15/04/2026
【身心靈小休息｜🧠5大對策應對考試頭腦一片空白】
明明自覺溫書已經溫足晒，但點解入到試場後，見到份卷會腦海完全一片空白，個腦越諗越亂，個心越急越驚越擔心😰？相信呢個情況都曾經出現喺每一位學生、每一位公開試考生嘅身上，其實除咗知識內容之外，點樣去制定對策預防、面對呢啲情況都非常重要㗎！🔑即刻記得呢五大對策，希望喺考場上幫到您冷靜應戰啦💪✨！
1️⃣聯想字眼💡
考緊試時當卡住咗喺某一題，唔好鑽牛角尖，嘗試搵出題目中嘅關鍵字，再喺草稿紙寫低相關嘅聯想字眼，透過呢啲破碎嘅記憶碎片，好可能慢慢就拼湊返完整嘅溫習內容出嚟🧩！
2️⃣自我提示 🗣️
正所謂「心態決定一切」，當大腦一片空白時，與其同自己講「死喇唔記得」，不如試吓同自己講：「我有溫㗎！嗰晚睇過！陣間就記得架喇，做下一題先！」 先放低焦慮，跳過難題，等大腦喺放鬆狀態下慢慢運作，回憶隨時就喺下一秒自動浮現！
3️⃣預防勝於治療 🛡️
想避免呢個情況嘅發生，平時溫習時可以多運用感官（例如邊讀邊寫、整mindmap嚟增加視覺刺激），再加上充足睡眠、提早到試場等，令身心處於穩定嘅狀態，自然減少臨場緊張到腦袋一片空白嘅機會！
4️⃣稍作停頓 ⏸️
見到題目唔識，請先停一停、諗一諗。暫停幾秒唔會令您做唔完份卷，但可以減少「越急越焦慮」嘅惡性循環，令思緒重回正軌🧘♀️。
5️⃣調節呼吸 💨
當發現自己心跳加速、手心冒汗呢啲緊張嘅癥兆時，可以即刻深呼吸幾次！深呼吸可以增加大腦含氧量，幫助神經系統平靜落嚟，令大腦變得更加清醒！
🔥各位考生記住喺溫書嘅同時，都要注意自己嘅身心靈，令自己可以喺試場上將自己嘅全部實力發揮出嚟！
大家加油呀💯！
－－－－－－－－－－－－－－－－
🔍三分鐘暸解您嘅身心靈健康狀況： https://wellbeingindex.dayday330.hk/330/home
📝立即透過 https://dayday330.newlife330.hk/ 簽署dayday330約章，承諾每日抽時間進行「小休息」，好好照顧自己身心靈，了解更多健康資訊！
📲想體驗不同靜觀練習，可以下載「330」應用程式，為自己每一日都預留出一份寧靜嘅空間： https://apple.co/42eOojo
