19/05/2026
💩 "الواد هيفرقع يا دكتور!".. لغز الحمام عند الرضع 👶🍼
مساء الراحة والهدوء على كل مامي "زعبولة" قاعدة مرعوبة عشان الحفاضة لسه نظيفة! 😂❤️
أكتر سؤال بيقلب البيت مناحة، وبيخلي الجدة تطلع "زيت الزيتون" والخالة تقترح "صابونة" (كارثة): "ابني مابيعملش حمام.. هل ده إمساك؟!"
تعالي يا ست الكل أقولك الخلاصة اللي تريح بالك وتوفر عليكي اللبوس:
✅ أولاً: الصدمة.. مش كل "تأخير" إمساك! 😲
في عالم الرضع، القواعد مختلفة تماماً:
ممكن يعمل حمام بعد كل رضعة (طبيعي).
وممكن يقعد لحد ٧ أيام مايعملش (برضه طبيعي!).
بشرط واحد: لما يعمل، ينزل البراز طري والطفل يكون وزنه بيزيد وبيرضع كويس. غير كدة، ده مجرد "كسل أمعاء" فسيولوجي والطفل لسه بيتعرف على جهازه الهضمي.
🛑 ثانياً: إمتى أقول "الحقني يا دكتور مأمون"؟ (الخطر الحقيقي)
سيبي الموبايل وركزي في دي.. القلق بجد لو فيه:
1 براز ناشف جداً (زي كرات الأرنب).
2 دم مع البراز.
3 رفض تام للرضاعة مع انتفاخ يحجّر البطن.
4 ترجيع أخضر (خط أحمر 🚩).
5 البيبي ماعملش أول حمام (العقي) في أول ٤٨ ساعة بعد الولادة.
❌ ثالثاً: ممنوعات "أيام زمان" (بلاش والنبي!)
لبوس الجلسرين: مش بونبوني هو! كتر استخدامه بيخلي الأمعاء "تكسل" وتتعود عليه.
خزوقة الصابون: جريمة في حق الشرج، بتعمل التهابات وجروح.
الأعشاب: مية بسكر وينسون بتملى بطنه ع الفاضي وتأثر على رضاعته.
🟢 رابعاً: روشتة "الراحة" في البيت
قبل ما تجري على الصيدلية، جربي "مساج الدلع":
1 تمارين العجلة: حركي رجليه بالراحة كأنه راكب عجلة.
2 مساج بطن: في اتجاه عقارب الساعة.
3 حمام دافي: بيساعد العضلات ترتخي.
4 لو بدأ أكل: كترّي (كوسة، قراصيا، برتقال) وابعدي عن البطاطس والجزر مؤقتاً.
💡 معلومة ع الماشي
الزق، والوش اللي بيقلب طماطماية، والعياط قبل الحمام.. مش دايماً إمساك!
ده طفل لسه بيتعلم ينسق بين عضلات بطنه وفتحة الشرج.. سيبيه "يتدرب" بالراحة 😂
💬 قوليلي في الكومنتات..
إيه أغرب "اختراع" سمعتيه من طنط حشرية عشان البيبي يعمل حمام؟ (عايزين نضحك ونصحح المفاهيم 😂👇)
د. مأمون عمرو منصور
أخصائي طب الأطفال وحديثي الولادة والمبتسرين
📍 شبين القناطر – موقف القاهرة – بجوار صيدلية الخالع
📍 كفر شبين – بجوار المدرسة الإعدادية بنات
010 93588864
