03/08/2024
عندك طفل بيتمرن سباحة وعنده حساسية صدر يبقى ركز معايا البوست ده ليك 👌
السباحة 🏊 رياضة ممتازة لمريض حساسية الصدر لأنها بتحسن جداً وظائف الرئتين وبتقوى عضلات التنفس والانتظام في تمرين السباحة بيقلل الأعراض بشكل ملحوظ ده كلام بقوله كل يوم للحالات عندى فى العيادة 📝
لكن دايماً بننسى الشروط المهمه جداً عشان نوصل للهدف ده ☠️
⬅️ ابنك هيوقف التمرين ف فترة الانتكاسات أو فى حالة وجود أعراض (كحه /ضيق تنفس /بلغم /تزييق /نهجان /كتمة نفس )
فى الوقت ده التمرين هيضره مش هيفيده وساعتها لازم نوقف التمرين ونرجع للدكتور لحد ما حالته تستقر ونسيطر على الأعراض.
📌 طيب يا دكتور مفيش أعراض طول اليوم بس بتيجي لما بينزل التمرين ؟ يبقى هنكمل تمرين عادي ونرجع للدكتور يظبط جرعات العلاج الوقائى ويحددلك بخاخة ناخدها قبل التمرين بس
📌طيب يا دكتور ابنى ماشى بعلاج وقائى ومفيش أعراض ؟
⬅️ يروح تمرين عادى.
📌 طيب يا دكتور ابنى خلص فتره العلاج الوقائى ومفيش أعراض ؟ ⬅️ يروح تمرين عادى.
📌 طيب يا دكتور ابنى بيجليه أعراض بس بسيطة ؟ يبقى ترجعى للدكتور وهو اللى يقرر
هل دى اعراض حساسية بسيطة ؟ asthma symptoms ⬅️ يبقى نروح التمرين عادى.
ولا دى نوبة حساسية ؟ asthma exacerpation⬅️
ساعتها هنوقف التمرين.
يعني مهم أوووى نتابع ونكون مركزين مع أولادنا كويس 🚨
نيجى بقى لأهم حاجه اللى محدش بيدور عليها وده ممكن يسبب لابنك كواااارث حقيقية حتى لو هو رايح التمرين كويس ومفيش أعراض ظاهرة عليه ألا وهى ((نسبة الكلوووووووور ف الميه))
الكلور مهم للتطهير والتعقيم وقتل الجراثيم في الميه لكن بنسبه محدده المفروض تكون( 0.2 - 0.5) مجم لكل لتر او ( 1- 3 جزء في المليون ppm) فى مياه الشرب وفى حمام السباحة لا تتعدى ٣ أضعاف الرقم ده يعني 1.5 مجم / لتر او أقل من (10 ppm)
فياريت حضرتك زي ما سألت مين أحسن كابتن أدرب ابني معاه تروح بنفسك تدور ع نسبة الكلور ف الميه وتشوف القائمين على البسين فاهمين والميه بتتعاير والنسبه بتتقاس ولا لأ ⁉️
من غير ذكر اسماء
انا لقيت في أحد الأماكن المشهورة نسبة الكلور ف الميه 220 ppm 🫣 يعني 22 ضعف الحد الأقصى المسموح بيه
وطبعاً أنا شامم ريحة الكلور اللي حطينه ف الميه من أول الشارع وتم إتخاذ الإجراءات القانونية ضدهم وقتها
⬅️ طيب الكلور الزيادة عن الحد ده يعمل إيه فى أولادنا ؟
🥺 تهيج رهيب ف الجلد وهرش وحكه وطفح جلدى واكزيما
🥺 التهاب وحساسية العين
🥺 التهاب وتهيج فى الجيوب الانفية
🥺 جفاف وتساقط للشعر
🥺 الولاد طبعاً بتشرب من الميه غصب عنهم فيحصل وجع بطن وفقدان شهيه وميل للقئ واسهال
🥺 كمان الكلور ومشتقاته بيقلل حموضه المهبل وده بيسبب التهابات متكرره للمهبل عند البنات وعندي امهات كتير هتتجنن بسبب الموضوع ده تقولى يا دكتور التويلت عندى نضيف جداً وبنتي كل شويه يجيلها افرازات والتهابات طب منيييين ؟؟!! 🤔
🥺 بالإضافة إلى ان ريحة الكلور ومركباته (هيبوكلوريت) هتقفل صدر ابنك وهتفاقم أعراض حساسية الصدر وتدخله فى انتكاسات إحنا فى غنى عنها ✋
⛔ طيب الحل ايه ؟
بجملة اللي حضرتك هتصرفه على السباحه هات جهاز tds ده بيقيس نسبة الكلور ف الميه تمنه حوالى ٤٠٠ جنيه
أو ممكن تاخده من أى محل فلاتر مياه جنبك وزى ما بتقيس فلتر الميه فى البيت روح قيس نسبة الكلور ف الميه اللي ابنك هينزل يتمرن فيها بالساعات وهتدخل عينه وأنفه وصدره وجلده وهيبلعها كمان
صدقنى الموضوع يستاهل لأن الإهمال والتسيب واللامبالاه بقى فى كل شئ للأسف وصحة ولادنا مبنهزرش فيها ❤️
__________________________________________________
عيادات دكتور محمد حمزة 👨🏻⚕️
◾دكتوراه طب الاطفال
◾أستاذ الصدر و الحساسية بكليه الطب
- طنطا 🩺
شارع البحر . أمام مستشفى الجامعة . أعلى معمل المختبر
0403274044
01001940046
- كفر الشيخ 🩺
المحاربين الجديدة. أعلى بنك QNB
0473144411
01013988886
- قطور 🩺
ميدان الساعة. بجوار صيدلية الشفاء
0402760175
01012468516
