10/04/2026
Kagyat na AYUDA para sa mga nawalan ng trabaho sa Middle East!
7 Abril 2026
Lagpas limang linggo na mula noong pumutok ang gera na sinimulan ng US-Israel laban sa Iran. Ang patuloy na digmaan ay nagreresulta sa patuloy na paglala ng krisis sa ekonomiya na pangungahing binabalikat ng mga mangaggawang migrante.
Sa kasalukuyan ay ramdam na ramdam na ang pagbagal ng takbo ng ekonomiya at ang pagtaas ng presyo ng petrolyo at mga pangunahing bilihin. Ito ay nagreresulta sa malawakang tanggalan sa trabaho, pagbabawas ng sahod, pagsasara ng mga kompanya, at pag-atras ng mga namumuhunan sa mga bansa sa Middle East.
Dahil dito ay nanawagan tayo sa gobyerno ng Pilipinas ng immediate relief (pagkain, gamot, at pinansyal) para sa lahat ng apektado ng digmaan na nasa Middle East. Tungkulin ng gobyerno ng Pilipinas na bigyan ng serbisyo ang OFWs sa panahon ng sigalot.Ito ang panahon na dapat ilaan ang pondo para sa mga OFWs at hindi sa korupsyon gaya ng mga maanomalyang flood control projects.
Sa 2.4 milyon na OFWs na nakabase sa buong Middle East ay nasa 5,000 OFWs na ang humiling ng repatriation. Asahan natin na kung magtutuloy-tuloy ang ganitong sitwasyon ay dadagsa pa ang mag-aaply ng repatriation. Kung makauwi man ay tiyak na hindi sasapat ang ayudang pinasyal dahil sa mataas na bilihin sa Pilipinas at kawalan ng katiyakan sa kabuhayan.
Sa UAE, Israel, Jordan, at Bahrain, malaking bahagi ng ekonomiya ay nakaasa sa turismo. Madaming mga OFWs sa Hotel and Restaurant, Food and Beverages, at Travel Agencies ang nawalan na ng trabaho. Madaming hotel ngayon sa UAE ang nasa 30% lamang ang operations dahil walang pumapasok na mga turista. Kahit ang ilang airports ay nasa 30% lamang ang operations kaya ramdam ng mga OFWs na nagtrabaho dito ang pagbabawas sa tauhan.
Ang mga kompanya ng cleaning companies ay biglaan ang ginawang pagkakaltas sa sahod. Ang sahod na dating nakabatay sa kontrata ay binabase na lamang sa dami ng kliyente at kaltas na hourly rate sa paglilinis.
May ilang mga domestic workers sa Kuwait, Lebanon, Bahrain, Jordan, KSA, Qatar, at UAE ang inabando na ng kanilang mga employers na lumikas sa ibang lugar. Meron ding mga pinababalik ng employers sa kanilang mga agencies. At meron ding napipilitan sumama sa mga employers sa mga malayong bansa para makaligtas sa digmaan.
Sa kasalukuyan, nanawagan tayo sa lahat ng kapwa OFWs na lumahok sa ating mga sama-samang pagkilos.
• Magsagawa tayo ng petisyon, kolektibong mga aksyon sa mga embahada, kalampagan, pagrecord ng mga videos at photos na naglalaman ng ating mga sitwasyon at panawagan.
• Makilahok at sumapi sa mga organisasyon at alyansa ng mga OFWs na na nanawagan para sa ating karapatan at kagalingan.
Palakasin natin ang ating pagkakaisa sa panahon ng krisis at gera para manawagan para sa tunay na pagbabago. Ipagpatuloy nating ang panawagan para sa tunay na reporma sa lupa at pambansang industralisasyon na siyang lilikha ng sapat na trabaho para mga Pilipino sa sarili nating bansa.
Ayuda para sa mga OFW na apektado ng digmaan sa Middle East, ngayon na!
Trabaho sa Pinas, hindi sa labas!
