Dr.Chen Siu Wai 陳少慧醫生, Kowloon (2026)

07/12/2025

如果對個社會感到不滿，應該要投票。

如果覺得很滿意，都可以投返仲喺度嗰個。

所以，都係嗱嗱臨好D。

23/10/2025

昨日海洋公園公布業績，年度虧損達2.7 億，可以用黐鬼線形容。

海洋公園蝕本嘅原因好多，禮品部不思進取，就肯定係其中一個。

自從子女出世之後，多年來我都持續購買全年入場證，個女細時就同個女去，佢大啲唔去我就同個仔去，我自己生日亦捉埋兩個去。每次入場，我哋都會在場內消費，唔帶嘢食，探完動物就入餐廳，企鵝餐廳係我哋多年來嘅最愛，食物唔係太好食，但係好坐，而我，係嗰啲連紀念品都買得一餐嘅本地遊客。

話說舊年我又買咗全年入場證啦，當日我哋只有一家三口入場，帶齊雨褸又去玩激流旅程。

一上到船，就有職員話影相，咁就是但啦，咪影囉，但我已經同自己講，唔會買㗎啦。
離開遊戲船上水，就經過照片攤位。原來而家海洋公園又更改作風，以前有一段時間，照片有人啱先至印出嚟，但今次員工一早就印定晒啲8R插晒喺度。就咁嘅，我係嗰種，去到咩主題公園都話買張相留念嘅人，我覺得有個套就會放喺度，望到就會有啲開心。雖然海洋公園嘅照片已經影咗好多次，但係呢，今次我個仔肯望鏡頭同埋笑晒喎！不過一張相連埋相架$199 ？我都係唔好咁黐線啦。

我同職員講：唔使啦，屋企有啦，買咗好多啦…
職員：唔怕啦！影得咁靚，而且相架出咗新款喎！買返去紀念吓啦⋯(盡力sell盡力sell)
我：吓？出咗新款咩？係咪㗎？
職員：係呀，仲有兩個款可以揀㖭啊，你睇吓鍾意邊個？
咁…
就喺職員熱情奔放嘅引誘之下，我又俾錢買咗一份，開開心心咁攞返屋企。

點知，返到屋企打開個飾物櫃一睇，我頂！又話出咗新款？同我10年前，即係2014買嗰張一樣嘅？仲有8年前嗰張又一樣喎，咩新款呀？20世紀新款啊？搞錯啊！呃人呀！搵笨呀！

嬲到我呢～

過多兩個禮拜，我又返返去海洋公園，同樣去返嗰個激流旅程，一樣經過嗰個相片攤位，職員一樣講話：出咗新款，買返去紀念吖！

我同職員講：哥哥吖，你哋唔好再呃人　啦，我兩個禮拜之前買咗，你講嗰個新款，同10年前一樣喎！

哥哥：唔好意思呀，我做咗一年幾，10年前係咩款，我真係唔知。

啱嘅，有邊個會喺攝影攤位做10年吖？佢係同舊年比嘅新款，佢點知海洋公園會由10年前開始訂咗一批相架，賣到而家都仲賣緊同款啫？呢樣我理解喎，真係唔係員工嘅問題。
但係海洋公園咁低能嘅行銷操作，除咗我呢啲資深嘅本地會買紀念品嘅遊客，邊個知？

海洋公園嘅管理人員，唔該你哋擘大雙眼睇吓自己搞緊乜啦？

紀念品貴，係唔緊要㗎，$200 一個相架加一張8R照片，都有我呢啲傻人購買喎，因為買嘅係回憶呀嘛！但係唔該你哋攞啲誠意，搵多啲人做設計，每次訂返500個就算，唔好話每季，起碼每年出一個新款，都仲有機會引到本地人消費吖，目標客路唔係淨係遊客㗎喎！仲有啊，你哋之前限量手錶就用鱷魚皮，完全都冇保育sense，紀念相架就10年都同款，水族館門口嗰個攝影棚仲好笑呀，嗰隻魔鬼魚由2009年我拍拖去到好似今年先至有變，一個留影背景足足用咗15年，真係唔好問人哋，點解冇晒興趣入去了！

去年我哋去杭州嘅唔出名遊樂園，有啲刺激項目係一路有鏡頭攝影過程，然後系統用自己人面識別/服裝識別之後，佢自動cut一條有你做主角，仲配咗音樂嘅片段俾返你購買，價錢只不過係好似$30，七日之後自動delete（我肯定delete咗，因為我睇完唔記得俾錢，過咗七日買唔到了）香港成日講咩新科技大製作，我唔使你學航天科技吖，海洋公園派人學吓國內嘅小樂園技術，搞吓個業績唔好蝕得咁甘，得唔得呢？

07/10/2025

上星期完成咗2025年第一組Year 3 中大醫學生的Clinic attachment .

因為有時有Year 2 學生的，我冇仔細研究，但開場前就問佢哋有冇去過診所跟症，順便講吓應有嘅旁聽禮儀等等。

其中一個女同學答：我舊年嚟過，佢未嚟過。

當時我個腦load 左一下，舊年嚟咗，今年又嚟？跟住就問，你哋幾年級？

原來女同學去年二年級嚟過我診所attach , 今年三年級了，有類似嘅進階program，佢又揀咗嚟我診所旁聽喎！

我心裏暗暗笑，似乎佢去年跟得好開心喎！但我又覺得，有機會梗係去見識吓唔同嘅醫生啦，做乜鬼又返嚟…

兩次session 期間同學都好幸運，病人booking 很多，拒絕被旁聽嘅病人也少，病症品種唔算單一，感覺內容都幾豐富。佢哋今次嘅任務，據了解係觀察病人對答方式和反應，而唔係睇吓醫生做D乜。不過我知道佢哋最近學緊內分泌系統，見有時間，就係咁易教咗佢哋一次內分泌系統嘅重點。做醫學生就係好奇怪，有啲嘢背咗幾次都唔知講乜的，但有人點醒一次，搞清幾個概念，問題就變得簡單，好快就讀完。其實內分泌系統呢，就係一個大老細，坐喺個腦下垂體裏面一眼關七，管理下便幾條Team嘅人做嘢，不斷施壓，去肯定下邊啲經理會有output , 然後老細收到feedback , 知道啲下屬有做嘢，就再調整施壓嘅力度，咁上下。有啲team Manager，因為工作性質會麻煩啲，要一日廿四小時都要check住佢，有啲manager 啲工作冇咁緊張，調整周期可以慢啲嘅⋯⋯一個個feedback mechanism 同network , 就係內分泌系統嘅精髓，如果D下屬唔聽話，個別事情做多咗或者做少咗，我哋個人咪內分泌失調囉，所以咪咁多婦科病人囉⋯⋯

中場休息嘅時候，我行開諗住去洗手間，打開個櫃，點解多咗袋嘢嘅？原來同學想送朱古力俾我，又唔夠膽直接開口喎，所以就交俾護士轉送給我了。嘩！我做咗咁多年學生教學，真係第一次有醫科生送朱古力俾我喎！Godiva 最近都好少食，所以我都好開心呢！

而家啲學生花錢都唔手軟，一送，就送Godiva 喎！我突然間諗起我廿五年前考完final exam , 攞咗嗰個gold medal in surgery 獎項，之後我就去屈臣氏, 買咗一盒Merci 朱古力比徐教授，好似$29.9 定$39.9 。當年香港未有Godiva，我見識少，覺得Merci 都唔錯，過咗咁多年，都仲見到呢個牌子嘅朱古力喎！其實我唔肯定當時外科考咗咁多Long case /short cases同寫essay ，到底係邊樣高分，令我入到最後八強的。反正當年徐教授做我主考官，我覺得我條long case考得好開心，佢個樣又聽得好開心，唔知點解，我覺得就係要送朱古力俾佢了！

我畢業之後幾年，徐教授就離開咗威爾斯，私人執業了。而家我有時喺醫院手術室係會撞到佢的，我有諗過同佢傾偈，講返呢件事，不過我又覺得好老土，所以最後都冇同佢攀談呢😂！不過我估送朱古力比喜歡嘅上司/同事/貴人呢件事，都係千年不變的！

15/09/2025

早兩日，我參加左由女醫生協會同黃大仙關愛隊協辦嘅‘護眼護脊小勇士‘活動，擔當其中一名脊骨檢查員。出席嘅義工除咗我，仲有眼科醫生，兒科醫生，內科醫生，同埋十數個高年級嘅女醫科學生。

當日嘅活動唔算複雜，參加嘅家長同小朋友一齊聽脊骨同埋視力嘅健康講座，然後會輪流進行脊柱側彎篩查，斜視篩查以及視力檢查，等待期間小朋友可以走去砌Lego，砌完一大嚿之後仲可以攞走。

呢兩個普查，其實本身有包含在健康院嘅學童健康檢查裏，不過有少少意料之外，我同家長傾偈，先知道原來有唔少參加檢查嘅學童，什至已經到左10幾歲發育年紀，從來未試過檢查視力或者脊椎的。

雖然我表面係過來幫忙篩查脊柱側彎嘅，不過反正都嚟咗啦，對住每位家長我都會順便一問，有冇覺得仔仔女女有啲咩唔正常想查詢一下呢？

唔問猶自可，一問就會有小朋友被家長投訴唔食飯啦，唔做運動啦，寒背唔肯坐正啦，做功課縮埋啦，頸椎俾人話唔正常啦，腰椎過度隆起，脾氣暴躁包拗頸…..等等😂。

借醫生把口講出自己嘅心底說話，喺天下父母都一致喜愛採用嘅教仔方法，呢個時候，我當然會同家長打個眼色，一唱一和咁樣講解健康訊息，務求家長返到屋企都可以同小朋友講句：‘ 嗱，醫生都係咁講㗎！’

今次嘅活動，全部參加嘅小朋友都正常健康，同家長帶住Lego開開心心咁樣返屋企！其實做醫生真係唔使日日衝鋒陷陣，亦都唔想每日接觸死人冧樓嘅事情，同正常健康嘅市民做完檢查，然後大家開開心心咁樣完場，都係一件令人好感恩嘅事情呢！

原來黃大仙有一個‘城寨社區會堂’，我以前都唔知呢！

13/09/2025

Graffiti , 化妝，drama , 夾band，drone control , 舞台sound and light , 仲有video production 七選一。

我真係要為女兒學校嗰個OLE ‘‘Other learning experience “課程嘅總監喝采！

我想佢學化妝，不過佢話塗鴉，或者夾band做Bass guitarist 就最好喎😂。係囉，用家強嗰支結他練習就可以了。

聽講有啲男同學，兄弟班諗住一齊報化妝😂。

07/09/2025

早兩日睇到 Giorgio Armani離世嘅新聞，令我想起以前着過嘅一套戰衣。

Armani嘅服裝，以前有買過嘅，但係因為貴，我只係曾經喺減價場先捨得買左一條裙加對鞋，況且女醫生又唔係高級行政人員，尤其是喺政府做初級醫生時，係更加冇必要嘅。結果唯一一次覺得真係要著得超smart，係考專業試嘅時候。

嗰陣時（諗返起都20年前了），我要過星加坡考婦產科專業試part 2 嘅OSCE ，係成功過到part 2 筆試，先至有得參加嘅’口試加模擬實景’嘅‘ 靠把口’部份。我感覺呢個係見人嘅時候，無論有冇實際，都要有駕勢。當年我問一個同學嘅意見，究竟考OSCE, 應該着咩好呢？同學話，佢用兩萬蚊喺Armani正價買咗一套西裝去考試（以我哋當年嘅薪金計，係半個月多D）,而佢着住呢套戰衣，已經成功過咗佢嘅Part 2 （唔同專科嘅考試時間有先有後嘅。）朋友話我應該啱着，問我想唔想試吓？我一聽到Armani戰衣喎，就梗係想試吓啦！神奇地，成套衫只係稍為寬鬆半個碼，好修身，仲要係夏天質地。我着埋咁啱特價買嘅黑色尖頭Armani矮踭皮鞋，全套Armani行頭，飛去星加坡上陣。

到底係信心嘅問題吖？定係戰衣嘅魔法呢？我着住呢套黑色嘅高級套裝，感覺自己好醒目，好sharp ，好有自信，自我感覺良好，對住一個都唔識嘅海外考官，最後考試真係一take過。我還返套衫俾朋友嘅時候，話俾佢聽嗰套衫又得咗啦，真係好犀利！朋友話，而家套衫已經有200/200 嘅成功率，佢有另一個朋友就嚟考試等住着，就算唔啱着，都會照着！呢件吉祥物嘅後着如何，幾時先俾人廢左武功，我就不得而知了！那時候因為要考試，個人特別迷信，我記得去英國上考試補習班時，朋友話有間唐人街飯店係一定要去食炒‘腰果’嘅，因為‘要過’ 喎! 所以就算貴一貴唔好食，我哋叫咗，兩個都食晒成碟呢！

婦產科嘅Part 2 專業試，據講係所有專科考試中成功率最低嘅，有一陣子，香港考生passing rate 係～80% ，但全球加英國加印度等係30% 😛，好多英國醫生都唔知點解，明明係英國試，但就卡死係Part 2 嗰度，反而我哋香港醫生夾硬讀啲同香港工作唔同嘅內容，反而考得更好。想當年，因為香港醫生突然被政府覺得‘太多’，我哋開始要走合約制，如果不能喺指定時間內喺專業試Part 1/part 2 合格, 醫管局就唔會再續約，所以好多人，三年就離開政府，冇得再進行專科訓練了。後尾因為醫生唔夠？定係政府財政改善了呢？整整吓，就冇咗呢個條款，後來好多時離開嘅，唔計現在移民嗰啲啦，反而係捱唔到苦，明明考試成功，但唔想再走專科訓練嘅人…..

呢兩年政府缺錢，醫管局又扣減budget，嚟緊開始每年有600個醫科生畢業，跟住再過幾年，會變成800 ，行業又吹起‘醫生太多’嘅風了！要知道T當話太多嗰時，只係每年唔到400 個….感覺上，呢條合約條款舊路又可能會再次出現了。新一代嘅醫生們，嚟緊你哋準備好了嗎？

哦，原來Giorgio Armani本來都想做醫生嘅….

圖：Hk01

07/07/2025

昨日IB放榜, 一早就傳來一個好消息：一個我認識嘅女孩、女兒中學嘅師姐，以極優秀嘅成績被中文大學醫學院嘅特別GPS課程取錄了！

大概係兩年前吧，我參加咗女兒中學嘅職業博覽講座，協助講解香港醫生嘅職業生涯，讓有興趣嘅中四同學了解吓行醫這個行業嘅得失，會面對嘅問題，同點樣準備自己等等。

講座過後，有幾位女同學聯絡我，想到我診所旁聽，了解一下行醫生活。我抱住培養吓醫學人才嘅心態，好似每人帶咗佢哋兩三節診症時間，等佢哋觀摩一下，所謂行醫，大概係做啲咩嘅。

當時我覺得有兩個女仔係比較成熟嘅，學習態度亦良好，但係我就冇深究過，佢哋到底有冇被醫學院取錄嘅能力呢？直到大概半年前我才發現，這兩個女孩，原來就係畢業班嘅全級第一名和第二名吖？於是，我就開始對佢哋有啲期待了。

昨日是IB成績放榜日, 下午時我收到其中一位女同學嘅通知，雖然成績未出，但佢早上已經收到中文大學醫學院GPS課程嘅取錄電郵了！到咗晚上，我再收到消息，另一個來過我診所嘅同學，都被中大GPS取錄埋，連埋另一個我唔認識嘅同學，同屆同學居然總共有三人入到呢個課程來做我嘅師妹喎！真係可喜可賀啊！

中文大學醫學院GPS課程，喺每年抽調大概30至40個名額，重點培訓一啲有潛質做未來領袖或者科研人員嘅‘特艱課程’，開辦左10 年，我嘅感覺係，個課程去得特別快、特別深、特別廣，換轉俾我去讀，我都應該會讀到日日打冷震😂。其實其中一個女同學唔止讀書能力強，體育方面都超晒班，係某種風吹雨打、日曬雨淋都唔能夠停低嘅運動嘅港隊成員！咁堅毅又唔怕辛苦嘅特質，最啱就係做醫生啊！

唔知點解，明明成件事好似唔關我事，但係我又覺得自己占了光，為佢哋嘅成功覺得好興奮嘅？吖，我又有少少記返起以前收到取錄通知嘅嗰種感覺啦！

行醫嘅路真係好漫長，我衷心希望幾位女兒嘅師姐，做埋我嘅師妹之後，將來都能夠快樂地工作，好好回饋社會呢！

圖：中大醫學院網站

05/07/2025

呢幾日太陽真係曬到黐線啊！
提提大家，我哋呢啲更年期嘅婦女，真係好容易出荷爾蒙斑㗎! 然後出左呢？又搞極都仲喺度，勞民傷財都搞唔掂的！

大家緊記，無論係幾分鐘送校車，落樓下接放學，行兩步去買嘢或者打波揸車等等，都記得要搽防曬啊！

以前我都介紹過一啲兒童適用嘅防曬產品, 我個人就必定係選擇物理防曬行先。如果想出海又想對海洋友善，有好多產品都指明係Coral safe 嘅。如果再斟酌啲安全性，就可以選擇non nano 物理防曬，不過啲皮膚望落去就一層白色囉。

呢幾年消費者委員會都出咗啲報告提供唔同嘅選擇，鍾意深層次D嘅毒性檢測嘅，可以閱讀埋水中銀嘅相關報告，鍾意用歐美產品嘅呢，就可以參考埋EWG 。

https://www.consumer.org.hk/tc/article/528-sunscreen/528_sunscreen_sample

https://www.ewg.org/skindeep/

https://www.fishqc.com/m/pages/products

話時話，如果攞呢張相做sunblock 廣告, 大家覺得點呢？😛

#水中銀
#防曬
#物理防曬
#婦女
#更年期

01/07/2025

有一日，有個病人話我冇戴眼鏡好靚，佢見到覺得好開心，問我下次可唔可以一樣咁靚咁樣睇佢。

嗱，咁我就唔知佢邊日返嚟啦，不如咁啦，下次複診嗰時，我開呢個俾你睇吓，好唔好？

20/06/2025

期末考試正式結束。今日同個女去食下午茶，聽咗好多八卦嘢。
然後我問：咁，佢哋係咪泊車？
我意思，佢哋係咪拍拖..

15/05/2025

早陣子睇報紙，講述一名中學生投訴父母月入200,000，但係都聲稱唔夠錢供佢去英國的大學讀工程，令佢非常失望的報道。想讀工程系對家庭經濟影響尚且如此，大家又是否知道，送子女到英國讀醫科，對家庭的經濟要求，又會是怎樣的一回事呢？

事情係咁嘅，有朋友的孩子正在讀國際學校，一次歐洲旅行之後，孩子突然‘決定’要去英國讀醫科，仲話要決心考到神校添！

小朋友有上進心，係好好嘅，但我一聽到，第一個反應就係，外國讀醫科好貴㗎喎，你哋計咗條數啦？但係到底貴在哪裏呢，朋友同我又講唔出喎！於是，我就走去神校網站研究研究一下。

係神校讀醫學院，外國人嘅學費每年需要70,000磅，大學預算學生一年嘅食宿費至少15,000磅，加上佢哋有學院傳統，每個學院亦都另外收學院費，平均大概在11,000-13000磅左右。未計子女來回香港的交通費或者小旅行的使費，保守估計，孩子讀一年醫學院大概需要100,000磅，六年的學生生涯就需要600,000磅，即係港紙大概六百萬了！

那麼讀完之後，孩子有什麼目標呢？朋友說，孩子其實沒有思考得很清楚，不過希望有前景，行醫收入好，搵到食。

其實在英國讀醫，留在英國工作，是很直接的一件事，不過當地要求實習兩年，之後再在全國各地爭取獲得訓練名額，就算做GP都要爭崩頭。今年英國國民保健NHS 的財務狀況到達崩潰邊緣，各類不同的醫護人員亦都受到減薪的威脅，加上當地稅收較高，扣除稅款後，初級醫生每年的收入大概有30,000-35000磅，如果非常順利地爭取到訓練職位，一路無間斷扶搖直上成為專科醫生呢，大概七、八年之後，他們就可以qualified 升任顧問醫生。據了解，英國一般NHS顧問醫生的稅後年度收入大致上在80000-100000磅左右，比起香港的政府顧問醫生, 稅後收入起碼低三分之一至一半！

如此計算，如果朋友的子女以國際生的身份在英國完成醫科課程，再到當地執業，順利成為醫生再工作10年左右，10年在英國行醫的稅後總收入，大概就只有400000 -500000磅左右，工作10年，收入仍然未能與付出的學費打和！如果純粹為了讀醫‘搵食’的話，從經濟上考慮，這個操作實在是長期虧蝕的投資呢！當然真心想在英國生活做醫生，再有照顧英國五湖四海的移民和難民的情操另計⋯⋯

最近看到報導，由於英國NHS資金短缺，政府開始縮減GP醫生的空缺，就以今年為例，受訪醫生有三份一失業或者開工不足，更有不少GP醫生為支付日常開支而轉做Uber司機，可想而知，未來在英國行醫, 將會有多少實際困難呢！如果走返來香港執業呢？英國受訓的醫生，又有可能遇上工作文化的差異，而出現水土不服的情況，感覺都可能會兩頭唔到岸。

諗嚟諗去，朋友都未諗到對自己孩子嘅想法應該積極支持，定係積極勸退才好。最後，我幫朋友諗到一個方法，就係請孩子以考到神校的獎學金，再入讀醫學院為目標！即係咁，能夠成為神校醫科畢業生這個終身標籤，感覺又真係好威威嘅！父母在經濟上能否支持呢？卻又是一個極度現實的考慮呢！

10/05/2025

已經好耐冇去過威爾斯親王醫院。

今日因為要上堂充實自己嘅關係，我舊地重遊。對上一次過來，好像已經係10年前有多。

明明教學大樓仍在，明明當年每日遊走嘅走廊仍然一樣，但去到嘅時候，我居然覺得自己迷路，仲拿着手機問左兩次員工，到底我要去嘅地方喺邊。

Yr3 -Yr5 大部份時間我們都在這個教學大樓四處遊走，還有實習的整整一年，我都只是在威爾斯工作，偏偏今日我莫名其妙地找不到方向。講到明舊地重遊，去檢視下自己嘅威水史係必須的！

4樓嘅外科大樓，有外科金獎得獎人金榜。其實比較少人知道嘅5樓骨科，一樣有令我自己成日都會忘記咗嘅HT Wong First Prize 得獎人名單。

今次第一次帶着iPhone到場，影完相之後回家喺度比較人名，睇真啲兩個名單，就見到得奬者有上一任中大醫學院院長，亦都有現任中大醫學院院長，同埋位位出色嘅中大星級教授。

認真對比之下，我先知道原來有幾屆嘅得獎人，喺呢兩個獎項上都係重複的！其中包括89/95/98/99/2000 嘅兩科第一名原來都係同一位學生喎！不過似乎骨科獎牌嘅名單2012年就停止更新，可能呢個獎項之後就終止了。不過雙料又算得係咩吖，我剛剛喺網上見到2023年，有‘六料’得獎人呀！尖成咁，真係恐怖呢！

數數手指，再數埋腳趾，今年就係畢業25年。唔知教學大樓會在幾時清拆重建呢？可能得閒又要返嚟行吓，回味一下醫學生時期嘅美好回憶呢！

Dr.Chen Siu Wai 陳少慧醫生

07/12/2025

23/10/2025

07/10/2025

15/09/2025

13/09/2025

07/09/2025

07/07/2025

05/07/2025

01/07/2025

20/06/2025

15/05/2025

10/05/2025

Address

Website

Alerts

Shortcuts

Share

Category