د.سهام حسن- مركز نفسية طفلك

06/03/2026

ازاي أساعد ابني يحفظ القرآن
إجابات لأهم ⁨الاسئلة المرسلة بخصوص حفظ الطفل القرآن 👌🏻


#تربية ⁩

05/03/2026

وانتصف رمضان
اللهم إن رمضان يمضي سريعاً فاجعل لنا فيه نصيباً من الرحمة والمغفرة والعتق من النيران اللهم ارزقنا فيه دعاء لا يرد ومغفرة تسع رحمتك وعتق من النيران وفرجا لا نشقى بعده واجعلنا فيها من المقبولين عندك غير ضالين ولا مضلين اللهم أرح قلوبنا من الشقاء والتعب والهم 🤲💛✨

01/03/2026

إجابتي على أهم الاسئلة اللي بعتوا تسألوا عنها
ربنا يحميكم ويحمي كل أولادنا يارب العالمين 🙏🏻

هجاوب على كل الاسئلة اللي سألتوها من بداية الأحداث 🚀🔥

1️⃣نعمل إيه لما الطفل يسمع عن حرب وضرب

منكدبش وما نقولش كل الحقيقة 👌🏻

قولي:
“في مشاكل بتحصل وإحنا هنا في أمان وبابا وماما مسؤولين عنك.” لمجرد انه يطمن ويحس بالأمان.

2️⃣ ليه الطفل بيقلق من الحرب مع أنه مش فاهم؟

عشان الطفل بيسمع وبيشوف وبيكمل الصورة بخياله فالخوف مش من الحرب نفسها الخوف من عدم الفهم.

3️⃣ احنا بنشوف الأخبار فنمنعها ولا نشرحها؟

ولا نمنع تماماً ولا نسيبه ٢٤ ساعة قدامها.

✔️ نقلل
✔️ نشرح على قد سنه
❌ منشغلش الأخبار قدامه طول اليوم

4️⃣ لو الطفل سأل: “إحنا ممكن نموت؟”

ما نقولش:
❌ “لا طبعاً ” (كده كدب)

قولي:

“كلنا في حماية ربنا بس إحنا بنعمل اللي علينا عشان نفضل في أمان.”

5️⃣ ليه اللعب العنيف عند الطفل بيزيد؟

عشان الطفل مش عارف يعبّر بالكلام فيفرغ باللعب
ودا معناه إنه متلخبط ومتوتر.

6️⃣ بيسمع أبوه وهو بيتكلم وبيخاف؟

لأن الطفل بيراقب وبيسمع نبرة الصوت والقلق والخوف حتى لو مش فاهم الكلام فحاولوا تقللوا كلام وتوقعات مخيفة وتتكلموا بهدوء قدامه.

7️⃣ نزرع الأمان إزاي وسط كل ده؟
• بحضن
• بالصلاة
• بوقت اللعب
• تقليل موبايل وتلفزيون وأخبار

الطفل مش محتاج تفسير العالم كله هو محتاج يحس إن عالمه الصغير آمان فقط

#تربية⁩

28/02/2026

أهم نصيحة لازم تاخدوا بالكم منها 👌🏻

خلوا صورة ربنا في قلب ولادكم
رحمة وأمان، مش بس تهديد وعقاب.

#الطمأنينة⁩

26/02/2026

امتى اعلم ابني يصلي في المسجد 👌🏻

امتى ابني يكون مستعد يشاركني الصلاة في المسجد من غير ما اشتت باقي المصلين بصوته ولعبه حواليا؟

مش السن هو الفيصل الاستعداد النفسي هي الأساس:

• الطفل يقدر يروح المسجد من سن 4–5 سنوات لو:
• بيقدر يلتزم بالهدوء لفترة الصلاة.
• فاهم إن في مكان له احترامه وقدسية.
• مش عنده خوف أو قلق من المكان.

وبلاش لو ابنك عمل صوت أو شقاوة تعنفه لأن التجربة الأولى للطفل طبيعي يكون لسه بيتعلم وخد بالك أنها هتعلم جواه وتخلق ذكرى طويلة وأنت تختار :

📌لو كانت إيجابية = حب وسعي لتكرار التجربة لحد ما قلبه يرتبط بالصلاة في المسجد.

📌لو كانت سلبية = مقاومة ورفض وتهرب من الصلاة.

طيب اعلمه أزاي تدريجياً الإلتزام في المسجد؟

١. في البداية:
• صلاة قصيرة
• صفوف جانبية أو خلفية
• الخروج بهدوء لو الطفل تعب

٢. أكون قدوة ليه:
• ألتزم أنت بصلاتك عشان يلاحظ ألتزامك.
• هيحاول يقلدك بعد كده.
• مش مطلوب يكمل الصلاة صح من أول مرة.

٣. خليك صبور وطويل البال:

• الطفل لسه بيتعلم وهيأخد وقت.
• افتكر أن الطفل لسه غير مكلف ولسه بيتدرب ويتعلم.
• وجوده في المسجد للتعود والطمأنينة مش للحساب والعقاب لو لسه ملتزمة.
•نمدحه على المحاولة مش الأداء.

• خليك لطيف وحنون ومرح مع ابنك وافتكر كان رسول الله ﷺ يصلي فجاء الحسن أو الحسين رضي الله عنهما
فـ ركب على ظهره وهو ساجد.

📌 فماذا فعل النبي ﷺ؟
• أطال السجود
• لم يزجر الطفل
• لم يبعده
• ولم يقطع الصلاة

وبعد ما انتهت الصلاة سأله الصحابة عن سبب إطالته السجود فقال ﷺ:

«إن ابني ارتحلني، فكرهت أن أعجله حتى يقضي حاجته»
(رواه أحمد والنسائي وصححه الألباني)


#تربية #الصلاة

25/02/2026

انتظروني انهارده الأربعاء ٤ عصراً
في مدخلة هاتفية على قناة Ten
برنامج يوم جديد 🌙✨

22/02/2026

فيديو لطفلة صغيرة بتبكي لأنها جعانة
ومش قادرة تمشي والمدرس سألها صايمة قالت اه صايمة وبتبكي🥺

يا جماعة الله يرضى عليكم بلاش تكرهوا الأطفال في العبادات وتفهموهم الدين غلط
ربنا هيحاسبنا على تربيتنا الدينية لأولادنا
الأطفال تحت سن ال ٧ سنوات ممنوع يصوموا إلا لو عايز يشاركنا ويقلدنا ومنعلقش عليه لو أكل أو نتريق ونقلل منه✋🏻

السن دا محتاج يفهم بس معنى الصوم وليه بنصوم حب وطاعة لله عز وجل ولأنه أمرنا بفريضة الصوم زي الصلاة وزي الذكاة
لكن مش بنجبره ونقوله عشان تحس بالفقراء والمساكين ياسيدي احنا مش مسكين ولا فقير وعايز أكل!!

الأطفال بتملك الرد فعلاً وبنسمع منهم كدا أو بيستخبى ويتدارى ويأكل هل أنا كدا بقوله الصوم عبادة بينك وبين الله عز وجل وبيراقبك فيها بالعكس هو فاهم أنك انت المراقب وليس الله✋🏻

فوق سن ال ٧ سنوات إلى أن يتم ال ١٠ سنوات بخليه يصوم تدريجياً من السحور للضهر وكل سنة أزود الوقت لحد ما يبلغ سن ال ١٠ سنوات سن السعي والتكليف كما اخبرنا الله عز وجل عن سيدنا إسماعيل "فلما بلغ معه السعي "
لحد أما يقدر يصوم يوم كامل وهو مدرك وواعي تماماً مراقبته لله عز وجل
غير كدا مشاقة لا يتحملها جسد الطفل وبيكون سبب في إصابته بأمراض كتير 🥺

أي حد هيقولي ٧ و٨ و٩ سنين كبير دا من وجه نظرك وتوقعاتك في ابنك اللي ممكن تخالف الواقع اللي عليه تماماً وتاني يصوم حسب استطاعته وليس ملزم بصوم يوم كاااااامل
ولو حب يصوم يوم كامل ونجح وكمل مش لازم يكمل الشهر كله بترك ليه الأمر يختار ✋🏻


#رمضان

18/02/2026

سلسلة

2️⃣ بلاش تتكلم قدام ابنك في مشاكلك المادية والضغوط باستمرار 😬

#تربية

17/02/2026

كل عام وأنتم بخير 🌙✨

اللهم أهله علينا بالأمن والإيمان، والسلامة والإسلام، والتوفيق لما تحب وترضى، ربنا وربك الله 🙏🏻


#رمضان

17/02/2026

احنا كلنا بنتجهز ونحاول
وولادنا لازم يشوفوا أننا مش بنسعى طول الوقت حاجات مش بنعمل بيها
لكن على الأقل بنغلط ونحاول
ودا الهدف من شهر رمضان
شهر دروسه مفيدة كتيرة
الشاطر يتعلم ويفهم ويكون واعي
أن غيره بيتعلم منه ويقلده 🌙✨

كل عام وأنتم بخير وصحة وسعادة
تقبل الله منا ومنك سائر الأعمال وأعننا الله على طاعته 🙏🏻🥰


#رمضان #تربية

16/02/2026

⁨ دراسات علمية حديثة أكدت إن الاستخدام الكتير للشاشات عند الأطفال الصغيرين
(موبايل – تابلت – تلفزيون) ممكن يكون مرتبط بـ:

• انخفاض في مادة مهمة في المخ اسمها الميالين
• الميالين دي مسؤولة عن سرعة توصيل الإشارات العصبية
• وده ليه علاقة بتطور مهارات مهمة عند الطفل: اللغة، الانتباه، والمهارات المعرفية

يعني بتأثر بشكل غير مباشر على:
• اللعب
• الكلام والتفاعل
• القراءة
• التواصل الحقيقي مع الأهل

📌 الدراسات مقالتش إن الشاشات ممنوعة خالص
لكن أكدت إن:
✔️ العمر مهم تحت ٣ سنوات ممنوع الشاشات
✔️ المدة مهمة فوق ٣ سنين مسموح بساعة واحدة
✔️ المحتوى مهم من غير سلوكيات سلبية يقلدها الطفل
✔️ وجود شخص يتفاعل مع الطفل مهم جداً

علشان كده:
🔹 اللعب والكلام والحركة = أساس نمو المخ
🔹 الشاشة مش بتنمى مهارات وعمليات معرفية في مخ الطفل

ودي المصادر العلمية للدراسات:

‏
روابط المصادر الخاصة بالأبحاث والدراسات موجود في التعليق المثبت اسفل الفيديو 👇🏻


#تربية⁩

15/02/2026

📌خليني أطمنك الأول وبعدها هقولك خطوات بسيطة تعمليها:

وعيك بالمشكلة هو أول خطوة تربية صحيحة أنتي كده هتكسري الدائرة.
الخوف هنا صحي لأنه بيخليكي تراجعي نفسك قبل أي تصرف.

🥺 يعني لما تحسي إنك متعصبة وممكن تصرخي اقفي ثانية وأسألي نفسك:
«هل ده تصرف نابع من تربية صح؟ ولا من وجع قديم؟»

📌طيب خطوات بسيطة نمشي عليها تفيدنا في الحالة دي:

1️⃣ التربية مش يا قسوة يا دلع في منطقة وسط اسمها (الحزم الحنون)
الحزم = قواعد واضحة
الحنان = مشاعر محترمة

❌ قسوة: “إنت ليه مؤذي وبتتعمد تضايقني!”
❌ دلع: “مش مشكلة اعمل اللي إنت عايزه”
✅ حزم حنون:
“أنا زعلانة من سلوكك بس بحبك والصح أنك تعمل كذا كذا”

2️⃣ العقاب الصح مش لازم اوجع ابني عشان يتعلم هو أصلاً قبل أي عقاب لازم أجاوب على 3 أسئلة:
• العقاب آمن؟
• مناسب لسنه؟
• له علاقة بالتصرف ولا مشاعري وعايزة أفرغها فيه ؟

📌مثلاً:
• طفل صغير: حرمان مؤقت من حاجة مرتبطة بالغلط
• طفل أكبر: إصلاح الخطأ (يعتذر – يرتب – يتحمل نتيجة)
❌ ناخذ بالنا ممنوع الضرب، الإهانة، التخويف لأنها بتربي الخوف مش هتعمله السلوك الصح.

3️⃣ خوفك من الدلع سببه جرح قديم مش واقع حقيقي لأن الاحتواء مش دلع
الحنان مش ضعف اللي بيطلع طفل مدلل هو غياب الحدود مش وجود الحب.

📌مثلاً :
تحضني ابنك وتسمعي له = احتواء
تحضنيه وتسيبيه يكسر القواعد = دلع

4️⃣ لو حسيتي إن مشاعرك أقوى من الموقف…
📌دي نوبة الغضب وغالباً بتيجي من طفلة جوه الأم لسه متألمة.
وده محتاج دعم وإرشاد نفسي مش جلد ذات.

5️⃣ أهم هدية لأولادك إنك تعالجي نفسك
اللجوء لمتخصص نفسي مش معناه إنك أم وحشة معناه إنك أم شجاعة قررت تحمي ولادها من تكرار الألم.

📌 المتخصص النفسي التربوي هيساعدك:
• تفصلي بين تربيتك القديمة وتربيتك النفسية السوية.
• تتعلمي أدوات تربية مناسبة لكل مرحلة عمرية.
• تنظمي غضبك من غير تكبتيه
أو تفرغيه في اولادك.


#احتواء