20/03/2026
✍️✍️ بمناسبة العيد كل سنة و أنتم طيبين و بما إن ده موسم الكحك بسكر و الحلويات عموما أكيد السؤال التقليدي اللي بيتكرر كتير جدا عن علاقة السكر بالأورام و هل تناول السكر ممكن يكون سبب في حدوث الأورام أو يكون سبب في زيادة الاورام؟! 👇👇
💥 اولا بنطمن حضراتكم ان المعتقد السائد عن العلاقة بين السكر و الاورام غير صحيح علي الإطلاق....إيه تاني؟؟
💥 مريض الأورام زيه زي اي إنسان عادي في النقطة دي...يعني ايه؟؟
✍️✍️ يعني ناخد السكريات او الكربوهيدرات عموما بشكل معتدل و بدون إفراط...يعني ناكل كحك بسكر مفيش مشكلة بس نخللي بالنا ما نزودش و ما نفرطش🌹🌹
👈🏾👈🏾 نقطة مهمة جدا في تناول السكريات و الكربوهيدرات عموما و دي تنطبق علي الكل سواء كان مريض او لا ..ايه هي؟!
🗯 أحسن وقت لتناول السكريات هو إن الواحد يحللي بعد الوجبة الرئيسية زي الغدا ...طيب اشمعني؟!
👈🏾👈🏾 لأن تناول السكريات بالشكل ده بيساعد إن ما يحصلش صعود حاد و في وقت قصير لمستوى السكر في الدم بعد تناولها🌹
💥 لا يفضل أبدا تناول السكريات بين الوجبات لأن بيحصل عكس اللي لسه قايلينه بمعنى إنه بيحصل ارتفاع حاد و في وقت قصير لمستوى السكر في الدم ...طيب و ده ايه مشكلته؟
👈🏾👈🏾 لما بناكل السكريات لوحدها بين الوجبات زي كحكة بسكر مثلا أو قطعة كيك و بعد الارتفاع الحاد في نسبة السكر في الدم بيحصل بعدها هبوط حاد في مستوى السكر في الدم و تبدأ مراكز المخ يحصل فيها إثارة و تطلب السكر تاني و ندخل في دائرة مغلقة تتنهي الى إدمان السكريات يعني المخ يطلبها طول اليوم و هو ده الضرر الحقيقي 🤚
✍️✍️ اذا كان نفسك في حاجة مسكرة بين الوجبات ما تاكلهاش لوحدها أبدا 🤚 ..... يكون مع السكريات دي حاجة تغطيها زي اي بروتين...ناكل السكريات مثلا مع زبادي لأن ده بيساعد الجسم إنه يتعامل مع الحاجتين مع بعض..👏
🌺🌺 الخلاصة.... احنا مش ممنوعين من حاجة...الفكرة بس هي التنظيم و عدم الإفراط ...ربنا يديم علي الجميع الصحة و العافية 🌺🌺
