03/06/2025
წარუშლელი კვალი და უკვდავი მემკვიდრეობა...
დღეს ქართული მედიცინის ყველასათვის ცნობილი, დამსახურებული მოღვაწის, მედიცინის აკადემიური დოქტორის, ქუთაისის საპატიო მოქალაქის და ღირსეული ადამიანის, ლერი პავლეს ძე ხონელიძის დაბადების დღეა. დღეს მას 87 წელი შეუსრულდებოდა!
რეგიონის მასშტაბით და მის ფარგლებს გარეთაც, ლერი ხონელიძე ცნობილი იყო, როგორც ყველასაგან გამორჩეული ექიმი, უსაზღვროდ შეყვარებული სამშობლოზე, საკუთარ ქალაქსა და პროფესიაზე. უანგარო მოღვაწე და განსაკუთრებული პიროვნული თვისებებით შემკული ადამიანი.
ბატონი ლერი ხონელიძე იყო არა მხოლოდ პროფესიონალი ექიმი - არამედ ადამიანი, ვის თვალებშიც ყოველთვის იკითხებოდა გულისხმიერება, ვინც სიტყვითაც და ქმედებითაც აგრძნობინებდა სხვას, რომ მარტო არ იყო. მან სიცოცხლე აჩუქა უამრავ ადამიანს, ათასობით სიცოცხლე გადაარჩინა და ოჯახებში მოლოდინად ქცეული სიხარული შეიტანა.
მან შეაყვარა ადამიანებს პროფესია, რომელსაც ყოველდღიური ბრძოლა და მსხვერპლი სჭირდება - და თავად იყო ამ ბრძოლის შუქურა. მის მიერ დატოვებული კვალი სამედიცინო სფეროს სცილდება - ის ჩვენ გულებსა და მოგონებებში რჩება. ასევე მომავალ თაობებში, ვინც მისგან ისწავლა, როგორი უნდა იყო ექიმი და ადამიანი ერთდროულად.
დიდი ნიჭი და ღვთისგან ბოძებული საჩუქარია ის პატივისცემა და სახელი, რომელიც დაიმსახურა ლერი პავლოვიჩმა. დღე არ გავა სიყვარულით და იუმორ-ნარევი სევდით არ გაიხსენონ მისმა საყვარელმა თანამშომლებმა ისტორიები, რომლებიც კიდევ ერთხელ ამყარებს მოსაზრებას რომ რჩეულთა სახელი უკვდავია. დღესაც და მარად დიდი პატივისცემით და მოწიწებით მოვიგონიებთ კაცს დაბადებულს ექიმად , რომელმაც ღირსეული მემკვიდრეობა დაუტოვა ქალაქს.
✔️მრავალი წელი ქალაქის მთავარი მეან-გინეკოლოგი და ქვეყნის დამსახურებული ექიმი. მუდმივად ორიენტირებული საკუთარი პროფესიული ცოდნისა და უნარების გაღრმავებისკენ. ჯერ კიდევ ძალიან ახალგაზრდა გახდა ვანის რაიონის საავადმყოფოს მთავარი ექიმი, რაც მისი წარმატებული მომავლის საწინდარი აღმოჩნდა.
მისი მეან-გინეკოლად ჩამოყალიბება უკავშირდება ამ სფეროს კორიფეებს და ქვეყნის დამსახურებულ პროფესორებს, თბილისის სამეანო-გინეკოლოოგიური სამეცნიერო კვლევითი ინსტიტუტის მაშინდელ დირექტორს, აკადემიკოს კონსტანტინე ჩაჩაჩავას, სამედიცინო აკადემიის აკადემიკოსს, პროფესორ, პალიკო კინტრაიას, პროფესორებს: გურამ გოცაძეს და ვალტან პოლჩინს. ისინი გახლდათ მისი მთავარი სადისერტაციო ნაშრომის ხელმძღვანელები და უდიდესი ცოდნის გამზიარებლები. ლერი პავლოვიჩი მთელი მისი ცხოვრება გამოხატავდა მათდამი უდიდესს მადლიერებას და პატივისცემას.
✔️მისი ხელით დაიწყო ძირეული ცვლილებები რეგიონში სამეანო-გინეკოლოგიის მიმართულებით. დაამკვიდრა იმ დროისთვის უმაღლესი სტანდარტი ამ სფეროში და კლინიკა აღჭურვა უახლესი სამედიცინო აპარატურით. მან შექმნა ბაზა ახალგაზრდა სპეციალისტების. როგორც უდიდესმა რეფორმატორმა, რეგიონის გაძლიერებაში და სამეანო-გინეკოლოგიური მომსახურეობის განვითარებაში უდიდესი წვლილი შეიტანა.
✔️უამრავი სამეცნიერო ნაშრომის ავტორსა და მრავალწლიანი პრაქტიკული გამოცდილების მქონე ექიმს, შემოღებული აქვს ოპერაციების წარმართვის საკუთარი ტექნიკა, რამაც უამრავი წარმატებული ოპერაცია უზრუნველყო და მისი როლი და დამსახურება სამედიცინო სფეროში კიდევ უფრო გააუმჯობესა.
ის ადამიანების სასარგებლო საქმისთვის და სიყვარულისთვის მოწოდებული გახლდათ. ქველმოქმედი და თავის ხალხზე უზომოდ შეყვარებული. ჩვენი ქვეყნის მიერ აღიარებული უანგარო დონორი, რომელსაც უამრავი ადამიანის სიცოცხლის გადასარჩენად აქვს გაღებული სისხლი. რაც მისთვის არა იძულება, არამედ სულსა და გულში გამჯდარი მოთხოვნილება იყო. ყოველივე ეს ხაზს უსვამს მის პიროვნების ღვთისნიერებას და სათნოებას.
🙏🏻პატივს მივაგებთ ლერი ხონელიძის სულს და უფალს შევავედრებთ დაუმკვიდროს ცათა სასუფეველი, სადაცა მართალნი განისვენებენ 🤍
ექიმი, ვინც სიცოცხლეს ემსახურებოდა! მისი სახელი სამუდამოდ დარჩება ქართულ მედიცინასა და ჩვენს გულებში!
რჩეულთა სახელი უკვდავია...
