د/محمد سعده استشارى جراحة الأطفال وحديثى الولادة وجراحة المناظير

06/05/2026

🌸 النهاردة في العيادة كان يوم مختلف وجميل جدًا 💙

زارني مجموعة من “أصحابى العسليات” اللي بجد خطفوا قلبي 😊

👶 سيف الصغير
كان عنده يوم واحد بس، واتعملت له عمليات كتير وهو لسه في أول الطريق…
بس اللي يطمن فعلًا هو صبر والدته الخلوقة جدًا وهدوءها اللي يستحق الاحترام 💙🙏

---

👦 وبعدها فوجئت بـ شابة جميلة داخلة العيادة مع أخوها…
داخله تسلم وتقول: “أنا من أصحابك يادكتور ” 😄
لحظة بسيطة بس مليانة حب ودفا ❤️

👧 هى بنت “عسلية” جايه مع أخوها
وقالت بكل براءة:
“عايزة أتصور مع عمو سعدة” 📸😊

وإحنا طبعًا ما نقدرش نرفض الطلبات العسل دي 😄💙
---

💬 الأيام دي بتفكرني إن شغلنا مش مجرد جراحة…
ده حكايات صغيرة مليانة حب وثقة وأمل 🌸

ربنا يحفظ كل أطفالنا ويطمن كل أهاليهم 🤲💙

06/05/2026

🚨 ابنك عمل عملية؟ ده مش معناه إن الموضوع خلص! 🚨

للأسف… في أطفال كتير عملوا عملية الشفة الأرنبية أو سقف الحلق
لكن بعد سنين بيظهر عندهم مشاكل… والأهل مش واخدين بالهم ❗

🔴 زي إيه؟
▪️ ضعف في السمع 👂
▪️ خنف في الكلام 🗣️
▪️ ناسور في سقف الحلق
▪️ احتياج لتجميل الأنف بعد العملية

⚠️ المشاكل دي ممكن تأثر على نفسية الطفل وثقته بنفسه… لو ما اتلحقتش بدري

---

💙 علشان كده أطلقنا مبادرة مهمة جدًا 💙

🎉 كشف مجاني بالكامل 🎉
لكل حالات الشفة الأرنبية وشق سقف الحلق

📅 الجمعة 8 مايو
📍 مستشفى دار الشفاء

---

👨‍⚕️ تقييم شامل مع فريق متخصص في نفس اليوم:
✔️ جراحة أطفال
✔️ أنف وأذن وحنجرة
✔️ تخاطب

مع نخبة من كبار الأساتذة:
• أ.د. حسام الشريف
• أ.د. محمد درويش
• د. محمد سعدة

---

👶 المبادرة مناسبة لـ:
✔️ أي طفل عمل العملية من سنين وعايزين يطمنوا عليه
✔️ طفل عنده خنف أو تأخر في الكلام
✔️ طفل بيعاني من ضعف سمع
✔️ حالات فيها ناسور
✔️ أو محتاجين تجميل أنف بعد الشفة الأرنبية

---

📍 العنوان:
شارع معاوية – ناصية عمرو بن العاص – أمام كلية تجارة

📞 للحجز:
01122770011
01206144144

---

⏳ المكان محدود… والأولوية للحجز المسبق

💬 ماتستناش المشكلة تكبر… اطمن على ابنك دلوقتي.

شير ..علشان نفيد أكبر عدد من الأطفال

05/05/2026

يسعدنا خدمتكم

كشوفات مجانيـــة لكـل حـالات الشفـة الأرنبية وشق سقف الحلق، يوم الجمعة 8 مايو في مستشفى دار الشفاء 🎉

بحضور طاقم كبير من الأطباء المتخصصين:
• أ.د. حســــــــــــام الشــــــــــــريف
"أستاذ جراحة الأنف والأذن والحنجرة – دكتوراه سويسرا"
• أ.د. محمـــــــــــد درويـــــــــــــــش
“استشاري التخاطب - رئيس قسم التخاطب بكلية طب طنطا”
• د. محمـــــــــــــــــد سعـــــــــــــــدة
"استشاري جراحة الأطفال وحديثي الولادة وجراحات المناظير، دكتوراه إصلاح التشوهات الخلقية"

كل طفل يستحق فرصة لحياة أفضل، عشان كدا دار الشفاء معاكم خطوة بخطوة 👌🏼

___________
📍 شارع معاوية ناصية عمرو بن العاص أمام كلية تجارة
📞 01122770011 - 01206144144

04/05/2026

✨✨ بصراحة… الحكاية دي من جوّه أوضـة العمليات ✨

زمان…
كنت أول ما أشوف حالة صعبة زى دى … قلبي يدق بسرعة
خوف حقيقي… مش تمثيل

وأقعد ليالي طويلة من المذاكرة
مراجعة… فيديوهات… إعادة وتكرار
يوم تقيل عليّا… وعلى البيت… وعلى الأولاد…

لحد ما أدخل العملية
وأفضل شايل همها… لحد ما تخلص على خير 🙏

وقتها…عدد حالات صغبة قليلة والمعظم حالات سهلة.
3 أو 4 حالات صعبة بس في السنة
وكانوا كفيلين يخلّوا النوم يطير من عيني…

وكنت بقول لنفسي:
"أكيد مع الوقت الخوف هيختفي…"

لكن اللي حصل؟ 👇

دلوقتي…
بعد سنين طويلة
الحالات بقت أكتر… وأصعب…
كل أسبوع تقريبًا حالة تقيلة أو أكتر
ومن محافظات مختلفة… وكمان من خارج مصر 🌍

آه… التوتر قل شوية
والخبرة زادت بفضل الله 💙

لكن الحقيقة اللي محدش شايفها…

أنا لسه بخاف…
وبخاف جدًا…

بس مش من صعوبة الحالة ❌
أنا بخاف من نظرة الأهل 😔

نظرة كلها أمل…
ثقة كبيرة… يمكن أكبر مني
ناس شايفين فيك طوق نجاة لطفلهم
ومستنيين منك فرحة عمرهم…

الإحساس ده… مش سهل
تقيل… جدًا…
تقيل جدا جدا

مسئولية كبيرة قدامهم
وقدام نفسي
وقبل أي حد… قدام ربنا

وقبل كل عملية…
بيكون فيه لحظة صمت كده وتفكير وتركيز …

وأقول:
"يارب… دي مش شطارة مني
دي رحمتك أنت
اجبر بخاطرهم…
ووفقني علشان الطفل ده
يارب هما جايين عشمانين فيا…
وأنا عشمان فيك…
تسترني وتكرمني قدامهم" 🤲

💙 الحقيقة إننا مش بنمسك مشرط وبس…
إحنا ماسكين أمل ناس…
ودعوات طالعة من قلوب موجوعة

اللهم لا تحملنا ما لا طاقة لنا به
واستخدمنا ولا تستبدلنا
واجعلنا سبب في جبر الخواطر 🤍

دمتم بخير 🌷




#مسئولية
#ثقة

04/05/2026

✨ حكاية صغيرة… لكن فيها أمل كبير ✨

✨ اسمعوا معايا القصة دي… ✨

النهاردة قابلت أصغر طفل من حيث الوزن عنده سقف حلق مشقوق 💔👶

مش أصغر في السن…
لأني شفت قبل كده أطفال عمرهم ساعات بعد الولادة، وده طبيعي جدًا…

لكن المختلف هنا 😳👇
القمر ده اتولد وزنه 1 كيلو و100 جرام فقط!
أيوه… رقم صعب جدًا لطفل لسه مولود!

قعد في الحضانة 40 يوم
رحلة كلها تعب وصبر ودعاء…
لكن بفضل الله وصل النهاردة لـ 1 كيلو و800 جرام 💪✨

كل جرام زيادة… كان خطوة ناحية الحياة ❤️
تخيلوا فرحة مامته وجدته وسعادتهم😍😍

🙏 ربنا يحفظه لأهله
وحاليًا مستنيين وزنه يزيد أكتر
علشان نقدر نعمل عملية إصلاح سقف الحلق في الوقت الآمن بإذن الله

💡 الرسالة المهمة:
طفلك مش رقم… ومش حالة صعبة وخلاص
طفلك حكاية… ليها بداية… ونهاية سعيدة بإذن الله

مهما كان وزنه قليل
مهما كانت حالته معقدة
فيه فريق كامل بيشتغل علشان يوصل بيه لبر الأمان 👨‍⚕️💙

✊ إحنا مش بنعالج بس…
إحنا بفضل الله بنصنع أمل

دعواتكم
دمتم بخير 🌷




#أمل

04/05/2026

(أينما أنبتك الله فأزهر)

هذا الأسبوع
مع زملائى الأفاضل
وإجراء جراحتين بالمنظار .
لطفلين
كل منهما يعانى من
تشوه خلقى بالقولون
مرض هيرشسبرنج
بأحدث الطرق والتقنيات..

والحمد لله كنت من اوائل من أدخلوا هذه التقنية بالكامل إلى مستشفيات بنها..
سواء الأطفال التخصصى
أو التأمين الصحى..

وسعادتى بالغة برؤية زملائى وهم يجيدون الجراحة والمناظير ويقومون فى سن مبكر بإجراء ما تعلمته فى سنوات طوال.
اللهم لك الحمد.

والطريقة هى استخدام المنظار الجراحى
وآلة lone star.
مع تقنية re**al eversion
والتى تعد من أحدث الطرق لاستئصال القولون مع الحفاظ على العضلات فى فتحة الشرج بدون تأثر..
وهذا يقلل فرصة حدوث عدم تحكم بالبراز بعد الجراحة..والتى قد تحدث بعد بعض الطرق الأخرى..

الصورة اليمنى...فى مستشفى التأمين الصحى.
الصورة اليسرى ..فى مستشفى الأطفال التخصصى.
مع زملائى الكرام
د السيد
د نعيم
د أحمد
د عمرو
ومعانا فى الصورة مس التمريض الشاطرةجدا..مس وفاء

كلهم اخوتى الأعزاء.

(أينما انبتك الله فأزهر)

دمتم بخير.

03/05/2026

✨ الليزر موجود… والكي موجود ✨

ومن يوم ما أعلنّا إن الطهارة بالليزر متوفرة عندنا…
والسؤال بيتكرر بشكل يومي 👇

❓ هو الليزر أفضل؟
❓ ولا الكي (الحراري أو الكهربائي)؟

---

📌 خلّيني أجاوبك بكل وضوح وأمانة:

مفيش حاجة اسمها "الأفضل مطلقًا"

✔️ الليزر تقنية حديثة
✔️ الكي تقنية مجرّبة وقوية
✔️ الاتنين بيحققوا نفس الهدف بكفاءة عالية

---

🔹 رأيي الشخصي كجراح:
بصراحة… لا أجد فرقًا كبيرًا بين الطريقتين

والكلام ده بقوله لكل أب وأم قبل الإجراء 👈
من غير تجميل… ومن غير مبالغة

---

⚠️ الأهم من التقنية نفسها:

👨‍⚕️ خبرة الجراح
🧠 تقييم الحالة صح
🩺 اختيار الطريقة المناسبة لكل طفل

---

❗ ومهم جدًا:
ماينفعش أستخدم الكي وأقول "ده ليزر"

لأن ده مش تسويق…
ده حق مريض وأمانة

---

🎥 في الفيديوهات المعروضة:
حالتين ورا بعض… نفس اليوم
واحدة بالليزر وواحدة بالكي

👀 والنتيجة؟
فرق بسيط جدًا يكاد لا يُذكر

---

💡 الخلاصة:

🔸 الليزر ممتاز
🔸 الكي ممتاز
🔸 مفيش فرق جوهري كبير

👈 والاختيار في النهاية للأهل… بعد ما يفهموا كويس

---

🤍 رسالتنا:
نوضح الحقيقة… مش نبيع كلام
نشتغل بإخلاص… مش نبالغ في الدعاية

---

🌿 دمتم بخير.

02/05/2026

✨ الطهارة بالليزر… دلوقتي متوفرة عندنا ✨

وعدنا حضراتكم… والحمد لله نفذنا 🙏
تم توفير جهاز الليزر، وبدأنا بالفعل إجراء عمليات الطهارة لعدد من الأطفال بنجاح 👶💙

🔹 للتوضيح:
إحنا بنستخدم أحدث التقنيات في القطع حسب كل حالة:
✔️ الكي الحراري
✔️ الكي الكهربائي ثنائي القطب
✔️ الليزر

🔸 وكمان بنختار الأداة الأنسب لكل طفل:
✔️ جفت الطهارة
✔️ جهاز الجومكو
✔️ الحلقة البلاستيكية

📌 مهم جدًا:
مش بنقول إن في طريقة “أفضل” بشكل مطلق…
لكن بنختار الأنسب لكل حالة 👌
وكل الطرق آمنة وفعالة بإذن الله 👍

🎯 هدفنا دايمًا:
راحة الطفل 👶
أمان تام أثناء العملية 🛡️
أفضل نتيجة ممكنة 💯

🎥 (الفيديو في أول تعليق)

📍 أماكن العيادات:
زفتى – شارع أبوالحسايب أمام قسم الشرطة الجديد
السبت والأربعاء من ٥ لـ ٧ مساءً
01097996116

بنها – أمام مستشفى الأطفال التخصصي
الأحد والثلاثاء من ٥ لـ ٧ مساءً
01097096118

طنطا – مستشفى دار الشفا

القاهرة – مستشفى تبارك (التجمع الخامس)

📩 للحجز والاستفسار… تواصلوا معانا

02/05/2026

بوست ١ مايو.

النهاردة اول مايو
عيد العمال..

العمال والفلاحين هما آباءنا وأهالينا
وبأكون سعيد وفخور لما يدخل عليا العيادة أب بابنه أو بنته ويسلم عليا وأحس أن إيده خشنة من العمل والتعب بأحس أن ده إيد أب بياكلها بالحلال وبيأكل ولاده بالحلال.

وفى الظروف الصعبة اللى بنمر بيها ربنا يكون فى عون كل عامل وكل أب على تربية أولاده

وبالنسبة لينا فى العيادة فى عيد العمال مش هنقولك كل سنة وانت طيب بس
لا
هنقول لكل أهالينا من العمال الطيبين والغالين على قلبنا
أى أب عنده أسرة وله أولاد أو بنات او زوجة ولها عملية نقدر نعملهالها.فى تخصصنا
خاصة العمليات الكبيرة والمتقدمة والغالية على الكل احنا تحت أمره
يقدر يشرفنا ومايحملش هم
بإذن الله هنحاول نساعده على أد مانقدر.

احنا اخوات وأهل
والعيادة عيادة أخوك

دمتم فى أمان الله.

01/05/2026

لجميع الأهالى..

اللى محتاج عملية متقدمة لابنه أو بنته بالمنظار ..
يقدر يتواصل معانا
ونحدد له الميعاد.
01097096116. واتساب.

دمتم بخير

01/05/2026

من كتر ماالواحد شاف مواقف مع الأمهات تخلى الواحد يبكى ..
بقى أما بيشوف موقف طبيعى بيقول الحمد لله وبيبقى مش مصدق أن فيه ناس كويسة وعندها دين واخلاق وشهامة حقيقية.

يعنى فى نفس اليوم
أم جاية بابنها علشان العملية ولما سألتها على أبوه قالت سايبنا أنا و ٤ عيال ومش بيصرف علينا وأنا اللى بأشتغل عليهم وربنا يعيننى..
طبعا حاية لوحدها مع ابنها وهى حزينة ومكسورة بدون سند..

ام جاية تعمل عملية..وبعد الفحص والكشوفات. طيب ياامى انتى اتأخرتى ليه فى عمل العملية ..قالتلى يابنى انا زوحى متوفى من زمان وبأشتغل فى مصنع وبأربى عيالى وانتظرت لما يكبروا وواحد منهم بقى بيشتغل معايا فى المصنع ويقدر يصرف علينا فقولت آجى أعملها لأنى تعبانة من زمااان..
طبعا جاية لوحدها مع ابنها الصغير اللى بقى بيساعدها فى المصنع.وكل مره بتيجى لوحدها بدون أخ أو سند او عم او خال.

ده ومواقف غيرها كتير تقول أن احنا فى مجتمع انحدرت فيه مستوى الآجتماعيات والروابط الأسرية وتحمل المسئولية..وكمان زادت فيه الخسة والندالة والبعد عن الدين..

ولكن النهاردة الجمعة ..
بأعمل عملية لطفل وانا عارف أن والده متوفى من سنة ..والطفل معاه أخته ووالدته ..وطبعا لمحت فى عينيها الحزن علشان ابنها ولكن ..مش عارف من كتر ماشوفت من الحالات .حسيت أنها بتتكلم وهى مش مكسورة..آه زعلانة علشان وفاة زوجها طبعا..ولكن مش مكسورة..المهم عملت العملية وهى واقفة وابنها أمام العمليات وبأطمنهم..وهى بتطمن منى وتتصل بالتليفون بحد تطمنه..
المهم نزلت من العمليات .وفى استقبال المستشفى ..لقيت خال الطفل..وعمه..قاعدين مع بعض وهما اللى بيردوا على تليفونها .وبيسألونى على ابن أخوهم وابن اختهم زى مابيسألونى على اولادهم بالضبط ..ولأنى عارف الاب الله يرحمه بأخلاقه وأدبه وازاى كان دايما بيقف مع أهله ودايما يوصينى على مرضى كتير...اول ماشوفت خال ولاده وعمهم ..وهما فى المستشفى جنب ولاده وجنب زوجته افتكرته وبصراحة حاولت أهزر معاهم بس فعلا لم أتمالك نفسي من البكاء..
لا
مش علشان الموقف صعب أو موقف بطولى..
ولكن لأن ده اللى المفروض يحصل
المفروض اليتيم يلاقى اعمامه واخواله جنبه دايما وخاصة وقت الأزمات
المفروض الأرملة تلاقى جنبها سند وظهر وهى بتربى عيالها
هو ده الطبيعى جدا..
ولكن من اللى بنشوفه يخلينا نستغرب لما نشوف الطبيعى واللى وصانا بيه الرسول صلى الله عليه وسلم..

معلهش ازعجتكم ..بس فعلا أنا خارج من العمليات دلوقتى بمزيج من الفرحة للموقف..والحزن على مواقف أخرى..

مش عارف رسالتى وصلت ولا لا...
ولا أنا اللى مكبر الموضوع ..

دمتم بخير.

كتير بيقولولى ماتكتبش المواقف الحياتية اللى زى دى على صفحتك...
بس بأحس انها بتوصل رسالة مهمة..
إيه رأيكم
نكمل؟
ولا
نتوقف؟

30/04/2026

اليوم قد من الله على بالحصول على كورس تدريبى متقدم فى جراحات مناظير الأطفال ومسالك الأطفال المتقدمة على أيدى عدد من الخبراء الأجانب..

بالرغم أنى أمارس هذه الجراحات المتقدمة ولكن أؤمن أن معرفة كل جديد وحديث ومفيد يزيد من خبراتى ومداركى ومهاراتى وفيه نفع أكثر للمرضى وأهاليهم.

يتميز الكورس بأنه يناقش مرضين من أصعب وأعقد الأمراض فى تخصص جراحة الأطفال..من حيث القرار الجراحى والتقنية الجراحية ..

وهما
ارتجاع وانسداد الحالب..
Vesicoureteric reflux
Vesicoureteric obstruction .

ارتجاع وانسداد المرئ.
Gastroesophegeal reflux
Achalasia..

كما يناقش أحدث الطرق الجراحية لعلاجهما بالمنظار الجراحى بالتقنيات المختلفة..

وكما من الله عليا بهذه النعمة..
يسعدنى أن اقدم هذه العمليات الدقيقة للمرضى فى العيادة مجانا لعدد من الأطفال الفترة القادمة..

أى طفل محتاج أى عملية من العمليات دى..
يقدر أهله يشرفونى
وبإذن الله هنساعدهم ونعمل له العملية بأحدث التقنيات مجانا..

اللهم علمنا ماينفعنا وانفعنا ومرضانا بما علمتنا