Qaro Medium Eye Clinic

20/04/2025

10/02/2025

Too much time spent indoors and intensive near vision activity lead to more children suffering from nearsightedness or .

Taking regular breaks and spending more time outdoors can reduce this risk. Get regular eye checks!

21/08/2024

Qaroo ijoollee keessanii eeguu: Dandeettii Isaanii Guutuu ifatti baasuu:

Dandeettin arguu(vision) daa'imaa karra ittiin addunyaa baratanii fi qorataniidha. Akka carraa rakkoon fayyaa ijaa hin mul’anne yoo jiraate guddina barnootaa isaanii haalaan gufachiisuu danda’a. Rakkoon qaroo-dhiyoo fi qaroo-fagoo rakkoo fayyaa ijaa beekkamoo yoo ta’an, akkaataa ijoolleen odeeffannoo itti hubatan/fudhatan irratti dhiibbaa godha.

Kilinikni G/G Ijaa Qaroo Daa'imman gara barnoota isaanitti osoo hin galin dursitanii qorannoo ijaa walii galaa akka taasiftaniif maatii barattootaa hundaaf gorsa dabarsa. Qorannoon ijaa waliigalaa rakkoo fayyaa ijaa dafanii adda baasuuf kan fayyadu yoo ta’u, kunis yeroon yaala akka argatan kan dandeessisuudha. Kilinika keenyatti sakatta’iinsa rakkoo dandeettii arguu dhaqqabamaa ta’e ni kennina. Rakkoo fayyaa ijaa dandeettii dubbisuu, barreessuu fi sochii daree keessatti hirmaachuu daa’ima tokkoo irratti dhiibbaa uumuu danda’an adda baasuuf qorannoo gadi fageenya qabu ni gaggeessina.

Guddina daa’immanii gaarii ta’eef, rakkoo fayyaa dafanii adda baasuu fi yaaluun barbaachisaa dha. Qorannoon akka agarsiisutti rakkoon dandeettii arguu ijaa hin yaalamne dubbisuu, barreessuu fi xiyyeeffannaa irratti rakkoo uumuun ga’umsa barnootaa irratti dhiibbaa uumuu danda’a. Fayyaa ijaa daa'ima keessaniif dursa kennuudhaan, bakka dandeettii isaanii guutuu akka ga'an humna isaaniif kennuun barbaachisaadha.

Kilinikni G/G Ijaa Qaroo ijoollen qixaan akka arganii fi naannoo barumsaa mul’ataaf mijatu uumuuf kutannoo qaba. Daa'imni hundi carraa milkaa'inaa akka argatu waliin haa hojjennu.

Teessoo: Magaala Amboo Hoteela ANAATOLII fuuldura.

14/07/2024

MEESHAALEEN ELEKTIROONIKSII IJA KEENYA MIIDHUU NI DANDA'UU?
=====================================
Rakkoon fayyaa ijaa sababa ifa foddaa meeshaalee elektrooniksiin dhufuu haala itti-fayyadamaa fi turtii meeshaalee kanneen waliin dabarsinu irratti hundaa'a.

Ijji keenya dalagaa isaa sirriitti raawwachuuf imimmaan ga'aa fi haala qixa ta'een irra diriire qabaachuu qaba. Imimmaan xannachoota imimmaanii irraa maddee ija keenya uffisuun faayidaa barbaachisu erga nuuf kenneen booda ija keenyarraa haxaa’amee ujummoo imimmaaniin gara keessoo funyaaniitti gadi bu’a. Imimmaan ija keenya akka uffisuufi yeroo booda gara keessoo funyaanitti akka deemu kan taasisu immoo sochii qola ijaa (libsuu ijaa) ti. Ijji keenya walitti fufiinsaan imimmaan ga'aa akka qabaatuuf libsuun ija keenyaa baay'ee murteessaa dha jechuu dha. Irra-deddeebiin libsachuun kan barbaachises kanumaafi.

Uumamaan libsuun ijaa Daqiiqaa 1 keessatti giddu-galeessan 10-15 ta'a. Yeroo haasofnu garuu 20fi isaa ol ta'uu fi yeroo xiyyeeffannoon waa ilaallu (dubbisuu, fiilmii ilaaluu, konkolaataa oofuu, kkf) haga 5tti gadi bu'uu danda'a.

Walitti fufiinsaan libsachuun keenya ofiin yaadannee kan raawwannu utuu hin taane, hooggansa sammuun kan raawwatamu dha. Utuu nuti itti hin yaadin, sammuun keenya ofumaan beekee raawwachuu danda'a jechuu dha. Haa ta’u iyyuu malee, wantootni xiyyeeffannoo sammuu keenyaa hatan libsuu ija keenyaa hir’isuu danda’u.

Wantoota xiyyeeffannoo sammuu hatan keessaa tokko meeshaalee elektrooniksii fayyadamuun wantoota raawwatnuu dha. Yeroo meeshaalee kanneen fayyadamnu, xiyyeeffannoon sammuu keenyaa gara sanatti waan hatamuuf, libsuun ija keenyaa ni hir’ata. Kun immoo sochii imimmaanii jeequn kallattiidhan gogiinsa ijaatiif nu saaxiluu mala. Ijji keenyas jiidhina ga’aa dhabuurraan kan ka’e diimachuu, nu hooqsisuu, miira rigataa fi kkf qabaachuu eegala. Kunimmoo, si'a tokkoon utuu hin taane walitti aansinee yeroo dheeraaf fayyadamuu yeroo amaleeffannu nu mudata.

Amaleeffannaan akkanaa gogiinsa ijaan alatti wantootni fiduu malu:
✅ Mudoo Qaroo Dhi'ootiif nu saaxiluu danda'a. Keessumaa immoo, daa'imman yeroo dheeraaf meeshaalee elektirooniksii fayyadamuu yoo amaleeffatan rakkoo kanaaf saaxilamoo ta'u.
✅Marsaa yeroo hirribaa keenya jeequu mala (disrupt our body's natural sleep cycle), keessattuu galgala fayyadamuu yoo baay'isne.
✅Carallaan foddaa meeshaalee kanaarraa ba’u argaa keenya jeequu mala.

Furmaata
=====================================
1. Hamma danda'ametti turtii foddaa meeshaa elektrooniksii irratti dabarsinu hir’isuu, ykn boqonnaa fudhachaa fayyadamuu

⌚️20-20-20 rule:
🙏daqiiqaa 20f fayyadamuu(dubbisuu)
🙏 sekondii 20f..
🙏 meetira 6(20feet) fuulduratti
ilaalun boqochuu

2. Mallattoolee akka diimachuu, hooqsisuu, miira rigataa fi kkf yoo nu mudatan ogeessa yaala ijaan ilaalamuun gaaridha.

3 mallattoon armaan olii yoo mudatan ykn ifti foddaa meeshaalee elektrooniksii irraa ba'u kan nu jeequ yoo ta’e, fuullee ijaa fayyadamuu barbaachisa. Mallattoo homaa qabaachuu yoo baanne immoo fuullee ijaa fayyadamuun gaarii ta'ullee dirqama miti.

4. Daa’imman bilbila harkaa, kompiyuutaraa fi kkf yeroo dheeraaf akka hin fayyadamne ittisuu. Qajeelfamni kanaa jiraachus baatu 'American academy of pediatrics' akka yaada kennutti:
✍️Daa'imni waggaa 2 gadii foddaa
meeshaalee elektrooniksii waliin turuu hin
qaban(bilbila suur-sagalee irraa kan hafe)
✍️Daa'imni waggaa 2-5 guyyaatti sa'aatii
tokkoo ol meeshaalee kanneen irratti
dabarsuu hin qaban.

5. Kompiyuutara yeroo fayyadamnu haga dheerina harka keenyaa irraa siquu, ifa foddaa isaa hir'isuu fi xiqqoo ofii gaditti gochuu.

6. Yeroon hirribaa yoo gahu sa'aa 1-2 dursinee meeshaalee elektrooniksii fayyadamuu irraa of qusachuu.

KILINIKA G/G IJAA QAROO

Ambo

06/07/2024

Moora Ijaa!
======================
Moorri ijaa yeroo leensin ijaa ifa ofkeessa dabarsuu dadhabudha.
Uumamaan leensin ija namaa keessa jirtu kan halluu hin qabnee fi akka gaaritti ifa ofkeessa dabrsuudha. Haalli uumamaa Kuni yeroo danqamee leensin addaachun ifti gara Reetinaatti akka hin seenne aguugamu moora Ijaa ( Cataract) jedhama.
Moorri ijaa haala garaa garaatin uumamuu danda'a. Isaan keessaa Muraasni:
1. Congenital or Developmental cataract...........Moorri daa'imman akkuma dhalataniin wajjin dhalatu 'Congenital cataract' kanjedhamu yoo ta'u kan daa'imman erga dhalataniin booda umurii isaan guddinarra jiranitti kan uumamu 'developmental cataract' jedhama.

2. Aquired cataract............ Kanniin jedhaman ammoo erga daa'imman dhalatanii guddataniin booda kan uumamuudha. Kana jechuun, leensin kan isheen addaattee ifa ofkeessa dabarsuu dadhabdu sababa wayiitifi jechuudha.
Sababoonni Moora ijaa gosa kanaa fidan keessaa Muraasni isaanii:
1. Umurii (senile cataract)..........namoonni hedduun gaafa umuriin isaanii 50 fi isaa ol ta'u moora Ijaa godhatu
2. Sababa balaa ykn rukuchaatin (traumatic cataract.......physical trauma, electrical, radiation))
3. Dhukkuba ijaa gosa biraa hordofuun (secondary cataract)
4. Sababa dhukkuba qaama keessaa birootin fkf. Dhibee shukkaaraa
6. Qoricha dhukkuba gara biraatif fudhannu hordofuuni Fi kkf.

Namni dhukkuba moora ijaatin qabame ijji isaa suuta suuta dandeettin arguu isaa hirdhachaa adeemun boodarra cirumayyuu arguu dadhabu.

Moorri Ijaa akkamiin yaalama?

Moorri ijaa kan yaalamuu danda'u tajaajila baqaqsanii yaaluu qofaanidha. Moorri ijaa ogeessa ga'umsa qabuun baqaqsanii yaalun yoo taasifameef ijji arguu dadhabde deebitee arguu dandeessu. Haa ta'u malee namoonni hedduun sababa hanqina ogeessa ija yaaluf leenji'e baay'en hin jirreefi akkasumas sababa hubannoo dhabuutin ijji isaanii jaamee manatti kan hafan baay'ee hedduudha. Biyya keenya qofaa osoo hin taane akkuma addunyaa kanaattuu akka dhaabbanii fayyaa addunyaa (WHO) ifoomsetti namoota moora Ijaa qaban keessaa kan carraa baqaqsanii yaaluu ogeessa ga'umsa qabuun argatan harka kudha torba (17%) qofaadha.
Moorri ijaa yeroo barbaachisaa keessatti tajaajilli baqaqsanii yaaluu yoo taasifamuu baate rakkoo ijaa dabalataallee fiduu danda'a. Rakkoolee moora Ijaa yeroo barbaachisaa ta'e keessatti yaala dhabuu irraa hordofan keessaa Muraasni:-
1. Daa'immanirratti yoo tajaajilli baqaqsanii yaaluu dafee hin taasifamne ijji daa'imattii moorri hojjatamuufillee ijattiin dadhabduu taati(Amblyopia)
2. Moorri osoo hin yaalamin yoo ture ijarratti dhibee akka gilaawukoomaa fi Yuuvayitasii jedhamnis fiduu danda'a.
Kanaafuu Moorri ijaa yoo dafanii hin yaalamin agartuun ija namaa akka isheen baayyee dadhabduu taatu ykn ammoo dhibee biraatin mancaatullee gochuu waan danda'uuf yerootti yaala barbaachisaa argachuun baayyee barbaachisaadha.

29/06/2024

Dhukkuba Dhiibbaa Ijaa (Gilaaakoomaa/ Glaucoma) የዓይን ግፊት ህመም
=====================================================================
Tarii ogeessa fayyaatin dhukkuba dhiibbaa ijaa (Gilaakoomaa) akka qabdan yookiin immoo dhukkuba kanaaf caalmatti saaxilamaa ta’uu keessan isinitti himameera ta’a. yookiin immoo nama dhukkuba Kanaan qabame naannoo keessanitti beekuu dandeessu. Tasumaa dhukkubni kun maal akka ta’e hin beektanis ta’uu mala. kanas ta’ee sana, Gilaakoomaan maali, jireenya fi dandeettii arguu keenyaa irratti dhiibbaa akkamii geessisuu danda’a qabxiilee jedhan beekuun barbaachisaa dha.

Gilaakoomaan dhukkuba narvii agartuu keenyaa isa dhaamsa karaa ifaatiin ija keenya seenu fuudhee gara sammuu geessu irratti miidhaa qaqqabsiisudha. Narvii agartuu jennee kan waamnu kun seelota heddu qaqalloo ta’an fi funyoo elektrikaa fakkaatan irraa kan ijaarame ta’uu isaa irraa kan ka’e dabaluu dhiibbaa ijaatin salphaadhumatti miidhamuu danda’a. narviin agartuu haala Kanaan miidhame immoo dhaamsa gahaa fuudhuu fi gara sammuu keenyatti geessuu irratti dadhabaa waan adeemuuf dandeettin arguu ija miidhamee gadi bu’aa dhufa. haa ta’u malee, miidhan bifa kanaan narvii irra qaqqabu kun sadarkaa cimaa irra hamma gahutti namni dhibee kanaan qabame osoo of irratti hin barin yaala malee turuu ni danda’a. miidhaan kun dabalaa adeemuun sadarkaa olaanaa irra yeroo gahu ykn guutumaan guututti narviin agartuu yeroo miidhamu dhaamsi ija irraa gara sammuu deemu dhaabbachuun jaamina ijaa fida. Funyoon elektirikaa tokko yemmuu miidhaan irra gahu yookiin yoo citu funyoo kana suphuun ykn geeddaruun tajaajila irraa argachuun kan danda’amu yemmuu ta’u narviin ija keenyaa garuu erga miidhamee booda narvii kana jijjiiruun yookiin suphuun dadhabina ykn jaamina ijaa hambisuun hin danda’amu. Karaa birootiin yoo ibsamu, dhukkubni kun mallattoo tokko malee osoo hin beekamin dhibee hamaa dandeettii arguu keenyaa suuta suutaan dhabamsiisuudha. Haaluma wal fakkaatuun bal’ina dirree agartuu dhiphisuun ija dadhabsiisuun jaaminaaf nama saaxila. Kanaafuu, furmaanni jiru tokko qofa yoo ta’u, innis rakkoo dhibee kanaan dhufu hir’isuuf osoo dhukkubichi miidhaa hamaa hin geessisin yeroon qorannoo ijaa sirrii ta’e taasisuu fi gosoota yaalaa garagaraa ogeessa fayyaatiin kennaman fayyadamuudha. Dhukkubni Gilaakoomaa jaamina agartuu fiduun sadarkaa addunyaatti dhibee Moora ijaatti aanee sadarkaa lammaffaa irra kan taa’u yoo ta’u, akka biyya Itiyoophiyaatti immoo dhibee mooraa fi Tiraakoomaatti aanee sadarkaa sadaffaa irra jira. Jaaminni dhibee mooraa fi Tiraakoomaan dhufu erga yaalli baqaqsanii yaaluu godhamee booda namoonni agartuu isaanii dhukkubaan dura turee yookiin itti dhihaataa ta’e horachuu kan danda’an yoo ta’u jaamina yookiin hir’ina agartuu ijaa sababa Gilaakoomaatiin dhufu garuu of duuba deebisuun tasumaa hin danda’amu. Kanaaf jecha rakkoon dhukkuba Gilaakoomaatiin dhufu hedduu yaachisaa fi sodaachisaa ta’a. kanaafuu kaayyoo guddaan yaala kennamuu guyyaa dhibeen barame irraa kaasee miidhaan dabalataa akka hin uumamnee fi cimaa akka hin adeemne gochuu dha. dhugaa jiru kana immoo namoonni dhibee kana qabanii fi fuulduratti saaxilamoo ta’uun itti himame sirriitti hubachuu qabu.
Dabalataanis akka dhibee moora ijaa yaala yeroo tokko godhameen fayyuu kan hin dandeenye waan ta’eef, guyyaa dhukkubichi barame irraa kaasee osoo addaan hin kutin
umrii guutuu deddeebi’uun hordoffii yaalaa gochuun dirqama ta’a.

Gilaakoomaa maaltu fida? What is the cause of Glaucoma?
=====================================
Akkuma qaama keenya kanneen biroo ijji keenya hojii ilaaluu isaa kan idilee sirnaan akka hojjatuuf wantoonni akka qilleensaa, bishaanii, nyaataa fi kkf isa barbaachisu. Ijji keenya boca kubbaa fakkaatu kana qabatee akka turu kan isa dandeessisu dhangala’aa bishaan fakkaatu (bishaan ijaa) yoo ta’u, dhangala’aan kun boca ijaa eeguun cinaatti kutaalee keessa ijaatiif wantoota barbaachisu geessuu fi xuraawaa adeemsa gubama soorataa keessatti uumamu dhabamsiisuuf tajaajila. Kubbaan tokko akka kubbaatti tajaajila isa irraa eeggamu kennuuf keessa isaatti dhiibbaan qilleensaa gahaa ta’e jiraachuun dirqama. Kubbaa kana keessa dhiibbaan jiru yoo gadi bu’e yookiin immoo dabale kubbicha irra miidha qaqqabsiisa. Haaluma wal fakkaatuun hammi dhangala’aa ija keenya keessa jiruu yoo gadi bu’e yookiin yoo dabale, ijji keenya hojii isaa idilee akka sirnaan hin hojjanne gochuu irra darbee ija keenya irra miidhaa qaamaa geessisa. Akkuma armaan olitti ibsame Gilaakoomaan kan uumamu yemmuu dhangala’aan ijaa yookiin bishaan ija keenyaa hamma barbaadamuu ol kuufamuun(dhiibban ijaa dabaluun) narvii ijaa kan dhaamsa ija irraa gara sammuu geessu kana irra miidhaa qaqqabsiisuu dha. dimshaashumatti, Gilaakoomaan kan uumamu yeroo hammi dhangala’aa ija keenya keessatti argamuu dandeettii ijji keenya baachuu danda’uu ol darbuun dhiibban ijaa narvii agartuu irratti miidhaa geessisuu dha.

Wantootni Gilaakoomaaf nama saaxilan maal fa’a? What are the risk factors for glaucoma?
=====================================
Dhukkubni kun sanyii, saala, umurii fi amantaan osoo hin qoodin kutaa hawaasaa kamuu miidhuu kan danda`uudha. haa ta’u malee wantootni dhibee kanaaf caalmatti nama saaxilan gurguddoon kanneen armaan gadiiti.
1. Umuriin dabalaa adeemuu (waggaa 40 fi achii ol); akkuma umuriin dabalaa adeemuun carraan dhukkuba Gilaakoomatiif saaxilamuu dabalaa adeema.
2. Sanyii gurraacha (hortee Afrikaa) ta’uu
3. Maatii keessaa (obboleettii, obboleessa, haadha, abbaa) namni Gilaakoomaan qabame yoo ture/jiraate.
4. Dhukkuboota qaamaa biroo (dhibee sukkaaraa, dhiibbaa dhiigaa, dhibee onnee, bowwoo..."migraine")
5. Rakkoolee ijaa fuullee ijaatin/marayaan yaalaman (qaroo fagoo fi qaroo dhihoo)
6. Ija balaa rukuttaa fi dhukkuba biraatiin miidhaan irra gahe
7. Hir’achuu furdina gurraattii ijaa (haphachuu gurraattii ijaa)...thin cornea
8. Qorichoota yeroo dheeraaf fudhataman (keessumattuu koortizoon/Isteerooyid kan of keessa qaban)

Gilaakoomaan jiraaachuu isaa akkamitti beekama?How do we know someone has Glaucoma?
=====================================
Namni tokko dhibee Gilaakoomaa qabaachuu fi dhiisuu isaa beekuu kan danda’u ogeessa ijaa muuxannoo gahaa qabuun qorannoon ijaa barbaachisu hundi erga godhameefii booda. Keessumattuu namni tokko Gilaakoomaa qabaachuu fi dhiisuu adda baasuuf qorannoowwan bu’uuraa armaan gadii kunneen godhamuu qabu.
1. Dhiibbaa ija keessaa safaruu.
2. Furdina gurraattii ijaa/koorniyaa safaruu.
3. Meeshaa addaa fayyadamuun kallattiin narvii ijaa ilaaluun miidhaa jiru adda baasuu fi yoo jiraate immoo sadarkaa irra jiru safaruu.
4. Meeshaa addaatiin dirree agartuu ijaa safaruu
Qorannoowwan asii olitti tuqaman kunneen erga taasifamanii booda namni tokko Gilaakoomaa qabaachuu fi dhiisuu akkasumas sadarkaa inni irra jiru tilmaamuun filannoowwan yaalaaf ta’an irratti ogeessi fayyaa dhukkubsataa mariisisuun yaalii barbaachisu irratti murtii kenna. Yeroo qorannoon taasifamu kanatti namootni Gilaakoomaa irraa bilisa ta’anii garuu carraan fuulduratti qabamuu isaanii bal’aa ta’e waggaa waggaatti yeroo tokko qorannoon ijaa akka taasifamuuf gorsi ni kennamaaf.

Yaalli Gilaakoomaa maali? What is the treatment for glaucoma?
=====================================
Qabxiin guddaan namni dhibee Gilaakoomaa qabu tokko cimsee beekuu fi amanuu qabu, hir’achuun dandeettii arguu sababa Gilaakoomatiin dhufe yaala kamiinuu tasumaa bakka duraan turetti deebisuun akka hin danda'amneedha. faayidaan yaala godhamuu miidhaan narviin ijaa irra gahu bakka jirutti akka dhaabbatu yookiin caalatti akka hin miidhamne gochuuf akka ta’e sirritti beekuu qaba.
Gosoonni yaalaa Dhibee Gilaakoomaatiif godhamanii gurguddoon sadii ( yaala qorichaa, yaala cararii ifaa/laser/ fi yaala baqaqsanii yaaluu Gilaakoomaa) yoo ta’an kaayyoon isaanii guddaan dhiibbaa ija keessa jiru hir’isuudhaan miidhaan caalu akka hin dhufne ittisuu fi yoo jiraates miidhaa kana xiqqeessuudha.

Gilaakoomaa ittisuun ykn Jaamina Gilaakoomaan dhufu xiqqeessuun akkamitti danda’ama? What to do to prevent or minimize sight loss from Glaucoma?
=====================================
Akka waliigalaatti wantootni bi'uuraa armaan gadii yoo qixaan hubataman dandeettii arguu ija ofii tursiisun, gilaakoomaan yoo jiraates miidhaa isaa xiqqeessun ni danda'ama.
1. Umriin keessan yoo afurtama darbe, maatii keessa namni Gilaakoomaan qabame yoo jiraatee fi akkasumas dhibeewwan qaamaa biroo kan Gilaakoomaaf nama saaxilan yoo jiraatan miidhaa isaa kana hambisuun waan danda’amuuf, waggaatti yoo xiqqaate yeroo tokko qorannoo ijaa guutuu taasisuu.
2. Dhaabbilee fayyaa kan mootummaas ta’ee kan dhuunfaa kanneen tajaajila qorannoo Gilaakoomaa kennan beekuu.
3. Waa’ee Gilaakoomaa irratti hubannoo qabdan cimsuu fi akkamitti ija keessan akka miidhu beekuu
(ምንጭ መጽሐፍ: የዓይን ጤናና ክብካቤ በፕ/ር የሺጌታ ገላዉ ከገፅ 47-70 በከፊል የተወሰደ)

Dr Gudina Milkessa (Ophthalmologist)

Kilinika G/G Ijaa Qaroo

Ambo

28/06/2024

Infeekshinii koorniyaa Ijaa(Keratitis)

Keratitis
===================
Dhukkubni ijaa 'keratitis' jedhamu sababa garaagaraatin kan dhufuu fi kutaa ija keenyaa ishee gara fuulduraatii gurraachoftee muldhattu kan 'cornea' jedhamuun beekamu kan miidhudha.
Kutaan ija keenyaa ishee gurraatin Kuni alaa yoo ilaalan gurraachoftee muldhattullee uumamni ishee akka fulleeti. Kan gurraacha'u duuba isheetti argama malee ofiif akka fulleetti gargaarti.
Egaan dhukkubni keratitis jennu Kuni haalota garaa garaatin kan dhufu yoo ta'ellee isaan keessaa kanneen sababa lubbu qabeeyyii ijaan hin muldhanneen dhufan(infection) Yaa ilaallu. Infeekshiniin koorniyaa (infective keratitis) Vaayirasii, baakteeriyaa ykn faangaasidhaan dhufuu danda'a.
Nama fayyaalessa tokkorratti koorniyaan (cornea) akka salphaatti baakteeriyaa ykn faangaasidhaan hin miidhamu(uumamaan akkaataa ittiin infeekshiniirraa ofittisu qaba).
Haa ta'u malee sababoota armaan gadiitin:
1. Yeroo ijji namaa rakkoo gogiinsaa godhatu
2. Yoo miidhan rukuttaa (trauma) ijarratti uumame
3. Yeroo Vaayiresiin tokko tokko ija miidhan (Fknf herpes virus)
4. Tiraakooman baallallee ijaa yoo keessatti garagalche
5. Dandeettin ittisa dhibee qaama keenyaa yoo gadibu'ee baakteeriyaa ykn faangaasin akka salphaatti koorniyaa ija keenyarratti balaa fiduu danda'a.

Mallattoolen dhukkuba kanaa
============================
-Imimmaan yaasuu
-ijji diimachuu
-Ifa ilaaluu sodaachuu
-Ciimmaa garmalee yaasuu
-ija gurraattirratti waan adiin mullachuu
-Dhukkubbiin ijaa hamaa ta'e jiraachuu fi kanneen kana fakkaatanidha.

Yaala dhukkuba kanaa
====================
Dhukkubni Kuni yoo yeroodhan bakka ogeessi yaala ijaa jirutti tajaajilaaf deemmame akka salphaatti yaalamuu danda'a. Bakka ogeessi yaala fayyaa ijaa jiru kanan jedheef sababa qabatamaa qabadheeni. Yaalli ijaa baayyee ofeeggannoo fi beekumsa ga'aadhan yoo hin deeggaramne yeroo gabaabduu keessatti ijji nama baduu waan maluufidha. Akkasumas sirna barnoota fayyaa biyya keenyaa keessatti ogeessonni fayyaa yeroo yuunivarsiititti barnoota ogummaa fayyaa baratan yaala ijaarratti yeroo gabaabduu qofti waan kennamuuf dhukkuba ijaa kana sirriitti yaaluf barnoonni kennamu quubsaa miti. Kanaafuu yeroo mallattoolen armaan olii Kuni isinirratti argamu gara mana yaalaa deemun akkuma barbaachisaa ta'e bakka ogeessi yaala ijaa itti argamu adda baafachuunis baayyee murteessadha.
Dabalataanis ogeessonni fayyaa sadarkaa garaa garaarra jirtan dhukkubsataa mallattoolee armaan olii qaban gara tajaajilli yaala fayyaa ijaa itti argamutti erguun filatamaadha. Akkasumas ogeessi fayyaas ta'ee namoonni faarmaasii(mana qorichaa) qabdan nama ijji na hooksise, na diimate ykn ammoo mallattoolee armaan olii himataniif callisaan qoricha (especially 'steroids eye drops') kennuun miidhaan hordofsiisuu malu hamaa waan ta'eef ofeeggannoo gochuu akka qabdan asumaanan ergaa dabarsa.

Dhukkubni Keratitis jedhamu Kuni yoo yaala hatattamaa hin arganne maal ta'a?
===============================
1. Yeroo gabaabduu keessatti ijji gurraattin kun urachuun (corneal perforation) agartuu ofii dhabuun ni mala
2. Infeekshiniin ala ijaarratti uumame Kuni gara keessa ijaa seenun keessi isaa akka tortoru gochuu mala
3. Madaa hamaa geessisuun yeroo turtii dheeraa booda tarii yoo fayyellee godaannisa godhachuun ijji jaamuu danda'a.
4. Infeekshiniin Kuni yoo yerootti hin too'atamne ija birallee darbee gara sammuu dhaqabuun lubbuufiyyuu sodaachisuu mala

Kanaafuu mallattoolee armaan olitti eeraman kana yoo ofirratti agartan hatattamaan gara mana yaalaa ogeessa ijaa qabu deemun filatamaadha.

Dr. Beekumaa Jimaa (Ophthalmologist)

Kilinika G/G Ijaa Qaroo

Ambo