20/01/2026
ازيكوا احلى ماميز 😊😊
البيبي يرضع كل ساعة! طبيعي ولا مشكلة؟”
الرضاعة العنقودية
كتير أمهات أول ما طفلهم يبدأ يرضع كل ساعة أو أقل يفتكروا إن اللبن قليل…
بس الحقيقة إن ده غالبًا مش نقص لبن أبداً، ده اسمه:
الرضاعة العنقودية (Cluster Feeding)
وهي مرحلة طبيعية جدًا في الأسابيع الأولى.
ليه البيبي يعمل رضاعة عنقودية؟
1️⃣ عشان يزوّد اللبن:
أهم وظيفة للرضاعة العنقودية إنها “تطلب” من الجسم إنتاج كمية أكبر.
الطفل هو اللي بيبرمج جسمك… كل ما يرضع أكتر، اللبن يزيد أكتر.
2️⃣ لأن اليوم بيقرب يخلص:
بتظهر غالبًا بالليل… لأن هرمونات الجسم بتكون أنشط، والطفل محتاج قرب أكتر.
3️⃣ للراحة والاطمئنان:
البيبي مش بس بيشرب… البيبي بيهدى.
المسكة، ريحة جسمك، صوت قلبك… كل ده يقلل توتره ويخليه يلزق فيك أكتر.
4️⃣ طفرة نمو (Growth spurt):
الأطفال عندهم أيام معينة يرضعوا فيها بشكل مكثف علشان جسْمهم داخل على نقلة نمو.
طب إمتى نقلق؟
لو البيبي بيرضع كل ساعة لكن:
* الحفاضات قليلة
* وزنه مش بيزيد
* عصّبي جدًا على الثدي
* الرضعة قصيرة جدًا (دقيقتين – 3 دقايق)
يبقى لازم تقييم رضاعة.
لكن لو:
* بيرضع كويس
* بينام بين الرضعات
* حفاضاته كويسة
* وزنه بيطلع
يبقى ده طبيعي تمامًا ومش علامة أبداً على قلة اللبن.
إزاي تتعاملي مع الرضاعة العنقودية؟
* خديها بهدوء… هتعدّي.
* رطّبي صدرك كويس.
* بدّلي الوضعيات عشان تقللي الألم.
* قربيه ليكي اكتر قبل النوم.
* نامي وقت نومه… مش لازم تفضّلي صاحية.
أهم حاجة تعرفيها:
الرضاعة العنقودية “علامة صحة” مش “علامة مشكلة.
د.يارا علاء الدين بيومى .
استشارى دولى رضاعة طبيعية.
رئيس قسم الاطفال و الحضانة مستشفى المنصورة العسكرى .(س)
اخصائى حساسية صدر و تغذية اطفال .
د.دكتوراة طب الاطفال و حديثى الولادة.
للحجز و الاستفسار:٠٥٠٢٥٢١٨١٩...٠١٥٥٨٣١٣٩٦٠
📍اول طلخا شارع صلاح سالم فوق ميلانو الدور الرابع بالاسانسير.
فرع شربين :شارع السلك خلف اجزخانة الذكى بجوار عنجوجة للسيارات.
