17/01/2023
Shan nimco ka faa'ideyso inta aanay shan ku haleelin, ayuu suubannaheenu NNKH ina yidhi. Suugaanta soomaalidu kaalin weyn ayay kaga jirtaa kor u qaadida wacyiga bulshada, baraarujinta, xuma reebida samo farida wax ka odhashada kolba xaalada bulsho ay ku jirto. Gabaygan uu tiriyey Abwaan Cali Maxamuud Qeylshe waxa uu ku qotomaa isla xadiiskaa aynnu saray kusoo sheegney. Fasiraad iyo falkin toona uma baahno e bal intan ila akhrista shanta galadood waa.
1. Dhallinyaranimadaada ka faa'ideyso inta aanad gaboobin.
2. Caafimaadka ka faa'ideyso inta aanad bukoon.
3. Qanninimadaada ka faa'ideyso inta aanad sabool(faqiir) noqon.
4. Noloshaada ka faa'ideyso inta aanad geeriyoon.
5. Wakhtigaaga ka faa'ideyso inta aanad mashquul noqon.
Galladaha shantaa ee ILAAH gurada kaa saaray.
Inta aan shan kale loo gediyin gaaxda ka idlayso.
Ger madow, murqaha giisan iyo dhuuxa aan gororin.
Maskax aan gef iyo daal badnayn, gole- ka fuulkaaga.
Inta aan gabow lagu sallidin, gaaxda ka idlayso.
Naflahaas adduunyada gigimay gaal iyo islaamba.
Caafimaadka guunka ah bar baan gaajo laga siine.
Intaad gogosha ku ururinood guri kasoo taahin.
Oon kaniin kasiinkaaga noqon gaaxda ka idlayso.
Siduu beri abwaan gabay badnaa noogu gogol xaaray.
Hal galgalatay weeyoo dunidu gelinba waa cayne.
Geel waxaad dharaar soofsatiyo guunyadaad dhaqatay.
Ama gini akoonnada ku jira go'id ka dhawraysey.
Guulaan harkeed weeye iyo guuxa maanyada e.
Inta aan saboolnimo ku galin kaaxda ka idlayso.
Siduu bacadle gabaygii shirkiga galiyey taariikhda.
Geerida xaqbaa loo arkaa gaal iyo islaane.
God laguu qodyaa iyo yaxaas gaws ku mariyaaba.
Good micida kula sayra iyo gaani ku helyaaba.
Qaraxyada naflaha gaabshey iyo gumuc ku leefyaaba.
Waxaan gibilku saarneyn inaad geedigii rariye.
Intaan malag garruun kuulq iman gaaxda ka idlayso.
Murtidii abwaanniin go'aa geliyey diiwaane.
Nin labaatan gaariyo adduun wey is gelayaane.
Kanshadaad guclaha orodka iyo gool ku dhalinayso.
Amaad geym ismaat foon ku jira kula gariirayso.
Inta aam gurbood iyo haween gurada kaa fuushan.
Oo aan gasiinka u qatimin goodna jirinaaya.
Gardarana la ooyoon xishood goojo laga siinin.
Risiqooda guudkaan la surin gaaxda ka idlayso.
Farshaxannimo iyo abqarinimo aad u sarraysa ayaa gabaygan ka muuqada, waxa marag ma doon ah in aynaan ku baraarugsanayn inteena baddan Galaddahaas shanta ah, waxaad arkaysaa qof maanta dhan baraha bulshada iska dhex jooga oo aan wax dheefa aanan ka helayn, wakhti baddana ka galayo aan ku baraarugsanayn wakhtiga ka galay.
Dheef aan wax loo dhigo jiran ayay aaladan baraha bulshadu leedahay tusaale ahaan; wax ayaad ka baran kartaa adiga oo jooga gurigaaga amaba goobtaada shaqo, dadka ayaad uga faa'ideyn kartaa hibadaada ood kula wadaagi kartaa, samaha ayaad ku baahin kartaa, ikk. Nimcooyinka Eebbe ee tiro beelka ah intani xasuus ayay aniga iyo idinkaba u noqonaysaa saaxiibbayaal .
W/Q: Cabdisalaan Cabdilaahi.
