د. أحمد رفعت - استشاري جراحة الأطفال

22/06/2022

ابنك في سن أنه بيمسك كل حاجة و يحطها في بقه؟ 😱
بتخاف عليه يبلع أي حاجة غريبة و مش عارف حتتصرف ازاي؟😱😱

اذن البوست ده ليك .. 💪🏻💪🏻

الأطفال في سن معين بيبدأوا استكشاف العالم من حواليهم و يتعرفوا علي البيئة المحيطة ليهم .. و أسهل طريقة للتعرف علي أي حاجة هي حاسة اللمس 🙌🏻 و التذوق 👅.. فبيكون عاوز يمسك أي حاجة و يحطها في بقه يشوف دي ينفع تتاكل أو لأ و طعمها ايه ..

من ضمن المشاكل اللي بتقابلنا كتير في الفترة دي هي أن الطفل يبلع أي جسم غريب يقابله و أشهرهم: العملات المعدنية 💰، المغناطيسات و البطاريات الموجودة في الألعاب، الأجسام الحادة زي المسامير و الدبابيس، الألعاب البلاستيكية صغيرة الحجم .. الخ الخ

طيب نسأل الأسئلة المهمة بقي ..
♦️ هل كل الأجسام الغريبة زي بعضها؟ يعني لو ابني بلع اي حاجة كله نفس النتيجة؟
⬅️ الاجابة لأ طبعا .. البطاريات الجافة و المغناطيسات لو أكتر من واحد يعتبروا من أخطر الحاجات اللي ممكن طفلك يبلعها .. بعكس العملات المعدنية أو الاجسام البلاستيكية

♦️ طيب لو شوفت ابني بلع بطارية أو كذا مغناطيس .. أعمل ايه؟
⬅️ عامل الوقت هنا مهم .. لو شوفت طفلك و هو بيعمل كده أو حسيت انه عمل كده .. أرجوك توجه لأقرب مستشفي لعمل أشعة عادية للتأكد من وجود الجسم الغريب فعلا و استخراجه سريعاً عن طريق المنظار من الفم أثناء وجوده في المعدة قبل ما يدخل الأمعاء

♦️ طب لو دخل الأمعاء .. حنعمل ايه؟
⬅️ حننتظر خروجه مع البراز بس مع المتابعة الدقيقة لأنهم ممكن يعملوا مشاكل كتير أثناء مرورهم في الأمعاء

♦️ طب هل ممكن نحتاج عملية جراحية لاستخراج الأجسام الغريبة دي؟
⬅️ آه للأسف ساعات بنحتاج .. في حالات معينة زي وجود بطارية أو مغناطيسات متعددة مع حدوث أعراض مقلقة زي وجود دم في البراز أو آلام حادة بالبطن أو ترجيع مستمر .. أحياناً العملات المعدنية تقف في جزء معين في الأمعاء و ماتتحركش و تعمل انسداد معوي و ساعتها لازم استخراجها .. ممكن بعض الأجسام الحادة تؤدي إلي ثقب في الأمعاء و التهاب بريتوني ..

👈🏻👈🏻 طبعا الموضوع يطول شرحه و الأسئلة فيه كتير و بنرحب بأسئلتكم و استفساراتكم علي رسايل الصفحة 📨 أو عن طريق الواتساب 📱📱

حفظ الله اطفالنا و دمتم سالمين .. 🌹🌹 و نصيحة في اذن كل والد و والدة لاطفالنا .. برجاء التأكد دائما من وجود اي قطع معدنية صغيرة او بطاريات او اجسام حادة (كالدبابيس و المسامير ....) بعيدا دائما عن متناول ايدي الاطفال 🙏🙏
=========================
📱للحجز و الاستعلام: 01113939830
📱ت الطبيب للطوارئ: 01001028818
🕑 مواعيد العمل: ٢ - ٥ يوميا ماعدا الخميس و الجمعة
📍العنوان: طريق موقف المنصورة - بجوار بنزينة بيومي أعلي فرن الخباز

26/05/2022

⚠️⚠️ لو لقيت في حفاضة طفلك نفس الشكل ده .. أرجوك توجه لأقرب جراح أطفال فوراً 🚑🚑

👈🏻👈🏻 الانغماد المعوي .. أشهر الحالات الطارئة في جراحة الأطفال

==================================
♦️ يعني ايه انغماد معوي🤔؟
⬅️ يعني جزء من الأمعاء حصله تداخل في جزء تاني في الأمعاء .. بمعني انهم دخلوا جوا بعض و ماعرفوش يرجعوا تاني

♦️ طب ده ايه مشكلته؟
⬅️ مشكلته أنه بيسبب انسداد للأمعاء .. و الأخطر أنه بيسبب انسداد للأوعية الدموية كمان المغذية للأمعاء و ده ممكن يؤدي لحصول غرغرينا في جزء من الأمعاء و بالتالي الطفل ممكن يحتاج استئصال لجزء من الأمعاء أو تحويل مؤقت لمجري البراز لو ما اتلحقش بسرعة خلال 6 ساعات😱

♦️ طب أشك إزاي أن طفلي حصله انغماد معوي؟
⬅️ السن الأشهر لحدوث الانغماد هو من 6 إلي 12 شهر .. في البداية بيكون في مغص متكرر علي الطفل .. يجيله وقت يتلوي من الألم و يضم رجليه علي بطنه و بعد شوية يبقي كويس و يلعب عادي .. و بعد شوية يتكرر نفس الكلام .. بعد كده ممكن يظهر البراز المدمم بنفس الشكل او اللون اللي في الصورة (مخاط أحمر لزج) .. بس دي علامة متأخرة أن بدأ يحصل نقص في الدورة الدموية المغذية للأمعاء

♦️ طب ازاي اتأكد؟
⬅️ الفحص الطبي في أسرع وقت بالإضافة لعمل أشعة تليفزيونية علي البطن اللي بتبين حدوث الانغماد و تكون كتلة من الأمعاء داخل البطن

♦️ طب و علاجها ايه؟
⬅️ لو لسه الانغماد حديث ما عداش عليه وقت كتير و الحالة العامة للطفل كويسة بنجرب طريقة الإرجاع الهوائي عن طريق فتحة الشرج و اللي بتنجح في فك الانغماد بنسبة 70% دون الحاجة إلي عمليات .. في حالة فشل الطريقة دي بنلجأ لعمل استكشاف للبطن من فتحة صغيرة لفك الانغماد يدوياً قبل حدوث غرغرينا أو تسمم بالدم


=============================
♦️ نسعد باستقبال اسئلتكم و استفساراتكم فيما يخص جراحات الاطفال و حديثي الولادة و العيوب الخلقية علي رسائل الصفحة📨 او عن طريق الواتس 📱📱
=============================
📱 للحجز و الاستعلام: 01113939830
📱ت الطبيب للطوارئ: 01001028818
🕑 مواعيد العمل: ٢ - ٥ يوميا ماعدا الخميس و الجمعة
📍العنوان: طريق موقف المنصورة - بجوار بنزينة بيومي أعلي فرن الخباز

10/05/2022

لو طفلك محتاج عملية 👶🏻 .. ما تقلقش 😇😇

الصورة لطفل جميل اتولد بعيب خلقي في جدار البطن أدي لحدوث فتق بالحبل السري و خروج الأمعاء في الحبل السري .. و النتيجة الفورية من داخل غرفة العمليات بعد إصلاح الفتق و إعادة تكوين السرة بدون أي أثر للجراحة ..


=============================

♦️ نسعد باستقبال اسئلتكم و استفساراتكم فيما يخص جراحات الاطفال و حديثي الولادة و العيوب الخلقية علي رسائل الصفحة📨 او عن طريق الواتس 📱📱

=============================
📱 للحجز و الاستعلام: 01113939830
📱ت الطبيب للطوارئ: 01001028818
🕑 مواعيد العمل: ٢ - ٥ يوميا ماعدا الخميس و الجمعة
📍العنوان: طريق موقف المنصورة - بجوار بنزينة بيومي أعلي فرن الخباز

02/05/2022

كل عام و أنتم بخير .. عيد سعيد

15/04/2022

الكيس الدرقي 🤔 .. بلاش نتخض 😱

كل سنة و حضراتكم طيبين و رمضان كريم .. موضوعنا النهاردة عن الكيس الدرقي و ده مشكلة بتقابلنا في حوالي 7% من المرضي ..

1️⃣ اول حاجة لازم نعرفها طبعا يعني إيه كيس درقي؟
♦️ الغدة الدرقية في الأساس بتتكون في منطقة اللسان و الفم و بعدين بتهاجر نزولاً في الرقبة لغاية ما توصل لمكانها في أسفل الرقبة و المفترض بعد وصولها مكانها الجديد أن الطريق اللي مشيت فيه ده يقفل و يختفي .. لكن أحياناً جزء منه يفضل موجود و يتجمع جواه إفرازات مخاطية تعملنا كيس في الرقبة بنسميه كيس درقي نسبة إلي الغدة الدرقية.

2️⃣ طب معني كده أن الطفل اللي عنده كيس درقي عنده مشكلة في الغدة الدرقية؟
♦️ لا طبعاً مش بالضرورة و في الغالب بتكون الإجابة لأ و بتكون الغدة الدرقية سليمة تماماً و لكن لازم نتأكد بالأشعة التليفزيونية من وجود الغدة الدرقية في مكانها الطبيعي

3️⃣ طب امتي أشك أن طفلي عنده كيس درقي؟
♦️ لو لاحظت انتفاخ في منتصف الرقبة بالظبط تحت الذقن زي اللي في الصورة .. ساعات يكون أصغر في الحجم و يكون محسوس أكتر منه متشاف و ممكن نلاحظ أنه بيتحرك مع حركة اللسان يبقي لازم تتوجه لجراح أطفال للكشف و التأكد

4️⃣ طب و علاجه إيه ده؟
♦️ عملية بسيطة لاستئصال الكيس الدرقي ده تجنباً لمضاعفاته زي الالتهابات المتكررة أو تكوين خراج أو ناسور درقي مع الجلد أو زيادة حجمه بشكل يضايق ..
=============================
📱 للحجز و الاستعلام: 01113939830
📱ت الطبيب للطوارئ: 01001028818
🕑 مواعيد العمل: ٢ - ٥ يوميا ماعدا الخميس و الجمعة
📍العنوان: طريق موقف المنصورة - بجوار بنزينة بيومي أعلي فرن الخباز

31/03/2022

كل عام و أنتم بخير .. رمضان كريم

21/03/2022

👈🏻 اللسان المربوط .. يعني ايه؟ 🤔🤔

قصة مكررة طبعا بيسمعها كل دكتور أطفال أو جراحة أطفال .. ما تبصلنا علي لسان الولد يا دكتور لحسن حاسين انه لازق .. ايوه يا فندم فعلا لسانه مربوط أو ملتصق بالفم

♦️ طب دي بتأثر عليه يا دكتور ولا ممكن نسيبها؟
طبعا الموضوع درجات .. في التصاقات بسيطة ممكن ما تأثرش خالص أو الدكتور يقولك مش محتاجين نعملها حاجة و في درجات أشد ممكن تأثر علي الكلام أو الرضاعة و ساعتها لازم تدخل

♦️ طب امتي بنتدخل؟
زي ما قولنا علي حسب درجتها .. في الحالات اللي مأثرة علي الرضاعة بنعملها علطول عشان الطفل يرضع كويس .. أما لو مافيش تأثير بنأجلها شوية لغاية ما الطفل يشد حيله و يكبر شوية بس قبل سن بداية الكلام عشان ما تأثرش علي نطق الحروف

♦️ طب انا ابني او بنتي عنده مشكلة او متأخر في الكلام .. هل ده السبب؟
لازم نفرق بين أنه متأخر في الكلام أو عنده مشكلة في نطق بعض الحروف أو وضوحها .. اللسان المربوط ما بيمنعش الكلام أنما بيأثر علي نطق حروف محددة اللي بنستعمل فيها اللسان .. و لازم نراجع طبيب التخاطب لمعرفة المشكلة و في حالة شك دكتور التخاطب أن اللسان هو السبب بيتم التدخل لإزالة السبب

♦️ طب اعرف ازاي ان ابني / بنتي عنده مشكلة في اللسان؟
في حالة ملاحظة لجام في أسفل اللسان زي الصورة .. او وجود انقسام في طرف اللسان أثناء خروجه بحيث يظهر انه مشقوق من النص .. أو في حالة ملاحظة عدم قدرة الطفل علي إخراج لسانه من بقه يجب مراجعة جراح الأطفال لمعرفة إذا كان في مشكلة من عدمه

♦️ طب و دي ليها حل؟
آه عملية بسيطة في 5 دقايق و بتنتهي المشكلة

=============================
📱 للحجز و الاستعلام: 01113939830
📱ت الطبيب للطوارئ: 01001028818
🕑 مواعيد العمل: ٢ - ٥ يوميا ماعدا الخميس و الجمعة
📍العنوان: طريق موقف المنصورة - بجوار بنزينة بيومي أعلي فرن الخباز

20/02/2022

نسعد بخدمتكم دائما .. 🌹🌹

جراحات حديثي الولادة و العيوب الخلقية بالجهاز الهضمي
جراحات المنطقة الإربية (الفتق و الخصية المعلقة)
جراحات العضو الذكري (الطهارة و عيوب مجري البول)
اصلاح العيوب الخلقية بفتحة الشرج
اصلاح العيوب الخلقية (الشفة الأرنبية و سقف الحلق)
جراحات مناظير الأطفال (استئصال الزائدة الدودية و المرارة)
جراحات الرقبة (الأكياس الخيشومية و الدرقية)
عينات الغدد الليمفاوية
جراحات الطواريء و الانسداد المعوي علي مدار ٢٤ ساعة
=============================
📱 للحجز و الاستعلام: 01113939830
📱ت الطبيب للطوارئ: 01001028818
🕑 مواعيد العمل: ٢ - ٥ يوميا ماعدا الخميس و الجمعة
📍العنوان: طريق موقف المنصورة - بجوار بنزينة بيومي أعلي فرن الخباز

06/01/2022

الإحليل السفلي و عيوب مجري البول في الأطفال 💦💦
==============================

طبعاً أي حد فينا بيقلق لو شاف أي حاجة مش طبيعية في ابنه 😱😱 .. و من الحاجات اللي بيتم ملاحظتها بسهولة أثناء غيار الحفاضة هي عيوب مجري البول و طبعاً الأب أو الأم بيكونوا مخضوضين جداً و قلقانين من تأثير الكلام ده علي القدرة علي الجواز أو الإنجاب فيما بعد 🤵👰 .. تعالوا نتكلم بسرعة كده عن أشهر عيوب مجري البول اللي هو الإحليل السفلي (أو طهارة الملايكة 😇 زي ما الناس بتسميها) ..

👈🏻 يعني إيه إحليل سفلي؟
♦️ يعني وجود فتحة البول في مكان غير مكانها الطبيعي (اللي هو في نهاية العضو الذكري أو في مقدمة رأس العضو)

👈🏻 طب ليه الناس بتسميها طهارة الملايكة؟
♦️ لأن الجلد اللي بيغطي الجزء السفلي من رأس العضو بيكون غير موجود في حالات الإحليل السفلي و بالتالي بتكون رأس العضو ظاهرة منذ الولادة و بالتالي الناس بيعتبروه مولود متطاهر أو الملايكة طاهرته قبل الولادة ..

👈🏻 طب ازاي نعرفها؟
♦️ زي ما قولنا أول علامة أن الجلد مابيكونش مغطي رأس العضو بالكامل منذ الولادة و دي أول حاجة بتلفت نظرنا .. تاني حاجة ملاحظة خروج البول 💦 من فتحة في منتصف العضو أو مقدمته و مش من المكان الطبيعي في نهاية العضو ..

👈🏻 طب دي حاجة تقلق .. أو ليها حل يعني؟
♦️ لازم نقسم الأول الإحليل السفلي إلي أنواع .. النوع الأول اللي بتكون الفتحة قريبة من مكانها الطبيعي سواء في رأس العضو نفسه أو في نهاية العضو و ده بيحتاج عملية إصلاح لمجري البول و استكمال الجزء اللي ماتكونش و في الغالب بتتم علي مرحلة واحدة و بيرجع الطفل بعدها زي أي طفل طبيعي .. النوع التاني اللي بتكون الفتحة بعيدة عن مكانها الطبيعي و قريبة من بداية العضو أو كيس الخصية و ده بتكون الأمور معقدة شوية أكتر و في الغالب بيحتاج إصلاح مجري البول علي كذا مرحلة ..

👈🏻 طب ايه أفضل سن لإجراء العملية؟
♦️ أفضل سن لإجراء عملية الإصلاح هو من 6 شهور حتي 18 شهر (سنة و نصف) .. ده أفضل توقيت لإجراء العملية عشان الطفل مايفتكرش التجربة دي و التئام الجرح بيكون أسرع ما يمكن و احتماليات العدوي أقل و الطفل أسهل في السيطرة عليه و عدم الحركة .. و ده طبعا بشرط أن حجم العضو مناسب لإجراء العملية .. و في ظروف خاصة ممكن نضطر نأجل العملية شوية ..

👈🏻 طب لو حسيت أن ابني عنده مشكلة في مجري البول ساعة الولادة أعمل ايه؟
♦️ أول و أهم حاجة هو اننا نعرف ان ممنوع تماما الطهارة ❌❌ في حالة وجود عيب خلقي بمجري البول لأن جلد الطهارة ليه دور كبير في نجاح عملية الإصلاح .. و ساعتها بنتوجه لجراح الأطفال لتقييم الموقف و تحديد الموعد و الطريقة الأنسب لإجراء عملية الإصلاح

==============================

نسعد بخدمتكم دائماً .. 🌹🌹
📱 للحجز و الاستعلام: 01113939830
📱ت الطبيب للطوارئ: 01001028818
🕑 مواعيد العمل: ٢ - ٥ يوميا ماعدا الخميس و الجمعة
📍العنوان: طريق موقف المنصورة - بجوار بنزينة بيومي أعلي فرن الخباز

31/12/2021

16/12/2021

حلقاته 👶🏻 .. برجلاته 👶🏻 .. يوم ورا يوم يبقي بشنبات 🥳🥳💪🏻💪🏻

جالك مولود ولد؟ مبروك مبروك 🎊🎊 .. يتربي في عزك

السؤال اللي حيفضل شاغل بالك قبل أو بعد ما تعمله سبوع هو اطاهره امتي و ازاي و فين؟ خلينا نجاوب علي أسئلتك دي واحدة واحدة ..
=====================

♦️ أول سؤال .. هو لازم نطاهره يا دكتور؟
👈🏻 الإجابة من منظورين .. أولاً دينياً طبعا في أحاديث عن النبي – عليه الصلاة و السلام – بتؤكد علي كده و بالتالي هي سنة أو واجب ديني .. ثانياً من الناحية الطبية أو الصحية .. الطهارة للذكور بتقلل من نسبة الإصابة بالتهابات الجهاز البولي و التناسلي و بتقلل من نسبة الإصابة بالأورام في العضو الذكري.

♦️ ثانياً .. يعني ايه الطهارة أصلا؟
👈🏻 يعني إزالة الجزء الزائد من الجلد اللي بيغطي رأس العضو الذكري عشان نظهره

♦️ طب امتي أنسب معاد للطهارة؟
👈🏻 زمان كنا بنقول في الأسبوع الأول بعد الولادة أو بعد الأربعين .. و ده كان مرتبط بتكوين عوامل التجلط عشان نقلل احتمالية النزيف بعد الطهارة .. أما حالياً فمع التطور و وجود أجهزة كتيرة للكي و منع النزيف مابقاش في معاد محدد للطهارة إنما بيفضل إجرائها في خلال أول شهر أو شهرين بالكتير عشان تتم بمخدر موضعي و نتفادي البنج الكلي

♦️طب احنا خايفين عليه عشان لسه صغير .. نستني أما يكبر شوية؟
👈🏻 بالعكس .. كل ما يكون أكبر كل ما الموضوع بيكون مؤلم أكتر بالنسباله و كل ما كان احتمالية النزيف لا قدر الله أعلي .. ده غير أنه بيفتكر التجربة دي .. فبالعكس كل ما كان أصغر بيكون أحسن من ناحية الألم و النزيف و أنه ينسي التجربة بأكملها ..

♦️طب هو الطفل بيتعب في الطهارة ولا لأ؟
👈🏻مع استخدام المخدر الموضعي و اللبوس المسكن في أول 48 ساعة غالبا الطفل ما بيحسش بأي حاجة و من اليوم التالت بيكون كأن شيء لم يكن و بنتعامل معاه بشكل عادي جداً 👶🏻

♦️طب احنا سمعنا عن طرق كتير زي الجراحة التقليدية و الكي و الحلقة البلاستيكية و غيرها و غيرها .. ايه الأحسن؟
👈🏻 مافيش دليل قاطع أن في طريقة أحسن من التانية .. كلها طرق متاحة و بتؤدي المهمة المطلوبة .. الأهم هو إتقان الجراح للطريقة اللي هو شايفها مناسبة و بيوصل بيها لأحسن النتايج و هو ده المطلوب

♦️طب السؤال المتكرر الأشهر .. الطهارة بالليزر!
👈🏻 طبعا الموضة أن كل حاجة لازم يتحط فيها كلمة ليزر عشان تبان حلوة .. بس خلينا نفهم ايه دور الليزر في الطهارة؟ هو مجرد أداة لقطع الجلد زيها زي المشرط او المقص أو غيرها .. و بالتالي مافيش أي فايدة إضافية أو دور حقيقي لليزر في الطهارة مقارنة بتكاليفه العالية و احتياطاته و خطورة تشغيله .. فبالتالي مافيش حاجة اسمها طهارة بالليزر و ده مجرد نوع من الدعاية مش أكتر

=================================
نسعد بخدمتكم دائماً .. 🌹🌹
📱 للحجز و الاستعلام: 01113939830
📱ت الطبيب للطوارئ: 01001028818
🕑 مواعيد العمل: ٢ - ٥ يوميا ماعدا الخميس و الجمعة
📍العنوان: طريق موقف المنصورة - بجوار بنزينة بيومي أعلي فرن الخباز

13/08/2021

👶🏻👶🏻 عشان صحة أطفالنا مسئولية .. اسأل تطمن 👍🏻👍🏻
===================================

🎉🥳 بنرحب بأسئلتكم و اي استفسار يخص جراحات الأطفال و حديثي الولادة و العيوب الخلقية من سن يوم حتي 18 سنة

👈🏻 اكتب سؤالك أو ابعته في رسالة و حيوصلك الرد في أسرع وقت و حيتم توجيهك للإجراء المناسب حسب الحالة و السؤال ✔️✔️

د/ أحمــــد رفـــعـــت خـــــضـــــري
استشاري جراحة الأطفال و حديثي الولادة
زميل الكلية الملكية للجراحيـــن بانجــلــتـــرا
مدرس بكلية الطب و مستشفيات جامعة الزقازيق

===================================
نسعد بخدمتكم دائماً .. 🌹🌹
📱 للحجز و الاستعلام: 01113939830
📱 ت الطبيب للطوارئ: 01001028818
🕑 مواعيد العمل: ٢ - ٥ يوميا ماعدا الخميس و الجمعة
📍 العنوان: طريق موقف المنصورة - بجوار بنزينة بيومي أعلي فرن الخباز