25/06/2025
處於一個生活壓力爆燈又加上PDSD狀態嘅香港人，我相信大家生活上必定有好多挫敗、痛苦、委屈、抑壓、無助、氣餒、絕望、憤怒、無奈、沮喪⋯⋯而無能力無方法去扭轉現狀，為咗繼續支持落去，只能release 部份負面情緒，令自己舒服啲。如果冇渠道或過多負面情緒排唔切洪，為咗避免最後一根稻草壓落嚟，必然會有位就泄洪。網上係最安全又影響唔到身邊人嘅方法，能理解但唔agree。
不過批評批評人嘅人，hate the haters ，聽落應該唔能令世界變好，又萬劫不復。
我又諗，haters們嘅真身，有可能其實無乜嘢，怎至可能幾好人。
我有認識嘅haters係真人幾nice，無乜嘢。
Haters主要分兩種，一種係講明自己係hater角色，RPG咁係網上有目的有策略咁發炮，但去到真係死人冧樓嘅議題，通常都會收吓口。真人通常幾sharp同有禮貌。
另一種係「我有自由講嘢」派或「我講真話」派同「講下唔得呀」派，而佢哋嘅noise最大。呢班通常真人比較溫柔，nice，甚至係腍善嘅人。
反差之大，除咗可以話佢哋虛偽，我比較相信佢哋本身係咁，網上嘅角色只係釋放嘅渠道。呢個時代，壓力之大生活就係唔容易。
世界好亂，生活艱難之餘又話打仗又地震又海嘯咁，末世情緒滿滿。大事件我哋得個知字，呢啲嘢我哋控制唔到，都無計。
好好保護自己個心，係亂世之中每人都必會有情緒，唔緊要 ，最緊要aware到，見自己有唔對路就冷靜，收口，唔好俾負面情緒延續，唔好俾佢放大。唔啱心水，唔使comment啲咩，行動最實際，唔食唔去唔睇唔聽唔玩唔講唔做。因為通常Comment完會帶住唔好嘅感覺，揮之不去。
特別係呢個時候，做啲令自己覺得舒服開心嘅嘢，約friend食飯睇戲唱K、返屋企撚貓撚狗、得閒打下機打下麻雀仔、煲劇睇AV、如果喜歡北上消費又好，唔傷天害理，唔傷害到人，咩都得舒服開心就好了。帶動返自己情緒，hold返住自己嘅energy。
共勉之。
嚟啦，我同你返去啦，孫果
