11/09/2023
北美嘅 opioid epidemic 有佢獨特嘅成因，無論原因、問題、以至解決方法，我會話北美嘅opioid epidemic 都唔屬於一個其他地方可以借鑒嘅一件事。
「對毒品開戰，完全唔接受毒品」唔係代表「對吸毒者開戰，完全唔接受吸毒者」——呢一點要搞清楚。所謂「零容忍政策」固然有佢嘅好處同唔好處，但係「零容忍」係對毒品「零容忍」，而唔係對吸毒者「零容忍」。
至於「妖魔化」毒品，我覺得除咗個別例子(1)，其實大部分宜家常見嘅毒品(2)相當妖，相當魔。至於吸毒者嘅「妖魔化」，我只能夠講，價值觀問題，大家有大家睇法，而我作爲一個醫生，返工係攞正牌做左膠的。同吸毒有關嘅慘事，我只能話係屢見不鮮......
要幫到吸毒者，容忍政策(3)唔係唯一辦法，但係如果係搞到北美咁，或者容忍政策已經變成「唯一出路」。不過我想提醒大家，呢種容忍政策，某程度係展現緊佢開頭零容忍政策嘅失敗。
最後，我想同大家分享一首詩：
Vice is a monster of so frightful mien
As to be hated needs but to be seen;
Yet seen too oft, familiar with her face,
We first endure, then pity, then embrace.
--Alexander Pope (Essay on Man)
大體可以譯如下：
罪惡如虎獸，初見人皆驚，
僅需瞥一目，憎恨心中生。
然而常相對，熟悉其惡形，
先忍後憐憫，終至情相親。
(1) 個別例子係大麻，呢個故事好長，唔係十句八句可以講完，亦唔想喺呢個位討論，謝謝。
(2) 香港四隻最常見嘅毒品係可卡因、海洛英、氯胺酮，同埋冰。
(3) 相對於「零容忍政策」
[是日推介] [慎入]
我睇過嘅最赤裸但又最有人性嘅「毒海浮生」片。近距離追蹤毒販同癮君子，特寫道友打白粉針，記者甚至喺鏡頭前面同毒販買咗一劑10蚊芬太尼。
芬太尼已經成為北美最大「流行病」，由於藥力比嗎啡強100倍、比海洛英強50倍，成本極低但藥效嚟得快去得快，所以成癮同overdose個案數目極度驚人。
記者嚟到温哥華市中心最惡名昭著嘅毒街同一水之隔嘅廢墟地盤實地考察，訪問嘅係活生生、有意識、會思考嘅人，佢哋有啲仍然有毒癮在身，有啲死過返生，有啲帶住毒癮成為同儕義工，赤裸裸坦承自己嘅過去、現在同未來，冇遮冇掩。
身懷毒癮唔代表function唔到，有人因為愛情而控制用量，有人喺帳篷出面擺玩具希望有朝一日會再見到孫仔，有人每一日都用力咁憎恨自己當年行差踏錯，有人決心儲起賣藥賺嘅錢希望脫離困境，有人勉力控制童年、家庭、意外受傷帶嚟嘅痛苦。佢哋每一個都有各自嘅故事，唔係社會污名下千篇一律毫無感情嘅喪屍數字。
毒品猖獗到呢個地步，「嚴禁」係不切實際嘅，所以社會組織喺區內設置支援中心，區內成員輪流當值，派出乾淨針筒同用水，改善用藥衞生，減低感染風險，從而降低死亡人數同醫療壓力。志願組織安排道友同儕巡邏隊隨身帶備芬太尼解藥，救護用藥過量嘅瀕死個案。特殊診所開出藥用海洛英，確保需要吸毒嘅人定時喺監督下有規律咁適量用藥，騰出時間建立生活秩序，並且脫離犯罪。咁樣做雖然好貴，但係成本仍然比社會醫療負擔低好多，加上治安同秩序以及人命嘅價值，仍然除笨有精。
我哋好多時用非黑即白、二元對立嘅方法去睇世界，又或者被教育到一講毒品問題就覺得完全冇得救、冇希望，從而合理化我哋對呢啲社羣嘅貶斥、妖魔化、忽視、放棄、冇眼屎乾淨盲嘅態度。但我喺呢條片睇到嘅係一個好人性化嘅角度，話畀觀眾知呢啲人物嘅存在同我哋「正常」人冇乜分別，大家都有掙扎求存嘅經歷同心態，大家都有各自嘅生活方式。
更重要嘅係，呢啲社羣都係社羣，有鄰里關係，有友誼、親情、愛情，社區成員可以自己出力去維護同建設自己所在嘅社區，並唔係我哋一貫被灌輸嘅非人黑暗世界。非人與否、黑暗與否，全在於有資源嘅人點樣去組織、推動、幫一把，展現光明同希望。身懷毒癮嘅人喺適當嘅幫助同誘導下，可以係功能正常嘅社會成員；反而我哋繼續忽視、污名化、妖魔化，先至係毒品問題最大嘅自我實現預言。
