27/11/2025
在這個傷痛時刻，請好好照顧自己及身邊的人。
🔥 【今日香港 5 級大火｜家長可以點樣安撫小朋友？】
當面對今日香港大埔屋苑大火的新聞，我地睇住直播都感受震驚同心痛...
相信好多家庭都被嚇親。即使唔喺現場，媒體畫面、消防鳴聲、街坊嘅討論，都有機會令小朋友感到驚惶、不安、甚至夜晚瞓得唔穩。
普通嘅孩子會有情緒反應，如果你屋企有特殊學習需要（SEN）的小朋友，佢哋表達情緒嘅方式未必一樣，甚至感覺更強烈、更持久，家長更要多一份留意同體諒。
以下係 OneSEN 註冊遊戲治療師Joyce特別為家長整理嘅火災後情緒安撫小指引👇
🧡 1. 先接納情緒
✅ 告訴孩子：「我知道你有啲唔舒服／有啲驚，媽媽（爸爸）一直喺你身邊。」
❌ 避免即時否定或壓抑感受（如：「唔使驚啦」「唔關你事」）。
🧸 讓孩子明白：害怕、擔心、心跳加快都是正常反應。
🗣️ 家長對話例子：
「我見到你有啲唔開心，其實每個人面對呢啲新聞都會緊張，媽媽／爸爸明白你。
你有咩感覺都可以講畀我聽，就算講唔出口都唔緊要，我會陪住你。
如果你覺得用講嘅唔舒服，畫出嚟、寫出嚟都得。」
（SEN家長特別提示：有啲小朋友可能突然發脾氣、喊、唔出聲、重複問問題，甚至只係黐實你，唔代表佢唔乖，而係佢表達唔到感受。家長可以用更多擁抱、輕輕摸背、陪伴身邊，唔需要急於糾正行為。）
2.用簡單語言解釋事件
✅ 只描述孩子能理解的部分，避免過多細節或恐怖內容。
✅ 可以說：「有幢大樓著火，消防員叔叔已經救人，依家安全咗。」
✅ 如果孩子重複發問，用溫柔語氣回應，毋須急於一次講晒。
🗣️ 家長對話例子：
「火警有好多專業人士幫緊手，大家會慢慢安全返。」
3.暫停接觸大量新聞與片段
❌ 重複畫面會令孩子更緊張。
✅ 可以說：「我想保護你嘅心，我哋而家先唔睇新聞，一齊做啲你鍾意嘅嘢好唔好？」
❌ 減少電視、手機長時間播放意外內容。
🗣️ 家長對話例子：
「新聞太多，睇多咗個腦都會攰。我哋一齊玩下桌遊或者畫畫啦！如果你仲想知最新情況，我可以簡單講畀你聽。」
4.提供身體與情緒安全感
✅ 多陪伴、多擁抱，維持屋企原有生活節奏。
✅ 一齊做簡單活動：畫畫、玩玩具、做手作、深呼吸。
✅ 家長自己保持冷靜，孩子會更容易安定下來。
🗣️ 家長對話例子：
「我哋一齊攬一攬，媽媽／爸爸一直都喺你身邊，你想玩咩可以話我知。你鍾意用咩方法同我一齊，做深呼吸、畫畫，或者淨係坐埋一齊都得。」
5.提醒孩子：身體反應都屬正常
✅ 可能會有肚痛、心跳快、胃口差、瞓得唔好。
❌ 唔想返學、唔想講嘢、變得特別黐身。不要責怪，嘗試多聆聽了解。
✅ 告訴孩子：「有時嚇親都會有咁的反應，慢我會係度陪坐你。」
🗣️ 家長對話例子：
「我知你昨晚瞓得唔好、今日冇咩胃口，呢啲都係正常反應，媽媽／爸爸會陪住你。」
6.保持作息，建立穩定感
✅ 定時食飯、定時休息、適量運動。
✅ 參與孩子平時鍾意的活動。
✅ 保持和親人、朋友、老師等信任對象的聯繫。
🗣️ 家長對話例子：
「今日我哋都會照常返學、食飯、做運動，有咩唔舒服隨時同我講，老師都好關心你。」
7.家長也要照顧自己的情緒
💪 覺得不安、緊張、攰都係正常。
💪 建議家長：暫停睇新聞，搵朋友或伴侶傾下，有需要時休息。
💪 家長自己情緒穩定，孩子自然會更安心。
🗣️ 家長對話例子：
「有時我自己都會擔心，所以都會搵人傾下，大家一齊慢慢調整。我都會休息多啲，照顧好自己同你一齊行落去。」
❌ ❌切勿這樣說❌❌
「你如果唔乖就會(火警)咁。」
👉 恐嚇式說話會加深孩子恐懼，甚至令佢以為災難係自己造成，反而更焦慮。
❗如果孩子持續：
1.焦慮、做惡夢
2.黐實大人、反覆提問
3.對火／聲音特別敏感
就要搵專業人士傾吓，早一步介入會更安心!
#五句可以即刻講俾小朋友聽嘅安心句
「我哋而家係安全嘅。」
「我知你驚，係正常。」
「我會一直陪住你。」
「你嘅感受好重要。」
「我哋會一齊面對。」
最後，願所有受影響嘅居民同消防員都平安🙏🏾
📞 如情緒持續困擾可尋求專業支援：
• 撒瑪利亞防止自殺會：2389 2222
• 生命熱線：2382 0000
• 明愛向晴軒：18288
• 芷若園：18281
• 社會福利署：2343 2255
• 生命熱線青少年專線：2382 0777
• Open噏（24小時）：www.openup.hk
• 香港輔導及心理學會 WhatsApp：6218 1084
🧸 註冊遊戲治療師 Joyce想同咁多位爸媽講：
「你地肯陪住小朋友一齊面對情緒，已經係最好嘅禮物。你情緒的穩定、擁抱，都係小朋友最大嘅安全感。SEN孩子可能需要多啲時間同理解，你的耐性陪伴，係佢地最重要的支持！知道回應孩子情緒唔容易，你唔係孤單，OneSEN同我哋一直都喺度，陪你撐住！🙌」
