11/03/2024
رمضان مبارك علينا و عليكم جميعا
نهاية للجدل بخصوص " التمر " لمرضى السكر و مقاومة الإنسولين :
---
1- هل التمر يرفع السكر ؟
= الإجابة ايوة و لا , يعنى لو اكلت من 1 لـ 3 ف مش هيرفع السكر , السكر اللى فى التمر هو سكر الفاكهة الفركتوز على ما يتحول لـ سكر جلوكوز بيفقد جزء كبير من تأثيره على رفع السكر .
طاب امتى يرفع السكر ! لو افرطت منه و اكلت منه كتير هيبدأ يرفع سكرك فعلا .
لو بإعتدال من 1 لـ 3 زى ما قولنا ممتاز جدا .
= النقطة التانية : الـ Glycemic index بتاع التمر من منخفض لـ متوسط يعنى بالعربي مش بيرفع السكر فى الدم بسرعه يعنى ممتاز جدا .
= النقطة التالتة : التمر بيحتوى على نسبة الياف عالية جدااا ف بتقلل من سرعه ارتفاع السكر فى الجسم .
= النقطة الرابعه : التمر فيه ماده اسمها الـ Phytoestrogen الإستورجين النباتى , ودى من ضمن الفوائد بتاعتها انها بتتحكم فى ارتفاع سكر الدم .
= النقطة الخامسة : التمر فيه كم رهيب من المعادن و الفيتامينات , زى البوتاسيوم و الحديد و الفوليك اسيد , و بيكون مهم جدا فى تقليل الإمساك اللى بيحصل مع ناس كتير فى رمضان.
يبقى هل انا كـ شخص طبيعى , كـ مريض سكر , كـ شخص بعانى من مقاومة إنسولين ابدأ بـ تمر ؟
اجابة قاطعه : ايوة عادى جدا , بشـــــــــــــــــــــرط الإعتدال .
و بلاش التمر فى مايه لان الكوباية كده كلها مسكرة , وبلاش معاه فاكهة مجففة قمر الدين و مشمشية و الكلام ده .
كل التمر زى ماهو كده بدون إضافات .
