24/06/2022
مرض موجود بالفعل لا هو بالقليل ولا هو بالكثير بل تقريبا احنا كأطباء أطفال بنشوفه كل يوم ألا وهو حمى البحر المتوسط Familial Mediterranean Fever
تحدث اعراضه فى شكل نوبات متكررة كل فترة بشكل مفاجئ فى صورة ارتفاع درجة الحرارة و الام شديد بالبطن يشبه الم الزائدة الدودية أو التهاب المرارة و ارهاق عام و التهاب بالمفاصل واللى ممكن تستمر فترة أطول من الحمى و الم البطن
الهجمة بتاخد من 2 ل 4 ايام و بتختفى الاعراض لوحدها تماما سواء بعلاج او من غير علاج ثم تكرر مرة أخرى في نوبة أخري
الاعراض دى مش لازم تكون كلها موجودة يعنى ممكن مريض تكون الحرارة فقط هى العرض الاساسى والوحيد و ممكن مريض تانى ييجى بالم متكرر فى البطن بدون حرارة و بتختلف شدة الاعراض و تكرارها من طفل للتاني و المريض بيكون سليم تماما ما بين الهجمات و من هنا صعوبة تشخيص المرض لان الاعراض دى ليها اسباب تانية كتير
احنا بنهتم بالمرض ده لان فى كل مرة المريض يتعرض لنوبة من حمى البحر المتوسط .. الجسم بينتج بروتين اسمه Amyloid A" و مستواه بيعلى جدا فى الدم و بالتالى ممكن يترسب فى أعضاء الجسم المختلفة و يسبب تلفها و فشل و ظيفتها و فى مقدمتها الكلى
التشخيص بيعمد على
- التاريخ المرضى و الفحص و استبعاد الاسباب الاخرى للاعراض مع التاريخ العائلى للمرض
- بعض التحاليل بتخلينا نفكر اكثر فى المرض زى ارتفاع سرعة الترسيب و ال CRP و بروتين ال Amyloid A اثناء الهجمة و نزولهم بصورة سريعة بعد انتهائها
- التحليل الجينى FMF PCR و ده ممكن ياكد المرض لكن لا ينفيه بمعنى ممكن يطلع سلبى وبكون الطفل مصاب بالمرض
- اختبار تشخيصى و علاجى ودا غالبا اللى بنعتمد اكثر عليه و ده مهم جدا لتأكيد التشخيص خاصة فى الحالات المشكوك فيها ببساطة بندى العيان العلاج اسمه كولشيسين و ده العلاج الوحيد لحمى البحر المتوسط لو حصل تحسن ملحوظ و قلت النوبات كده اتأكدنا من التشخيص
العلاج زى ما قلنا هو الكولشيسين وتكون اهميته فى علاج حمى البحر المتوسط انه بيقلل حدوث نوبة المرض و بيمنع زيادة الاميلويد و حدوث الداء النشوانى الـ Amyloidosis اللى هو سبب فى فشل فى وظائف الكلى
العلاج بيكون مدى الحياة قولا واحدا حتى لو النوبات قلت او مبتجيش خالص مع متابعة دورية لنزول بروتينات فى البول
د/ جمال فتحى الفيار
أخصائي طب الأطفال و حديثي الولاده
أخصائي صدر وحساسية الأطفال
* الرجدية مستوصف جامع العمدة يوميا ماعدا (الثلاثاء والجمعة) من ٨ - ١٠ م
حصة شبشير اعلى صيدلية د منير سالم يوميا ماعدا ( الثلاثاء) من ٥,٣٠ - ٨ م
العجيزي بعد المزلقان اعلى نزية للورد والانتيكات يوميا ماعدا ( الثلاثاء والجمعة) من ٢,٣٠ - ٥عصرا
