25/05/2026
今日南華班球員凱旋歸來，睇其他籃球page見到都有唔少球迷去接機，作為球迷老編見到呢啲景象都覺得好開心。球迷係球市嘅根基，點都係先有關注度再有市場。究竟老闆點樣睇，之後會唔會搵更加多資源喺呢個基礎上繼續發展，相信係球迷下一步會關心嘅焦點。
講到呢一度，見到有啲籃球page話南華係借將組隊先至贏，唔係「真正」南華贏，老編對呢一種睇法都有少少相關嘢想分享。冇錯，奪冠關鍵楊和、無受傷嘅話相信會好有貢獻嘅基拔、輪換上相當重要嘅蔡再懃、梁兆華，喺開賽之前都唔係南華球員；但係開賽嘅時候香港甲一已經完咗季，而熟悉香港球壇嘅球迷都知道，好多球員完季就完約(甚至有啲球員係冇約)，嗰個時候絕對有權簽任何球隊，所以話呢隊奪冠球隊唔係「真正」南華似乎有啲苛刻同偏離香港籃壇嘅現實。老編之前都有個post講過要香港籃球好，唔單只要珍惜呢啲「組隊機會」甚至如果有老細肯嘅話，應該贊助「香港隊」去打NBL添啦。因為要個別球會老細投資咁多錢去維持呢個陣容只係參加香港一個*業餘聯賽(註)嚟講的確係講唔過去；反而用嚟培養「香港隊」無論喺籃球、公益、商業潛質都更加有吸引力。
照而家呢個勢，我諗好多球迷都會想原班人馬繼續留喺南華，睇下年底BCL-Asia正賽會唔會再創奇蹟，但私心嚟講，老編係好想見到基拔同楊和繼續打東方喺下年嘅EASL亮相，而東方喺來季除咗打甲一同EASL之外季尾亦都會參加BCL-Asia，前景應該都唔錯。
但係點講都好無論係東方定係南華，要佢哋喺香港呢個咁細嘅球市投資咁多錢請咁多人去打呢啲比賽都的確係唔現實。所以睇返實際情況，老編覺得都係要「組隊」甚至恆常組一隊「香港隊」喺本地業餘聯賽之上參加啲職業比賽先至有機會帶動到成個球市發展。
#香港籃球 #甲一 #南華
*(註)業餘嘅係賽事運作、宣傳、人工；大部分球員嘅投入度、籃球對佢哋生活嘅佔比，可比職業水平。
