https://www.facebook.com/286642832172426/

بابا العيال د محمد الملا إستشارى طب الاطفال, Sumusta al Waqf (2026)

16/02/2026

ڤيتامين د اهم مكمل تديه لطفلك الشهرين الجايين ، هيقوي مناعه الجهاز التنفسي لطفلك و هيحميه من النزلات الشعبيه و الالتهابات الرئويه.

لو مش عارفه نوع سيبيلي عمر طفلك و هرشحلك كذا نوع كويسين.

15/02/2026

١- الطقطقة عمرها ما كانت ولا هتكون نقص كالسيوم وعادى جدا ومعظمنا بنطقطق عادي

٢- ابنك سخن من غير اى اعراض تانية ... ياكل سمك و بيض و زبادي و عدس و شيكولاتة و موز عادى جدا
بس إنما لو سخن مع ترجيع او اسهال...لازم طبعا اخد بالى من اكله...يعنى ياكل شوربة لسان عصفور - شوربة خضار - تفاح - جزر - بطاطس ونبعده عن السكريات والكوسة والشيكولاتة والشيبسي والمياه الغازية

٣- اللبن بعد الموز عمره ما يضر الطفل

٤- السمك و اللبن عمره ما هيضر الطفل بردو

٥- اللبن البقري او الجاموسي ممنوعين قبل سنة....لكن منتجات الالبان زى الزبادى و الجبنة القريش عادى جدا من تمام ٦ شهور

٦- لو قعدنا نلحس للطفل قهوة عمره ما هيبقي اذكي و لا هيتكلم اسرع بالعكس هيسهرك و انتي اللي هتقعدى تكلمي نفسك طول الليل

٧- الطفل عمره ما يجيله انيميا الفول الا لو عنده استعداد وراثى مولود بيه يعنى البقوليات مش هى السبب

٨- اللي يقولك ان الطفل اللي عنده اربعين يوم لو مأكلتيهوش هيطلع بيكره الاكل ... الحقيقة مش لاقى كلام أقوله

٩- تقبل الطفل للاكل طبيعة و استعداد ليس إلا... والأطفال مش زي بعضها

١٠- وحياتى عندكم بلاش رضعة بيبي درينك و اعشاب في المستشفي بعد الولادة .....الرضاعة فقط

١١- اول يوم بعد الولادة ما تقوليش مفيش لبن وبعدين اسألك طب فيه لبن السرسوب؟ تقوليلي اه ... على اساس ان لبن السرسوب مش لبن ... و الله لبن غنى جداً بالبروتينات و كل العناصر اللى جسمه محتاجها و بيكفي الطفل جدا و بيغني عن اي حاجة تانية

١٢- بالله عليكم بلاش كلمة لبنى خفيف و مش بيشبع ...لو وزنه بيزيد كويس خلاص بلاش اختراعات وبلاش صناعى لو وزنه كويس ده عشان لبنك كويس مش بيرضع من حد تانى وانتى نايمه !

١٣- مفيش حاجة اسمها البنات بيرضعوا اكتر من الولاد...فيه طفل بيرضع كتير و طفل قليل بس كدا

١٤- بلاش الطفل اللي بيرضع صناعي تشربوه مية من اول يوم لأن انتي اصلا بتعملي الرضعة بمية فبلاش حجج واهية انه عطشان

١٥- الطفل بعد سنة اللبن عمر ما فايدته بتضيع و ربنا قال في عامين

١٦- الشكوى المتكررة.....ابني بيعيط و يمص صباعه وحاساه مش بيشبع و صدري مش تقل باللبن و بعصر بينزل نقط مش بملي ازازة
معلش بلاش مبررات هنسأل تاني وزنه زاد ؟طب بيعمل بول كويس
يبقي شكرا... متخليش حد بقي يضحك عليكي و ربنا يعينك

١٧- الخوافض اول 6 شهور سيتال ... تاني 6 شهور بروفين....بعد السنة ممكن دولفين او كاتفلاي بس علي شرط يكون الطفل سخن جدا
يعني كمادات و خافض فقط و ربنا معاكي

١٨- الاسهال اللي زي المية علاجه مش سميكتا و لا هيكون كابكت ....هناخد محلول جفاف ونكشف ...اهم حاجه نعوض جسم الطفل بالسوائل بس

١٩- الطفل اللي بياخد مضاد حيوي كتير سنانه مش بتتاثر ...مناعته هى اللي بتتأثر لو بناخده من نفسنا بدون وصف طبيب

٢٠- نقط علاج الصفرا و دوا شراب والاقراص اللي بتدوبوها و الحاجات دي كلها ملهاش لزمة ...الصفرا اما فسيولوجية و هتضيع بالرضاعة او مرضية و عايزة حضانة خدي بالك

٢١- الكالسيوم بنقولها كتير لازم تحليل و الا بيترسب علي الكلي

٢٢- دوا المغص و الخافض ونقط الانف... عند اللزوم بس

٢٣- نقط الڤيدروب وأخواتها زى كوليتريكس وديفيتون وسيمباكت دى وقاية فقط و فيتامين د النشط علاج لحالات معينة

٢٤- طفلك لما يشرق بلاش تنفخي في وشه ... خبطي علي ضهره كفاية ولو اكتر من ٦ شهور يشرب مايه عادى

٢٥- لو اخد دوا و بعدها رضع او شرب مية ...الدوا مفعوله مش هيقل خالص الا بعض الأدوية اللى لازم معدة فاضية عشان تشتغل

٢٦- لو وقفتي الطفل علشان يشد رجله و مشدهاش...عادى جدا على حسب عمره ومش معنى كده انه يبقي محتاج كالسيوم طالما بيسند راسه فى ميعاد أقصاه ٤ شهور !

٢٧- الطفل لو اخد التطعيم و ما سخنش ...عادى جدا ومش بايظ ولا حاجة

٢٨- تغيير لون البراز عادى جدا ... اهم حاجة ميكونش اسود ولا أحمر ولا أبيض

٢٩- مفيش حاجة اسمها جرعة ديدان وقائية... ولكن لازم نديها لأفراد العائلة الواحدة عند اثبات اصابة فرد فيهم بتحليل البراز ماعدا الحامل أو مرضعة أو طفل اقل من سنتين

٣٠- مفيش حاجة اسمها ابنى دفيان....فيه اختراع اسمه ترمومتر بيقيس الحرارة ... لو اكتر من ٣٧.٣ يبقي سخن ... غير كده لأ

٣١- التسنين مش بيسبب برد او كحة او التهاب في العين بالكتير ممكن حرارة بسيطة متعديش 38 و ريالة و زن مستمر

٣٢- جلسات الاستنشاق أو النفس وكمان البخاخات مفيش منها أى تعود ولا حاجة وهى احسن و أامن علاج للكحة أو حساسية الصدر .. مريض الحساسية بيخف منها لأنه عنده حساسية من الاسم حساس وهى اللى بتعالجه مش ادمان يعنى !!!

٣٣- الكورتيزون اللي موجود بالبخاخات مفيش منه اى مشاكل

٣٤- الحقن قبل ٣ سنين على الأقل بتكون في عضلة الفخد فقط ( نفس مكان التطعيم )

٣٥- ابن أربعة شهور متربعهوش بالله عليكم ... القعاد مسنود من الخامس و لوحده لحد ٩ شهور ..

٣٦- ترجيع مستمر مش بيقف مع الحقن او إسهال بدون تعويض او جفاف مش عادى ولازم محاليل بالوريد فوراً .

ولنا بقيه ...
شير فى الخير 🌹

14/02/2026

ايه أفضل حاجه ممكن أقدمها لابني بعد الحب؟؟

_تخرجيه. 🤔

اه والله أفضل حاجه تعمليها لابنك انك تخرجيه على قد ما تقدري

من وهو لسا بيبي (انا خرجت بنتي بعد الولاده ب ٣ ايام)

_معنى الخروج ايه ✋

معناه توديه مكان مفتوح

فيه طبيعه 👍

_حديقة.... نادي... جنينه عامه ان شالله تمشوا في الشارع كده

الخروج من بيت لبيت مش محسوب
الخروجة لكافيه مغلق مش محسوب

مكان اوبن يا جماعه

كلنا بيوتنا صغيره... وكلنا عندنا محاذير

متشيلش متوقعش متحطش متكركبش

بنزهقهم
طيب يعيش طفولته ازاي

هما محتاجين يروحوا مكان يخرجوا فيه طاقتهم من غير ما نقفلهم عالواحده

يتنططوا يجروا يطلعوا ينزلوا يشوفوا الشمس مكان واسع يحسوا فيه بالراحه مش حيطان واسقف

س: طيب أخرجه كام مره؟؟
على قد ما تقدري لو ينفع كل يوم خرحيه كل يوم

س:طيب بشتغل؟
بعد الشغل انا كنت بخرج ابني يوميا بعد الشغل؟

س:طيب حالتي الماديه مش متيسره؟
بقولك مكان عام انا كنت بروح اوديه حديقة بجنيه لو مش هتقدر تدفعي جنيه مشيه في الشارع او جناين عامه الي في الشارع

س:طيب الشتا؟
كل الأبحاث بتقول ان الخروج في البرد بيزود المناعه مش يقللها زي ما فاكرين
بالعكس القعاد في البيت يضعف المناعه عشان التهويه مش متجدده

س:طيب الواجبات والاكل؟
خدوا اكلكم معاكم وحلوا الواجبات بره
وخدي معاكي ترمس شاي عشان توفروا المشاريب

خرجوا ولادكم خرجوا ولادكم خرجوا ولادكم

وشوفوا تأثير ده عليهم وعليكم

تلات اربع المشاكل هتتحل والله
(العصبيه_فرط الحركة _ادمان الالكترونيات.... الخ)

14/02/2026

دي اشعه طفل عمره ٨ شهور

الطفل كانت شكوته انه بيشتكي من سخونيه متكرره وضعف في زياده وزنه

بعمل تحليل بول تبين ان عنده نسبه صديد عاليه بالبول

اخد علاج للصديد كذا مره

لكن الشكوي ما زالت مستمره

ونسبه الصديد عاليه جدا في البول

الخطوه اللي بعد كده في التشخيص هي اجراء اشعه تلفزيونيه واشعه تصاعديه بالصبغه

MCUG

لازم وضروري لتشخيص سبب تكرار العدوي

الاشعه التصاعدية بالصبغه علي مجري البول والمثانه

كانت هي كلمه السر في التشخيص

اتضح ان الطفل عنده ارتجاع بول من المثانه علي الحالبين

وارتجاع من الدرجه الرابعه

وده تسبب في التهابات شديده ووجود ميكروب مقاوم للعلاجات والمضادات الحيويه

الحمد لله الطفل عمل العمليه الأسبوع اللي فات

الرساله اللي بحب اوجهها لكل الناس من البوست ده

السخونيه المتكرره ليها اسباب وعلي رأسها

حمي البحر الأبيض المتوسط

حمي البافابا او متلازمه مارشال

التهابات مجري البول

كل مرض ليه صورته وشكله ولازم نوصل للسبب علشان العلاج يبقي فعال

الاشعه بالصبغه مش حاجه خطيره والاطفال بتعملها عادي

مش بعبع الناس بتخاف منه ☹️

الحاله دي استحاله كانت تتشخص بدون عمل الاشعه دي

Cpd

13/02/2026

لما يكون عندك وقت…
ارجع بص لصور زوجتك زمان 🤍

افتكر شكلها وهي مرتاحة، بتنام براحتها، وتهتم بنفسها…
وبعدين بص لها دلوقتي وهي شايلة مسئولية بيت وطفل وحياة كاملة على كتفها.

الإنسانة دي ضحّت براحتها، وبنومها، وبشكلها وباهتمامها بنفسها…
علشان انت تسمع كلمة "بابا" وعلشان تربي طفل سليم وسعيد 👶💙

علشان كده بلاش في يوم تقول لها:
"إنتِ عملتي إيه عشاني؟"

لأن اللي عملته…
ما يتقاسش بفلوس ولا يتعوض بأي حاجة في الدنيا 💎

قول لها شكراً…
وقدّر تعبها…
وخليك سند ليها زي ما هي سند لبيتك وحياتك 🤍

13/02/2026

تسيبي بينهم سنه ، اتنين ، خمسه ، عشره .. هيمسكوا في بعض برضو والصغير هيبلطج على الكبير .. خديها قاعدة😂

12/02/2026

دكتور الاطفال لما يحب يسكت العيال إللى بتعيط قبل الكشف 💃

12/02/2026

😱 يا دكتور ابني مش بيشبع مني!
😢 كل اللي يشوفه يقول ضعيف وخاسس!
اكتبلي لبن صناعي!!

📌 طيب أنا كدكتور أحكم إزاي إن الطفل بيشبع من الرضاعة الطبيعية ولا لأ؟

✅ أولًا: علامات مبدئية تطمّن

▪️ الطفل يهدى أو ينام بعد الرضعة
▪️ تحسي إن الثدي فَرِغ أو خفّ بعد الرضاعة
▪️ بيبلل 5–6 حفاضات على الأقل يوميًا
▪️ بيعمل براز طبيعي (حسب سنه)

لكن 👇
دي علامات مبدئية بس… مش الحكم النهائي.

✅ العلامة الأهم 👈 زيادة الوزن

📊 الطبيعي إن معدل الزيادة يقل تدريجيًا مع العمر.

✳️ المعدلات التقريبية الطبيعية:

🔹 أول 3–4 شهور
الطفل يزيد حوالي 150–200 جرام في الأسبوع
(يعني تقريبًا 600–800 جرام في الشهر)

🔹 من 5–8 شهور
حوالي 100–150 جرام في الأسبوع
(يعني تقريبًا 500 جرام في الشهر)

🔹 من 9–12 شهر
حوالي 60–100 جرام في الأسبوع
(يعني تقريبًا 250 جرام في الشهر)

📌 في المتوسط:
وزن الطفل بيتضاعف عند عمر 4–6 شهور
ويبقى تلات أضعاف وزن الولادة عند عمر سنة.

يعني لو مولود 3 كيلو 👇
نتوقع يكون حوالي 9 كيلو عند سنة (متوسط طبيعي).

💥 نقطة مهمة جدًا
مش كل الأطفال شكلهم مليان = صحتهم أحسن
ومش كل طفل رفيع = محتاج لبن صناعي

المهم 👈 يمشي على منحنى النمو الطبيعي بتاعه
مش نقارنه بابن الجارة 😉

💬 شكوى شائعة:

أم طفل عنده 11 شهر تقول:
"ده كان بيزيد أكتر من كده الأول!"

وده طبيعي جدًا 👌
كل ما الطفل يكبر معدل الزيادة بيقل.

🤱 طالما:
✔️ الوزن بيزيد طبيعي
✔️ الطفل نشيط
✔️ التحاليل سليمة
يبقى غالبًا الرضاعة كفاية ومفيش داعي للبن الصناعي 👌

12/02/2026

- وماحمتوش الواد ليه من لما اتولد اديله ٣ شهور !! 😒
= عشان ميجلوش برد يادكتور ده لحمه طريه 🤕
- طب وجايبينه النهارده ليه🙄
= عشان عنده برد 😪

12/02/2026

لو شيلتي البيبي وقت النوم 🥰

هيتعود علي اهتمامك و احتضانك 🤗

ولو اتعود علي اهتمامك و احتضانك ، يبقي هيتوقع انه يكون دا موجود طول الوقت ⚘

ولو توقع ان دا هيكون موجود طول الوقت ، يبقي هيعيط لما ميكنش الاهتمام موجود 🥲

ولو عيط وقت ما كنتي مش موجودة بالإهتمام ، يبقي لازم تهتمي كمان شوية زيادة عشان يهدا 💕

ولو اهتميتي شوية زيادة عشان تهديه ، هيفتكر انك مضمونة ❤

و لما هيضمن وجودك و امانه في حضنك ، هيتوقع انك انتي اللي هتفهميه وقت ما يكون تعبان او زعلان او محتاج لحضنك ❣

ولما هتفهميه وقت ما يكون تعبان و زعلان ، هيعرف ازاي يتحكم في مشاعره و احساساه فيما بعد 😊

ولما يعرف يتحكم في مشاعره و احساسه ، مش هتمر عليه اوقات صعبة كتير ، و هيبقي من السهل انه يكون معاكي و مع غيرك علاقات صحية و ممتعة 😇

ولما يكون معاكي و مع غيرك علاقات صحية و ممتعة هيقدر يبقي شخص متزن في حياته مع نفسه و مع غيره 😍

ولما هيكون شخص متزن، هيقدر يعتمد علي نفسه اكتر 🤗

ولما هيقدر يعتمد علي نفسه اكتر فيما بعد، هيبقي خلاص مش محتاجك تشيليه بعد كدة و يمكن هو كمان اللي يكون قادر يشيلك و يساندك وقت ما تحتاجيه 💘

احضنوا البيبيهات و شيلوهم وقت ما يعيطوا شيلهم هيعلمهم انكم بتحبوهم و موجودين عشانهم و بعدكم عنهم هيعلمهم من بدري اوي انهم مش مهمين و احاسيسهم مهملة 🥲 و دا مش كويس لتطورهم ال*قلي ولا النفسي 👌

طيب امتي مطلوب من البيبي يعتمد علي نفسه اثناء النوم ؟
من سن ٥ ل ٧ اشهر حسب ادخال الاكل و شرب الماء و التعود علي روتين يومي ليلي و صباحي ❤

🔥 حمل الرضيع واحتضانه عند البكاء، خاصة في الشهور الأولى، يعزز الإحساس بالأمان، ويساعد على نمو نفسي وعاطفي سليم، ولا يؤدي إلى الاعتماد الزائد كما يعتقد البعض.
ومع التقدم في العمر ووجود روتين نوم ثابت، يتعلم الطفل تدريجيًا الاعتماد على نفسه في النوم 🥰

11/02/2026

افهمى طفلك 🤔🤔

🔸الطفل من بعد السنة بتحصله تغيرات كتيرة ..
بيتحول من طفل عبيط كده .. قاعد ياكل وينام ويعيط 😭
لواحد تاني خالص بيعترض ويقول لأ ..ومش راضي يقعد ساكت وبيجري هنا وهناك ومزهقنا عاوز يمسك كل حاجة ويلعب في كل حاجة حواليه .. ويفتح الأدراج ويدخل المطبخ وياخد مني موبايلي 😥 ..

🔸الأم اللي إبنها كده دي أم شاطرة وعرفت تدمج إبنها بالعالم اللي حواليه بسرعة .. وحقها تفرح وتتنطط علينا 😃 .
لانها عملت انجاز رهييييييب .. ف أمهات تانية للأسف تتمني إبنها يعمل ربع الحاجات دي ☝☝

📌 تيجي أم تقولي طيب أعمل إيه عشان فرحتي تكمل ومدخلش في صدام معاه وأتجنب عِنده وعصبيته ؟!🤔

🔸حاضر .. هقولك تعملي ايه ..
علشان نكون مُتفقين .. العِند والصُراخ هيجي إمتى؟!
هيجي لما هو يكون عاوز حاجة والحاجة دي إما خطر عليه أو إنتي مش عاوزة تديهاله أو الحاجه دي مش بتاعته ومش هعرف أجبهاله ..

📌 أولاً .. الحاجات الخطر ... بصي يا ست الكل إنتة من أول ما إبنك يوصل السن ده تشيلي أى حاجة خطر من قدامه

✅ نقفل فيش الكهرباء
✅ نرفع الشاشه في مكان عالي
✅ نقفل النيش
✅ نقفل المطبخ أو نخبي الحاجات الخطيرة زي السكاكين والمقصات والمنظفات وغيره وسيبيه يلعب بالباقي 👍..
لو ظبطتي الدنيا هترتاحي منه وهتسبيه يلعب ويكتشف براحته من غير صراخ وعياط 👌

📌 ثانياً .. ايه الحاجات اللي مش عاوزة تديهاله؟
مثلا الفون .. مش عاوزاه يصرخ عليه يبقي متمسيكهوش قدامه .. طب لو اخده منك تعملي إيه ؟ .. تسبيه يلعب بيه شوية وأول ما يغفل عنه جري تخفيه بعيد عنه ولا من شاف ولا من دري 😂 ..

📌 ثالثاً .. بقي لو عيط على حاجه بتاعة حد غريب .. تمشي من المكان فوراً ..
- أيوة تمشي .. لأن إبنك يا ست الكل مش هيسكت ومش هيتنازل عن الحاجة اللي عايزها ..
يا إما تشيلي الحاجة دي من وشه خالص وتشغليه بحاجة تانية ..
▪️تيجي وحده او واحد من اللي قاعدين.. (جهله ولا يعرفوا حاجه عن الطفوله وازاي نتعامل مع الطفل )
يقولك ايه الدلع ده .. انتي مش عارفه تربي .. أنا لو مكانك كنت اديته بالقلم علي وشه 😲 ..
▪️بصي ولا كأنك سمعتي حاجه.. دول ناس متخلفة ولا تفهم أي حاجة .. لو سمعتي كلامهم ابنك هيطلع حاجه من الاتنين

1️⃣ عصبي وعِندي وكل حاجة هيطلبها بالصراخ والضرب ..
لانه طفل شخصيته قوية ومش هيتنازل ..
2️⃣ هيسكت ويخاف ويبقي بشخصيه ضعيفه بكرة وبعده يِضرَب على قفاه ويجي يعيطلك .. وتيجي تشكي تقولي أعمل إيه لإبني عشان محدش يضربه وتبقي شخصيته قويه!
قويه منين بعد ما دمرتيها 😣🤔🤔

💥 من الأخر حاولي تتجنبي أنك تدخلي في صدام معاه ..
خليكي ذكية واعرفي تضحكي على إبنك إزاى
راح ولا جه ده حتة عيل مطلعش من البيضه 👍😃

10/02/2026

👶💕 النونو الرضيع وطلب الاهتمام… طبيعي جدًا (ومن غير عنف حقيقي 😄)

الرضيع ما يعرفش يتكلم،
فبيستخدم كل وسيلة عنده علشان يقول:
«أنا محتاجك» 🤍

وده طبيعي وصحي جدًا 👇

1️⃣ هيعيط ويصرخ
لحد ما تقربي وتشيلـيه 🥰
العيّاط هو وسيلة التواصل الأولى للرضيع، مش دلع.

2️⃣ وهو في حضنك
لو حس إنك مش مركزة معاه،
ممكن:
يشد شعرك
يشد ودنك
يمد إيده يخبط خبطات عشوائية
يشد هدومك
👈 ده مش عنف، ده تطور حركي ومحاولة لجذب الانتباه 😂

3️⃣ هيعيط أول ما تحاولي تسيبيه
لأنه لسه ما يعرفش معنى “هرجع كمان شوية” 🥲
بالنسبة له:
اختفائك = خطر.

4️⃣ أول ما تقربي
هيرفع إيده أو جسمه علشان يتشال
وده اسمه استجابة ارتباط (Attachment response)
ويا ويلك لو طنشتي 😅🤣

5️⃣ هيبوسك 🤗
حتى لو البوسة كانت عضّة خفيفة أو ل*ق عشوائي 😄
دي طريقته في التعبير عن الحب.

6️⃣ غالبًا يفضل الرضاعة من جهة معينة (غالبًا الشمال)
علشان أقرب لضربات قلبك
الصوت اللي كان متعود عليه وهو في بطنك ❤️
وده تفسير عاطفي شائع، ومقبول سلوكيًا.

7️⃣ هيزحف وراكي وينده عليكي بالأصوات
المناغاة المتكررة معناها:
«أنا موجود… ردّي عليّ» 🙉
وده تطور لغوي طبيعي جدًا.

8️⃣ يبص في عينيكي كتير 🤩
وده أساس تكوين:
الأمان
الارتباط
الذكاء الاجتماعي لاحقًا

9️⃣ يضحك لك أول ما يشوفك 😍
خصوصًا بعد النوم
لأنك بالنسبة له:
الأمان
والدفا
والحياة كلها.

🔟 الحضن الكتير مش بيدلّع
بالعكس 👌
الأطفال اللي اتشالوا واتحضنوا كويس
بيطلعوا:
أكثر أمانًا
أهدى
وأقدر على الاستقلال لاحقًا 😌💙

🩺 الخلاصة الطبية
✅ كل السلوكيات دي طبيعية جدًا
✅ ما فيش حاجة اسمها رضيع مدلل
❌ تجاهل الاحتياجات العاطفية هو اللي يسبب مشاكل مش العكس

الرضيع اللي يشبع حب…
يكبر مطمّن ❤️

بابا العيال د محمد الملا إستشارى طب الاطفال

16/02/2026

15/02/2026

14/02/2026

14/02/2026

13/02/2026

13/02/2026

12/02/2026

12/02/2026

12/02/2026

12/02/2026

11/02/2026

10/02/2026

Address

Website

Alerts

Shortcuts

Share