
• الامساك

للتغلب على فقدان الشهيه:

• تقسيم الوجبات الى ٥- ٦ وجبات صغيره
• تناول الماء قبل الوجبه بنصف ساعه وجعلها عاده عند إستيقاظ الطفل من النوم وقبل الوجبه بنصف ساعه
• تناول المشروبات والعصائر بعد الوجبات الرئيسية وليس قبلها
• عدم اجبار الطفل على الطعام
• استبدال الاطعمه المحتويه على سكر عالى بأكل صحى
• الحفاظ على وجبة الافطار مبكرا
• اشراك الطفل فى اختيار نوع الطعام وتحضيره وتجهيز السفره
• التشجيع على التخلى عن الموبايلات والاجهزه الالكترونيه والاشتراك فى الالعاب الحركيه وممارسه الرياضه
• تقليل كمية اللبن الزائد

بعض الاطعمه التى تساعد على فتح الشهيه:
• اللبن الزبادى
• الفول السودانى وزبده الفول السودانى
• الخوخ
• الزنجبيل (يمكن اضافته الى الشوربه)
•الريحان
• ورق النعناع
• الافوكادو

د. رضوى النجار
استشارى الأطفال بالتأمين الصحى
للحجز: ٠١٢٨٨٠٤١٥٠٩
شربين ش باتا برج المأمون

19/04/2021

07/03/2021

(((( دواعى وشروط عملية استئصال اللوزتين )))

《《《《من فضلك شير علشان كمية الناس اللى ناويه تشيل اللوز لعيالها 》》》》

☆☆ ياجماعه اللوزتين مش أسنان لبنيه المفروض تتشال لكل طفل جاله فيها شوية التهابات متكرره او حتى صديد ...

☆☆ فيه قناعه عند المصريين ان أى طفل رجله بتوجعه يبقى لازم نشيله اللوز قبل ماتوصل قلبه .....

استئصال اللوزتين له شروط ودواعى علميه وهى:

■ التهاب الزور المتكرر أكثر من سبع مرات فى العام او اكثر من خمس مرات فى عامين متتاليين او اكثر من ثلاث مرات فى السنه لمدة ثلاث سنوات متتالية بشرط وجود واحد او اكثر من الآتى ( مصحوبة بارتفاع درجة الحرارة اكثر من 38.3 ..... التهاب فى الغدد الليمفاوية العنقية ....صديد او افرازات على اللوزتين ...... اختبار ايجابى لوجود الميكروب السبحى)

■ تضخم باللوزتين لدرجة تعيق عملية البلع أو التنفس او تتسبب فى اضطرابات النوم

■ وجود خراج بجانب اللوزتين غير مستجيب للعلاج الدوائى

■ وجود تشنجات حرارية ناتجة عن التهاب اللوزتين المتكرر

■ ويمكن ايضا للحالات اللى بتعانى من رائحة الفم الكريهة الناتجة عن الالتهاب المزمن للوزتين غير المستجيب للعلاج الدوائى

■ ولاقدر الله فى حالة وجود اورام

♡♡♡ الخلاصة الهدف من البوست ان الاطفال اللى بتعانى من التهاب متكرر باللوزتين ده مش سبب أكيد إنهم يتشالوا ..قد يكون الالتهاب فيروسى .. ممكن تكون مابتتعالجش صح أومابتديش كورس العلاج كامل ...

♡ الأمهات اللى بيشتكوا ان اطفالهم بيشتكوا من وجع فى الرجلين وان أكيد ستئصال اللوز هو الحل ... اطفال كتير بعد مابتعمل العملية برده بيشتكوا من وجع رجليهم 🙃

♡ اهتموا بصحة أطفالكم العامة .... ياكلوا كويس ... خضار وفاكهه وعسل أبيض وفراخ ولحمه وبيض ولبن .... نبعد عن الأكلات الضاره والحلويات المصنعه.... اهتموا بالنظافة العامة للطفل لتقليل العدوى واهتموا بنظافة الفم خاصة خلوهم يغسلوا اسنانهم ويستخدموا مضمضة لو يقدروا .... حسنوا نفسية اطفالكم والعبوا معاهم وشيلوا عنهم الضغط العصبى اللى بيزود فرصتهم فى الاصابة بالامراض ...

ربنا يعافى أطفالنا 😊😊

د.رضوى النجار
استشارى طب الأطفال وحديثى الولادة بالتامين الصحى
للحجز: ٠١٢٨٨٠٤١٥٠٩
شربين- برج المأمون الدور الثانى