18/05/2026
كل عام وأنتم بخير
بوست طويل ومهم بمناسبة ان بعض مرضانا الكرام من المصاحبين لمرض السكر بيحبوا يصوموا العشر الأوائل من ذى الحجة فدى بعض النصائح لصيام آمن:
النصائح دى لمرضى السكر من النوع الثاني واللى سكرهم منضبط على العلاج فى آخر شهر على الأقل وبموافقة طبيبهم المعالج
لا ينصح بالصيام لمرضى النوع الأول والأطفال ومرضى النوع الثاني اللى سكرهم بيعلى أو بينخفض أو أصيبوا بنوبات إنخفاض السكر بالدم أو غيبوبة إرتفاع السكر أو بيعانوا من مضاعفات شديدة
المرضى اللى هيصوموا يجب عليهم الإكثار من السوائل وعدم التعرض للشمس المباشرة وعدم العمل فى درجات الحرارة المرتفعة
وجبة السحور مهمة ولايجب تركها وتجنب فيها تعاطى المشروبات المنبهة مثل الشاى والقهوة
وجبة الإفطار يجب أن تكون متنوعة بين الخضروات والبروتين والتقليل من النشويات
يجب قياس السكر مرتين خلال الصيام مرة ١٠صباحا ومرة ٣عصرا ويجب الإفطار مباشرة فى حالة هبوط السكر عن ٧٠ أو إرتفاعه عن ٣٠٠
بالنسبة للمرضى اللى هيصوموا وسكرهم منضبط ومن النوع الثاني المعتمد على الأقراص لو بتاخد قرص قبل الفطار من مجموعة ال sulfonylurea زى الدياميكرون أو الأماريل هتاخده المغرب قبل وجبة الإفطار ولو بتاخد معاه نوع أقراص تانى بعد وجبة الغداء أو العشاء من مجموعات DDP4 أو SGLT2 أو metformin هتاخده بعد وجبة السحور(مثال لو مريض بياخد دايميكرون قبل الفطار هياخده وقت المغرب قبل الفطار ولو بياخد معاه جالفز ميت أو فيلداجلوز أو جليبتس هياخده بعد السحور)
بالنسبة للمرضى اللى هيصوموا وسكرهم منضبط ومن النوع الثاني المعتمد على الأنسولين وبياخد نوع الأنسولين المختلط زى الميكستارد الجرعة اللى بتاخدها قبل الفطار هتاخدها هى هى فى المغرب قبل وجبة الإفطار أما الجرعة اللى بتاخدها قبل العشاء هتاخد نصفها قبل وجبة السحور(مثال لو مريض بياخد أنسولين ميكستارد تركيز ٧٠/٣٠ وبياخد قبل الفطار ٤٠وحدة وقبل العشاء ٢٠وحدة هياخد فى الصيام قبل الإفطار ٤٠وحدة وقبل السحور ١٠وحدات)
بالنسبة للمرضى اللى هيصوموا وسكرهم منضبط ومن الثاني المعتمد على الأنسولين وبياخد نوعين من الأنسولين نوع قاعدى زى اللانتوس مرة بالليل ومعاه أنسولين مائى أو مايعرف بأنسولين الوجبات زى النوفورابيد أو الأبيدرا ٣مرات فى اليوم هياخد اللانتوس بنفس الجرعة الساعة ١١مساءا وهياخد المائى مرتين بدل تلاتة، الجرعة بتاعة الغداء هتتاخد فى وجبة الإفطار والجرعة بتاعة الفطار تتاخد فى السحور (مثال لو مريض بياخد لانتوس ٣٠وحدة وبياخد ابيدرا قبل الفطار ١٠وحدات وقبل الغداء ٢٠ وحدةوقبل العشاء ١٠وحدات هياخد اللانتوس ٣٠وحدة الساعة ١١مساءا وهياخد ٢٠وحدة ابيدرا وقت المغرب قبل وجبة الإفطار و١٠وحدات ابيدرا قبل وجبة السحور
ملحوظة أخيرة النصائح دى إرشادية ويجب مراجعة طبيبك المعالج
إن يك صوابا فمن الله، وإن يكن خطأ فمني ومن الشيطان
أسأل الله العلي العظيم أن يكون هذا العمل لوجهه الكريم وأن يوفقنا جميعا إلى مايحب ويرضى ويجعلنا من حجاج بيته الكريم فى العام القادم ان شاء الله
نسألكم الدعاء
وكل عام وانتم بخير
دكتور مصطفى جبريل
إستشارى الباطنة العامة والسكر والكبد والجهاز الهضمى
