Dr Wesam halawany

24/07/2023

معظم الأطفال اللى بشوفها اليومين دول جسمهم مليان حمو النيل😥 طبعا بسبب الحرارة والرطوبة العالية مع عدم وجود تهوية بسبب الكهرباء
عموما ندى للأطفال دش كل شوية ونغير ملابسهم وممكن نديهم شراب مضاد للحساسية كل طفل حسب عمره لانه بيكون الطفح الجلدى ده مزعج جدا وممكن ندهنه اى لوشن مرطب زى الكالامينا او الكالاميل اوبرينجو لوشن

20/07/2023

معلومة ع السريع الطفل اللى حرارته عالية ضربات قلبه بتكون عالية وسريعة وأحيانا محسوسة وممكن سرعة تنفس كمان من الحرارة لان كل درجة حرارة بتعلى بتزود ضربات القلب بمقدار عشر دقات فى الدقيقة بتبان اكتر فى الطفل النحيف فما تقلقوش خفضوا الحرارة بدش وكمادات وخافض حرارة هتلاقوا ضربات قلبه انتظمت تانى وبعدين اكشفوا براحتكم

20/07/2023

طفلك بيسخن ومتأكدة انها سخونة مش دفيان من حرارة الجو
مش لاقيه عليه اى اعراض وخاصة فى سنه الصغير( طفل رضيع)
مفيش رشح ولا برد ولا قئ ولا اسهال ولا اى طفح جلدي وبيبلع كويس ومش بيشتكى لو سنه اكبر شوية ومش بيسنن لو سن تسنين
يبقى لازم يتفحص كويس لأن فيه اسباب للحرارة مش بتكون ظاهرة اهم سببين ممكن ما يكونش واضحين ليكى
1- التهاب الأذن ومش لازم الطفل يخبط عليها ولا يشدها احيانا بنفحصها نلاقيها ملتهبة ومفيش عرض معين غير حرارة وعياط كتير للطفل
2- السبب التانى اللى علشانه البوست ده. التهابات مجرى البول بتحصل فى اى سن وفى الرضع كمان وبالذات البنات نظرا لقصر قناة مجرى البول ونظرا لوجود الحفاض بشكل مستمر ووجود البراز الملئ بالبكتريا
الحل فى هذه الحالة عمل تحليل بول كامل وبيتم للرضع عادى عن طريق شئ اسمه كيس جمع بول بنجمع فيه العينة

17/07/2023

فيه أولياء أمور بتستغرب لما بنطلب تحليل سكر لطفل يكون عنده بعد الأعراض اللى ممكن تفسر بمرض سكر من النوع الأول ويقولوا ده صغير +معندناش حد فى العيلة عنده سكر
أحب أفهمكم إن مرض السكر من النوع الأول بييجى فى الأطفال من سن صغير أوى وكمان بيكون غير وراثى( غير السكر من النوع التانى اللى غالبا بييجى فى سن اكبر وبيكون فيه سمنة وتاريخ عائلى) يعنى مش شرط يكون أحد الأبوين او الأقارب عنده سكر علشان ييجى لطفل فرجاءا ما تهملوش اى فحص الطبيب يطلبه هو مش غاوى يكدركم او يكلفكم ولكن ده لمصلحة اطفالكم

27/06/2023

كل عام وانتم بخير عيد أضحى مبارك أعاده الله عليكم بالخير وكتب لكم حج بيته الحرام❤️❤️

عيادة طنان أجازة الأربعاء والجمعة والعودة للعمل يوم الأحد بإذن الله

23/05/2023

لما اكون بتصفح جروب للبلد اللى انا اشتغلت فيها واتفاجئ ببوست زى ده وكلام والله ادخل السرور ع قلبى بدون اى معرفة بإن الام الجميلة دى هتعمل كده يبقى الف حمد وشكر ليك يارب
قدرنى يارب اكون اد الأمانة ودايما أراعيك فى عملى واستعملنى ولا تستبدلنى❤️❤️ شكرا أم عبد الله جزاك الله خيرا

06/05/2023

مواعيد السد يوميا ماعدا الجمعة من ٨_١١م
مواعيد مركز الشفاء بطنان بجوار مسجد حمزة بن عبد المطلب
الأربعاء والجمعةمن ٥-٧م
الاحد من ٦_٨م

04/05/2023

14/12/2022

لو سمحتم لو بنتك او ابنك عنده قئ وهتديله اى شئ يوقفه وده مسموح لحد ما تروحى تكشفى عليه علشان تعرفى السبب فابعدى كل البعد عن مادة الmetoclopramideاللى اسمها التجارى بريمبران ممنوعة فى الاطفال نظرا لأعراضها الجانبية على الجهاز العصبي للطفل ممكن تؤدى الى حركات لا إرادية او رعشة فى اليدين تشبه مرض الرعاش وغيره من الاعراض العصبية

14/12/2022

ابنك اوبنتك سنهم كبير شوية ويقدروا يبلعوا اقراص من فضلك لو ابنك سخن وعنده دور برد او انفلونزا او اى مرض ممكن يكون فيروسى ما تطوعيش من نفسك وتديله مادة الساليسايلك اسيد ( ريفو واسبرين) لان لو الطفل اخد الأسبرين او الريفو وهو عنده اى فيرس زى الانفلونزا او الهيربس الفارسيلا والادينو وغيره من الفيروسات ده ممكن يؤدى إلى حدوث متلازمةالReye syndrome
ودى متلازمة خطيرة بتأثر على الكبد والمخ وقد تؤدى الى الوفاة
الأسبرين له استخدامات محدودة فى الاطفال. تستخدم تحت إشراف طبى

23/11/2022

هام_
الحملة القومية للتطعيم ضد مرض شلل الأطفال يوم ١١ من شهر ديسمبر لمدة ٤ ايام بجميع المحافظات ما عدا القاهرة والجيزه والاسكندرية لمدة ٥ أيام من عمر يوم حتى ٥ سنوات . وعرف غيرك #منشن لكل اصدقائك وتابعونا