Dermatologist Khatuna Kudava / ექიმი დერმატოლოგი ხათუნა კუდავა

28/06/2025

ჩვილ ბავშვთა ჰემანგიომა ხშირად არის მშობლებისთვის მრავალი კითხვის მომცველი პრობლემა. რა არის ჩვილ ბავშვთა ჰემანგიომა და არის თუ არა ეს სისხლძარღვოვანი წარმონაქმნი ჩვენი შვილებისთვის საშიში?

ჩვილ ბავშვთა (ინფანტილური) ჰემანგიომა წლამდე ასაკის პატარებში კანზე გამოვლენილი ერთერთი ხშირი კეთილთვისებიანი სიმსივნეა, რომელიც მშობლების განსაკუთრებულ ყურადღებას იქცევს. ახალშობილის კანზე მისი აღმოჩენა უპირატესად ხდება ბავშვის დაბადებისთანავე ან დაბადებიდან რამდენიმე კვირაში. ჩვილ ბავშვთა ჰემანგიომა კეთილთვისებიანი სისხლძარღვოვანი სიმსივნეა, რომელიც შესაძლოა განსხვავებული კლინიკით გამოვლინდეს კანზე. ზედაპირული ფორმა მკვეთრი წითელი ფერით გამოირჩევა, უფრო ღრმა ფორმის შემთხვევაში წარმონაქმნს მოლურჯო ელფერი აქვს. გამომდინარე იქიდან, რომ ჩვილ ბავშვთა ჰემანგიომა არის სისხლძარღვოვანი წარმონაქმნი, ადვილად სისხლმდენია ტრავმირების შემთხვევაში და შესაძლოა დაწყლულდეს კიდეც. ახასიათებს უკუგანვითარება, რომელიც შესამჩნევი ხდება დაახლოებით 1-2 წლის ასაკიდან. უკუგანვითარების პროცესი 5-6 წლის ასაკისთვის მთავრდება, ზოგჯერ კი 10 წლამდე ხანგრძლივდება. ჩვილ ბავშვთა ჰემანგიომის ადგილას რჩება მოყვითალო ელფერის კანის შეცვლილი ტექსტურით წარმოდგენილი კერა ხშირად ტელეანგიექტაზიური (ადგილობრივად გაფართოვებული სისხლძართვოვანი ქსელი) ჩანართით. ჰემანგიომის შესაფასებლად და მასში მიმდინარე ცვლილებებზე დინამიკაში დასაკვირვებლად სასარგებლო და ინფორმაციული სადიაგნოსტიკო მეთოდია ციფრული დერმატოსკოპია.
მნიშვნელოვანია გავითვალისწინოთ ჩვილ ბავშვთა ჰემანგიომის ლოკალიზაცია. თუ ეს წარმონაქმნი მდებარეობს სპეციფიურ ადგილას (თვალთან, ცხვირთან, საშარდე სისტემასთან და ა.შ) და ხელს უშლის ბავშვის ფუნქციურ განვითარებას, აუცილებელია დავგეგმოთ მისი დროული მოცილება.
ერთად ვიზრუნოთ ჩვენი პატარების ჯანმრთელობაზე!
დერმატოლოგი ხათუნა კუდავა

20/06/2025

კანის კეთილთვისებიანი წარმონაქმნი, რომელიც პაციენტთა წარმოსახვაში ხშირად ასოცირდება მელანომასთან

რა არის სებორეული კერატოზი?

სებორეული კერატოზი კანის ფართოდ გავრცელებული, კეთილთვისებიანი წარმონაქმნია. პაციენტების ყურადღებას იგი ხშირად იპყრობს როგორც კოსმეტიკური დეფექტი ან როგორც სიცოცხლისთვის საშიში ავთვისებიანი წარმონაქმნის იმიტატორი. სებორეული კერატოზი სუბიექტურ ჩივილებს არ იწვევს. იგი შესაძლოა ლოკალიზდეს კანის ნებისმიერ უბანზე, ხელისგულებისა და ფეხისგულების გარდა. სებორეული კერატოზი გამოირჩევა კლინიკური გამოვლინებების მრავალფეროვნებით. ხშირია მრავლობითი ფორმები. წარმონაქმნის ფერი შეიძლება იყოს მოვარდისფრო, მოყვითალო, ყავისფერი ან შავი. სებორეული კერატოზი ამოწეულია კანის დონიდან და მკვეთრად შემოსაზღვრულია. მისი ზედაპირი გლუვი, ხავერდოვანი ან მეჭეჭოვანია. სებორეული კერატოზი წარმოადგენს ეპიდერმალურ წარმონაქმნს და ხშირად მისი ზედაპირი გარქოვანებულია, აღინიშნება სხვადასხვა ფერის ქერცლის არსებობა. მიუხედავად იმისა, რომ წარმონაქმნი არ შეიცავს ავთვისებიანად გადაგვარების რისკს, ის პაციენტთა წარმოსახვაში ხშირად ასოცირდება მელანომასთან და უსაფუძვლო შიშის მიზეზიც ხდება.
სებორეული კერატოზის სადიაგნოსტიკო მეთოდია ციფრული დერმატოსკოპია. მისი მოცილება შესაძლებელია სხვადასხვა მეთოდით, მათ შორის კრიოდესტრუქციითა და ელექტროკოაგულაციით.

დერმატოლოგი ხათუნა კუდავა

20/06/2025

ევროპის უნივერსიტეტი 💙

For ENG Scroll Down ⤵️
🎊🌎“ევროპის უნივერსიტეტი“ პრესტიჟული სარეიტინგო ბაზის – Times Higher Education (THE) Impact Rankings-ის საუკეთესო უნივერსიტეტების რეიტინგების 2025 წლის გამოშვებაში საქართველოს მასშტაბით ყველაზე მეტ, 12 კატეგორიაშია წარმოდგენილი.

🔝 ყოველწლიურად, Times Higher Education აქვეყნებს მსოფლიოს 115 ქვეყნიდან გამოვლენილი უნივერსიტეტების საერთო რეიტინგს და ასევე მდგრადი განვითარების 17 მიზნისთვის შესაბამის ცხრილს, სადაც ნაჩვენებია უნივერსიტეტების პროგრესი თითოეული მიმართულებით.

🎯“ევროპის უნივერსიტეტი“ Times Higher Education (THE) Impact Rankings 2025-ში მოხვედრით კიდევ ერთხელ ამტკიცებს თავის ერთგულებას მსოფლიოს ყველაზე აქტუალურ გამოწვევებთან ბრძოლაში, რაც ხელს უწყობს გარემოსდაცვითი მდგრადობის, სოციალური ინკლუზიის, ეკონომიკური ზრდისა და პარტნიორობის ჩამოყალიბებას მსოფლიოს მასშტაბით.

🔗იხილეთ მდგრადი განვითარების 12 კატეგორია, რომელშიც "ევროპის უნივერსიტეტი" წამყვან უნივერსიტეტებს შორისაა ნომინირებული: https://eu.edu.ge/evropis-universiteti-times-higher-education-impact-rankings-2025/

🎊🌎“European University” has been ranked in the 2025 edition of the prestigious Times Higher Education (THE) Impact Rankings, the most in Georgia, in 12 categories.

🔝Every year, Times Higher Education publishes an overall ranking of universities from 115 countries around the world, as well as a table corresponding to the 17 Sustainable Development Goals, showing the progress of universities in each area.

🎯By excelling in a variety of SDGs, European University showcase its commitment to addressing the world’s most pressing challenges, including environmental sustainability, social inclusion, economic growth and partnerships.

🔗See the 12 sustainable development categories in which "European University" is nominated among the leading universities worldwide: https://eu.edu.ge/en/european-university-is-ranked-in-the-most-categories-from-georgia-in-the-times-higher-education-the-impact-rankings-2025/

05/06/2025

ფრჩხილების სოკოვანი დაავადებები

ფრჩხილის სოკოვანი დაავადება (ონიქომიკოზი) ფრჩხილის ინფექციური დაზიანებაა, რომელსაც იწვევს სხვადასხვა სახეობის სოკო, ხშირად Trichopyton rubrum, Trichopyton mentagrophytes და Candida albicans.
ეს პათოლოგია ხშირად ასოცირდება ფეხის ტერფის სოკოვან დაავადებასთან და უპირატესად აზიანებს ტერფის ფრჩხილებს, თუმცა არაიშვიათია ხელის მტევნის ფრჩხილების დაზიანებაც. ონიქომიკოზის განვითარების მნიშვნელოვანი ხელშემწყობი ფაქტორია ფრჩხილების ტრავმული დაზიანება.
დაავადების დიაგნოსტირება ხდება ლაბორატორიულად. პირველ ეტაპზე ტარდება ფრჩხილის ფირფიტიდან აღებული მასალის მიკროსკოპული გამოკვლევა სოკოს მიცელიუმებისა და სპორების აღმოსაჩენად. მეორე ეტაპზე ტარდება კულტურალური კვლევა, რომლითაც ხდება სოკოს სახეობრივი იდენტიფიცირება.
ონიქომიკოზის თანდართული ტერფის სოკოვანი ინფექცია გამოვლინდება ამ არეში კანის შემოფარგლული, მოვარდისფრო აქერცლილი უბნებით. თითებშუა ნაოჭების ცენტრში ხშირია ნაპრალების განვითარება. ფრჩხილების კანდიდოზური ინფექციით ხშირად ავადდებიან დიასახლისები.
ფრჩხილების სოკოვანი დაავადების კლინიკური გამოვლინებები განსხვავებულია. ყველაზე ხშირად ვითარდება ფრჩხილის ფირფიტის ფერისა და სტრუქტურის ცვლილება. ფრჩხილის ფირფიტა ხდება მოყვითალო, მოყავისფრო ან თეთრი გაუმჭვირვალე, გასქელებული, ფშვნადი. ფრჩხილის სოკოვანი დაავადება შესაძლოა გამოვლინდეს მხოლოდ ზერელე ინვაზიითაც, ზედაპირზე გამოხატული თეთრი ფერის აქერცვლით. ზოგჯერ ვითარდება გაუფერულებული უბანი ფრჩხილში ფირფიტის ზედაპირის ცვლილების გარეშე.
გასათვალისწინებელია ისიც, რომ კანის ბევრი დაავადება (ფსორიაზი, ბრტყელი ლიქენი და სხვა) იწვევს ფრჩხილების სპეციფიურ დაზიანებებს, რომლებიც ,,დიაგნისტირდება“ როგორც ფრჩხილების სოკოვანი დაავადება. ამიტომაც ძალიან მნიშვნელოვანია სწორი დიაგნოზის დასმა, შესაბამისი მკურნალობის შესარჩევად.
ფრჩხილის სოკოვანი დაავადების მკურნალობა ეფექტიანია კომპლექსური მკურნალობის შედეგად. ონიქომიკოზის მკურნალობა მოიცავს როგორც ანტიმიკოზურ პერორალურ პრეპარატებს, ისე ფრჩხილების ადგილობრივი დამუშავებისა და სადეზინფექციო პროცედურებს.

დერმატოლოგი ხათუნა კუდავა

28/05/2025

24/05/2025

რჩევები მშობლებისთვის!

მშობლებისთვის!
ჰალო ნევუსი ( სეტონის ხალი, რეგრესული ხალი)

ხალების ირგვლივ თეთრი ქობის გაჩენა ყურადღების გარეშე არასდროს რჩება და ხშირად მელანომის შიშსაც იწვევს. ასეთი ცვლილება ხშირად ვითარდება ბავშვებში, პუბერტატულ ასაკში და არცთუ იშვიათად მოიცავს რამდენიმე ხალს. რა არის ჰალო ნევუსი და არის თუ არა ხალის ასეთი ცვლილება საშიში?
ჰალო ნევუსი ( სეტონის ხალი, რეგრესული ხალი) არის ხალი, რომლის ირგვლივაც როგორც სიმეტრიული ქობა ვითარდება დეპიგმენტური (თეთრი) ლაქა. ასეთი ხალების უმრავლესობა კეთილთვისებიანი დერმალური ნევუსია. შედეგად ხალი თანდათან უფერულდება და ბოლოს სრულიად ქრება, ხოლო დეპიგმენტური უბანი აღიდგენს ფერს. ხალის ასეთი ცვლილება ხშირად ასოცირდება აუტოიმუნურ პროცესებთან და დაავადებებთან, ზოგჯერ შესაძლოა იყოს ვიტილიგოს გამოვლინება. თუმცა იშვიათად ვლინდება როგორც მელანომის თანმხლები ცვლილება. ამიტომაც აუცილებელია შეფასდეს არა მხოლოდ დეპიგმენტური ლაქა, არამედ ხალი სტრუქტურულად მასში მიმდინარე ცვლილებებით. ამისთვის საუკეთესო უსაფრთხო გამოკვლევა დერმატოსკოპიაა.

18/05/2025

მზე და ბავშვის კანი
რჩევები მშობლებისთვის!

მზის სხივების მრავალმხრივი სასარგებლო თვისებები განსაკუთრებით მნიშვნელოვანია ჩვენი პატარების განვითარებისთვის. თუმცა აუცილებლად გასათვალისწინებელია მასთან სწორი კონტაქტი და მზის სხივებით გამოწვეული კანის პრობლემებიც, რომლებიც ხშირად თავს გაზაფხულზევე იჩენს.
ბავშვების კანზე გამოვლენილი ,,მზის ალერგია“ რამდენიმე დაავადებას მოიცავს. ფოტომგრძნობელობა ვლინდება გენეტიკურად წინასწარგანწყობილ მგრძნობიარე პირებში მზის სხივებთან კონტაქტის დროს. მზის სხივები იწვევს კანის გარკვეული კომპონენტების ცვლილებებს, რომლებიც ორგანიზმის მიერ აღიქმება როგორც ,,უცხო“ და ამის შედეგად აქტიურდება იმუნური სისტემა.
ბავშვების კანზე კლინიკურად გამოვლენილი ,,მზის ალერგიის“ ყველაზე ხშირი ფორმა ,,პოლიმორფული დერმატიტია“. მზის ალერგიის ეს ფორმა იწყება მზის სხივებთან თავდაპირველი კონტაქტისთანავე, ხშირად გაზაფხულზე. გამონაყარი ჩნდება გულმკერდის ზედა არეში, ხელის მტევნებზე, ზედა და ქვედა კიდურების გამშლელ ზედაპირებზე და თან ახლავს წვისა და ქავილის შეგრძნება. ,,მზის ალერგიის“ ეს ფორმა შესაძლოა განვითარდეს მზის სხივებთან კონტაქტიდან რამდენიმე წუთში, ზოგჯერ კი რამდენიმე საათის ან ორი-სამი დღის შემდეგ. ხშირად ვლინდება სიწითლის ფონზე წვრილკვანძოვანი და წვრილბუშტუკოვანი გამონაყარით.
გაზაფხულზე, მზესთან კონტაქტის შემდეგ შესაძლოა განვითარდეს ,,იუვენილური გამონაყარიც.“ ბავშვის კანზე გამოვლენილი ეს პრობლემა ხასიათდება უპირატესად ყურის ნიჟარების კანზე ლოკალიზებული წყლულოვანი და ქერცლოვანი გამონაყარით. გამონაყარი ვითარდება მზესთან კონტაქტიდან რამდენიმე საათში და ხშირად თან ახლავს მიმდებარე ლიმფური ჯირკვლების გადიდებაც, რაც მშობლების შიშის ხშირი მიზეზია.
ბავშვის კანისთვის განსაკუთრებით მნიშვნელოვანია მზისგან დამცავი საცხების სწორად გამოყენება, მათი შერჩევა ასაკისა და კანის ტიპის გათვალისწინებით. ექვს თვემდე ასაკის ბავშვებში მზისგან დამცავი საცხების გამოყენება რეკომენდირებული არ არის, წლამდე ასაკის ბავშვებისთვის უმჯობესია შეირჩეს ექიმთან ერთად ყველა კომპონენტისა და ფაქტორის მომცველობით.
არ უნდა გამოგვრჩეს ფოტოტოქსიური რეაქციების განვითარების შესაძლებლობაც ამ პერიოდში. ბავშვის კანზე მწვავედ გამოვლენილი ეს სპეციფიური რეაქცია უკავშირდება გარკვეული პრეპარატებისა (როგორც აბების, ისე საცხების) და მზის სხივების ურთიერთქმედებას.

ერთად ვიზრუნოთ ჩვენი პატარების ჯანმრთელ კანზე!

დერმატოლოგი ხათუნა კუდავა

20/04/2025

ქრისტე აღსდგა! გილოცავთ აღდგომის ბრწყინვალე დღესასწაულს!

15/04/2025

რჩევები მშობლებს!
,,ობობასმაგვარი ანგიომა“

წითელი ფერის წარმონაქმნის გაჩენა სახის არეში განსხვავებული ფორმისა და უეცარი გამოვლენის გამო ხშირად არის მშობლების შიშის მიზეზი. Nevus araneus სუსტად პულსირებადი, კეთილთვისებიანი სისხლძარღვოვანი წარმონაქმნია, რომელიც გვხვდება ბავშვთა ასაკში.
Nevus araneus - ,,ტელეანგიექტაზიური ანგიომა" მოიცავს ორ კომპონენტს: წითელი ფერის ცენტრალურ არტერიოლას და მასთან დაკავშირებულ ტელეანგიექტაზიურ სისხლძარღვოვან ქსელს. ასეთი ფორმის გამო მას ,,ობობასმაგვარ ანგიომას“ უწოდებან.
Nevus araneus თანდაყოლილი წარმონაქმნი არ არის. ბავშვებში ის ხშირად ჩნდება სახის არეში, ძირითადად ერთეული დაზიანებების სახით და კეთილთვისებიანი მიმდინარეობით ხასიათდება. მრავლობითი ,,ობობისმაგვარი ანგიომების“ გაჩენა უკავშირდება შინაგან პათოლოგიებს, უპირატესად ღვიძლის დაავადებებს.
დიაგნოზის დასადასტურებლად საკმარისია დერმატოსკოპული გამოკვლევა.

ერთად ვიზრუნოთ ჩვენი პატარების ჯანმრთელ კანზე!
დერმატოლოგი ხათუნა კუდავა

12/04/2025

ორსულობა და კანი

რჩევები მომავალ დედებს!

კანის ნებისმიერი დაავადება შესაძლოა განვითარდეს ან გამწვავდეს ორსულობის პერიოდში, თუმცა არსებობს პათოლოგიები რომლებიც სპეციფიურია ორსულობისა და მშობიარობის შემდგომი პერიოდისთვის. კანის ეს დაავადებები - ,,ორსულთა დერმატოზები“ ხასიათდება მკვეთრად გამოხატული, შემაწუხებელი ქავილით. ყველაზე ხშირი მიზეზები, რომლებიც ორსულებში იწვევს კანის ქავილს:

• ორსულთა ქავანა ურტიკარული პაპულები ორსულთა ყველაზე გავრცელებული დერმატოზია. ეს დაავადება ხასიათდება მრავლობითი გამონაყარის (წითელი პაპულები, ურტიკარული ბალთები) სწრაფი გამოვლენით. გამონაყარი უპირატესად ლოკალიზდება მუცლის, ბარძაყების, დუნდულების, გულმკერდისა და ზურგის მიდამოებში. დაავადებისთვის მეტად დამახასიათებელია სტრიებისა და მის ირგვლივ არეებში გამონაყარის განვითარება. ორსულთა ქავანა ურტიკარული პაპულები უფრო ხშირად ვლინდება ორსულობის მესამე ტრიმესტრში და უკუვითარდება მშობიარობამდე ერთი კვირით ადრე ან მშობიარობიდან ერთი კვირის განმავლობაში;
• ორსულთა ჰერპესი აუტოიმუნური დაავადებაა, რომელიც ვლინდება პოლიმორფული (სხვადასხვაგვარი) გამონაყარით. ხშირია ჰერპესის მსგავსი გამონაყარის ჯგუფური განლაგება, რასაც უკავშირდება დაავადების სახელწოდება ,,ორსულთა ჰერპესი.“ ეს დერმატოზი უფრო ხშირად იწყება ორსულობის მეორე ტრიმესტრში, თუმცა შესაძლებელია მისი განვითარება როგორც ორსულობის პირველ ტრიმესტრში, ისე მშობიარობის შემდგომ პერიოდშიც. ორსულთა ჰერპესის რეციდივები ზოგჯერ ვლინდება განმეორებითი ორსულობების პერიოდში და ესტროგენების, პერორალური კონტრაცეპტივების მიღების დროს. ორსულთა ჰერპესის გამონაყარი ყველაზე ხშირად ვლინდება ტანზე, მუცელსა და გვერდით ზედაპირებზე;
• ეგზემა ხშირად მკვეთრად მწვავდება ან შესაძლოა განვითარდეს ორსულობის პერიოდში;
• ორსულებში ზოგჯერ აღინიშნება კანის ზოგადი ქავილი, თუმცა კანზე სპეციფიური გამონაყარი არ ვლინდება (მხოლოდ ქავილთან დაკავშირებული მცირე ზომის ექსკორიაციები (ნაკაწრები)). ამ მდგომარეობის ხშირი მიზეზი ორსულობის ინტრაჰეპატური ქოლესტაზია. ქავილის მიზეზი შრატში ნაღვლის მჟავების კონცენტრაციის მატებაა, რომელიც ჩვეულებრივ ვითარდება ორსულობის მეორე ან მესამე ტრიმესტრში და სწრაფად ქრება მშობიარობის შემდეგ. მსგავსი სიმპტომების არსებობის შემთხვევაში აუცილებელია სისხლში შაქრის დონის განსაზღვრაც.

ერთად ვიზრუნოთ თქვენი კანის ჯანმრთელობისთვის!
დერმატოლოგი ხათუნა კუდავა

06/04/2025

ჩუტყვავილა და ჰერპეს ზოსტერი

ჩუტყვავილა ბავშვებში ფართოდ გავრცელებული ინფექციური დაავადებაა, რომელსაც Varicella zoster-ის ვირუსი იწვევს. გამომდინარე იქიდან რომ დაავადება მეტად კონტაგიოზურია, ის ხშირად მიკროეპიდემიების მიზეზიც ხდება. ინფექციის გადატანის შემდეგ ჩამოყალიბებული იმუნიტეტი ,,პირობითია“: ბავშვს განმეორებით ჩუტყვავილა არ ემართება, თუმცა მოზრდილ ასაკში მას ჰერპეს ზოსტერის განვითარების დიდი რისკი აქვს.
როდის არის გადამდები ჩუტყვავილა?
ინფექცია გადამდებია გამონაყარის გამოვლენამდე ორი-სამი დღით ადრეც. ამ პერიოდში ბავშვს შესაძლოა აღენიშნებოდეს ტემპერატურა, თავის ტკივილი და სხვა ზოგადი სიმპტომები. ინფექცია გადამდებია ჩუტყვავილისთვის დამახასიათებელი მრავლობითი ბუშტუკოვანი გამონაყარის არსებობის მთელს პერიოდში, სანამ ეს ელემენტები არ დაიფარება ქერქით. ჩუტყვავილის გავრცელების გზა არის ჰაერწვეთვანი, თუმცა ინფექცია შესაძლოა გავრცელდეს გამონაყარის შიგთავსითაც დაავადებულ ბავშვთან ახლო კონტაქტის შემთხვევაში.
გასათვალისწინებელია, რომ გამონაყარი ვლინდება როგორც კანზე, ასევე ლორწოვან გარსებზეც (პირის ღრუში, სასქესო ორგანოების ლორწოვანზე, სადაც ბუშტუკები ადვილად სკდება). შესაძლოა სტრეპტო-სტაფილოკოკური ინფექციებით გართულება.
როდის ხდება ვირუსის ხელახალი კლინიკური გამოვლენა?
Varicella zoster სრული ელიმინაცია ორგანიზმიდან არ ხდება. სხვადასხვა პირობების არსებობისას, როცა ხდება იმუნიტეტის დაქვეითება, ვირუსი რეაქტივაციას განიცდის და გამოვლინდება ჰერპეს ზოსტერის ფორმით. ეს დაავადება ზრდასრულ ადამიანებში ვითარდება (თუმცა შესაძლოა ბავშვებშიც). ხასაითდება ერითემულ (წითელ) ფონზე განვითარებული ჯგუფებად განლაგებული ბუშტუკოვანი გამონაყარით და ძლიერი ტკივილით. გამონაყარი ყოველთვის ცალმხრივია და მოიცავს კონკრეტული ნერვული ღეროების გასწვრივ უბნებს, რაც მას სპეციფიურ ფორმას აძლევს (აქედან გამომდინარე ამ დაავადებას უწოდებენ სარტყლისებრ ლიქენსაც). გამონაყარი ხშირად ლოკალიზდება გულმკერდის, ნეკნების არეებში, კიდურების მიმდებარედ, სახეზე.
განსაკუთრებული შემთხვევები:
აუცილებლად უნდა დავიცვათ წესები ინფექციის თავიდან ასარიდებლად. ჩუტყვავილით დაავადებულ ბავშვთან კონტაქტის შემდეგ უფროს ასაკოვან ოჯახის წევრს შესაძლოა დაემართოს ჰერპეს ზოსტერი, ჰერპეს ზოსტერით დაავადებულ ზრდასრულთან კონტაქტის შემდეგ კი ბავშვს - გამოუვლინდეს ჩუტყვავილა.

ერთად ვიზრუნოთ ჩვენი პატარების ჯანმრთელობაზე!
დერმატოლოგი ხათუნა კუდავა

05/04/2025

ევროპის უნივერსიტეტი / European University 💙