30/07/2025
აჭარის მთავრობის თავმჯდომარის მეუღლე - თამარ ნარიმანიძე ირმა ხვიჩიას რეაბილიტაციის ცენტრს ეწვია, დაათვალიერა ცენტრის მატერიალურ - ტექნიკური ბაზა, გაეცნო სამუშაო სპეციფიკასა და სერვისებს.
მედპერსონალთან გასაუბრების შემდეგ, გაიმართა შეხვედრა ცენტრის ბეფიციართა მშობლებთან და სპეციალისტებთან. ყურადღება გამახვილდა არსებულ სერვისებზე, რეალურ საჭიროებებზე, მიმდინარე პროექტებსა და ინოვაციურ მეთოდებზე.
გაცნობითი ხასიათის შეხვედრის ფარგლებში, სარეაბილიტაციო პროგრამებით მოსარგებლეთა მშობლებმა ისაუბრეს საკუთარ გამოცდილებაზე, არსებულ სირთულეებზე, რეაბილიტაციის კურსით მიღებულ დადებით შედეგებსა და სახელმწიფოს მხრიდან, შესაბამისი პროგრამების მხარდაჭერაზე.
ცენტრის სპეციალისტებმა სტუმარს გააცნეს სენსორული და ფიზიკური ინტეგრაციის ჯგუფის პროექტი, რომელიც აუტისტური სპექტრის მქონე ბავშვებისთვის განსაკუთრებით საჭირო და, რაც მთავარია, შედეგიანი მიმართულებაა. ინოვაციური პროგრამა, არა მხოლოდ ბავშვების, არამედ მათი ოჯახის წევრების ფსიქო-სოციალურ მხარდაჭერასაც ნიშნავს და ეს ძალზე დადებით შედეგებს იძლევა. სწორად შერჩეული სარეაბილიტაციო პროგრამების მაგალითია ერთ-ერთი ყოფილი ბენეფიციარი, რომელიც ამჟამად ცენტრშია დასაქმებული და ჩართულია სამუშაო პროცესში.
შეხვედრის მონაწილეებმა ქალბატონ თამარს მადლობა გადაუხადეს განსაკუთრებული საჭიროებების მქონე ბავშვებისა და მათი ოჯახების წინაშე არსებული გამოწვევებით დაინტერესებისთვის, თანადგომისა და გამოხატული გულწრფელი მხარდაჭერისთვის.
