27/03/2026
最近喺診所，成日見到唔少踏入40女性問：「醫生，我最近成日無啦啦全身發熱、出晒大汗，半夜仲會熱醒，搞到無覺好瞓，係咪收經呀？😩」
🫢呢啲正正就係更年期非常常見嘅「血管舒縮症狀」（簡稱 VMS），即係大家成日聽到嘅潮熱同盜汗。
當女性步入更年期，體內雌激素水平急降，會令大腦嘅「體溫調節中樞」變得過度敏感。就算體溫正常，大腦都會誤以為身體過熱，發出錯誤信號，搞到血管擴張同出汗散熱🥵。呢啲情況唔單止令大家喺社交場合覺得尷尬，仲會嚴重影響睡眠質素，搞到個人忟忟憎憎、周身無力。🫣🫣
傳統荷爾蒙治療可以有效舒緩潮熱，仲可以預防骨質疏鬆同改善陰道乾澀。不過，對於部分曾經患過乳癌或者有血栓風險嘅女性嚟講，就未必適合。🙂↔️
除咗傳統荷爾蒙治療；「非荷爾蒙口服藥物」— NK3 受體拮抗劑 💊都可能係一個新選擇。藥物可以直接針對大腦調節體溫嘅神經中樞發揮作用，精準又有效咁阻截潮熱同盜汗發作，唔適合或者唔想用荷爾蒙嘅女性都可以喺醫生建評估吓考慮運用。💪🏻
更年期係每位女性嘅自然蛻變期，絕對唔需要默默死忍。如果你正受潮熱、盜汗困擾，建議及早諮詢醫生做個評估。❤️
#更年期 #潮熱 #盜汗 #非荷爾蒙治療
