عيادة د.ايهاب الجمل للصدر وحساسية الاطفال dr.ehab el gamal chest clinic

26/07/2022

مع بداية الموجة السادسة الكورونا اللي كتير بيعتبرها دور برد من المروحة دي أهم النصائح:

*اي حد يتعب اليومين دول يحاول يعزل نفسه خصوصا عن كبار السن أو اللي عندهم أمراض مزمنة لأن دول اكتر فئة بيحصل لها مضاعفات

* الدور أغلبة بيبداء زي دور البرد وممكن يحصل بعدها حرارة أو صداع أو تكسير في الجسم لمدة ٢٤ ل ٤٨ ساعة والاعراض ممكن تبقي شديدة لكن في خلال يومين الأعراض بتتحسن وممكن يحصل احتقان في الزور وكحة ناشفة

*لو مش سن كبير او أمراض مزمنة إبداء بالباراسيتامول والراحة والسوائل و متابعة الأعراض وخصوصا اعراض الصدر

*كبار السن والأمراض المزمنة لازم يتابع مع دكتور

*اوعي حد ياخد حقنة كوكتيل البرد

*الدور أغلبه زي البرد ومضاعفاته بإذن الله قليلة

*بلاش الأدوية الكتير اللي بياخدها اي حد يتعب من نفسه وخصوصا أدوية السيولة والكورتيزون لازم دكتور اللي يكتبهم

*في ناس كتير بمجرد مايتحسن يبداء يمارس حياته طبيعي وده في مشكلتين مشكلة له لأن ممكن الأعراض ترجع شديدة تاني وثانيا ممكن يكون سبب في نشر العدوي

*اللي جاله كورونا قبل كده او اخد التطعيم ممكن يجيله تاني عادي وكمان ممكن ييجي بأعراض شديدة بس الفكرة أن المضاعفات و احتياج المستشفى بيبقي اقل بكتير جدا

ربنا يحفظ الجميع دمتم سالمين

30/09/2021

من أسواء الحاجات اللي بتحصل اليومين دول أن لما حد يجيله اعراض برد أو سخونية يروح الصيدلية وياخد حقنة البرد ودي عبارة عن ٣ حقن في بعض:

مضاد حيوي
مسكن
كورتيزون

اولا مافيش مضاد حيوي بتاخد جرعة واحدة دي طريقة غلط في العلاج بالمضادات
ثانيا أفضل مسكن بتاخد هو الباراسيتامول لأن أي حالة برد اليومين دول هي اشتباه كورونا

اخيرا الكورتيزون مالوش اي دور غير في بعض حالات الكورونا اللي في الرئة غير كده مالوش اي دور في البرد ولا في بداية الكورونا بالعكس دي بتقلل المناعة ولها اثار جانبيه كتير

اي حد يتعب اليومين دول أنصحه بالكشف ولو حب يبتدئ بحاجة يبقي الباراسيتامول والسوائل الدافئة والراحة مع متابعة الأعراض

14/09/2021

أنا مريضة حساسية صدر وباخد بخاخة كورتيزون ينفع اخد التطعيم ولا لازم اوقف البخاخة؟؟

مافيش تعارض بين التطعيم و استخدام بخاخة الكورتيزون لانه موضعي الكلام ده لو كورتيزون أقراص أو حقن ويبقي له علاقة بالجرعة ومدة الاستخدام

هل في تعارض بين التطعيم و والمضاد الحيوي؟؟؟

مافيش اي تعارض

ممكن اللي اخد التطعيم يجيله كورونا؟؟؟

اه ممكن بس الفائدة الرئيسيه للتطعيم أنه بيحمي من المضاعفات الخطيرة الكورونا ونسبة دخول المستشفى

لو جالي كورونا قبل كده اخد التطعيم ولا لا وايه المدة ؟؟؟

اه ممكن ناخد التطعيم عادي بعد ٢٨ يوم

ممكن التطعيم يكبر الغدد الليمفاوية ؟؟؟

اه ممكن وغالبا بتروح لوحدها ولو استمرت لازم تكشف

13/09/2021

و

بعض الأسئلة اللي جتلنا كتير الفترة الأخيرة

هل في تعارض بين تطعيم الكورونا و مصل الانفلونزا؟؟؟

مافيش تعارض بين تطعيم الكورونا (بكل أنواعه) وبين تطعيم الانفلونزا إنما بنسيب فرق مابينهم اسبوعين علي الاقل.

طاب لو جالي التطعيم الصيني بين الجرعتين ٣ اسابيع اعمل ايه؟؟؟

الأولوية حاليا لتطعيم الكورونا لأن مرض الكورونا اخطر ومضاعفاته اكتر فخد التطعيم الصيني وبعد الجرعة التانيه باسبوعين خد مصل الانفلونزا

هو لو اخدت تطعيم الكورونا كافي وماحتجش مصل الانفلونزا؟؟؟؟

التطعيمين مالهمش علاقة ببعض ولو اخدت واحد فيهم مايغنيش عن التاني ناخد الاتنين بس نسيب فرق اسبوعين علي الاقل

25/12/2020

اسئله كتير جدا بتيجي بخصوص العزل المنزلي لمرضي #الكورونا دي اهم القواعد والنصائح لمرضي العزل المنزلي اللي بتوضح ازاي يتعاملوا مع المرض في الفترة الصعبة بتاعة العزل ربنا يهونها عليهم وعلي كل مريض

١.قرار العزل المنزلي لازم دكتور هو اللي ياخده يعني مش اي حد يسخن أو يكح يعزل نفسه لازم الدكتور يحدد التشخيص وخطورة الحالة.

٢. في الفترة العزل حاول أن يكون في دكتور تتواصل معاه لان حيبقي عندك استفسارات كتير ويبقي معاك لو في طوارئ

٣. اي حد عنده فقدان حاستي الشم والتذوق غالبا عنده كورونا بقية الاعراض بتتشابه مع امراض تانية زي السخونية والكحة والنهجان والصداع والاجهاد.....

٤.المسحة مالهاش حاليا اي قيمة لا في التشخيص ولا المتابعة و ٤٠٪ من المسحات بتبقي سلبي ويبقي المريض عنده.

٥.الكورونا تتقسم لنوعين رئسيين معاها التهاب رئوي أو معهاش والنوع اللي مفيهوش التهاب رئوي بيبقي سهل وبسيط جدا زي دور البرد المشاكل ممكن تحصل في بعض حالات الالتهابات الرئوي

٦.الاشعة المقطعية علي الصدر من أدق الفحوصات اللي بنشخص بيها #الكورونا بس بتجيب النوع الي في التهاب رئوي بس يعني ممكن المقطعية تبقي سليمة ويبقي عندك كورونا

٧.مافيش حاجة في التحاليل اللي بتتعمل بتشخص الكورونا بس بتساعدنا في تحديد خطورة الحالة وكمان بتساعدنا في متابعة تحسن الحالة.

٨.لو في حالة اتشخصت التهاب رئوي واتعملها عزل منزلي الجهاز الوحيد اللي ممكن نحتاجه هو جهاز قياس الأوكسجين بلاش نجيب أجهزة كتير ملهاش لازمة.

٩.اهم الفيتامينات اللي بتتاخد هي فيتامين سي وفيتامين د والزنك ودول بيتاخدوا في جميع المرضى وكمان السليم بياخدهم لرفع المناعة

١٠. الناحية النفسية لمريض الكورونا نص العلاج في حالات كتير بتتدهور من الخوف والقلق والتوتر مع أن معظم حالات #الكورونا الحمدلله بتخف وبتبقي زي الفل والناحية دي بتبقي مهمة أهل وقرايب وأصدقاء المريض ومحدش يستهون بالنقطة دي لانها من أهم العوامل في تحسن الحالات.

25/12/2020

١١. ميعاد عمل الفحوصات بتاعة الكورونا مهم جدا لانه ممكن يتعمل بدري ويدي نتايج كويسه ويكون العيان عنده.

١٢.التحاليل بتتعمل بعد يومين من بداية ظهور الأعراض وأهم التحاليل هي صورة الدم الكاملة والسي ار بي ونسبة الفيرتين والدي دايمر

١٣.الاشعة العادية مالهاش اي قيمة في الكورونا بتعتمد بس على الأشعة المقطعية على الصدر

١٤.الاشعة المقطعية بتتعمل بعد خمس ايام لأسبوع من بداية الأعراض او لو في أعراض صدر واضحة زي النهجان او ألم الصدر او كحة مستمرة.

١٥.الخمس مراحل اللي في تقرير الأشعة المقطعية مالهمش علاقة بشدة الكورونا إنما معاهم احتمال الأشعة فيها كورونا ولا لا

١٦.الاشعة المقطعية لأي حد عنده كورونا وعامله التهاب رئوي بتتعاد بعد شهر من بداية العلاج مش اقل من كده علشان نتأكد انها مسابتش اي آثار او تليفات في الرئة

١٧.لو حد عمل مقطعية وظهر فيها كورونا لازم يتابع الاوكسجين باستمرار لان نقص الاوكسجين من أهم مضاعفات الكورونا وممكن الأوكسجين يقل ويبقى العيان مش حاسس فلازم متابعة بحهاز قياس الأوكسجين

١٨.الاوكسجين لو قل عن ٩٢٪ العيان حيحتاج اوكسجين ومحدش يجتهد ويتعامل مع الحالة لوحده لازم دكتور هو اللي يتابع الحالة ويحدد حتتعالج ازاي.

١٩.الحرارة من أهم الأعراض اللي لازم تتابع باستمرار في حالات بتيجي بدون حرارة في الأول وبعدها بتظهر وفي اوقات الحرارة بتختفي مع العلاج وترجع تظهر تاني والحرارة لازم تتقاس بالترمومتر وسجلها كل ساعتين

٢٠. مرضى الحساسية والجيوب الانفية اللي بتجيلهم الأعراض اللي متعودين عليها كل سنة في الفترة دي فبيعالجوا نفسهم انها حساسية نصيحة اكشفوا ولو الفحوصات اتطلبت اعملوها لان اعراض الكورونا شبه اعراض الحساسية

01/11/2020

البوست الخلاصة في فقدان حاسة الشم مع كوفيد ١٩ نقلا عن ا. د حازم محمد عبد التواب استاذ الأنف والأذن بالقصر العيني :

١- تم اكتشاف انه واحد من أهم علامات كوفيد وعادةً ترتبط حاسة الشم بحاسة التذوق.

٢- اذا فقدت حاستي الشم والتذوق بشكل مفاجئ ولم تكن مريض حساسية بالأساس فدي علامة غالبا مؤكدة لكوفيد ١٩.

٣- اللي بيصابوا بالعرضين دول بس غالبا بيمروا بسيناريو كوفيد لطيف احسن من باقي المصابين.

٤- اذا فقدت حاستي الشم والتذوق او الشم فقط دون سابق مرض او انذار الافضل تعزل نفسك لحين التأكد والشفاء.

٥- الاصابة بفقدان حاسة الشم غالبا بتتصلح لوحدها اقل تقدير اسبوع وبعض الناس وصلت ل ١٦ اسبوع حسب الاحصائيات والدراسات.

٦- عودة حاسة الشم لطبيعتها احيانا مش بتبقى كاملة وممكن المريض يرجع يشم بس مش زي الاول.

٧- بعض المرضى بعد فترة بيظهر عندهم عرض مؤذي اكتر وهوا ريحة سيئة في الانف احياناparosmia او cacosmia مع الاكل وبتكون ريحة مش حلوة.

٨- تعمل ايه لو مصاب بفقدان الشم: اعزل نفسك/ اعمل غسيل للأنف باستمرار/ اعمل تمارين الشم/ كورتيزون بخاخ لو
مفيش تحسن في خلال اسبوعين.

٩- تمارين الشم تجيب اربع زيوت الورد والليمون والقرنفل والاوكاليبتوس او الكافور او غيرهم لو مش لاقي حاجة منهم وتحطهم جنب بعض وتشم واحده واحده بهدوء من غير نفس قوي لمدة ٢٠ ثانية وبعدين تسيبها وتاخد نفس عميق بعيد وتروح تشم التانية لنفس التوقيت وقابلة للاعادة اكتر من مرة في اليوم وثبتت كفاءتها بشدة.

١٠- لو في ريحة وحشة في الانف بتاخد وقت وبتتصلح مع غسول الانف باستمرار والبعد عن الروايح المؤذية .

25/09/2020

ده شكل التطعيم بتاع السنة دي اللي نزل في المصل واللقاح

*جنب اسم التطعيم الانفلوفاك حتلاقي مكتوب كلمت تترا وده معناه ان ده التطعيم الرباعي

*لازم نتأكد من السنة اللي موجودة جنب اي تطعيم حيتاخد انه بتاع السنة دي 2020/2021

*التطعيم ده مبيتاخدش لسن اقل من ٣ سنوات

*الجرعة واحدة للكبار والصغيرين

*لو من ٣ ل٩ سنوات بياخد مرتين بينهم شهر لو اول مرة ياخده.... لو اخده قبل كده حتى لو التطعيم الثلاثي هي مرة واحدة

*التطعيم سعره ١٧٠ جنية

22/09/2020

مراكز المصل واللقاح لإعطاء مصل الإنفلونزا

ملحوظة مهمة....... التطعيم الموجود بالمصل واللقاح هو الانفلوفاك الرباعي ومابيتاخدش الا من سن ٣ سنوات فاكتر اقل من كدة مش حياخده

22/09/2020