د. محمد حسني شلبي

04/01/2023

دهون الكبد باختصار :
من كل 10 بيجوا العيادة تقريبا 2 او 3 عندهم دهون على الكبد.
وتقريبا نص اللي عندهم سكر من النوع التاني عندهم دهون على الكبد.
وتقريبا دهون الكبد موجودة عند تلتين اللي عندهم سمنة.
____________
المعظم بدون اعراض وبيتم اكتشافه اثناء الكشف او التحاليل و السونار ولكن ممكن اعراض مثل الإرهاق المستمر وعدم الراحة بالبطن.
علاج دهون الكبد ممكن يمنع حدوث السكر
____________
الرياضة والحركة ✔
الخضار والفاكهة الطازجة ✔
زيت الزيتون ✔
السمك ✔
القهوة ✔
قليل من اللحوم الحمراء و السكريات❌❌
_____________
للمزيد من المعلومات والعلاج تواصل معنا .
د. محمد حسني شلبي
اخصائي الكبد والجهاز الهضمي , ماجيستير الباطنة العامة
طلخا _ ميت الكرماء _ بجوار الجمعية الشرعية
مواعيد العيادة من الساعة 5 مساء حتى 10 مساءا
0502595094
01015438626

22/12/2022

الحمد لله :)
ان ربنا يكرمنا بالتشخيص السليم للحالة خاصة لو الحالة صعبة في التشخيص أو نادره ده فضل من ربنا يستحق الشكر .
لأن العلاج السليم ممكن يحمي المريض من مضاعفات خطيرة.
___________________
الحالة بيجيلها ألم شديد جدا في البطن كل فترة ( كل شهر أو اتنين مثلا )
الألم يفضل موجود يومين أو تلاتة وفجأة يروح .
بيعتقد انه قولون , لخبطة أكل , او التهاب في المعدة , مغص كلوي , أو حتى الزايدة !!!
ويعمل عملية الزايدة ولسه الوجع بيجيله كل فترة !!!
____________________
حالة النهارده هي حالة ( حمى البحر الأبيض المتوسط )
و علشان احنا من بلاد البحر الأبيض المتوسط فالمرض موجود بنسبة كبيرة عندنا . بس للأسف ناس كتير ممكن يكون عندها بس ما اتشخصتش .
_________________
الحالة تشخيصها بيكون أولا ( بالكلام مع الحالة ) واخذ تفاصيل التعب كويس
علشان كده ( الكلام مع الحالة مهم جدا جدا )
ثانيا الكشف والفحص بيوجهنا لطلب الفحوصات اللازمة اذا كان لها ضرورة .
** وده دورنا الكلام مع الحالة والفحص الكويس **
_______________
حمى البحر الأبيض المتوسط
نوبات متكررة من الحُمى ( وممكن من غير حرارة كمان) والتي تكون عادة مصحوبة مع ألم في البطن او الصدر او المفاصل .
برغم ان تشخيصها صعب و ممكن يكون العيان لف كتير وعمل عمليات كمان !
إلا إن علاجها ( غالبا ) بسيط ورخيص .
حباية كولشيسين بيمشي عليها يوميا , بتحميه من هجمات المرض .
وضروري المريض ما يوقفهاش خالص علشان يحافظ على الكليتين من مضاعفات المرض اللي ممكن توصل للغسيل الكلوي .
ويتابع باستمرار بتحاليل وظائف الكبد والكلى .

فيه حالات قليلة مش بتستجيب للكولشيسين وساعات بتحتاج علاج بيولوجي او مناعي .
______________
ربنا يرزقنا جميعا الصحة والعافية

16/12/2022

09/12/2022

:D

09/12/2022

حوار متكرر في العيادة والمستشفى.
_ " بعد قياس الضغط " انت ضغطك عالي يا حاج .
= أيوه ما أنا عارف , أنا قيسته ( كذا مرة) ولقيته عالي , بس أنا مش حاسس بحاجة ومش باخدله علاج .
____________ لحظة صمت _______________ :(

للأسف الموضوع رغم انه خطير جدا وبيتسبب في أمراض كتير وقد يسبب الموت المفاجئ إلا اننا معظمنا مش بنهتم بيه .

*** نصيحة مهمة قبل ما أكمل البوست:
( أي حد ما قاسش ضغطه قبل كده لازم يقيسه سواء كان كبير أو صغير في السن ). الموضوع بسيط ومش هياخد منك دقايق ما تكسلش .
_________________________________
_من كل 10 بكشف عليهم 3 أو 4 بيطلع ضغطهم عالي.
_نص مرضى الضغط المرتفع ما يعرفوش انهم عندهم الضغط .
( اسمه القاتل الصامت )
وللأسف عدد كبير من مرضى الضغط ممكن يكتشفوه بعد ما يعمل المضاعفات بتاعته و اللي ممكن تكون خطيرة .
_________________________________
_ امتى نقول ان الضغط مرتفع ؟ وانه محتاج متابعة وعلاج ؟
=اذا كان أكثر من 140/90 .

_طيب لو ضغطي طلع أقل من 140/90 ؟ كده خلاص ماقيسهوش تاني ؟
**** لا طبعا
= لو ضغطك أقل من 120/80
قيسه كل 5 سنين على الأقل أو لو فيه فرصة أقرب .
= لو ضغطك من 120/80 حتى 130/85
على الأقل كل 3 سنوات
= لو ضغطك من 130/85 حتى 140/90
يبقى تقيسه كل سنة , ولو انت كبير في السن يبقى تقيسه كل 6 شهور .

________________________
الضغط ممكن يأثر على القلب والأوعية الدموية والمخ والعين والكلى ويسبب مضاعافات خطيرة.
فيه حاجة اسمها SCORE2 زي آلة حاسبة كده بتحسب احتمالية حدوث المضاعفات دي.
( بيشوفوا احتمالية حدوث المضاعفات دي قبل ما تحصل !! )
وبناءا على نتيجة الاسكور بيتحدد احتمالية الخطورة وايه المفروض يتعمل على حسب السن وضغط الدم و مستوى دهون الدم .
وده لينك الاسكور ده
https://heartscore.escardio.org/Calculate/quickcalculator.aspx?model=veryhigh&_ga=2.248765187.581535715.1670567633-1262376703.1670567633
___________________________
* لو ضغطك عالي وشربت كركدية العطارة كلها ضغطك مش هيتظبط .
طبعا فيه نصايح لمرضى الضغط بيتبعوها لكن في الغالب لازم أدوية معاها وبالذات لو الضغط عالي بزيادة .
أهمها تقليل الملح لأقل من 5 جرام ملح بس في اليوم .
ممارسة الرياضة
تقليل الوزن
الامتناع عن التدخين
تناول الخضروات والفواكة الطازجة وزيت الزيتون
وتقليل اللحوم الحمراء والدهون
الابتعاد عن الأدوية اللي بترفع الضغط زي المسكنات , و ادوية احتقان الأنف ( والبرد ) و حبوب منع الحمل وأدوية اخرى
ده غير العرقسوس بالذات وبعض الأعشاب .
ومفيش أي سيرة عن الكركدية في أي مصدر ذاكرت الضغط فيه :D
______________________
في النهاية لو انت ضغطك عالي لازم تظبطه بالمتابعة والعلاج .
فيه أدوية بسيطة ممكن تحميك وتحمي حياتك وحياة اللي بتحبهم.

ودمتم في خير وعافية ان شاء الله

17/11/2022

اشرب مايه لأن مع بداية البرد شرب المايه بيقل,
وده بيزود حالات الحصوات والأملاح وكذلك الامساك والصداع والارهاق .
واليومين دول الحالات دي بدأت تزيد.
ده غير تأثير الجفاف على الكلى ومرضى السكر والكبد .
النصيحة اللي بقولها لمعظم الناس اليومين دول (اشربوا مايه كويس).
طيب ببساطة تعرف انت بتشرب مايه كويس ازاي ؟
1_ لو كنت مش بتحس بالعطش غير قليل جدا , يعني بتشرب قبل ما تعطش, لأن مجرد الاحساس بالعطش غالبا من علامات الجفاف.
2_ لو كان البول عديم اللون أو اصفر فاتح .
ايه كمية الماء الذي يحتاج اليها الشخص ؟
في المتوسط 8 أكواب ماء ( 2 إلى 3 لتر ) يوميا .
طبعا بتختلف من شخص لآخر على حسب حرارة الجو ونشاط الشخص نفسه.
الشخص البالغ السليم في الجو المعتدل يحتاج
15.5 كوب تقريبا (3.7 لتر) من السوائل يوميًا للرجال
11.5 كوب تقريبا (2.7 لتر) من السوائل يوميًا للنساء
ربنا يعافيكم ويحفظكم جميعا .

12/11/2022

برغم من ان الطب مهنة كلها ضغوطات مادية ومعنوية.
سواء من ناحية المذاكرة أو الامتحانات أو المتابعة والمذاكرة المستمرة دايما دي.
او من ناحية التوتر والقلق من العبء النفسي للمهنة نفسها اللي بتتعامل مع شقاء او راحة الناس واحيانا حياتهم.

برغم ده ( واكتر) ، إلا إن اكتر سبب للاستمرار في المهنة دي هو اللحظات اللي اي طبيب بيحس فيها ان ربنا وفقه في تشخيص وعلاج مرض كان مسبب ضرر و شقاء لحد ، وان ربنا جعله سبب في تحول الشقاء ده لشفاء وراحة.

الحمد لله وحده ، اللهم اجعلني سبب في الشفاء ولا تجعلني سبب في الشقاء لأحد.

الرسالة دي من أكتر الرسايل اللي فرحتني 💚🙏

24/06/2022