https://www.facebook.com/103586181503408/

Dr. Sanyii Jalqabaa, Nekemte (2025)

04/06/2024

MEESHAALEEN ELEKTIROONIKSII IJA KEENYA MIIDHUU NI DANDA'UU?
=============
Gaaffiin kun gaaffii namoota baay'ee ti. Deebiin isaas haala itti-fayyadama keenyaarratti hundaa'a. Dhimma kana ilaalchisee maxxansa armaan gadii isiniif qoodeera. Itti dhiyaadhaa!

Daqiiqaa tokko keessatti, giddu-galeessaan si’a 12-15 kan libsannu yoo ta’u, sa’a 1 keessatti si’a 900 ol libsachuu dandeenya. Haa ta’u malee, maaliif akka libsannu yaaddanii beektuu?

Dalagaa isaa sirriitti raawwachuuf iji keenya imimmaan ga'aa qabaachuu qaba. Imimmaan kun faayidaa barbaachisu erga nuuf kenneen booda ija keenyarraa haxaa’amee gara keessoo funyaaniitti gadi bu’a.

Imimmaan kan maddisiisan xannachoota imimmaanii yoo ta'an, imimmaan ija keenyarra diriirsuuf, akkasumas, ija keenyarraa haxaa'ee gara keessoo funyaaniitti gadi buusuuf kan nu gargaaru immoo sochii qola ijaa (libsuu ija keenyaa) ti.

Iji keenya walitti fufiinsaan imimmaan ga'aa akka qabaatuuf libsuun ija keenyaa baay'ee murteessaa dha jechuu dha. Irra-deddeebiin libsachuun kan barbaachises kanumaafi.

Walitti fufiinsaan libsachuun keenya ofiin yaadannee kan raawwannu utuu hin taane, hooggansa sammuun kan raawwatamu dha. Utuu nuti itti hin yaadin, sammuun keenya ofumaan beekee raawwachuu danda'a jechuu dha. Haa ta’u iyyuu malee, wantootni xiyyeeffannoo sammuu keenyaa hatan libsuu ija keenyaa hir’isuu danda’u.

Wantoota xiyyeeffannoo sammuu hatan keessaa tokko kompiyuutara fayyadamuu dha. Yeroo kompiyuutara fayyadamnu, xiyyeeffannoon sammuu keenyaa gara sanatti waan hatamuuf, libsuun ija keenyaa ni hir’ata. Kunimmoo, kallattumaan gogiinsa ijaatiif nu saaxiluu mala. Iji keenyas jiidhina ga’aa dhabuurraan kan ka’e diimachuu, nu hooqsisuu, miira rigataa fi kkf qabaachuu eegala.

Kunimmoo, si'a tokkoon utuu hin taane walitti aansinee yeroo dheeraaf fayyadamuu yeroo amaleeffannu nu mudata. Amaleeffannaan akkanaa Mudoo Qaroo Dhi'ootiif illee nu saaxiluu danda'a. Keessumaa immoo, daa'imman yeroo dheeraaf meeshaalee elektirooniksii fayyadamuu yoo amaleeffatan rakkoo kanaaf saaxilamoo ta'u.

Darbee darbee immoo, carallaan foddaa meeshaalee kanaarraa ba’u argaa keenya jeequu mala. Kanarraan kan hafe, meeshaalee kana fayyadamuu waliin wal-qabatee miidhaan kallattumaan ija keenyarra ga'u hin jiru.

Wantoota Kana Hambisuuf Maal Gochuu Qabna?
-----------
1. Hamma danda'ametti, turtii kompiyuutara irratti dabarsinu hir’isuu qabna, yookaan immoo gidduu gidduun boqonnaa fudhachuu qabna.

2. Mallattoolee akka diimachuu, hooqsisuu, miira rigataa fi kkf qabaachuu yoo eegalle, yookaan ifti foddaa meeshaalee kanaarraa ba'u kan nu jeequ yoo ta’e, marayaa fayyadamuun nuuf mala. Mallattoo homaa qabaachuu yoo baanne immoo marayaa fayyadamuun dirqama miti.

3. Daa’imman keenya bilbila harkaa, kompiyuutaraa fi kkf yeroo dheeraaf akka hin fayyadamne ittisuu qabna.

Barreeffamni kun kitaaba FAYYAA IJAA keessaa gabaabfamee kan fudhatame dha.

Galatoomaa!

Dr. Sanyii Jalqabaa, Ispeeshaalistii Ijaa.

01/06/2024

Kiliinika Addaa Dhibee Keessoo 'Iskaay'. Buraayyuu, Mana Murtii Olaanaa Fuuldura.

Sky Internal Medicine Specialty Clinic. Burayu, Infront of the High Court.

Dr. Mo'ataa Yaadatee, ispeeshaalistii dhibee keessoo (internist).

05/05/2024

BALAAWWAN IJA KEENYA MUDACHUU MALAN (OCULAR TRAUMA)
======================
Jiruu fi jireenya taasifnu keessatti balaawwan garaagaraa, kanneen akka balaa rukuttaa, waraansa, balaa keemikaalaa, balaa elektirikaa,yookaan balaa ibiddaatiif saaxilamuu dandeenya.

Qaamolee biroo waliin wal-bira qabnee yeroo ilaallu hagas mara heddummaachuu baatus, iji keenyas balaawwan kanaan miidhamuu danda’a.

Battala balaan mudatutti, libsachuu, ija keenya haguuguu fi fuula keenya gara biraatti naannessuun kan amaleeffatame dha. Gochi kunneen ija keenya balaarraa eeguuf gargaaru.

WANTOOTNI BALAA IJAAF NAMA SAAXILAN MAAL FA’A? (RISK FACTORS)
------------------
Taateewwan akka tasaa mudatanii fi of-eeggannoo keenyaan ol ta’anbalaa ijaa nurraan ga’uu danda’u. Isaanis: wantoota saffisa guddaan furguggifaman (mismaaraa fi kkf), wantoota baay’ee xixiqqoo ta’an, keemikaalota faca’an tokko tokko (bulbula asiidii, bulbula beezii fi kkf), wantoota karaa cinaatiin ija keenyatti furguggifamanii fi kkf fa’a.

Akka waliigalaatti, wantootni balaa ijaaf nu saaxiluu malan kanneen armaan gadii ti.

(1). Qaruuraa dhugaatii of-eeggannoo malee banuu.
Dhugaatii warshaalee keessatti qophaa’an of-eeggannoo malee banuun balaa ijaatiif nu saaxiluu danda’a.

Akkuma kana, manatti kan qophaa’anis yeroo dheeraaf ukkaamfamanii yoo turan, si’a banaman balaa ijaatiif nusaaxiluu malu. Balaan akkanaa tibba ayyaana waggaa heddummaata.

(2). Hojiiwwan tokko tokko:
Hojii mukaa, hojii sibiilaa, dhagaa cabsuu fi kkf irratti hirmaachuu, warshaalee garaagaraa keessa hojjechuu, keemikaalota addaa addaa fayyadamuu fi kkf.

(3). Lolatti hirmaachuu yookaan araaraaf gidduu seenuu.

(4). Tapha ispoortii: keessumaa immoo, tapha buunyaa (aboottee) fi tapha kubbaa irratti hirmaachuu.

(5). Saffisa ol’aanaan doqdoqqee oofuu.
Yeroo akkanaa, ilbiisotni qilleensa keessa balali’an illee miidhaa cimaa nurraan ga’uu danda’u.

(6). Balaa konkolaataa:
Akkuma qaamolee keenya biroo, iji keenyas balaa kanaan miidhamuu danda’a.

(7). Dandeettiin arguu keenyaa gadi bu’aa yoo ta’e.
Iji sirriitti arguu hin dandeenye irra-deddeebiin balaaf saaxilamuu danda’a. Argaan ija tokkoo yoo bade, iji kaanis salphaatti balaaf saaxilamuu mala.

(8). Wantoota biroo:
Fakkeenyaaf: rakkoon gaggabdoo yeroo nama mudatu, ijii fi qaamoleen biroo balaa garaagaraaf saaxilamuu danda’u.

HUBADHAA!
Daa’imman namoota kaan caalmaatti balaa ijaaf saaxilamoo dha. Sababni isaas, wantoota balaa fidan adda baasanii beekuu dhabuurraan kan ka’e ittiin of-miidhuu danda’u.

BALAA IJAA AKKAMIIN ITTISUU DANDEENYA? (PREVENTION)
-----------------------
Of-eeggannoo barbaachisan mara taasisuun balaa ijaa ofirraa ittisuu ni dandeenya. Akka fakkeenyaatti:

1. Dalagaan keenya balaaf kan nu saaxilu yoo ta’e, meeshaalee of-eeggannoof oolan (safety equipments) fayyadamuu qabna.

Hojii akkamii kan hojjennu yoo ta’e?
Hojii mukaa fi sibiilaa, dhagaa cabsuu, warshaalee garaagaraa keessa hojjechuu fi kkf.

Meeshaalee akkamii fayyadamuu qabna?
Haguuggii fuulaa (face shield), haguuggii ijaa (goggles), yookaanmarayaa of-eeggannoof oolan (safety spectacles) fa’a fayyadamuu qabna.

2. Daa’imman bakka hojii keenyaa akka hin dhufne ittisuu qabna.

3. Itti-fayyadama keemikaalaa sirriitti beekuu qabna.
Keemikaalota fayyadamnu mara of-eeggannoo gaariin qabachuu qabna.

Kanneen faayidaan ala ta’anis bifa miidhaa uumuu hin dandeenyeen dhabamsiisuu qabna.

Keemikaalota hunda bakka daa’imman arguu fi ga’uu hin dandeenye kaa’uu qabna.

4. Tapha ispoortii tokko tokko irrattis meeshaalee of-eeggannoof gargaaran fayyadamuu qabna.

5. Doqdoqqee yeroo oofnu saffisa hir’isuu, haguuggii mataa fi kan fuulaa (heelmeetii) yookaan immoo marayaa bal’aa fayyadamuu qabna.

6. Lola keessatti hirmaachuurraa of-qusachuu qabna. Akkuma kana, araara buusuuf lola gidduu yeroo seennuseeggannaa ofiif gochuu qabna.

7. Ija tokko qofa kan qabnu yoo ta’e:
Marayaalee of-eeggannoof gargaaran fayyadamuu qabna. Akkuma kana, lola keessatti hirmaachuu irraas of-qusachuu qabna.

HUBADHAA!
Wantoota miidhaa fiduu malan kamuu daa’imman keenyarraa fageessuu qabna.

(Kitaaba FAYYAA IJAA, fuula 225 hanga 240 keessaa gabaabbatee kan fudhatame).

AYYAANA GAARII!

DR. SANYII JALQABAA, ISPEESHAALISTII IJAA.

05/08/2023

MARAYAALEE KEENYA OF-EEGGANNOO AKKAMIIN QABACHUU QABNA?
(SPECTACLES HANDLING)
=====================
Gatiin marayaalee yeroo dhaa gara yerootti qaala’aa waan deemuuf, marayaalee of-harkaa qabnu haala gaariin qabachuun barbaachisaa dha. Eeggannoo barbaachisu yoo gooneef, waggoota dheeraaf nu fayyaduu danda’u.

Walumaagalatti, marayaalee keenya bifa armaan gadiitiin qabachuu qabna.

1. Yeroo kaa’annu yookaan yeroo ofirraa baasnu harka lachuufayyadamuu qabna (fakkii armaan gadii 20.5 (A) ilaalaa). Gam-tokko qofaan qabnee ofirraa kan baasnu yoo ta’e, marayaaleen keenya nu jalaa jal’achaa deemu.

2. Dalagaalee akka qaama dhiqachuu, bishaan daakuu, rafuu, sochii qaamaa fi kkf yeroo goonu ofirraa baasuu qabna.

3. Yeroo ofirraa baasnu, qarqara isaatiin dhaabuu yookaan man’ee isaatti deebisuu qabna (fakkii 20.5 (B) ilaalaa).

4. Addarratti baachuu irraa of-qusachuu qabna.Kana gochuun, marayaaleen keenya bal’achaa akka
deeman taasisa (fakkii 20.5 (C) ilaalaa).

5. Fuullee marayaalee qubaan tuquu hin qabnu.

6. Fuulleen marayaalee keenyaa yoo xuraa’e, uffata lallaafaa man’ee isaa keessa jiruun haxaa’uu qabna (fakkii 20.6 (A) ilaalaa).

7. Akkaan yoo xuraa’e immoo:
(A) Bishaan muraasa itti biifuun haxaa’uu dandeenya.

(B) Saamunaa dhangala’aa fi bishaan ho’aa fayyadamuunqulqulleessuu dandeenya (fakkii 20.6 (B) ilaalaa).

(C) Sana booda, uffata man’ee isaa keessa jiruun qoorsuu qabna.

Kitaaba FAYYAA IJAA fuula 324-326 irraa kan fudhatame.

GALATOOMAA!

DR. Sanyii Jalqabaa tiin.
(Ispeeshaalistii Ijaa)

14/06/2023

https://m.facebook.com/story.php?story_fbid=807597824051197&id=100044029604041&mibextid=Nif5oz

03/05/2023

KULKULFANNAA (INFLAMMATION)
============================
Kulkulfannaa yeroo jedhamu dhageessanii beektuu laa? Dubbisni armaan gadii dhimma kanarratti kan xiyyeeffate dha. Itti dhiyaadhaa!

KULKULFANNAA JECHUUN MAALI?
---------------------------
Qaamni keenya dandeettii dhibee ofirraa ittisuu ni qaba. Dandeettiin uumamaan nuuf kenname kun MADINUMMAA (IMMUNITY) jedhama. Madinummaan keenya dhibee nurraa qolachuu, qaamni keenya dafee akka fayyu gochuu fi balaa nu mudatu dandamachuu akka dandeenyu gochuuf nu gargaara.

Qaamni keenya dhibeen yoo hubamu, madinummaan keenya dhibee kana nurraa qolachuu eegala. Deemsa kana keessatti, qaamni keenya dhiita’uu, diimachuu fi dhukkubuu eegala. Jijjiiramni qaama irratti mul’atu kun 'Kulkulfannaa' (Inflammation) jedhama. Tarii “qaamnikoo na kulkule” yeroo jedhamu dhageessanii beektu ta’a. Jechi kunis loqoduma ummataa kanarraa fudhatame.

Qaamni keenya yeroo kulkulfatu dalagaa idlee isaa raawwachuu hanqata. Fakkeenyaaf: miilli keenya yoo nu kulkule okkoluu dandeenya. Iji keenya yeroo kulkulfatu dandeettiin arguu keenyaa hir’achuu mala. Haa ta’u iyyuu malee, dhibee nu mudaterraa fayyuu yoo eegallu dalagaan qaama keenyaas bakkatti deebi’aa deema.

Madinummaan qaama keenyaa akkuma faayidaa qabu, si’a tokko tokkos miidhaa nurraan ga’uu danda’a. Kana hubachuuf, fakkeenya tokko fudhannee ilaaluun barbaachisaa dha. Madinummaan keenya ministeera waraanaa qaama keenyaa ti. Dhibeen immoo nyaaphatti fakkeeffama. Qaamni dhibeen hubame immoo dirree waraanaatti fakkeeffama. Dirree waraanaa madinummaanii fi dhibeen irratti wal-waraanan akka jechuuti.

Waraanni yeroo geggeeffamu, gareewwan lolatti hirmaatan qofa utuu hin taane, lammiileen nagaas gidduutti miidhamuu malu. Haaluma wal-fakkaatuun, madinummaan keenya lola cimaa kan geggeessu yoo ta’e, dhibee nurraa qolachuu bira darbee seelotuma qaama keenyaa mancaasuu danda’a. “Arbi lama yeroo wal-lolan, gidduutti kan miidhamu marga” jedhama mitii ree.

Gabaabumatti, madinummaan keenya lola cimaa yeroo geggeessu, qaamni keenyas akkaan kulkulfata. Kulkulfannaan akkanaa miidhaa cimaa nurraan ga’uu danda’a.

QAAMOLEEN SALPHAATTI MIIDHAMUU MALAN MAAL FA'A?
-------------------------------
Qaamoleen haala kanaan salphaatti miidhamuu danda’an sammuu, ija, kalee fi kkf fa’a. Gara ijaatti yoo dhufnu, caasaaleen salphaatti miidhamuu malan: caasaalee keessoo ijaa jiran, narvii agartuu, maashaalee ijaa fi kkf fa’a.

Kulkulfannaan qaama keenya miidhu kamuu akka dhibee of danda’e tokkootti ilaalamuun yaala barbaachisu argachuu qaba. Dawaan kulkulfannaa kana xiqqeessuuf gargaaran ni jiru. Dawaa kanneenfayyadamuun miidhaalee nurra ga’uu malan ittisuu ni dandeenya.

Barruun kun kitaaba FAYYAA IJAA fuula 28-30 irraa gabaabbatee kan fudhatame dha.

DR. SANYII JALQABAA

04/04/2023

’immani_Yookoo

Qorannoo kansarii harmaa tolaan Qorannoo kaansarii cawwee gadameessaa %50 qofaan. -Saamuda cawwee gadameessaa Ispeeshaalistii gadameessaa fi ulfaatiin giddu gala yaala adda haadholiif daa’immani Yookootti argattu.
's
#0996272727
#0995080808
#0970247024 for reservation.

Abdi D Gemechu Daraartuu Bushaa Lemi Belay Tolu Dr. Lammii Gonfaa Dr Nafyad Getu Dr Meseret Olana Dr. Sanyii Jalqabaa Dr.Lemi B Tolu

23/03/2023

QAROO NAMA TOKKOO NAMA BIRAATIIF JIJJIIRUU (CORNEAL TRANSPLANTATION)
========
Ramadan Kareem! Ramadan Mubarak!
Akkuma beekamu ji'i soomanaa ji'a arjummaa ti. Kanumaan wal-qabatee waa'ee qaroo ofii arjoomuu haa ilaallu.

Qaroo ofii eenyutu arjoomuu danda'a?
Qaroon kunimmoo namoota akkamiitiif kennama?

Waa'ee kanaa hubachuuf barruu armaan gadiitti dhiyaadhaa!

Barruun kun kitaaba "FAYYAA IJAA" fuula 145-147, akkasumas fuula 152 irraa kan fudhatame dha.

Dr. Sanyii Jalqabaa.

21/03/2023

JAAMINA HALLUU (COLOR BLINDNESS)
===============
Dhalli namaa, bineensotnii fi ilbiisotni tokko tokko halluuwwan adda baasanii arguu danda’u. Kunis faayidaalee hedduu qaba. Fakkeenyaaf: kaannisni daraaraa isaaniif mijatu adda baafachuu akka danda’aniif isaan gargaara.

Nutis, halluuwwan mudraalee ilaaluun bilchaachuu fi dhiisuu isaanii adda baafachuu dandeenya. Akkuma kana, ibsaa tiraafikaa ilaaluun yoom karaa qaxxaamuruu akka qabnu beekuu dandeenya (fakkiilee armaan gadii ilaaluu dandeessu; fakkii 16.9 (A) fi (C)).

Haa ta’u malee, namootni tokko tokko halluuwwan adda baasanii arguu hin danda’an. Rakkoon akkanaa Jaamina Halluu (Color Blindness) jedhama.

Irra-jireessi dhibee kanaa dhaalaan yookaan sanyiidhaan namatti dhufa. Darbee darbee immoo, dhibeewwan ija namaa miidhuun beekaman kanneen akka dhibee sukkaaraa, dhibee dhiibbaa ijaa (gilaakoomaa) fi kkf fa’aan nutti dhufuu danda’a. Qorichootni tokko tokkos (fakkeenyaaf, daranyoo sombaatiif kan kennaman) rakkoo akkanaa nutti fiduu malu.

Dhibeen kun dhiibbaa garaa garaa namarraan ga’uu danda’a. Akkuma beekamu, kitaaboleen daa’immanii halluuwwan garaa garaatiin kan faayamani dha. Kana waan ta’eef, daa’imman jaamina halluu qaban kitaabolee kana dubbisuuf baay’ee rakkatu. Kunimmoo, barnoota isaanii irratti dhiibbaa uumuu bira darbee ofitti amanamummaa isaanii illee gadi buusuu danda’a.

Akkuma kana, ibsaa tiraafikaa adda baasanii arguu dhabuu irraan kan ka’e balaa garaa garaaf illee saaxilamuu danda’u. Daa’imman akkanaatiif eegumsi addaa godhamuufii qaba.

DHIBEEN KUN AKKAMIIN NAMATTI DHUFA?
===========
Iji keenya seelota waa arguuf nu gargaaran hedduu of-keessaa qaba. Kanneen keessaa halluu arguuf kan gargaaran "Seelota Koonii" (Cone Cells) jedhamu. Seelotni kun miiliyoona 6 olitti kan tilmaamaman yoo ta’u, dalagaa isaanii irratti hundaa’uun gosa garaa garaatti hiramu. Seelotni kun fayyaaleyyii yoo ta’an, halluuwwan garaa garaa adda baasnee arguu dandeenya. Uumamaan hanqina yoo qabaatan, yookaan dhibeen yoo miidhaman immoo halluuwwan adda baasuun rakkisaa ta’a.

Seelotni muraasni qofti hanqina yoo qabaatan, halluuwwan tokko tokko adda baasuu baannus halluuwwan biroo arguu ni dandeenya. Fakkeenyaaf, daa’imman halluu diimaa fi magariisa adda baasuu hin dandeenye, cuquliisaa fi keelloo immoo adda baasanii arguu malu.

Haa ta’u malee, si’a tokko tokko seelotni kun guutummaan guutuutti hanqina qabaachuu malu. Daa’imman rakkoo akkanaa qaban halluu kamuu arguu hin danda’an. Daa’imman kun akka viidiyoo bara durii waraabaman sanaatti addunyaa kana hubatu. Wantootni hundinuu daalachaa fi gurraacha (black and white) fakkaatanii isaanitti mul’atu jechuu dha (fakkii armaan gadii ilaaluu dandeessu; fakkii 16.9 (F)).

DHIBEE KANA DURSINEE BARUUF MAAL GOCHUU QABNA?
==============
Daa’imman dhibee kana qaban dursinee adda baasuun barbaachisaa dha. Kunimmoo, ga’ee ogeessa fayyaa qofa utuu hin taane, maatii daa’immanii fi barsiisota isaanii illee ni ilaallata.

Daa’imman dhibee kana qabaachuu isaanii dursinee baruuf, wantoota armaan gadii gochuutu nurraa eegama.

1. Barnoota idlee eegaluu isaaniitiin dura, yookaan waggaa 3-5 gidduutti ogeessa bira geessinee fayyummaa ija isaanii ilaalchisuu qabna.

2. Yeroo kamuu, dhibee kana qabaachuu isaanii yoo shakkine ogeessa bira geessuun ilaalchisuu qabna.

3. Mana barumsaa keessattis, daa’imman halluu adda baasuu hin dandeenye yoo nu mudatan, maatii isaaniitti beeksisuun ogeessa bira akka geeffaman gochuu qabna.

Yaala dhibee kanaa fi xiyyeeffannoo daa’imman kanaaf taasifamuu qabu kitaaba “FAYYAA IJAA” keessatti bal’inaan ibsamee jira.

Barruun kun kitaaba “FAYYAA IJAA” fuula 242-246 irraa gabaabfamee kan fudhatame dha.

Dr. Sanyii Jalqabaa

18/03/2023

Dhibeen Kaanserii Akkamiin Uumama?
==========
Dhibeen kaanserii dhibeewwan sodaachisoo fi lubbuu namaa galaafachuun beekaman keessaa isa tokko dha. Kaanserii ija namaa miidhan keessaa inni beekamaan kaanserii ija daa'immanii miidhu (retinoblastoma) dha.

Ofii dhibee kaanserii kan jennuun kun akkamiin uumama? Seensaaf akka tolutti, akkamiin akka uumamu beekuun barbaachisaa dha. Kana hubachuuf, barreeffama armaan gadiitti dhiyaadhaa. Barruun kun "FAYYAA IJAA" fuula 32 fi 33 irraa kan fudhatame dha.

Dr. Sanyii Jalqabaa.

16/03/2023

Kunuunsa Qaro-dhabeeyyiif Godhamuu Qaban
============
Qaro-dhabeeyyiif deeggarsa gochuun dirqama namummaa ti. Mana jireenyaa keessattis ta'u alatti, namoota qaro-dhabeeyyii ta'an bifa armaan gadiin kunuunsuu qabna.

Kitaaba "FAYYAA IJAA" fuula 309-312 irraa kan fudhatame dha.

Dr. Sanyii Jalqabaa

15/03/2023

Dhibeewwan Dhaalaa (Hereditary Diseases)
=========
Dhibeewwan dhaalaa yeroo jedhamu dhageessanii beektu ta'a. Ofii maal jechuu dhaa? Dhibeewwan kun akkamiin daddarbu?

Kan armaan gadii kitaaba "FAYYAA IJAA" fuula 31 irraa kan fudhatame dha. Kitaabni kun haala uumama dhibeewwanii (pathogenesis) of-keessatti hammatee jira.

Haala uumama dhibeewwan kaanserii (cancers), alaarjikii (allergy), kulkulfannaa (inflammation), al-madinummaa (autoimmune disorders) fi kkf yeroo biroon isiniif maxxansa.

Dr. Sanyii Jalqabaa.

Dr. Sanyii Jalqabaa

04/06/2024

01/06/2024

05/05/2024

05/08/2023

14/06/2023

03/05/2023

04/04/2023

23/03/2023

21/03/2023

18/03/2023

16/03/2023

15/03/2023

Address

Website

Alerts

Shortcuts

Share

Category