15/04/2025
- لما عيالكم يقفلوا علي نفسهم الاوضه بالساعات ومايحبوش القعده معاكم بسبب الانتقاد والكلام اللي زي السم اللي بتوجهوه ليهم ..
- لما يكبروا و يكرهوا كلمة " إن شاء الله " .. لأن كُل وعد توعدوه تقولوا إن شاء الله و مايحصلش !
- لما شخصياتهم تبقي ضعيفه وما يبقاش عندهم ثقه في نفسهم لانكم ما بتديهومش فرصه يعبروا عن اللي جواهم ودايمًا تستغبوهم .
- لما يكرهوا الصلاه و المذاكره ! لأن من أقل غلطه يغلطوها تسألوهم صليت إيه النهارده ؟! ذاكرت ولا لاء ؟ كأن الصلاه والمذاكره عقاب .
- لما اولادكم يدوروا علي الحنان بره البيت لانهم مالقهوش في حضنكم
- لما يكرهوا النقاش معاكم لانكم بتقللوا من اراءهم سواء في السياسه او الحياه عامةً
- لما كل يوم قبل نومهم يعاتبوكم وهما في اوضهم في سرهم و قد إيه في فجوه بينكم بسبب قلة التفاهُم والاحتواء
- لما يفشلوا في الكليه اللي اخترتوهالهم بسبب تدخلكم في مستقبلهم و منعهم عن حلمهم المؤمنين بيهم !!
- لما يكرهوا السفر معاكم في مصيف مثلاً .. لأنكم بتتعصبو عليهم وممكن تقلبوا الفُسحه غَم !
- لما يحبوا اكل المطاعم لأنكم بترفضوا تعملوا طرق جديده في نفس الاصناف الموجوده من اكل البيت !
- لما عيالكم يكرهوا بعض لأنكم بتفرقوا في المعامله بينهم و تميزوا حد عن التاني .. وتتحاسبوا يوم القيامه بجريمة الظُلم . !!
- لما يطلعوا مكلكعين من جوا وتفكيريهم محدود بسبب كلمة " انا وانا قدك كنت بجيب لبس كذا .. بصرف كذا .. " ! رغم ان سيدنا علي قال : لا تربوا أولادكم علي أخلاق زمنكم فانهم خلقوا لزمان غير زمنكم !!
- ماتزعلوش قوي لما بنتك تبقي تعيسه ف حياتها الزوجيه بسبب عريس فرضتوه عليها مع ان حقها الشرعي تتجوز اللي يعجبها حتي ولو بعد ١٠٠ سنه
- ماترجعوش تزعلوا بعد عمر طويل لما تموتوا وعيالكم مايحنوش للقائكم لأنكم زي الطوق علي رقابيهم و بفراقكم اتنفسوا .. بقوا أحرار !
قال رسول الله صلي الله عليه وسلم : " رحِم الله والدًا اعان ولده علي بِره " !
قال الشيخ الغزالي معلقًا على هذا الحديث: لا يجعل ولده عاقًا كارهًا له بسبب سوء معاملته لابنه
..
