28/08/2025
السلام عليكم
النهاردة الترابيزة عليها حلاوة المولد مش علشان ناكلها، لأ… علشان نحللها 😂
نصلي عالنبي ﷺ، ويلا بينا…
⬅️ إيه قصة الحلاوة؟
حلاوة المولد معمولة من سكر أبيض (كتير جدًا)، ومعاه سوداني/حمص/سمسم/فول… الحاجات دي صحية في الأصل مليانة بروتين ومغذيات،لكن لما بيتغطسوا في بحر السكر، النتيجة بتكون قنبلة سكرية بجد!
🩸 التحاليل بتقول إيه بعد حلاوة المولد؟
ركز معايا:
- أول ما السكر يدخل الجسم (سكر السكروز) بيتكسر لـ جلوكوز + فركتوز.
- الجلوكوز يرفع السكر في الدم بسرعة Postprandial Hyperglycemia.
- الفركتوز يروح عالكبد ويتحول لدهون وده يرفع الدهون الثلاثية (TG).
- الجلوكوز العالي يخلي البنكرياس يطلع إنسولين جامد ومع التكرار يحصل مقاومة إنسولين (Insulin resistance).
- الكبد يتعب من الفركتوز والدهون المتخزنة وده يزود إنزيمات ALT & AST.
- السكر الأبيض كمان ممكن يقلل الكوليسترول النافع (HDL) ويرفع TG يعني القلب مش هيتبسط.
في بعض الحالات السكر بيزود مؤشرات الالتهاب زي CRP.
⬅️ طب بتحس بإيه بعد ما تزود في الحلاوة؟
خمول وكسل بعد الأكل.
عطش رهيب.
شوية انتفاخ أو مغص لو زودت الكمية.
⬅️ طيب ناكلها ولا نديها بلوك؟
لا يا عم، كل واتبسط، بس بعقل
قطعتين كفاية، مش نص صينية.
وخد بالك لو مريض سكر لازم تظبط الجرعة وتخلي بالك.
ولو رايح تعمل تحاليل صايم تاني يوم بلاش تلعبها وتاكل بالليل
اختار اللي فيها سوداني أو سمسم أكتر… دي أرحم من اللي كلها سكر صافي.
حلاوة المولد = سعادة سريعة وسكر عالي،
تحليلك بعدها = رقم ممكن يخضك!
هي مش متهمة، لكن السكر الأبيض هو اللي سوابقه تقيلة
