21/07/2025
👩⚕️ "دكتور، أنا متأكدة إنه فيروس اليد والفم والقدم... كل الأطفال حواليها عندهم نفس الطفح!"
جملة سمعتها أكتر من مرة الأيام اللي فاتت…
الفيروس فعلاً منتشر، لكن مش كل طفح جلدي معناه إنه هو!
خليني أحكيلكم عن 3 حالات شفتهم في العيادة، كلهم كانوا جايين بنفس القلق… بس كل حالة كان ليها حكاية مختلفة تمامًا.
---
🟠 الحالة الأولى:
أم جايبة طفلها الصغير وهي مرعوبة من الحبوب اللي على إيده ورجله.
بتقولي: "أنا قلقانة! نفس الشكل اللي شوفته على جروبات الماميز!"
فحصت الطفل كويس... مفيش حرارة، ولا تعب، ولا أي أعراض تانية.
وبصراحة؟
🦟 كانت مجرد قرص ناموس!
ابتسمت وقلت لها:
"هو مش فيروس يا ماما... بس واضح إن الناموس عامل حفلة صغيرة بس خلاص!"
---
🟠 الحالة التانية:
طفلة عندها طفح غريب، في الايدين والرجلين لكن شكله مش معتاد لفيروس اليد والفم.
الأم كانت واعية وقالت : "هي أخدت علاج لمشكلةصحية تانية ووقفته، بعدها بدأت الحبوب دي تظهر."
بدأت أشك إنها حساسية من الدواء… لكن عشان أكون دقيق، استشرنا دكتور جلدية،
وفعلًا التشخيص اتأكد:
💊 حساسية دوائية. وادعولها ربنا يشفيها لأنها لسة تعبانة.
---
🟠 الحالة التالتة:
ودي كانت الأصعب والأخطر…
الطفل كان جاي للعيادة بعد ما ظهرت عليه حبوب على الجلد.
الأهل في البداية افتكروا إنها قرص ناموس، وبعد كده حد في صيدلية قالهم:
"ده فيروس اليد والفم والقدم… خدوا العلاج ده وهيخف!"
وفعلًا بدأوا علاج على الأساس ده.
لكن بعد يومين… الولد بدأ يشتكي من وجع شديد في رجليه.
ولما فحصته، لفت نظري لون الطفح، كان مختلف… مائل للبنفسجي.
سألتهم: "هو بيشتكي من حاجة تانية؟"
الأم قالت:
"هو بقاله يومين بيعيط من وجع في بطنه، واحنا مش فاهمين من إيه!"
هنا الصورة اكتملت…
🩸 ده كان مرض اسمه Henoch-Schönlein Purpura (هينوخ شونلاين بربرا)
وهو مرض مناعي بيأثر على الأوعية الدموية، وممكن يسبب مضاعفات خطيرة في الكلى والجهاز الهضمي.
حولته فورًا لمستشفى الجامعة…
وأخر مرة تواصلت معاهم عرفت إن حالته بقت أصعب ، وحصلت مضاعفات شديدة.
💔 وبدعيله من قلبي ربنا يشفيه ويحميه.
---
🎯 الخلاصة؟
مش كل طفح جلدي هو "فيروس"
ومش كل حاجة ينفع تتعالج بنصيحة من جروب أو صيدلية.
في حاجات بسيطة…
وفي حاجات لازم تتشاف بدقة، وتتلحق في وقتها.
👶 كل طفل يستحق تشخيص صح…
وكل أم تستحق تعرف الحقيقة من أول مرة، وتطمن أو تتحرك بسرعة لو في مشكلة.
---
💬 لو تعرفي أي أم محتارة في تشخيص، أو عندها طفل ظهر عليه طفح جديد، اعمليلها منشن أو شاركي البوست ده...
لأن الوعي بيفرق، والتشخيص الصح ممكن ينقذ حياة.
#الصورة الثالثة مش للحالة اللي جاتلي لأن كان صعب التصوير وحالة الطفل كده
