20/09/2022
إيدى نضيفة ⁉️ قفلت باب العربية⁉️ مطفتش النور⁉️
دا جزء بسيط من اللي بيدور طول الوقت فى دماغ مريض الوسواس القهرى 🤦🏻♀️🤦♂️
🔸طب ايه هو الوسواس القهرى أو (OCD)⁉️
هو عبارة عن أفكار بتتسلط على الدماغ .. مصدرها الخوف
ومع الوقت الخوف ده بيكبر ويسيطر على تفكير الشخص.
🔸الوسواس القهري متقسم لجزئين ✌️
📌 الوسوسة او obsessions :
هى عبارة عن افكار غالبيتها غير منطقى، والشخص هنا بيبقى مدرك دا كويس، ولكن بيبقى شئ مُلِح علي دماغه مش عارف يسيطر عليه
كلمة الوسوسة لغوياً معناها الإحساس ب إن في افكار بتتقال جنب ودن الشخص بشكل متكرر، وبالتالي بيحصل ضغط شديد عليه ويحسسه بالقلق أو ومثال علي الجزء ده اسأله تشكيك زي:
ايدى مش نضيفه⁉️ (وهو لسة غاسلها)
الباب ماتقفلش كويس⁉️ (وهو لسة قافله) وأحياناً بيسأل نفسه كده حتي بعد ما يتأكد اكتر من مرة
📌 الأفعال القهرية أو الcompulsions :
والجزء ده بيبقي عبارة عن أفعال نتيجة للأفكار المُلِحة على دماغه، زي إنه:
👈 يفضل يفتح و يقفل باب العربية أو باب الشقة من ١٠ ل ١٥ مرة، وممكن تزيد عشان بس يتأكد انه اتقفل.
👈 وممكن يفضل يغسل فى ايده كتير جدا لدرجة إنه يؤذي جلده.
⬅️ الأفعال القهرية دى بتكون مريحة لحظياً، لكن بمرور الوقت بتتحول لجزء لا يتجزأ من حياته وبيأثر عليها.
⬅️ وخليك عارف ان الشخص بيبقى مستوعب كويس أوى إن الأفكار دى سخيفة أو غريبة، بل من كتر غرابتها أحياناً بيبقى محرج إنه يشاركها و مش عارف يشرحها، وبالتالى بيقابل ردود فعل علي تصرفاته بالإستغراب أو التساؤل...
الوسواس القهري ليه علاج⁉️
اه ليه، طرق العلاج دي ممكن متنهيش وجوده تماماً لكن الأكيد انها هتسيطر على الأعراض اياً كان ايه نوع العلاج👇:
✍️ العلاج بالأدوية :
وده بيكون بجرعات معينة .. بإستشارة دكتور متخصص.
✍️ العلاج النفسى :
وهي جلسات العلاج السلوكي المعرفى.
⬅️ وفى الغالب المصاب بيجمع بين النوعين علشان يوصل لأفضل نتيجة
📌 مهم جدا متتهمش الشخص انه السبب ، ولا تتهم نفسك لو انت مصاب بالإضطراب .. الوسواس القهرى مرض زي أي مرض مش بإيدك انت .. متقعش فى فخ القاء اللوم على نفسك بغرض التحكم في الوسوسة
د/ سارة خليفة " لأمراض المخ والأعصاب والطب النفسى "
