عيادة الدكتور ماركو موسي - الاطفال وحديثي الولادة

04/05/2026

نقول تاني

فيتامين د 🩺🩺🩺🍼🍼🍼🍼

💕💕ليه الفيدروب مبيوقفش اثناء التعب ؟! ليه مش الفيتامنات بنوقفها ؟! ﻵ الفيدروب بيكمل معانا مبيوقفش ﻻنه مقاوم للعدوى وبيقوى من المناعه ،طب بنوقف أيه ؟! جرت العاده اننا بنوقف الحديد !وأيه كمان ؟! نخلى بالنا اننا منديش الكالسيوم مع الحديد ﻻزم يبقى فرق بينهم ساعتين !وايه كمان ؟!متدوش كالسيوم من أصله ! طب ليه؟! ﻻن الطفل بياخد كفايته من الكالسيوم وانما المشكله بتكون فى نقص فيتامين د !طب لو عاوز آدى الكالسيوم ! اﻻول نعمل تحليل كالسيوم طلع قليل ندىء !طلع طبيعى منديش ؟! طب لو طبيعى وعاوز آدى واهو زياده تؤكيد والخير خيرين ؟! مينفعش ياناصح ﻻن الكالسيوم دى الجسم مش محتاجه هيترسب فى الكلى ويعمل تحجر وتكلسات على الكلى !

💕💕ضرورى تعرفى فيتامين د. انه بلاش يتاخد قبل النوم بيصحصح الطفل الافضل صباحا

23/04/2026

11/02/2026

القئ منتشر جدا وسببه التهاب فيروسي بجدار المعده و النزلات المعويه الفيروسيه
لكن الترجيع بدون اسهال اوأي اعراض تانيه ده يقلق
الترجيع ولحظات صعبه ✍🏻

📌 اللحظات التي تسبق الترجيع تسمى (الغثيان): لحظات صعبه عالطفل، وشه بيلون بيتخطف ويصفر ويبهت، كإن حاجه واقفه على قلبه، مع خلل لحظي في الوعي، يعقبه عملية القيء ثم البكاء، ثم الخوف من الاكل والشرب (حتى لو جعان أو عطشان)، حتى لا تتكرر هذه اللحظات العصيبه مره اخرى.

📌 راحة الجهاز الهضمي في هذا الوقت تعد اولويه قصوى: إعطاء فيلم أو حقنه للترجيع من مادة (اونداسترون) زي اوندالينز أواونداميتك ٤ مجم دانسيت أو ايميرست أو زوفران...الخ (ونصبر ساعه بعدها قبل تقديم الاكل والشرب مره تانيه) + الاهتمام بالسوائل المفيده زي الرضاعه ومحلول الجفاف والشوربه وعصائر منزليه من غير سكر ومياه محلاه بقليل من عسل النحل وعصرة ليمون خفيف كميه صغيره على فترات قصيره عند الحاجه + التصرف بهدوء واحتواء الطفل + عدم إعطاء ادويه بدون داعي وإيقاف الادويه الغير ضرورية.

📌 بعد الاطمئنان بزوال الترجيع : طبيعي نلاقي شهية الطفل قليله ولذلك يتم إعطاء اكل بيتي متنوع وخفيف فريش سهل البلع والهضم (أيضا كميه صغيره على فترات قصيره) مثل زبادي ساده، بطاطس، خضار ، لسان عصفور ، تفاح مهروس، رز مهروس، بطاطا....الخ

📌 مهم جدا الابتعاد عن السكريات والعصائر الخارجيه وعصائر الفاكهه ذات السكريات العاليه والدهون والاكل الخارجي والمواد الحافظه، ونقلل الألبان ونبتعد عن الفاكهه زي البطيخ والخوخ والاناناس (متهمه بقلبان البطن الفتره دي).

📌 لو الطفل ماشي عالرضاعه ومحلول جفاف فقط : فهذا يكفيه، ومانقلقش من قلة باقي الاكل لأن شهيته هتتحسن تدريجيا مع الوقت.

📌 مش معنى أن الطفل بيرجع فهبطل تقديم سوائل خوفا من الترجيع: بالعكس؛ لازم نستمر في تقديم السوائل ولكن الأولويه لمحلول الجفاف ويتم تقديمه مع السوائل الأخرى ولكن بكميات أقل وفترات متباعده لأن بيتم امتصاص جزء كبير من السوائل عن طريق الجهاز الهضمي حتى مع استمرار القيء.

👈🏽 ماننساش: الاطفال فوق السنه ونص والسنتين: ممكن يقعد من غير اكل فتره مش قليله: والطفل ممكن ينام من ٩ بالليل ل ٦ الصبح ومش بياكل عادي، وممكن يقعد بعد فطار ٩ الصبح لغاية الساعه ١ من غير اكل عادي: فبلاش استعجال في تقديم الاكل أثناء الترجيع، ونمشي الخطوات واحده واحده زي ماذكرت

🚨 عند عدم تحسن القيء واستمراره أو ترجيع مرتين تلاته خلال ساعه (بعد إعطاء فيلم أو حقنه للترجيع) أو قيء مدمم : يرجى استشارة الطبيب أو التوجه لاقرب طوارئ.
حفظ الله أطفالكم

07/12/2025

سيلجون أقراص أو لبوس او نقط
هيتوقف من سوق الدواء المصري ...
للي ميعرفوش دا منتج بيستخدم في علاج الكحة الجافة

12/11/2025

الكحة بتبدأ ومبتنتهيش
دور سخيف جداً بيبدأ بحرارة ويقلب بكحة
منتشر جداً بين الأطفال اليومين دول.. ويكمل بـ تكسير جسم وهمدان.. دور تقيل الحقيقه لكن أغلب الأدوار فيروسيه

بصراحة حالات البرد🤧 في الأطفال و الرُّضَّع زادت جداً اليومين دول !
انا عارف ان جملة زى " فيروس وماشي فى الجو " ليها أثر بروباجاندى🎙 فظيع بس بصراحه الكلام ده رغم إنه جذاب بس مش علمى أوى

أى دكتور أطفال أو أم أو يمكن حتى مدرسين المدارس ملاحظين إن دايماً شهر ١١ و١٢ و١ "شوطة" كحة بتشوط العيال ..
السبب بأه انتشار فيروسات ..
قول الجو .
قول السقعه.
قول اللى عاوز تقوله المهم إن فعلاً البلد بتكحّ .
وبشكل فظيع .
⚠️المشكلة الأكبر هنا فى الأطفال الرُّضَّع ان البرد بيقلب بنزلة شعبيه حاد
وللوقاية محتاجين

✅1. نفصل الأطفال التعبانين في البيت الواحدعلى قد ما نقدر
✅2. لو مش قادرين يبقى نلبسهم mask قناع للأنف والفم.
✅3. نعلم أطفالنا يغطوّا فمهم بإيدهم أو بالساعد كله عند الكحة أو العطس ( مهم جداً جداّ والله ).
✅4. نغيب أطفالنا اللي بيكحو بشكل مستمر من المدرسه أو الحضانه حتى لو يومين .
✅5. نهتم بتهوية الفصول وأماكن الازدحام زى أوض النوم اللى فيها أكتر من طفل.
✅6. منستخدمش نفس الطبق ولا المعلقه ولا الكوب ولا الفوطه ( جزء لا بأس به من العدوى بينتقل باللعاب).
✅7. أطفال حساسية الأنف يداوموا على بخاخات الأنف.
✅8. أطفال حساسية الصدر يداوموا على بخاخات الصدر.
✅9. مونتولوكاست ( رائع فى الوقاية بس لوحده لا يكفى).
✅10. تطعيم المكورات الرئوية ( بريفينار وسنفلوريكس) أهم من تطعيم الانفلونزا بالنسبة لى وكله مهم.

03/11/2025

في حاجه غريبه بتحصل اليومين دول ؟
طفل غالبا فى سن المدرسة من 3 ل 14 سنة يجي يكشف بسخونيه و يتشخص عدوى فيروسية غالبا انفلونزا وياخد علاج ويمشي
بعد اربع خمس ايام تلاقي الطفل بيشتكي من رجليه ؟
بس الشكوي هنا مبتبقاش الالام في المفاصل
بتبقي في عضلات الرجل فى السمانة زي شد العضل كده بالظبط و ساعات مبيقدرش يمشى من الالم او يعرج او يمشى على اطراف الاصابع
مع اعطاء مسكن و راحة و سوايل
الدنيا بتتحسن خلال 3 ايام غالبا والطفل بيبقي تمام

ده حاجة مش مقلقة عبارة عن التهاب فى العضلات بتسببه بعض الفيروسات و اشهرها الانفلونزا A و B و غيرها من الفيروسات المنتشرة BENIGN ACUTE CHILDHOOD MYOSITIS
طبعا لازم الطبيب المعالج يشوف الطفل و يفحصه خاصة الفحص العصبى و يتأكد من التشخيص و يستبعد امراض تانية اكثر خطورة متشابهة فى الاعراض خاصة متلازمة غيلان باريه Guillain-Barré syndrome و دى بيميزها شلل تصاعدى للعضلات بدايته من الرجل و بيطلع لفوق و احيانا بيشمل عضلات التنفس و مرض انحلال العضلات rhabdomyolysis و ده بيؤدى للون بول داكن و فشل كلوى حاد

12/10/2025

معظم شكاوى الأمهات .. مع فترة بدء الدراسة

- ابني ينسى كثيراً !

- ابني حركته كتير وعنده تشتت في التركيز .

حتعرف في البوست ده
بعض الألعاب والأفكار اللي بتساهم في تحسين مستوى التركيز عند الطفل ،
وبتحسّن من مستوى الحفظ والتذكّر عند الطفل :

1 - لعبة العدد النّاقص :
بتعد الأم الأعداد بالترتيب من واحد لعشرة مثلا
ولكن تفوت رقم أثناء العد
عشان يلاحظ الطفل العدد المختفى ويفتكره بسرعة .

2 - لعبة المقابلة :
أن الأم تقول صفه من الصفات ويقول الطفل عكسها،
مثال حار بارد - سعيد غاضب - ناعم خشن.

3 - لعبة تقوية التخيّل :
يرسم الطفل مثلث وهو مغمض عينه،
التمرين ده بيساعد الطفل على التخيل،
وبيساعد علي إنه يقدر يطبق خياله على الورق بأعمال استخدم فيها ايده وحواسه.

4 - الأوامر المركّبة :
هنا بقي الام حتكلف الطفل بأوامر مركبة من كذا جزء
مثل: روح المطبخ وهات الطبق من الدرج الأول والملعقة من الدرج الثالث"،
تيدا في زيادة تعقيد الأوامر بالتدريج.

5 - القصّة والمناقشة :
تعود الطفل علي قراءة القصص المصورة لحد ما يدرب نفسه علي إنه يعرف يفكص الحاجه اللي في ايده،
وتشجيعه على المناقشة في اللي كان بيقرأه

6 - أطول فترة تركيز :
التركيز على صورة معينة فى الحيطه اللي لذامه مثلا
"بدون كلام"، لأطول مدة ممكنة،
أو أنه يبص في عين الام مثلا اللي قاعده قدامه أطول مدة.

7 - لعبة الحروف :
فى ورقة مكتوب عليها خانات
ولد . بنت . جماد . نبات . بلد . وجبة . حيوان، ،
ويتطلبي منه كتابة الأسماء اللى بتبدأ بحرف أ،
واللب يخلص الأول يكون هو الكسبان
، وممكن تعيدي العبة بحرف تاني وهكذا.

8 - اللون والكلمة :
نكتب أسماء أكثر من لون ( أحمر . أخضر . أزرق . برتقالي . أبيض . أسود ) .

ونكتب اللون بعكس لونه .
مثال : نكتب كلمة ( أحمر ) باللون ( الأزرق )
و بعدين نطلب من الطفل أنه يقول اللون مش أنه يقرأ الكلمة ف مش يقرأ كلمة ( أحمر ) وإنما يقول ( أزرق ) لأنها مكتوبة باللون الأزرق وهكذا ..

9 - الرّبط بالمحسوس :
عشان يحفظ الطفل الحروف مثلا ، نربط الحروف باشياء محسوسة عند الطفل مثال :
ابنك اسمه ( محب ) حتى يحفظ حرف الميم نقول له : (ميم) دا حرفك . و ده شكله .
فيرتبط الحرف بشيء محسوس عند الطفل .
وهكذا أي شيء ممكن نربطه بالمحسوس عشان يسهل حفظه وتذكّره .

10 - قصّة قبل النوم :
بنحكي للطفل قصّة قبل النوم .
وفي تاني يوم الصبح نطلب منه أنه يعيد القصة على إخواته أو والديه .

ملحوظه مهمممممه
ابعاد الأطفال عن الالعاب الالكترونية اللي بتسلب التركيز عند الطفل ،
وتشتت عنده الانتباه .
+ ما ننساش كمان ان المناهج برده بقى محتواها كبير وتقيل شويه فمحتاجين برده شويه صبر على الاطفال
+ في برده حاجه مهمه ان في بعض الاطفال ذكائهم مختلف عن الذكاء الدراسي عندهم مثلا ذكاء حركي او اجتماعي انها ممكن يبقوا مش اسرع حاجه في قصه الحفظ والنسيان
+ في بعض الادويه اللي ممكن تساعد على حفظ الانتباه
في الحاله دي ممكن نستعين
فيتامين حديد شراب. ومعاه حاجه
اوميجا شراب

09/10/2025

مرض فيروسي بسيط ومنتشر الفترة دي عدوى اليد والفم والقدم

Hand , Foot and mouth disease

👈هو مرض فيروسي بيصيب كتير من الاطفال بالذات الاطفال الرضع من بعد عمر ٦ شهور لحد عمر ٤ سنوات ودي اكتر فئه عمريه بيحصل فيها
لكن ممكن يحصل في سن أكبر

👈الاعراض ممكن تلخبط الأهل في البداية لانه بيبدا بسخونية عاليه وقريفه وعياط وعصبيه والطفل يرفض الرضاعه او الاكل

من غير طفح جلدي في الاول وبيتم اعطائه علاجات على انه التهاب بالحلق او برد.

👈 الطفح الجلدي بيظهر بعد يومين تقرييا من السخونية وبيبدا القلق الشديد من ظهوره واللي يقولك ده ممكن يكون حساسية من العلاج اللي اخده ولا حاجه .

👈 الطفح ده ليه توزيعه مميزه اوي بنعرفه من خلالها

بيظهر في اليد والقدم واحيانا حول الفم وداخل الفم وبيبقى الطفل عنده صعوبة في البلع وممكن في منطقة المؤخرة وبيزيد في بعض الاطفال ويشمل كذا منطقة تانية

👈 العدوى الفيروسية بتتحسن مع العلاجات الموضعية وخافضات الحرارة والسوايل

👈 الطفل بيكون معدي لباقي الاطفال ويفضل تجنب الاحتكاك في الايام الاولى مع باقي الاطفال

👈 العلاج كله عباره عن علاج الاعراض اللي موجوده

يعني الطفل ساخن هياخد شراب بروفين او سيتال مع عمل الكمدات والتهويه

الشراب المسكن بيهدي وجع الحلق الشديد ويساعد الطفل انه يقدر يشرب وياكل

👈 قرح الفم بنستعملها اسبراي مسكن موضعي ويفضل يكون مكون من اعشاب طبيعيه ونبعد عن ماده الليدوكين اللي في بعضا المنتجات

دي أمثله من المنتجات السبراي الفعاله
Texor care oral spray

بخاخ للفم واللثه والحلق ٣ مرات يوميا
👈دهان للحبوب المنتشره باليد والقدم اسمه

Acyclovir cream

دهان ٤ مرات لمده اسبوع كامل لحد ما الحبوب تنشف وتظهر قشره سوده ، كده الفيروس انتهي

👈 الاكل في المرحله دي صعب ، البلع صعب ، الرياله كتير

الاكلات تكون سهله البلع جدا

زي السوائل والعصائر الفريش
شربه الخضار لسان العصفور بعد ما يبرد
الجيلي ، المهلبيه ، الأرز باللبن ،الشوفان بالفواكه
فواكه زي الجوافه ، الموز ، التين ، التفاح المسلوق
الأرز ، ميه الأرز ، المكرونه المسلوقه