04/12/2025
متجوزة من أسبوعين و حامل في شهر !!.. طب ازاي؟ 🤔
📌 مشكلة بتحصل كتير: “اتجوزت من أسبوعين والدكتور بيقولّي إنتي حامل في شهر!”
بنات كتير بتروح لدكتور النسا بعد الجواز على طول، تتفاجئ إنه بيقولها:
"إنتي حامل في شهر"
مع إنها أصلاً متجوزة من أسبوعين بس!
وتبدأ بقى القلق والأسئلة والشك…
مع إن الموضوع طبيعي جداً ومفيهوش أي حاجة غلط.
🔬 طب هل الدكتور بيحسب الحمل غلط؟
لأ خالص.
الطب بيحسب عمر الحمل من أول يوم في آخر دورة شهرية (LMP)…
مش من يوم الجواز
ولا من يوم العلاقة
ولا من يوم التبويض.
ليه؟ 🤔
علشان يوم التبويض مش ثابت ومحدش بيقدر يحدده بدقة،
والحيوانات المنوية بتعيش كام يوم،
والبويضة ليها مدة معينة.
فأكتر طريقة دقيقة وموحدة في الطب هي الحساب من آخر دورة.
---
📎 طب إزاي واحدة متجوزة من أسبوعين يبقى مكتوب إنها “حامل في شهر”؟
ده عمر حسابي بس…
مش العمر الحقيقي للجنين.
العمر الحقيقي بيكون أقل بكتير…
يمكن أسبوع واحد بس أو أيام قليلة.
إنما الحساب الطبي بيضيف أسبوعين قبل التبويض علشان كده الرقم يكبر.
---
⚠️ المشكلة بقى فين؟
المشكلة إن ناس كتير بتفهم الرقم ده غلط…
وتفتكر إن الحمل حصل قبل الجواز!
وده بيعمل توتر ومشاكل من غير أي سبب علمي.
---
💡 المهم تعرفيه
عمر الجنين الحقيقي = عمر الحمل المحسوب – حوالي أسبوعين
لو اتجوزتي من أسبوعين والدكتور قال "حامل في شهر" → ده الطبيعي جدًا
السونار المبكر هو اللي بيحدّد العمر الحقيقي للجنين بدقة (CRL)
---
🩺 الخلاصة
❗ الرقم ده مش معناه حاجة غلط
❗ ولا معناه إن الحمل قديم
✔️ دي بس طريقة الحساب في الطب
✔️ وبتحصل مع آلاف الستات كل يوم
