唐宇嶸醫生 - 順孕安產·香港婦產科及生殖醫學資訊專頁

19/11/2025

婦產科醫生爸爸工作日記 #胚胎成績表

做試管（IVF）嘅媽媽爸爸，最緊張嘅時間之一，一定係等實驗室報告：「有幾多個胚胎？分數高唔高？等級係咪越高越易成功？」其實「胚胎成績表」都幾複雜，未必話分數高就一定有著床BB！

每個胚胎由卵子同精子結合開始，會慢慢分裂，實驗室會望住佢哋變化，記低細胞數、分裂靚唔靚、有冇碎片。到咗第五日形成囊胚，就會用一套叫Gardner嘅評分，數字加英文字母去「打分」。理論上，分數靚啲嘅胚胎，平均著床率會高啲，但真實世界唔可以淨係睇分數。

做咗咁耐試管，真係見過有啲低分胚胎，最後都可以順利著床、出世做健康BB！相反，有啲外觀靚靚嘅胚胎，未必一定成功，因為影響懷孕嘅因素真係好多，包括基因、子宮環境等等。

對每一對走過試管路嘅夫婦，每一粒胚胎都係希望。其實胚胎評分主要係幫手排次序，揀邊粒先放，唔係「水晶球」可以預知結果。好多時，擺到最後一粒低分最低嘅胚胎，反而成功咗，人生真係好奇妙。

希望將來有更準、更科學嘅方法，幫到大家揀到最有機會成功嘅胚胎，圓多啲家庭嘅夢。

（本帖只係分享經驗同健康教育，唔可以代替醫生個人建議。如有疑問，記得搵返你嘅主診醫生傾傾啦！）

#醫生爸爸系列 #婦產科 #胚胎成績表 #醫患同行 #香港媽媽 #醫學小知識

07/11/2025

婦產科醫生爸爸工作日記：從病人到評審——醫患之間的同行

最近有幸獲邀參與一個國際婦產專科的臨床評審工作，團隊中除咗有專業醫生，仲有來自唔同背景嘅公眾評審（lay examiner）。其中一位公眾評審分享，佢之所以加入，係因為十多年前經歷咗一次複雜嘅分娩，當時佢嘅產科醫生畀咗佢極大嘅支持同鼓勵，令佢至今都好感激。正因如此，佢希望可以用過來人、病人家屬嘅角度，參與臨床評審，推動醫生除咗專業知識之外，更加重視對病人嘅關懷同陪伴。

無論醫療科技點樣進步，病人最需要嘅，往往都係一位願意支持同用心陪伴嘅醫生。有時候，一句窩心說話、一個專心聆聽，可能比任何藥物更重要。

作為醫生，我哋同病人係一齊行呢段路嘅夥伴。其實每一位病人都係我哋最好的老師，佢哋嘅經歷同回饋，令我哋不停學習、反思同成長，先可以不忘初心，為病人帶嚟最適切嘅照顧。

多謝每一位病人嘅信任，亦多謝有機會由唔同角度學習成長。希望大家都可以感受到醫患同行嘅力量。

當日工作一直持續到晚上八點，衷心感謝所有參與嘅醫護同工同公眾評審嘅努力和付出。每一位都好專業、好投入，大家都希望為婦女健康出一分力。

（圖：夜晚離開學院時拍低嘅一刻。）

28/10/2025

婦產科醫生爸爸工作日記 — 怎樣快樂的更年

多謝珊珊及三坐山的邀請，讓我有機會和大家一起傾談「更年期」這個每位女士都會經歷的重要人生階段。希望透過今次分享，幫助大家正確認識更年期的身心變化，學習科學管理，提升生活質素。

(本帖僅供健康資訊交流，不能取代個別醫療建議。如有需要，請諮詢你的主診醫生或合資格醫護人員。）

#婦產科爸爸醫生 #更年期 #健康資訊 #醫學科普 #科學生活

更年期唔一定要辛苦過！唐宇嶸醫生教你用科學方法調理身心，重新找回快樂與平衡。* 為什麼這幾年特別容易發脾氣？* 是否與「更年期」有關？* 今集《醫生請坐》，主持 李珊珊 請來 婦產科專科 唐宇嶸醫生（Dr. Paul Tong），....

22/10/2025

🧵 婦產科醫生爸爸工作日記：急性盆腔炎-陰道超聲引流術

最近門診見到一位年輕女士，平時身體健康，突然間下腹痛得好緊要，發燒、陰道分泌增多。經檢查同化驗，確診為急性盆腔炎（PID），甚至出現咗輸卵管膿腫。

以往遇到咁嚴重嘅情況，傳統做法多數要做開腹或腹腔鏡手術，將膿腫切除。雖然可以徹底清除感染，但始終係一個較大嘅手術，對於有生育計劃嘅年輕女士，難免擔心影響將來懷孕機會。

近年醫學有新進展——陰道超聲引流術。呢個方法唔需要開刀，而係利用超聲波引導下，經陰道一支幼針，將膿腫內嘅膿液抽出，再配合適當抗生素治療。好多時都可以有效控制感染，減低手術風險，最重要係有助保留輸卵管同卵巢功能，對有生育計劃嘅女士嚟講係一個重要突破。

其實急性盆腔炎如果及早發現同治療，大部分都可以避免嚴重併發症，所以如果女性朋友有持續下腹痛、發燒、分泌異常等症狀，記得及早求醫檢查，唔好諗住「捱一捱就無事」。

醫學科技不斷進步，幫到更多有需要嘅病人。希望每一位女性都可以健康自在，擁有自己嘅選擇權。

#婦產科爸爸醫生 #急性盆腔炎 #超聲引流術 #保留生育力 #健康資訊 #醫學科普 #正能量

27/09/2025

White Coat Ceremony 2025｜醫學生白袍禮：一輩子的承諾

今日代表婦產科學系出席HKU醫學生白袍禮，坐在台上見證新同學穿上白袍，現場氣氛莊重又溫馨。聽到中學校長代表分享同學努力考入醫學院的經歷，亦感受到每位同學背後的堅持與付出。

大家一齊宣讀醫生誓詞，多年後重溫這份承諾，別有一翻體會。醫學唔只係知識同技術，仲包括醫德與專業態度——誠實、尊重、同理心、對病人負責，始終都係做醫生最基本但亦最重要的事。

參加這個場合，亦提醒自己：除了臨床工作，教育和啟發新一代同樣重要。醫學精神需要一代一代傳承落去。

最後，祝各位新同學艱苦學習中搵到樂趣，醫學生涯充實愉快。醫學係團隊工作，大家一齊努力，為病人做到最好。

#醫學生 #醫德 #醫學教育

21/09/2025

🧵婦產科爸爸工作日記：取卵手術戴VR會唔會冇咁痛？

好多女士做IVF前最擔心嘅係：「取卵手術會唔會好痛？」
近年科技興玩VR，咁如果不育女士接受取卵手術時戴住VR頭盔睇片，有無幫到手呢？
我哋團隊早前就做咗個隨機對照研究（RCT），結果剛剛刊登咗醫學期刊 Human Reproduction！

點做嘅？
- 160位準備做取卵手術嘅女士被隨機分成兩組：一半戴VR頭盔睇大自然影片，一半照傳統方法
- 全部都用返標準麻醉＋鎮靜藥
- 做完手術即時問大家痛楚感覺、滿意度、副作用等

結果如何？
- 兩組女士痛楚感覺和滿意度其實差唔多
- 戴VR頭盔無明顯減痛效果

有時做多啲嘢未必一定有幫助，反而有證據支持嘅選擇先最重要💪🏻

特別多謝每一位參與研究嘅病人同我哋團隊嘅努力，冇你哋就做唔到呢個研究！🙏🏻

💡實證醫學就係將假設用科學方法測試
💡發表到國際期刊等全球專家審閱
💡好多治療聽落好合理，但真係要做過研究先知實際效果

[有興趣可以睇原文（Human Reproduction, 2025）](https://academic.oup.com/humrep/advance-article/doi/10.1093/humrep/deaf188/8259676)

#婦產科爸爸 #取卵 #虛擬實境 #醫學研究 #女仕健康

17/09/2025

🧵婦產科醫生爸爸日記：生BB愈嚟愈多福利？今年「組合拳」你要知！

過去政府一直唔干預生育，依家政策轉向，鼓勵大家生BB，有咩措施？

🔹稅務優惠齊上場
- 居屋/租屋利息有額外扣稅
- 生育醫療開支都可以扣稅
- 子女免稅額提升，BB出世嗰年仲有額外免稅

🔹住房支援更貼地
- 公屋申請「家有初生」可快一年上樓，已經超過5,300個家庭受惠
- 居屋都有「家有初生優先選樓」，800個新手家庭成功揀樓

🔹BB數量終於回升
- 2024年新生嬰兒數目顯著上升，全年多咗3,500個BB，升幅11%！

🔹新一輪「組合拳」再加碼
- 初生BB雙倍免稅期由一年變兩年，每個未滿兩歲BB，父母可享26萬免稅額
- 未來三年增設15間資助幼兒中心，日間照顧名額幾乎double，特別照顧0-2歲BB
- 校內課後託管名額唔設上限，家長返工更安心

🔹生育支援更全面
- 設孕婦專屬窗口，睇醫生輪候更方便
- 取消胚胎/配子自用儲存年限，輔助生育服務名額再增
- 推動彈性工作時間，家庭友善職場更普及

#婦產科醫生爸爸 #生育福利 #家庭支援 #新手爸媽 #政策觀察

九、社會發展 設立「社會高齡化對策工作組」 265. 政府致力構建長者友善的樂齡社會。去年《施政報告》提出成立的「促進銀髮經濟工作組」（工作組）已於5月...

10/09/2025

📌【本專頁守則及免責聲明】

為遵守香港醫務委員會（MCHK）規定，保障用戶及專業操守，特設以下守則：

本專頁只作健康教育用途，內容根據最新醫學資訊，不構成個別診斷、治療或醫患關係，亦無任何商業推廣。

互動守則
- 歡迎查詢一般健康問題，但請勿留言或私訊個人病情、檢查報告、相片或索取醫療建議。
- 如有緊急或嚴重健康問題，應親自求醫，切勿只依賴本專頁資訊。

私隱保障
- 嚴禁張貼可識別身份的病歷、照片或私隱資料。
- 本專頁不會公開分析個案資料，亦不會收集個人資料。

專業分際及免責聲明
- 不接受個案諮詢/分析檢查報告/開證明/提供醫療建議。
- 所有內容僅供參考，使用本專頁即代表同意以上條款。
- 有疑問，請諮詢主診醫生。

管理原則
- 本專頁保留刪除違反守則、推銷、不當、私隱等留言的權利。
- 所有互動以尊重、專業、互信為原則。

💡溫馨提示：
每個人健康狀況不同，網上資訊不能取代面對面醫療，請大家尊重醫學專業界線。

10/09/2025

🧵婦產科醫生爸爸日常：大肚要打流感針💉？

早兩日有位準媽媽嚟產檢問：「醫生，新聞話流感高峰期又嚟啦，懷孕期間打流感針真係有用咩？會唔會唔安全？」

🔹點解孕婦特別需要打流感針？
- 孕婦感染流感後，併發症（例如肺炎、早產等）風險明顯高啲。
- 打咗針，媽媽身體會產生抗體，啲抗體仲可以經胎盤保護BB，BB出世頭幾個月都一齊受惠。
- 世界衛生組織（WHO）同香港衛生防護中心專家都一致建議所有懷孕媽媽任何孕期都可以安全接種流感疫苗。

🔹打流感針會唔會有影響？
- 科學數據顯示，滅活或重組型流感疫苗對媽媽同胎兒都安全，冇證據會致畸或導致流產。
- 但要留意，鼻噴式「活疫苗」唔適合孕婦使用。

🌸媽媽話：「原來打流感針不單止保護自己，仲可以幫埋 BB，仲要唔駛錢添😊！」

===================
🔹政府資助流感疫苗 9月25日開始！
- 由2025年9月25日起，政府資助流感疫苗正式開打。
- 懷孕媽媽可於參與政府疫苗資助計劃（VSS）嘅家庭醫生、產科門診、公私營診所接種。

#婦產科醫生爸爸 #孕婦流感針 #政府資助疫苗 #媽媽要保護自己 #一人打針兩人受惠

06/09/2025

🧵 婦產科醫生爸爸工作日記：順產定開刀？最新國際指引點睇？🤰🏻🤱🏻

產前門診好多準媽媽都問：「醫生，我應該揀順產定剖腹產好？」

最近，英國婦產科醫學院（RCOG）新聞稿提及：
順產同剖腹產各有好處與風險，邊種方式最啱你，要根據你同BB嘅情況、醫生評估同你個人選擇。

而家醫學界最大嘅轉變係——唔會再單一推崇順產或剖腹，最重要係知情同自主選擇。

無論選擇邊一種，兩者在大多數情況下都係安全有效，唔需要覺得有一種一定比另一種「高級」或「次等」。

最終目標都係：媽媽BB平安健康，過程中感受到被尊重同支持，呢個先至最重要！

我見證過好多不同分娩經歷，每個家庭嘅故事都好獨特——

有啲媽媽開頭想順產，但遇到突發情況要緊急剖腹；又有啲媽媽因為高危因素，一早就計劃好開刀。亦有好多好似我太太前三胎都咁好彩，安全順產，黎緊亦希望可以繼續由我順利「執」出黎😊。
無論選擇咩方法，最緊要同醫生商量清楚，做過最合適自己嘅決定！

你又點揀？有冇任何疑問或分娩故事想分享？一齊交流下啦！💪🏻❤️

#婦產科爸爸醫生 #順產定開刀 #媽媽的選擇 #醫學科普 #知情選擇 #健康資訊 #正能量

Reference: https://www.rcog.org.uk/news/rcog-opens-consultation-on-new-good-practice-paper-on-planned-caesarean-birth-services/)

#婦產科爸爸醫生 #順產定開刀 #媽媽的選擇 #醫學科普 #知情選擇 #健康資訊 #正能量

30/08/2025

🧵 婦產科醫生爸爸懷孕日記：懷孕期間坐骨神經痛小知識

今日星期六，早上睇完症同巡房，下午手術中間有空檔，返去幫太太整張新凳仔。呢張新凳買咗一段時間，但一直無時間整。

老實講，其實係太太兩日前發作咗一次好嚴重嘅坐骨神經痛，痛到幾乎行唔到路。見佢咁辛苦，我都好內疚，覺得自己應該早啲處理。

🦴 咩係坐骨神經痛？
坐骨神經痛（sciatica）係指由腰部經臀部、大髀後面伸延落小腿嘅痛楚或麻痺感。

👶 懷孕媽媽為何易中招？
- 骨盆及脊柱姿勢改變，腰椎負擔增加
- 子宮增大，間接壓力影響神經
- 體重增加
- 荷爾蒙令韌帶及關節鬆弛

🛠️ 舒緩建議
- 保持良好坐姿／站姿
- 避免長時間同一姿勢
- 適量活動及溫和伸展（建議由醫生或物理治療師指導）
- 用有承托力嘅椅／腰枕（正如太太終於換到嘅新凳仔😅）
- 熱敷或溫水浴可暫時舒緩

⚠️ 甚麼情況要即時求醫？
- 痛楚非常嚴重或持續惡化
- 下肢麻痺、無力、行動困難
- 伴有大小便困難／失禁
- 其他異常症狀（如下肢腫脹、發燒）

新椅終於裝好，太太坐得舒服啲，我都放心啲。

#婦產科醫生 #孕婦腰痛 #坐骨神經痛 #健康小知識

25/08/2025

🧵 婦產科醫生爸爸健康資訊：更年期潮熱新療法🩺🌡️

「醫生，我成日突然覺得好熱🥵、出汗💦，夜晚訓得唔好😴，又有情緒波動😔。有家族乳癌史，唔敢用荷爾蒙，仲有冇其他方法？」

其實，潮熱🔥、夜間出汗💧、失眠🌙、情緒變化，係唔少更年期女士常見問題。除咗傳統荷爾蒙治療，近月有多一種選擇：Fezolinetant（非荷爾蒙藥物）。

Fezolinetant屬於NK3受體拮抗劑🧬。臨床研究顯示，有助減少潮熱及夜間出汗，部分人數日或數星期內有改善。

藥物作用主要影響大腦體溫調節🧠，並無荷爾蒙。

常見副作用包括頭痛、疲倦🥱、噁心🤢、腹瀉🚽及肝酵素升高🧪。用藥前及期間要驗肝功能🩸。如有黃疸、深色尿液、右上腹痛⚠️，要即時停藥並求醫🏥。藥物長遠安全性仍需觀察🔍。

潮熱嚴重，或荷爾蒙治療不適合／不願意使用人士可考慮使用。是否適合，需由醫生按個人情況評估。

除咗Fezolinetant，亦有其他非荷爾蒙治療方案（如部分抗抑鬱藥/血壓藥/神經痛💊），或生活習慣調整🧘‍♀️、心理支援🫂等，均可按需要討論。

❗️如對治療方案有疑問，建議諮詢你的主診醫生，切勿自行服藥。

#更年期 #潮熱 #健康資訊 #女性健康