عيادة د.احمد صبري عبدالعاطي حتيته Dr. Ahmed Sabry AbdElatty Heteta clinic

06/06/2025

25/05/2025

عشان حقك تعرفي.
غرزه عنق الرحم.او في تعبير اخر ربط عنق الرحم.
ده اجراء بيتعمل لمنع عنق الرحم من انه يوسع تلقآئيا من تأثير وزن الطفل من اول التلت الثاني من الحمل.
ازاي اعرف ان انا محتاجه غرزه عنق الرحم ولا لا و ان شاءالله مفيش حد يحتاجها.
اولا غرزه عنق الرحم عشان تبقى لازمه عندنا كذا احتمال
اول حاجه ان يبقى حصلك اجهاض في التلت التاني من الحمل (يعني من الشهر الرابع لآخر السادس) او ولاده مبكره تلات مرات او اكتر قبل كده . بس خلي بالك في شروط للاجهاض ده انه يكون بدون الم لان ده دليل على ان عنق الرحم بيفتح بسهوله من غير آلام ولاده من الرحم نفسه و غالبا الولاده او الاجهاض مش بياخد وقت طويل و غالبا بينزل الجنين عايش.
او انه يكون حصل نفس الظروف دي مره واحده بس . لكن لما بنقيس طول عنق الرحم كان ٢.٥ سم او اقل.
هل معنى كده ان لازم اقيس عنق الرحم و انا حامل؟
لا . الا لو في سابقه ولاده مبكره او اجهاض في التلت التاني من الحمل او نزول مبكر للميه حول الجنين في حمل سابق او عمليه سابقه في عنق الرحم و لو قياسه طبيعي بيتكرر المتابعه كل اسبوعين او اربع اسابيع من عمر ١٦ اسبوع لحد عمر ٢٤ اسبوع.
طبب لو معنديش حاجه من دي بس قياس عنق الرحم كان ٢.٥ سم او اقل هل المفروض اعمل الغرزه؟
لا.
طيب انا حامل في توأم هل المفروض اعمل الغرزه؟
لا.
في حالات للأسف مش حينفع معاها الاجراء ده حتى لو الاحتمالات دي موجوده. زي لو في نزيف او نزول ميه او عيب خلقي مميت في الطفل او مفيش نبض للجنين او في تلوث للميه حول الجنين.
المره الجايه نتكلم عن افضل وقت لعمل الغرزه و طريقتها و امته نفكها عادي و امته نضطر نفكها .

15/12/2024

سؤال مهم. هل ينفع اسافر و انا حامل؟
السفر اثناء الحمل مش ممنوع في العموم لكن في احتياطات معينه لازم تتعمل وقت السفر. طيب ايه هيه المشاكل اللي ممكن تحصل من السفر؟
اول حاجه هيه حالتك العامه ، يعني لو في انيميا في الحمل او في ترجيع زايد او سكر او ضغط مع الحمل او اي مشكله تانيه .دي كلها حاجات ممكن تأثر عليكي في السفر فلازم آخد احتياطات كويسه ان حالتي تبقى مستقره وقت السفر.
تاني حاجه هيه ان الحمل فتره بتزيد فيها احتمالات حدوث جلطات و السفر مده طويله ممكن تزود الاحتمالات دي ، طيب ايه هيه المده الطويله؟ المده الطويله اتفق الاطباء انها ٤ ساعات او اكثر . فلو حسافر المده دي لازم آخد احتياطات معينه من تعليمات و ادويه و وسائل تقلل احتمالات الجلطات.
تالت حاجه هيه عمر الحمل، افضل فتره للسفر وقت الحمل هيه من ١٤ ل ٢٨ اسبوع، و النقطه دي مش معناها ان السفر في غير المواعيد دي خطر على الحمل لكن الحمل في غير الفتره دي احتمالات المشاكل فيه اكتر من اجهاض او نزيف او آلام ولاده مبكره ف الافضل اكون قريبه من مكان متابعتي. و ده نفس السبب اللي بيخلي شركات طيران كتير تمنع سفر الحامل من عمر ٣٦ اسبوع . عشان احتمالات الولاده بتزيد خاصه لو مسافه طويله.
رابع حاجه هيه وسيله السفر، و في المعظم مفيش وسيله سفر معينه تعتبر خطر على الحمل بس القطار يعتبر اريح حاجه عشان حريه الحركه فيه و الاهتزازات قليله و لو حسافر بعربيه الافضل اقعد في مكان مريح و اربط الحزام تحت بطني مش ضاغط عليها.
و في تعليمات عامه في السفر هيه اني لازم اعمل متابعه قبل السفر عشان اطمن على الحمل و اشرب سوايل كويس و لازم فترات راحه على الاقل كل ساعتين اتحرك فيهم و البس لبس واسع و مريح و حذاء مريح ميكونش ضاغط على رجلي. و على حسب مكان و مده و وسيله السفر بأحددلك اذا كنتي محتاجه حاجه اكتر من كده.
توصلي بالسلامه.

04/05/2024

سؤال الموسم.
ممكن اكل فسيخ و رنجه يا دكتور و انا حامل ؟
مبدأيا للأسف لازم نقول ان الفسيخ كمنتج الخطوره منه مش للحامل بس. مشاكل الفسيخ على كل الناس و مرتبطه بطريقه تصنيعه اللي صحيا مش مظبوطه ف لو لاقدر الله التصنيع مش سليم حتكون المشكله على اي حد حياكل مش الحامل بس. ده غير ان الاملاح الزياده فيه غلط للضغط و الكلى. ده بجانب ان الحامل خاصه في الشهور الاخيره عندها مشاكل في الهضم و التنفس نتيجه كبر حجم الرحم ده بيخلي الخطوره عليها اكبر في حاله حدوث مشكله لاقدر الله.
و عشان اليوم مايبقاش باظ فالرنجه سمك مملح مدخن يعني تصنيعه صحي لو من مكان مضمون بس ماتكونش فيها ملح كتير و تشربي ميه و سوايل كويس و الافضل لو تسويها ماتاكليهاش نيه و بلاش كميات كبيره.
ربنا يعافي الجميع و كل سنه و انتم طيبين.

05/02/2024

السكر و الحمل،
لو جالك سكر مع الحمل قبل كده:
- حتعملي تحاليل سكر قبل الحمل و عند ١٦ اسبوع و يتعاد بين ٢٤-٢٨ اسبوع في الحمل لو مظبوط بإذن الله.
- في وسائل ممكن نسيطر بيها على مستوى السكر في الدم قبل استعمال الانسولين.
- المتابعه بالسونار مهمه طول فتره الحمل.
- قياس السكر بانتظام مهم جدا طول فتره الحمل.
- العلاج بيقف مع الولاده بس بتتابعي بتحاليل السكر ممكن لحد ٦ اسابيع بعد الولاده.

29/01/2024

السكر و الحمل،
لو عندك السكر و بتخططي للحمل:
- لازم تحليل السكر التراكمي يكون مظبوط قبل الحمل.
- لازم تبدأي في فوليك اسيد بتركيز اعلى من الحمل العادي قبل الحمل بشهر على الاقل.
- تحاليل وظائف الكلى و فحص الشبكيه و القلب قبل الحمل مهم.
- اقراص علاج السكر غالبا حنستبدلها بانسولين فتره الحمل.
- متابعه قياس السكر بانتظام طول فتره الحمل مهم جدا.
- المتابعه بالسونار و التحاليل مهمه جدا و على فترات متقاربه طول فتره الحمل.
- حتحتاجي اشعه ثلاثيه الابعاد للبيبي في ٢٢ اسبوع.
ربنا يكتب الشفاء للجميع.

11/12/2023

متنسوش فيتامين سي عشان امتصاص الحديد و تقويه الأوعية الدمويه و الغضاريف. فيتامين سي موجود في الموالح زي البرتقال و الليمون و الفراوله و الكيوي و الخضروات زي الطماطم و السبانخ و البروكلي.

13/11/2023

ارتفاع ضغط الدم مع الحمل.
ارتفاع ضغط الدم مع الحمل ليه كذا نوع اولهم انك تبقي عارفه انك عندك ضغط الدم مرتفع من قبل الحمل و بتاخدي علاج و هنا لازم قبل الحمل تكوني متأكده ان العلاج اللي بتاخديه ينفع مع الحمل او بتغيريه بنوع ينفع و تعملي تحاليل نطمن بيها ان مفيش مشاكل مصاحبه للضغط العالي و في علاج بتمشي عليه مع الحمل عشان الضغط العالي ميجيش معاه ضغط عالي من الحمل او مايعرف بتسمم الحمل.
النوع الثاني ان الضغط يعلى في اي وقت اثناء الحمل من غير مايكون معاه ظهور زلال في البول و ده مشاكله قليله و سهل السيطره عليه بإذن الله بالعلاج.
النوع الثالث و هوه ارتفاع الضغط من الحمل او مايعرف بتسمم الحمل و ده غالبا بيظهر في او بعد الثلث التاني من الحمل يعني الشهر الخامس تقريبا و بيكون معاه ظهور زلال في البول و ده النوع اللي بيكون ليه تأثير اخطر شويه على البيبي من تأخر النمو و نقص الوزن او على الام من الضغط العالي او حدوث تشنجات او نزيف و في علامات خطوره ليه زي الصداع و زغلله العين و الغثيان و الم المعده .عشان كده بيحتاج متابعه دقيقه و متكرره للأم و البيبي.
و في ادويه معينه لعلاج ضغط الدم المرتفع هيه اللي مسموح باستعمالها اثناء الحمل.
و في تحاليل لازم تتعمل اثناء متابعه الحمل و قبل الولاده .
و ميعاد الولاده بيتحدد على حسب نوع ضغط الدم المرتفع و مدى التحكم فيه.
ضغط الدم العالي مش ضروري يكون له اعراض . لازم قياس الضغط يكون روتين أثناء متابعه الحمل.