26/03/2021
ფსიქოთერაპია ამარცხებს კოვიდ ინფექციას!
ინფექციის გავრცელებამ ფართო მასშტაბები მიიღო და უდიდესი გავლენა მოახდინა ცხოვრების ყველა სფეროზე. იგი შეეხო მილიონობით ადამიანის ჯანმრთელობის მდგომარეობას. დიდია გარდაცვლილთა რაოდენობა. 2021 წ. 25 მარტის მონაცემებით დაინფიცირდა 125 167 534 და გარდაიცვალა 2 748 908 ადამიანი.
მხოლოდ საქართველოში კოვიდით დაავადდა 279 027 ადამიანი, რომელთაგან 3732 გარდაიცვალა.
დღეს მსოფლიოს სამედიცინო საზოგადოების ყურადღების ცენტრშია პოსტკოვიდური გართულებების თემა. ამ გართულებებს უწოდებენ „ლონგ კოვიდს“ ან „თეთრ კოვიდს“. გამოცანად რჩება პოსტკოვიდური სიმპტომების არსებობა და მისი გახანგრძლივება დროში. პაციენტები სხვადასხვა სიმპტომს უჩივიან.
გამოყოფენ გულის, ფილტვების, თირკმელების ანომალიებს, ნევროლოგიურ და ფსიქიკურ გართულებებს.
ვაშინგტონის უნივერსიტეტის მკვლევართა მონაცემებით ასეთ პაციენტთა რაოდენობა 30% -ს აღწევს.
ვუჰანში (ჩინეთი) განკურნებული პაციენტებიან 76% კვლავ განიცდიდა რომელიმე სიმპტომის გავლენას.
ევროპელი სპეციალისტების მიხედვით, კოვიდმა ადამიანებს არა მხოლოდ ფიზიკური ზიანი მიაყენა, არამედ სერიოზულად გაართულა მათი ფსიქიკური ჯანმრთელობის მდგომარეობა. ხაზს უსვამენ ისეთი მოვლენების არსებობას, როგორიცაა დეპრესია, შფოთვა, კონცენტრაციის გაძნელება, მეხსიერების პრობლემები, განწყობილების შეცვლა.
ინგლისის ჯანმოს მონაცემებით, კოვიდის გადატანის შემდეგ პაციენტთა 29,3% სხვადასხვა ჩივილით შებრუნდა კლინიკებში. მათგან 12,4% გარდაიცვალა.
ოქსფორდის უნივერსიტეტის კვლევით, კოვიდის გადატანიდან პირველ 6 თვეში 33% -ს განუვითარდა სხვადასხვა მენტალური დაავადება.
საერთაშორისო გამოკვლევებზე დაყრდნობით მსგავს პოზიციას გამოხატავს საერთაშორისო ექსპერტი გ. ფხაკაძე: კოვიდგადატანილთა 30%-ზე მეტს აქვსო რაიმე მენტალური პრობლემა. აღარ ვლაპარაკობთო გულზე, ფილტვებზე და ა.შ. არსებულ გართულებებზე.
საყურადღებოა ქართველი მედიკოსების დაკვირვების შედეგები.
პირველი საუნივერსიტეტო კლინიკის გენერალური დირექტორის ლ. რატიანის მიხედვით, როგორც კოვიდ 19-ის, ისე ნებისმიერი დაავადების დაძლევაში დიდი მნიშვენლობა აქვს ადამიანის ფსიქო-ემოციურ განწყობას. დ. უზნაძის განწყობის თეორიაც ადასტურებსო, რომ ფსიქიკა მართავს სხეულს. უარყოფითი განწყობა ამძიმებს ავადმყოფობას, შემართება და გამარჯვების რწმენა კი გადარჩენის საწინდარია 99% შემთხვევაში.
იგივე აზრი გამოთქვა ინფექციონისტმა მ. ენდელაძემ ინფექციურ საავადმყოფოში მოთავსებულ პაციენტებზე დაკვირვებისას.
ჯანდაცვის მსოფლიო ორგანიზაციის მიხედვით, კოვიდ პანდემიამ დიდი გავლენა მოახდინა ადამიანთა ჯანმრთელობაზე. მილიარდამდე ადამიანს აღენიშნება ფსიქიკური მოშლილობები. ჯანმო შეშფოთებას გამოთქვამს ფსიქოლოგიური სამსახურების შეფერხებით მუშაობაზე.
ასეთი საგანგაშო მდგომარეობის ფონზე წარმოგიდგენთ ქართული ფსიქოთერაპიული სკოლების („მენცარი“, „ანთროპოანალიზი“) საინტერესო მონაცემებს.
ჩვენ მრავალი წლის განმავლობაში წარმატებით ვკურნავთ ფსიქიკურ აშლილობას, ფსიქოსომატურ დაავადებებს და ანტისოციალურ ქცევებს (ნარკომანია, აზარტული თამაშები, ალკოჰოლიზმი და სხვ.). ამ ყველაფერს საერთო საფუძველი აქვს ფსიქიკური ტრავმის სახით. მკურნალობაც მიმდინარეობს მხოლოდ ფსიქოლოგიური მეთოდებით მედიკამენტების გარეშე.
კოვიდ ინფექციის გაძლიერებისას გამოვთქვით ვარაუდი, რომ ჩვენთან ნამკურნალები ადამიანები ან არ დაავადდებოდნენ ან დაავადებას გადაიტანდნენ მსუბუქ ფორმაში.
ვარაუდის შესამოწმებლად გამოვკითხეთ 1994-2020 წ.წ. ჩვენი ყოფილი პაციენტები. ისინი პასუხობდნენ შემდეგ კითხვებზე: დაავადდით თუ არა კოვიდით (კი ან არა)? თუ დაავადდით როგორ გადაიტანეთ (მსუბუქად, მძიმედ)? ატარებდით თუ არა პრევენციულ ღონისძიებებს მედიკამენტების, ვიტამინების და სხვ. გამოყენებით (კი, არა)? გქონდათ თუ არა კონტაქტი ინფიცირებულებთან (კი, არა)?
მივიღეთ პასუხი 72 პაციენტისგან. მათგან დაავადდა 8 ადამიანი და ყველამ მსუბუქად გადაიტანა. 4 ადამიანი ახორციელებდა პრევენციულ მსუბუქ ღონისძიებებს, იღებდა რა ვიტამინებს. ინფიცირებულებთან კონტაქტი ჰქონდა 39 ადამიანს, რომელთაგან მხოლოდ 8 დაავადდა.
ძალზე მნიშვნელოვანია, რომ პოსტკოვიდური გართულებები არ აღენიშნება არცერთ მათგანს.
ეს, ერთი შეხედვით, საოცარი შედეგები სულაც არაა გასაკვირი, თუ კარგად ჩავწვდებით ფსიქიკის რაობას. ადამიანი უპირველესად ფსიქიკური არსებაა. ჯერ კიდევ სოკრატე მიუთითებდა, რომ უმთავრესი ადამიანური თვისება არისო რეფლექსიის (ფიქრის) პროცესი. ფსიქიკის პრიმატზე აკეთებდნენ აქცენტს ზ. ფროიდი, დ. უზნაძე და სხვ.
ჩვენ მიერ ჩამოყალიბებული ანთროპოანალიზური ფსიქოთერაპიით ზუსტად ხდება ფსიქიკური აშლილობის მიზეზის მიგნება და მისი აღმოფხვრა. ეს განაპირობებს ფსიქიკის ისეთ მდგრადობას ( ამას შეიძლება „ფსიქიკური იმუნიტეტიც“ ვუწოდოთ), როცა შესაძლებელი ხდება დაავადების ნებისმიერი სიმპტომის დაძლევა.
„ანთროპოანალიზის“ დამფუძნებელი, პროფ. გივი მერაბიშვილი
