11/02/2026
„ფენიქსი“ - მოზარდებისა და მათი ოჯახების მხარდამჭერი პროფესიონალური სერვისი თიანეთში
როდესაც ვსაუბრობთ რეგიონების მეტ განვითარებაზე, უპირველესად მოვიაზრებთ ეკონომიკურ და ინფრასტრუქტურულ პროგრესს, სოციალური პრობლემების გადაჭრას, სამედიცინო და სხვა სერვისების მაქსიმალურ მისაწვდომობას. ზემოთ აღნიშნული თითოეული მიმართულებით განხორციელებული პროექტებისა და მერიის სოციალური პროგრამების მრავალფეროვანი პაკეტის შესახებ არაერთხელ მიგვიწოდებია ინფორმაცია ჩვენი მკითხველისთვის. ამჯერად კიდევ ერთი, ჩვენს სინამდვილეში პირველი და განსაკუთრებული მნიშვნელობის მქონე სერვისის შესახებ გვინდა გიამბოთ. თუ გადაუდებელი სამედიცინო დახმარების მიღებას ან სხვადასხვა ქრონიკული დაავადების მკურნალობას როგორღაც აგვარებენ ადამიანები - ზოგს სახელმწიფო პროგრამების დახმარებით, ზოგს კი პირადი სახსრებით, ისეთი პრობლემების მოგვარება, როგორიც არის ადრეული ინტერვენცია, ქცევითი, მეტყველების, ფსიქოლოგიური და ნევროლოგიური პრობლემები და ა.შ. ცოტა ჭირს. აღნიშნული შედარებით ხანგრძლივ მხარდაჭერას გულისხმობს, თანაც ადგილზე მისი მიღების საშუალება აქამდე არ იყო და ბევრი თიანელი მოზარდი რჩებოდა ამ საჭირო სერვისების გარეშე. სწორედ ასეთ მოცემულობაში გამოჩნდა თიანეთში ნეიროგანვითარების ცენტრი „ფენიქსი“, რომელმაც მოკლე დროში შეძლო ბენეფიციარებისა და მათი მშობლების ნდობის მოპოვება. დღეს უკვე ბევრი მადლიერი ადამიანი საუბრობს მასზე.
„ფენიქსის“ შესახებ მის თანადამფუძნებელსა და კლინიკურ დირექტორს, გიორგი ღუდუშაურს ვესაუბრეთ. გიორგი ნეიროლინგვისტური პროგრამების ფსიქოლოგია, ათწლიანი გამოცდილებით. გახლავთ ნეიროლინგვისტური პროგრამების პრაქტიკოსი (ლონდონის სკოლა) ფსიქოლოგიური კონსულტანტი; ენის, მეტყველებისა და კომუნიკაციის თერპევტი (იტალიის ჯანდაცვის ინსტიტუტი); ილიას სახელმწიფო უნივერსიტეტის მაგისტრი განათლების ფსიქოლოგიაში; აქვს თბილისის სახელმწიფო უნივერსიტეტის აკადემიური ხარისხი ფსიქოლოგიაში. დამეთანხმებით, შთამბეჭდავი ჩამონათვალია საიმისოდ, რომ შვილის ბედი თამამად ანდო.
- რამდენიმე სიტყვით უამბეთ ჩვენს მკითხველს ნეიროგანვითარების ცენტრ „ფენიქსის“ შესახებ.
- ნეიროგანვითარების ცენტრი „ფენიქსი“ 2023 წლიდან ფუნქციონირებს თბილისში და დღევანდელი მონაცემებით ემსახურება დაახლოებით 550 ბენეფიციარს. ცენტრის შექმნის მთავარი მიზანი თავიდანვე იყო ისეთი სივრცის შექმნა, სადაც ბავშვები და მათი ოჯახები ერთ ადგილზე მიიღებდნენ ყველა საჭირო სერვისს პროფესიონალი, მრავალპროფილური გუნდის დახმარებით.
„ფენიქსი“ აერთიანებს ადრეული ინტერვენციის, ქცევითი, მეტყველების, აკადემიური თერაპიების, ფსიქოლოგიური და ნევროლოგიური მომსახურებების ფართო სპექტრს. ჩვენთვის განსაკუთრებით მნიშვნელოვანია, რომ ბავშვებმა თერაპიული პროცესი გაიარონ მშვიდ, უსაფრთხო, ემოციურად მხარდამჭერ და სანდო გარემოში, სადაც თითოეული ბენეფიციარი აღიქმება, როგორც ინდივიდუალური საჭიროებების მქონე პიროვნება.
- სად და როდის გაჩნდა თიანეთში ცენტრის სერვისების დანერგვის იდეა?
- დაახლოებით ორი წლის წინ გაჩნდა მნიშვნელოვანი სოციალური იდეა — ფსიქოლოგიური და ნეიროგანვითარების სერვისები მიგვეწოდებინა მაღალმთიან რეგიონებში მცხოვრები ბავშვებისთვის, სადაც მსგავსი მომსახურება, ფაქტობრივად, მიუწვდომელი იყო. პირველი ნაბიჯი ამ მიმართულებით ყაზბეგის მუნიციპალიტეტში გადაიდგა, სადაც ყაზბეგის მერიის, საკრებულოსა და თამარ შიოლაშვილის მხარდაჭერით გავხსენით ცენტრი. დღესდღეობით იქ დაახლოებით 40 ბავშვს ვემსახურებით და ვუწევთ სხვადასხვა სახის ფსიქოლოგიურ და თერაპიულ დახმარებას. სწორედ ამ წარმატებულმა გამოცდილებამ დაგვანახა, რომ მსგავსი სერვისების რეგიონებში შეტანა რეალურად ცვლის ბავშვებისა და ოჯახების ცხოვრებას.
- რა ტიპის დახმარებას უწევთ თიანელ მოზარდებს?
- შემდეგი მნიშვნელოვანი ნაბიჯი იყო თიანეთი. აღნიშნულ რეგიონში მსგავსი სერვისების არარსებობის ფონზე და იმის გათვალისწინებით, რომ თიანეთი მოსახლეობით საკმაოდ დასახლებულია, აშკარად გამოიკვეთა ხარისხიან და სანდო თერაპიულ მომსახურებაზე მაღალი მოთხოვნა.
თიანეთის მუნიციპალიტეტის მერის, ბატონი ლევან წიკლაურის მხარდაჭერით, „ფენიქსმა“ დაიწყო საქმიანობა თიანეთშიც. ჩვენი მიზანია, რომ თიანელ ბავშვებსა და მოზარდებს არ დასჭირდეთ დიდი მანძილის გავლა საჭირო დახმარების მისაღებად და მათ საკუთარ მუნიციპალიტეტში ჰქონდეთ წვდომა პროფესიონალურ სერვისებზე.
- რა ასაკის ბენეფიციარები გყავთ და რამდენად კმაყოფილები არიან ბავშვები ან მათი მშობლები მიღებული დახმარებით?
- თიანეთში მცხოვრებ ბავშვებსა და მოზარდებს ვუწევთ სრულყოფილ თერაპიულ მხარდაჭერას, რომელიც მოიცავს ქცევით, მეტყველების და აკადემიურ თერაპიებს, ასევე ნევროლოგის, ლოგოპედისა და ფსიქოლოგის მომსახურებას. ჩვენი ბენეფიციარების ასაკი მერყეობს 2-დან 18 წლამდე.
მშობლების მხრიდან რეგულარულად ვიღებთ უკუკავშირს, რომელიც უმეტესად ძალიან პოზიტიურია. ისინი აღნიშნავენ, როგორც ბავშვების პროგრესს, ისე თერაპევტების პროფესიონალიზმსა და დამოკიდებულებას. პერიოდულად ვატარებთ შიდა გამოკითხვებს, რაც გვეხმარება მომსახურების ხარისხის მუდმივ გაუმჯობესებაში.
- ვინ მუშაობს მოზარდებთან?
- ცენტრის მუშაობაში განსაკუთრებული მნიშვნელობა ენიჭება მშობლებთან აქტიურ და მუდმივ კომუნიკაციას. როგორც ადმინისტრაცია, ისე თერაპევტები რეგულარულად ურთიერთობენ მშობლებთან, რაც ზრდის ნდობას და უზრუნველყოფს თერაპიული პროცესის გამჭვირვალობას.
მოზარდებთან მუშაობენ „ფენიქსის“ მაღალკვალიფიციური და გამოცდილი თერაპევტები, რომლებიც უკვე დიდი ხანია ჩვენი გუნდის წევრები არიან. ისინი კარგად იცნობენ, როგორც ბავშვების, ისე ოჯახების ინდივიდუალურ საჭიროებებს და მუშაობენ თანამედროვე, მტკიცებულებებზე დაფუძნებული მეთოდებით.
- ხომ არ იგეგმება რაიმე ტიპის სერვისის დამატება?
- დიახ, ახლო მომავალში ვგეგმავთ ფიზიკური და სენსორული თერაპიების დამატებას. ეს მნიშვნელოვნად გაამრავალფეროვნებს ჩვენს სერვისებს და კიდევ უფრო გააძლიერებს ბავშვებისთვის გაწეულ დახმარებას. ჩვენი მიზანია, ეტაპობრივად შევქმნათ მაქსიმალურად სრულყოფილი თერაპიული სივრცე, რომელიც პასუხობს სხვადასხვა საჭიროებას.
- რამდენად მოგწონთ სამუშაო გარემო და, ზოგადად, თიანეთი?
- თიანეთი ძალიან თბილი, მშვიდი და ადამიანურად გულწრფელი გარემოა. აქ განსაკუთრებულად იგრძნობა საზოგადოების ჩართულობა და სურვილი, რომ ბავშვებმა მიიღონ უკეთესი მომავალი. სამუშაო გარემო ხელს უწყობს კონცენტრირებულ და შედეგზე ორიენტირებულ მუშაობას, რაც თერაპიული პროცესისთვის ძალიან მნიშვნელოვანია.
დასასრულს მინდა აღვნიშნო, რომ მსგავსი პროექტები რეგიონებში მხოლოდ სერვისების მიწოდება არ არის — ეს არის ინვესტიცია ბავშვების, ოჯახების და მთლიანად საზოგადოების მომავალში. ჩვენი გუნდისთვის დიდი პასუხისმგებლობა და ამავე დროს დიდი მოტივაციაა ვიყოთ ამ პროცესის ნაწილი.
ინგა ჩიტაური
