29/07/2025
ონკოპაციენტების კვების თავისებურება მკურნალობის სხვადასხვა ეტაპზე.
აღსანიშნავია, რომ ონკოპაციენტების კვება განსხვავებულია მკურნალობის სხვადასხვა ეტაპზე და დამოკიდებულია ადამიანის ზოგად მდგომარეობაზე, მაკრო და მიკრო ნუტრიენტების დეფიციტზე .
სიმსივნის ტიპის და სტადიის მიუხედავავ მნიშვნელოვანია ისეთი საკვების მიღება, რომელიც ანტიოქსიდანტური თვისებების მქონე ვიტამინებით და ნივთიერებებით არის მდიდარი , შეიცავს ვიტამინებს A,C , რეტინოლს და კაროტინს.
განვიხილოთ საკვები პროდუქტების მახასიათებლები /სარგებელი კვებითი კატეგორიების მიხედვით:
• მარცვლეული პროდუქტები: აუცილებელია დაბალანსებული კვებისათვის.
მარცვლეული უზრუნველყოფს ორგანიზმს B ჯგუფის ვიტამინებით, ნახშირწყლებითა და ბოჭკოებით, რაც აუმჯობესებს საჭმლის მომნელებელი სისტემის ფუნქციონირებას.
• ბოსტნეული, მწვანილი და ხილი: აუცილებელია ყოველდღიური რაციონისათვის, განსაკუთრებით ქიმიოთერაპიის შემდეგ. ეს პროდუქტები მდიდარია მიკროელემენტებით, ვიტამინებით, ფლავონოიდებითა და ანტიოქსიდანტებით, რომლებიც ხელს უწყობენ დაზიანებული უჯრედების რეგენერაციას და ახალი უჯრედების ნორმირებულ წარმოქმნას.
• რძის პროდუქტები: რძემჟავა პროდუქტების სახით წარმოადგენს ქიმიოთერაპიის დროს სრულფასოვანი კვების მთავარ კომპონენტს.მათში შემავალი ლაქტო- და ბიფიდობაქტერიები აძლიერებენ იმუნიტეტს, აუმჯობესებენ საჭმლის მომნელებელი სისტემის მდგომარეობას და ამცირებენ ინტოქსიკაციის სიმპტომებს.
• ცილოვანი ჯგუფი: მოიცავს კვერცხს, კაკალს, ლობიოს, ქათმის თეთრ ხორცს, ზღვის პროდუქტებს და თევზს. მათი მიღება უზრუნველყოფს ორგანიზმის გაჯერებას ცილებით, მიკროელემენტებითა და ვიტამინებით.
• ზეთები და ცხიმები: ონკოლოგიური დიეტის აუცილებელი ნაწილია. აღნიშნული ჯგუფი შეიცავს ომეგა-3/6 ცხიმოვან მჟავებს, რომლებიც ამცირებენ სიმსივნური უჯრედების ზრდას და აქვთ ანტიკანცეროგენული ეფექტი. მათ შორისაა: კაკალი, სელის თესლი, სელის ზეთი, ზეთისხილისა და ხორბლის ჩანასახების ზეთი, თევზის ქონი და სხვა.
ონკოპაციენტისთვის დიეტის დაგეგმვის დროს უნდა გაითვალისწინოთ როგორც პაციენტის ზოგადი მდგომარეობა, ასევე თანმდევი დაავადებების შესაძლო კვებითი მოთხოვნები.
მენიუს აგების ძირითადი პრინციპებია:
• სწრაფი ნახშირწყლების შემცველი პროდუქტების შემცირება. (მაგალითად ტკბილეულობა )
• ცხიმების ზომიერი რაოდენობა (განსაკუთრებით – ცხოველური)
• ანთების საწინააღმდეგო პროდუქტების რაოდენობის გაზრდა (ომეგა-3, ანტიოქსიდანტები)
• საჭმლის მონელებისა და იმუნიტეტის მხარდაჭერა, სითხით გაჯერება და დეტოქსიკაცია.
• მინიმალური თერმული დამუშავება.
გისურვებთ ჯანმრთელობას, თუ გაქვთ შეკითხვები კონკრეტულ კვების გეგმის ან პროდუქტის შესახებ - მომწერეთ.
