Wesam Mahmoud “Psychologist & Behavioral Therapists”

22/05/2025

#تعديلـسلوك #نفسيه #ذكاء

22/05/2025

22/05/2025

إزاي أتعامل مع المراهق؟؟

(من غير ما تخسره، ولا يهرب منك)

المراهق مش طفل صغير يسمع الكلام زي الأول،
ولا هو شخص كبير يقدر يشيل مسؤولية كاملة…
هو "نص ونص"،
عايز يجرّب، ويتكلم، ويغلط، ويتعلم،
وفي نفس الوقت… عايزك جنبه، حتى لو بيبان العكس!

١. اسمعه من غير ما تقطع

لما ابنك أو بنتك يجوا يحكوا لك حاجة،
بلاش تقاطع، تحكم، أو تنصح بسرعة.
اسمع، وافهم مشاعرهم الأول…
وبعدين اسألهم:
"تحب أقول رأيي؟"
المراهق بيحب يحس إنه بيختار، مش بيتفرض عليه.

٢. افهم إن العصبية مش "قلة أدب"

لما تلاقيه رمى الباب، أو رد بصوت عالي…
اعرف إنه مش بيكرهك،
بس جواه مشاعر مش عارف يتصرف فيها.
كلّم بهدوء، وعلّمه إزاي يعبّر، بدل ما تقوله "اتكلم بأدب وانت ساكت!"

٣. حط حدود... بس بحب

آه طبعًا لازم يبقى فيه قواعد،
بس خليها دايمًا باتفاق مش بفرض:
"إحنا اتفقنا إن الموبايل بيتقفل الساعة ١٠، صح؟"
مش "أنا قولت ميت مرة!"

المراهق لو حس إنك بتحترم رأيه، هيحترم قوانينك.

٤. ما تفتّش في خصوصيته

المراهق محتاج مساحة.
مش معناها إنك تسيبيه من غير رقابة،
بس معناها تثق فيه لحد ما يثبت العكس.
لو شكّيتي، كلميه، ما تفتحيش تليفونه من وراه.
السرقة دي حتى من بابا أو ماما بتوجعه جدًا.

٥. امدحيه لما يعمل الصح

المراهق بياخد نقد طول اليوم:
من المدرسة، من صحابه، من السوشيال ميديا…
فلو جيتي انتي كمان بتنتقدي بس، هيفقد ثقته في نفسه.
لكن لو شافك بتشوفي الحلو اللي فيه، هيحاول يحافظ عليه أكتر.

٦. خليه يحس إنك "أمان"

يعني لما يغلط، ما يسمعش شتيمة، ولا تهديد، ولا فضيحة.
يسمع:
"أنا زعلت، بس أنا جنبك"،
"أنا مش موافق على اللي حصل، بس بحبك"،
الكلام ده هو اللي بيقوّي العلاقة، مش العقاب الشديد.
وأهم حاجة

خد نفس وافتكر إن المراهقة هتعدي،
بس العلاقة اللي هتبنيها دلوقتي،
هي اللي هتفضل باقي العمر…

#المراهق #نفسيه
#تعديلـسلوك

19/04/2025

الصورة بتوضح بشكل دقيق التداخلات والخصائص المميزة بين
التوحد (Autism)، فرط الحركة وتشتت الانتباه (ADHD)، والطلبة الموهوبين (Giftedness)، من خلال مخطط يوضح الخصائص المميزة لكل حالة، وكمان السمات المشتركة بينهم :

🟡1. التوحد (الدائرة الصفراء - Autism):

تشمل السمات التالية:

الحاجة إلى الروتين والنظام والتوقعات الواضحة، خاصة تحت الضغط.

مشاكل في المهارات الحركية.

الميل للتواصل غير اللفظي أو التواصل الفاقد للغة الجسدية.

تفضيل للتواصل المباشر والواقعي.

صعوبات في التفكير المجرد.

اهتمام خاص بمواضيع محددة (Hyperfocus).

صعوبات في فهم المشاعر (Alexithymia).

استخدام الحركات المتكررة (Stimming).

تفضيل للأنشطة الفردية.

صعوبات في المهارات الاجتماعية.

التعلُّم المختلف عن النمط التقليدي.

---

🔵2. فرط الحركة وتشتت الانتباه (الدائرة الزرقاء - ADHD):

تشمل السمات التالية:

ضعف في الذاكرة العاملة.

صعوبة في التنقل بين المهام أو الانتقال في الروتين.

الحاجة إلى التحفيز المستمر.

سرعة الملل.

التشتت والانتباه المتقطع.

الاندفاع الحركي أو الكلامي.

صعوبة في تنظيم المشاعر.

فرط النشاط أو النشاط الزائد.

الاستجابة المبالغ فيها للمواقف الطارئة.

الميل للتعلم من خلال الحركة أو التجربة.

---

🔴3. الموهبة (الدائرة الحمراء - Giftedness):

تشمل السمات التالية:

الوعي المبكر بالقضايا الأخلاقية.

سرعة فهم العلاقات والمفاهيم.

التفكير الرمزي والاستعاري.

حب التحديات الفكرية.

الميل إلى فهم الأمور المعقدة.

التعمق العاطفي المبكر.

الميل للتفكير المنطقي وتحليل العدالة.

فهم متعدد الجوانب للمشاكل.

التقدّم المبكر في مهارات معينة.

القدرة على الربط بين مجالات متعددة.

---

ثانيًا: السمات المشتركة بين : 🔛

بين التوحد وADHD:

استجابات حسية غير نمطية.

صعوبة في المهارات الاجتماعية.

سلوكيات نمطية (Stimming).

اختلاف في معالجة الوقت.

صعوبة في تنظيم الذات.

بين التوحد والموهبة:

القدرة على التركيز على مواضيع محددة بعمق.

الميل للجلوس بمفرده لفترات طويلة.

تفضيل المنطق والدقة.

الانبهار بالنظريات.

تفكير بصري أو رمزي.

بين ADHD والموهبة:

الشعور بالملل السريع.

التفكير غير التقليدي.

التعلم بطريقة غير تقليدية.

الميل للتحديات الذهنية.

الاندفاع نتيجة التفكير السريع.

---

ثالثًا: السمات المشتركة بين الثلاث حالات (في المنتصف):

سهولة الشعور بالملل.

التفكير بطرق غير تقليدية أو عبر رموز وتشبيهات.

التعلم خارج التسلسل النمطي (learning in a non-linear manner).

---

أهمية الصورة:

الصورة بتوضح إن فيه تداخل كبير بين الحالات دي، وإن الطفل ممكن يكون عنده سمات من أكتر من فئة، وبالتالي مهم جدًا:

عدم التسرع في التشخيص.

استخدام أدوات تقييم دقيقة.
((منقول))

19/04/2025

س: هو المعالج النفسي فعلاً ممكن يساعدني؟ ولا ده كلام فاضي؟

ج: لأ، مش كلام فاضي خالص. المعالج النفسي مش موجود عشان يقولك “كل حاجة هتبقى تمام”، ولا عشان يطبطب عليك ويمشي. هو موجود عشان يساعدك تفهم إنت ليه مش تمام… ويكون معاك وإنت بتدور على الطريق اللي يريحك.

س: طب إيه الفرق بينه وبين الصحاب أو أي حد قريب مني؟

ج: الفرق كبير جدًا. الصحاب ممكن يسمعوك من قلبهم، بس ساعات بيبقوا متحيزين، أو مش عارفين يوجهوك. المعالج مدرّب يسمعك من غير حكم، من غير ما يقولك “ما كنتش المفروض تعمل كده”، ومن غير ما يحاول يصلّحك. هو بيساعدك تشوف الصورة كاملة، حتى اللي انت مش شايفه.

س: هو بيقوللي أعمل إيه يعني؟

ج: المعالج مش بيقولك تعمل إيه زي ما الناس فاكرة، هو بيساعدك إنت توصل للإجابات اللي جواك. بيطرح أسئلة، يربط مواقف، يحط المراية قدامك بلُطف… لحد ما تبدأ تفهم مشاعرك، تصالح نفسك، وتاخد قرارات من وعي مش من وجع.

س: طب ولو كنت مش عارف أتكلم؟ أو مكسوف؟

ج: عادي جدًا. المعالج الشاطر مش هيضغطك. هيصبر عليك، ويساعدك تحس بالأمان. وساعتها الكلام هيخرج لوحده. مفيش "صح وغلط" جوه الأوضة دي… فيك إنت، زي ما إنت، وبس.

س: طيب هو ليه مهم أروح؟ أنا مش مدمن ولا مكتئب مثلًا.

ج: العلاج النفسي مش بس عشان "الناس اللي وقعوا". ده كمان للناس اللي عايزين يفهموا نفسهم أكتر، يطوّروا علاقتهم بحياتهم، بقراراتهم، بالناس اللي حواليهم.
الناس بتروح الجيم عشان صحتها الجسدية، والمعالج النفسي هو "جيم المشاعر والعقل".

س: بس الناس ممكن تقول عليا مجنون...

ج: الناس هتتكلم في كل الأحوال. بس انت اللي هتعيش جوا دماغك. تحب تعيش مرتاح؟ ولا تعيش لرضا الناس؟
كفاية كتم، كفاية تأجيل… فيه راحة مستنياك، بس محتاجة خطوة شجاعة منك.

وآخر حاجة: المعالج النفسي الشاطر مش بيديك حل سحري… بس بيديك فرصة حقيقية تبدأ حياة أهدى، أوضح، وأنضج.
ويمكن دي تكون أذكى خطوة تاخدها لنفسك.

#نفسيه

29/03/2025

Gaslighting التلاعب بالعقول
يعد نوعا من انواع التلاعب النفسي الذى يمارسه شخص علي آخر بحيث يشككه فى واقعه حيث يسعى ذلك الشخص المستخدم لهذا النوع من التلاعب إلى زرع بذور الشك فى عقل شخص معين او مجموعة معينه مما يجعلهم يشكون فى ذاكرتهم وادراكهم وسلامتهم العقليه بأستخدام الانكار المستمر والتضليل والاقناع بالشئ وعكسه.
و ده اللي كان بيعمله وسام فى مسلسل لام شمسيه مع زوجته ومحاولة منه بأسقاط كل اضطراباته النفسيه فى شخص زوجته او ضحيته وده شكل خفى من اشكال الاضطرابات النفسيه اللى ممكن تكون موجوده حوالينا وبنتعرض ليها.
متتردش فى طلب المساعده من المتخصص لو حسيت انك بتتعرض لهذا النوع من التلاعب من شخص ما او حتى لو انت هذا الشخص المساعده والوعى طريق آمن للتعافى.
#اضطرابات
#نفسيه
#وعى

#صحةنفسية

28/03/2025

تعقيب عن مسلسل لام شمسيه
مع اختلافى او اتفاقى عن سياق العرض الدرامى للمشاكل النفسيه
المسلسل نور الوعى جوا كتير وبالفعل الكثير من الحالات اكتشفت بشكل او بأخر انها اتعرضت لحوادث شبيه بالاستغلال الجسدى وسواء الاحداث الماضيه سببت مشكله فى حياتهم او لا المهم انها كشفت عن المشاكل الدفينه اللي جواهم اللي اثرت عليهم بشكل ما
مع الاخذ فى الاعتبار بضرورة عدم مشاهدة الاطفال لهذا المحتوى حيث انه موجه خصيصا لأولياء الامور لزيادة وعيهم اتجاه طرق التواصل مع ابنائهم وضرورة اللجوء لمساعدة المختصين.
شكرا لكل من ساهم فى هذا العمل لخدمة الوعى الصحى بالاضطرابات النفسيه
#اضطرابات نفسيه
#نفسيه

16/03/2025

🎯 التعامل مع طلاب فرط الحركة مش تحدي صعب، بس محتاج الطريقة الصح! 🤔💡

أكيد قابلت الطالب اللي مش قادر يقعد مكانه، بيسرح بسرعة، وبيتنقل من حاجة لحاجة بدون تركيز، وكل تصرفاته مندفعة وبدون تفكير! 😅 وده ممكن يسبب فوضى في الفصل.. متقلقش؛ التعامل معاهم مش مستحيل، هو بس محتاج شوية استراتيجيات ذكية تخليك تسيطر على الموقف وتحافظ على تركيز كل الطلاب! 👏✨

✅ 8 استراتيجيات ذهبية لإدارة الفصل مع وجود طلاب فرط الحركة وتشتت الإنتباه:

1️⃣ وضع قواعد واضحة وبسيطة 📝: خلي القواعد قصيرة وسهلة زي: "نرفع إيدينا قبل ما نتكلم"، "نحترم وقت الشرح". كل ما كانت القواعد واضحة، كل ما التزم بيها الأطفال أكتر.
2️⃣ التعليم بالحركة والتفاعل 🏃‍♂️: استغلال طاقتهم في أنشطة حركية، زي الإجابة بالإشارات، تمثيل الأدوار، أو استخدام الألعاب والأنشطة، هتلاقيهم مركزين أكتر.
3️⃣ تقسيم المهام وتحديد وقت لكل نشاط ⏳: متديش تعليمات طويلة، الأفضل تقسيم الدرس لمهام صغيرة مع فواصل سريعة، واستخدام مؤقت زمني عشان تخلي عندهم حافز للإنجاز.
4️⃣ استخدام وسائل بصرية جذابة 👀🎨: الأطفال اللي عندهم تشتت انتباه بيستجيبوا أكتر للصور، الألوان، الخرائط الذهنيه، والمخططات بدل الكلام النظري الطويل.
5️⃣ التعامل مع الطاقة الزائدة بذكاء ⚡: بدل ما يتحرك عشوائيًا، ادّيله دور زي توزيع الأدوات، تنظيف السبورة، أو ترتيب الفصل، كده هيفرّغ طاقته بطريقة مفيدة.
6️⃣ التوجيه الإيجابي بدل العقاب 👍: بدل ما نقول: "اقعد ساكت"، نجرب: "أنا عارف إنك تقدر تركز معايا زي البطل"، التحفيز الإيجابي بيأثر عليهم بشكل كبير.
7️⃣ إعادة التركيز بأساليب ممتعة 🎯: استخدام جمل ملفتة زي:
🔹 "تفتكروا إيه هي الإجابة الصح؟ اللي مركز هيعرفها!"
🔹 "خلينا نشوف مين هيركز معايا أكتر!"
🔹 أو اعمل مسابقة سريعة بين الطلاب علشان تخليهم متحمسين للدرس.
8️⃣ مكانهم في الفصل مهم 🏫: أفضل مكان ليهم جنبك عشان متابعتهم تكون أسهل، كمان يكونوا بعيد عن الشبابيك أو أي مشتتات.

💬 مين بيستخدم الإستراتيجيات دي يقول لنا ليها تأثير بنسبة كام في المية، وشاركونا ف الكومنتات باستراتيجيات تانية بتستخدموها وبتنجح معاكم 😉👇

💬 كمان شاركونا بالمشكلات اللي بتواجهكم في الفصل نتناقش في حلولها سوا 🤝🏻

22/01/2025

★ عَلم إبنك إن عوجة البوء أثناء الكلام مش روشنة ولا شطارة، ده عربجة وقلة أدب.
★علمه إن التريقة على الناس والتنمر عليهم، وخصوصًا الكبير منهم، مش من المروءة ولا الجدعنة.
★علمه إن عمل المقالب في إخواته أو أقاربه، مش خفة دم، ولا حرفنه، ده قلة قيمة وسذاجة، وبث الذعر في الآخرين ممكن يؤدي لوفاتهم.
★ علمه يغِير على أخته وأخوه، ولو مقطعين بعض جوه البيت، بلاش ده يظهر للغريب بره.
★علمه إن الرجولة بالموقف والفعل، مش بالصوت العالي والسيجارة، واللبس المقطع والبناطيل الضيقة.
★ علمه إبنك" أهلك تهلك"، واحترامهم من احترام الأب والأم،
★علمه صنعة أو حِرفة أو موهبة من صغره وحسب إمكانياته، وبلاش تنتظر أما يكبر، خليه يفهم الدنيا بدري بدري عشان يتحمل المسؤولية.
★ماتديش له فلوس كتير، وعلمه قيمتها جدًا، وخليك متزن في الصرف عليه.
★علمه يصلي من صغره، وعوده على شكل السجادة والجامع وإنه يألف منظر الركوع والسجود عندك وعند أمه، حتى لو مش فاهم.
★ماتمسكوش تليفون كتير، وخليه ينزل الشارع، ويختلط بالناس، ويغلب ويتغلب، والدنيا تسويه بدري بدري، أحسن مايطلع زي الفرخة البيضة مايعرفش يتصرف ف حاجة خالص.
★علمه مايتهزش ويرقص ع الفاضي والملان، وخليك صارم معاه جدًا في موضوع قَصة شعره، وخليه تقيل في نفسه وذو هيبة يخضع لها الجميع.
★ ثق تمامًا أي حد سهل يربي إبنه ويبنيه لحم وطول وعرض، بس مش أي حد يبني راجل، يحترم نفسه ويحترم غيره.
منقوول

24/10/2024

*قرايه الكتب بتساعد علي تفضيه المخ*

جرب تقرا كام صفحه من اي كتاب بتحبه قبل النوم بربع او نص ساعه.
هتفضي مخك من كل الازعاج الي بيجي من السوشال ميديا و من الفيديوهات السريعه و كمان الحياة الي ريتمها سريع.
و بالتالي هتنام اسرع و احسن.
ابدا بصفحتين في الاول عشان الناس الي بتقول انهم مش بيحبوا القراية.. القراية علم و العلم هو الي هيساعدك تتقدم.

02/10/2024

من أنواع الصدمات النفسية

تشمل أنواع الصدمة النفسية ما يلي:

1 . الصدمة الحادة: تعرف الصدمة النفسية الحادة بأنها الاستجابة العاطفية التي تنشأ جراء التعرض لحدث محدد صادم.
2 . الصدمة المزمنة: هي استجابة عاطفية طويلة الأمد تنجم عن التعرض المتكرر والمستمر للأذى والأحداث المرهقة أشهر أو سنوات، مثل تعرض الطفل لسوء المعاملة، أو التنمر، أو العنف المنزلي.
3 . الصدمة المعقدة: هي حالة الصدمة النفسية التي تحدث إثر التعرض لسلسة من الأحداث أو المواقف المؤلمة وتترك أثرًا دائمًا على النفس.
4 . الصدمة الثانوية أو الصدمة غير المباشرة: قد يحدث هذا النوع من الصدمات النفسية نتيجة مشاهدة شخص آخر يتعرض لحدث مؤلم

Types of psychological trauma

Types of psychological trauma include:

1. Acute trauma: Acute psychological trauma is defined as the emotional response that arises as a result of exposure to a specific traumatic event.
2. Chronic trauma: A long-term emotional response resulting from repeated and ongoing exposure to harm and stressful events over months or years, such as child abuse, bullying, or domestic violence.
3. Complex trauma: It is a state of psychological trauma that occurs as a result of exposure to a series of painful events or situations and leaves a lasting impact on the psyche.
4. Secondary trauma or vicarious trauma: This type of psychological trauma may occur as a result of watching someone else experience a traumatic event

#إجابيه #