05/05/2026
菲菲想@掌握自己嘅命運🙌🏻
近呢兩三年，越嚟越多客人喺我面前講，覺得自己嘅人生好似停滯不前，想改變，但過咗幾年都始終仲係原地踏步。
好多時佢哋停滯嘅原因，不外乎係自己冇時間、冇資金儲備、想轉工轉行但冇人請，或者想學嘢但又搵唔到自己嘅興趣。
但當你再細問落去，好多時都會發現，佢哋講嚟講去都離唔開「等」——等我有錢嘅時候、等我有時間嘅時候、等我諗到做乜嘅時候……⏳
呢種心態其實某程度上好似聽天由命，期望有人或者某啲事可以帶領自己去解決問題。但呢類期望，往往就係令我哋人生變得不可控嘅主因。
要掌控返自己嘅人生，其實唔難。首先要打破自己嘅框框，唔好再自怨自艾，亦唔好一味期望身邊嘅人同事，可以配合自己心入面諗嘅嘢去發生。
例如有好多人，明明有自己嘅諗法，但又唔講出口，希望對方估到自己想點，甚至希望對方主動。你會發現，呢類人好多時都會過得好唔開心。💭
另外，我哋亦可以靠自己努力去為自己製造機會，幫自己調撥時間、儲錢、增值、豐富經驗。前提係唔可以急，唔好希望而家呢一刻即刻就可以達到你嘅理想。
所有事情都需要時間去發生，積累越多，底蘊越厚，最後成功嘅機會自然就越大。🌱✨
點解我哋要令自己嘅人生變得可控？
因為你會發現，對於我哋控制唔到嘅事，好多時都係我哋內耗嘅根源。
例如人哋點樣睇我？點解人哋要咁樣對我？點解個環境會係咁？到底佢想我點？
呢類諗法會令我哋焦慮、抑鬱、冇安全感，甚至驚恐症發作。
如果大家成日發現自己諗嘢諗到黐咗線，我會建議大家唔好再將呢類問題無限放大，試下換個角度，諗返啲自己可以控制到嘅嘢，多顧及自己感受，學識拒絕，你會發現內耗自然會少咗。🫂
其實每個人都有掌控自己人生嘅能力。古語有云：「一命二運三風水，四積陰德五讀書」，除咗命之外，其餘好多嘢其實都可以變得可控。
再簡單啲講，做當下你認為正確嘅選擇，都已經係一件可控嘅事。希望大家都可以積極啲面對人生。✊🏻✨
今次分享取材自 鳶尾花 💜鳶尾花象徵 希望、新開始、勇氣同信念，花語有 希望、智慧、好消息 嘅意思。
就好似掌握命運呢件事一樣，未必係一下子改變所有嘢，而係喺每一個選擇入面，慢慢搵返屬於自己嘅方向，同埋繼續向前行嘅力量。🌿
🃏 菲菲想塔羅占卜館
以上個案及分享只供參考🤍如需查詢個人情況及占卜詳情歡迎 Whatsapp／DM 預約❣️
店舖地址：旺角東 T.O.P 商場 1 樓 108–109 號（鋪面：許願殿堂（達摩））
