12/07/2018
اربعون حقيقة لازم الكل يصدقها ( حتى لو ماكنتش جربت الحمل قبل كده😇) :
1- حرقان الصدر ليس له علاقة بشعر الجنين على الاطلاق
2- مقولة ان الست الحامل لازم تاكل الضعف او تاكل زيادة علشان هي بتاكل لاتنين هي مقولة غير صحيحة و هي اهم سبب لزيادة وزن السيدات بعد الولادة
3- زيادة وزن الجنين ليس له علاقة بزيادة وزن الام او نقصانه
4- التقليب اثناء النوم لا يؤدي الى التفاف الحبل السري حول الجنين او عمل عقدة في الحبل السري
5- التمر لا يجهض و لا يسبب ولادة مبكرة ( ماكنش حد غلب)
6- العلاقة الزوجية لا تسبب اجهاض و لا تسبب ولادة مبكرة ( ماكنش فيه واحدة كملت الحمل للاخر)
7- 90/60 مش ضغط واطي ( اقل حاجة في الطبيعي بس يظل طبيعي)
8- القئ المستعصي المصاحب للحمل من اكثر الاشياء المتعبة التي تواجهها المراة الحامل ... و تحتاج تشجيع و تعاطف مش كلمات موجعة من طراز ( دلع , قرف , محدش حمل غيرك)
9- الولادة القيصرية فيها الم زيها زي الطبيعي ( الم الولادة الطبيعي قبل الولادة ... و الم القيصري بعد الولادة)
10- حجم البطن ليس له علاقة بنوع الجنين
11- حركة الجنين المبكرة ليس له علاقة بنوع الجنين
12- بريمة شعر اخوه ليس له علاقة بنوع الجنين
13- الحلم و الرؤيا و المنام ليس له علاقة بنوع الجنين🙂
14- حرقان الصدر عند المراة الحامل ناتج عن ارتجاع العصار المعدية للمرئ بسبب ارتخاء الصمام الفاصل بين المرئ و المعدة مع ضغط الرحم على المعدة ( مش بسبب شعر الجنين)
15- مفيش نظام اكل يستطيع تحديد نوع الجنين قبل الحمل ( ماكنش برده حد غلب )
16- حركة الاقمار ليس لها علاقة بتحديد نوع الجنين قبل الحمل ( ماكنش برده حد غلب )
17- الابراج الصينية ليس لها علاقة بتحديد نوع الجنين قبل الحمل ( ماكنش برده حد غلب )
18- تحليل القطط اتشال من كل التوصيات و الارشادات و ملوش لازمة
19- مفيش حاجة اسمها تحليل سيولة يتعمل لكل واحدة حامل على الفاضي و المليان
20- مفيش حاجة اسمها حمل غالي او حمل عزيز .. اي حمل هو هبه من الله ... و اي حمل هو عزيز و غالي
21- ليس كل اجهاض له سبب وجب معرفته ... الاجهاض المتكرر فقط هو اللي يجب معرفة سببه.. اما اننا نطلب لستة تحاليل علشان اجهاض مرة واحدة بالصدفة فهو نوع من التهريج
22- بصفة عامى مفيش عدوى فيروسية او بكتيرية او لوزعية تسبب اجهاض متكرر .. و حط خط تحت كلمة متكرر
23- اللي عايزة تجهض علشان هي تعباة و الحمل لسه في اوله و محصلش اربعين يوم و مانزلش فيه الروح و خلافه .. احب اقول لها ..
24- الموبايل و التاب لا يوجد دراسة على تاثيرهم على الاجنة .. التعامل بحرص واجب
25- الجنين داخل كيسه الذي يحتوي على حوالي لتر من السائل الامنيوسي .. و الكيس يفصل الجنين عن جدار الرحم الملئ بعضلات سميكة قوية .. و الحجاب الحاجز يفصل الرحم عن صدر الام .. يبقى ازاي شعر الجنين داخل الرحم داخل الكيس داخل المياه يعبر الحجاب الحاجز و يحرق في صدر الست الحامل
26- وقوع الشعر بعد الولادة مش معناه ان فيه مرض او ان الشعر عايز تغذية او علاج ... ده المسار الطبيعي اللي ممكن يحصل بعد الولادة
27- لو راجل حالق دقنه و شنبه و دخل على ست لسه والدة مش هتتكبس و هترضع عادي
28- لو ست حامل دخلت على ست في النفاس مش هينقطع عنها اللبن
29- الست اول لما تتجوز مش ضروري تحمل علطول
30- مش كل اضطراب في الدورة يعتبر استحاضة .. بعض الاضطرابات تعتبر حيض شرعا
31- كل وسائل منع الحمل لها اضرار .. حتى الوسائل الغالية .. حتى اللولب ابو الف و الفين جنيه ..اليوم اللي هنعرف فيه وسيلة عالية الكفاءة و ملهاش اضرار .. هو يوم عيد .. و البحث عن وسائل حمل جديدة هيقف
32- الافرازات المهبلية المصاحبة للحمل في الغلب افرازات طبيعية و لا تحتاج لعلاج
33- ليس كل شعر زائد في جسم المراة يعتبر مرضا
34- ليس كل شعر زائد في جسم المراة يعتبر طبيعي او ان الست مشعرة
35- منشطات التبويض و الطرق المساعدة لحمل لا تسطيع ان تضمن الحمل .. هي تضمن فقط ان جسم المراة بهرموناتها و خلافه يسير في المسار الطبيعي .. و نجاح العلاج متعلق بالنقطة دي فقط .... اما حدوث الحمل من عدمه فهو في النهاية خاضع لارادة الله و ليس لشطارة طبيب... و عدم حدوث الحمل ليس معناه بالضرورة فشل العلاج
36- حرقان الصدر ليس له علاقة بشعر الجنين ( معلش علشان الموضوع ده بيسبب لي حرقان انا شخصيا )
37- عبارات زي ( المية نشفت حوالين الجنين و لازم تولدي حالا) ( العيل شرب المية و هياكل الخلاص) ( عضمتين الحوض ضيقين ) ( الطلق موجود بس الرحم مافتحش) ( انت مش هتستحملي الطلق الطبيعي) و غيرها من امثال هذه العبارات .. كلها اتهرست في الفين فيلم قبل كده .. و علشان كده هم مصممين عليها .. لان محدش متصور ان في حد هيستخدمها تاني .. فضلا انه يصدقها🙂
38- الحامل ممكن تمارس رياضة عادي .. بل و ممكن تمارس السباحة ... تخيلوا
39- ابن السابع باذن الله بيعيش .. و ابن الثامن برده باذن الله بيعيش ... و ابن الثامن فرصته احسن بكتير من ابن السابع .. تاني .... ابن التامن فرصته احسن من ابن السابع
40- حقيقة اخيرة ... حرقان الصدر ليس له علاقة بشعر الجنين🙂
