04/05/2026
中醫兒科破障抄｜鷓鴣鵪鶉
節錄《迴響．粵語文化期刊》 #35
唐朝醫藥家孟詵《食療本草》記述
鷓鴣「能補五臟，益心力，聰明」
鵪鶉「補五臟，益中續氣，實筋骨，耐寒暑，消結氣」
兩隻都有補益五臟功效，唔同嘅係鷓鴣溫熱性質比較明顯（鷓鴣甘溫而鵪鶉甘平），另外就係鷓鴣嘅keywords 係「益心力」「聰明」，鵪鶉係「實筋骨」「肥下焦」。咁樣代表啲乜？大家都知聰＝聽力，明＝視力，而響中醫理論框架入面，肝開竅於目、腎開竅於耳，耳目聰明就係同肝腎氣血是否充盈及通暢有關；與此同時，耳目均位於頭面部（位於人體最上部）、用於感知外界接收資訊，而感知外界呢件事本身係由心所主理，對應番鷓鴣「益心力」呢個講法，食用後可以令人「聰明」（視力聽力提升、對外界嘅感知力增加），大機會唔係由於佢可以入下焦補肝腎（否則就會同鵪鶉一樣會提及筋骨、下焦等字眼），而係因為佢可以增強心力，同埋令心—肝、心—腎呢兩條道路／頭面部氣血通道暢通、或者令肝腎本身就有嘅氣血得以上達。相比之下鵪鶉就簡單直接啲，開宗明義「實筋骨」（筋屬肝、骨屬腎）、「肥下焦」，就係講緊佢能夠直接補益位置在身體下部、深處嘅肝臟腎臟。咁心屬上部、肝腎屬下部（用番中醫 technical term 就係上焦下焦），簡單粗暴啲歸納，可以話大家都補五臟但鷓鴣補多啲上焦而鵪鶉補多啲下焦。
從我嘅經驗去睇，體弱嘅小朋友燉鷓鴣、鵪鶉比燉雞、煲鱷魚肉出事嘅機會率的確少啲─── Wait，所謂出事具體即係咩先？可以係忽然發燒、咳多咗、痰多咗，或者流下鼻血牙血生痱滋之類，後者算係最無傷大雅，因為有啲長期服用燉補，係會搞到痰涎壅塞甚至變生喘促或者俗稱氣管敏感嘅原因不明久咳，到時無論響中醫定西醫角度要處理都比較麻煩，西醫又要用類固醇、氣管舒張劑、抗生素三寶，中醫就先要疏痰清痰、再強肺之後調補脾胃有排搞……所以響我嘅診室遇到小朋友體弱而家長想要配合食療，我一律建議燉鷓鴣、鵪鶉，補身得嚟副作用／反作用／出錯機率相對較少，鱷魚肉呀乜參物參就真係我話「最近可以試下煲喇」先好整。
食譜👩🏻🍳👩🏻🍳👩🏻🍳
如果係專燉俾一個小朋友服用（細燉盅），鷓鴣半隻／鵪鶉一隻；如果多過一個小朋友或者 for 全家（大盅），鷓鴣一隻／鵪鶉一對。網絡上充斥住咩百日鷓鴣王之類嘅銷售說辭，暫時我就搜索唔到有咩文本根據，不過傳統嚟講，禽鳥類用作食療補身的確係以老為佳，我就認為幾多幾多日並非對療效有決定性嘅重大影響，可以自行斟酌性價比再採購。無需配搭其他肉類，切件洗淨後輕燙出水。
必要配搭︰
。少量珍珠米或糯米（視乎燉煮頻率，如果一星期一次咁密就三次珍珠米一次糯米，如果一兩個月一次就用哂糯米都得，總之糯米不可常服而珍珠米點用都得）
。栗子／合桃（只用一樣又得，一齊落哂又得）
。生薑（一兩塊薄片用嚟辟腥）
。南北杏（脾肺弱小朋友嘅食療鐵膽）
。遠年陳皮（一角仔就夠）或川貝（十粒八粒）（用嚟疏導藥力、化痰散結）
Optional 配搭︰
氣候乾燥或小朋友明顯乾瘦偏黑＝乾淮山、乾百合
氣候潮濕＝白朮、生薏米、或陳皮落多啲
以上所有材料入燉盅，加滿清水，隔水燉三個鐘。飲湯，基本上所有湯料都可以食，但強調最好要食哂米同果仁（如果米落得多變咗粥仔都無妨，盡量食），肉同其他材料就可食可不食，總之最緊要係啲湯水、米同果仁。最適合係免疫力弱或過敏而體形較瘦小嘅小朋友，通常我會推薦俾小朋友非常易病兼氣管敏感、哮喘（非發作期）、鼻敏感嘅家長，鷓鴣、鵪鶉卡啦咁燉俾小朋友食，兩星期一次。
-
☎️查詢或預約：26612126/ 98876218
#田皓瑤醫師 #中醫兒科點燈錄
#田醫小小食療方 #田醫醫診室日常 #田醫醫小兒調養
