好返 Hou2 Faan1

20/01/2025

好返物理治療主題曲
《今日好返未》
https://suno.com/song/a6a13c42-30fa-407b-98f4-fcc119f63efc
[Verse]
睇見你個腰真係扯
唔掂老友去到嗰邊
唔使擔心去「好返」
身體好返輕鬆練番

[Chorus]
好返未好返就嚟好返
好返少少好返好多
好返晒似新生命
保險claim得返笑出聲

[Verse 2]
師傅隻手真係靈
日治夜愈創奇蹟
荔枝角專搞到你靚靚
身體放鬆唔駛再驚

[Chorus]
好返未好返就嚟好返
好返少少好返好多
好返晒似新生命
保險claim得返笑出聲

[Bridge]
每日多兩分鐘運動
減低痛楚再接再厲
物理奇跡出新周期
荔枝角診所注定精彩

[Chorus]
好返未好返就嚟好返
好返少少好返好多
好返晒似新生命
保險claim得返笑出聲
好晒

100% Credit on Summer Ha

pop song. Listen and make your own with Suno.

16/07/2024

恢復就是用盡所有方法去還原。

09/07/2024

每日1小時 x 35日，即使停做2-3年後，改善效果仍能被檢測出來。

#體外反摶 #心血管疾病 #心血管 #心血管阻塞 #心絞痛(歡迎打開播放欄的字幕按鈕(C))血管疾病為全球頭號殺手，針對血管疾病的治療方法主要是藥物治療及入侵性治療，治療方法未必人人適合。血管疾病與循環系統.....

28/03/2024

CLS🤯尋日瞓醒左膝臏骨內側不知名腫痛，用腹針對應左膝內側位置淺刺留左30分鐘，無再搞佢。
今日好返8成，但係發現肚上對應左膝蓋內側位置瘀曬但無痛嘅🙃

有料嘅係腹針係始創人薄智雲

updated 同樣既事換個位置發生多次, 今次係右腳腕拗柴, 不得不服, 誰說中醫只醫慢性病。

有料嘅都係腹針都係始創人薄智雲

28/03/2024

拗柴
拖左好多年想講拗柴，一來懶二來未有把握講得好清楚，而家都無不過最迎連續三四個不同嘅拗柴個案彷佛推我點都先寫個開頭，最多之後慢慢修改。
拗柴sprain ankle分高位（腳眼或以上受傷）及低位（腳眼以下受傷）；內翻（受傷動作腳底向內）及外翻（受傷動作腳底向外），以下主要講低位內翻，因為個人經驗8成以上拗柴皆為此類，其他種類處理之後想講先加或者個別處理。

1）受傷即時
☐低位內翻拗柴受傷，外側靭帶拉傷是基本消費，如果受傷時聽到啪一聲就可以合理懷疑靭帶有部分或全條斷裂，聲音是有點恐怖但不用怕死唔去好得返既，馬上停止活動原地坐下，找東西墊高小腿（腳踭懸空），

**未檢查傷勢前一步都唔好行，如果有骨折或錯位，一步甚至只是企一企都可以做成二次傷害，受傷果下你控制唔到係意外，二次傷害就係自己攞嚟。**

2）初步自我檢查
☐ 受傷一刻到腫到不能動，你大概有5分鐘可以檢查，假設你已經將自己放好係上文講嘅位置，先試主動上下屈伸腳腕（不可嘗試做任何內外翻或者打圈動作），拗柴後腳腕屈比伸痛很多+幅度少很多是正常，因為拗柴第二基本消費是距骨（腳眼對落果舊）前移，頂住屈唔到係合理嘅。如果還能肉眼見到主動屈伸有少少幅度的話，咁我真係要恭喜你啦，代表無完全脫位呀，yeah! 完全見唔到任何主動屈伸幅度的話，可以叫擔架啦，甩左架啦個關節，唔好諗住借少少力無問題。
上下能動，你就可以起身出場去揾個舒服啲嘅位坐，找東西抬高小腿（腳踭懸空，為防加重距骨前移），然後就都係冰呀固定呀抬高呀果啲啦。

3）受傷當日！當日！當日呀呀呀！
☐ 如果腳踭雖然痛但都企到咁就唔係錯好多位，腳踭痛到唔可以掂地就安心去照x光啦，一係骨折一係錯位錯得好厲害，即日見到有瘀血都有骨折指向性，否則瘀血通常兩三日先會見到。
☐ 照完如果只係裂左無斷開嘅骨折，都可以揾我將距骨復位及處理好所有扭旋嘅皮，擺正然後固定，找東西抬高小腿（腳踭懸空，為防加重距骨前移）。

**呢一步係拗柴康復最重要最重要嘅一環，因為距骨唔岩位你由佢瞓一晚之後，第二朝就gg架啦，超腫超痛加腳踭落唔到地企（就算之後落到地都會keep住腫，其中一位客人腫左1個月），復左位都係會超腫超痛但腳踭落到地，而行多幾步就會鬆啲。**

之所以會水腫係身體感應到有傷口或者關節錯位，唔想比你亂咁郁做成二次傷害，所以會叫多D體液去頂住所有可能會郁既野。所以受傷後要同時間鬥快，係佢腫到唔郁得之前盡量對正晒D皮筋骨，再固定佢，令身體知道你都係生性既，對你有返D信心，咁佢就唔會call咁多水腫嚟保護你。

4) 康復預期
☐ 無骨折+骨位正+固定好+血氣好=預期受傷後第一日最腫但企到，第二日開始消腫行到少少但痛，第三日再消多啲腫瘀血開始散到腳外掌邊邊位，慢慢行少少痛，出街無人睇得出你受傷；第五日正常速度行街少少痛，返工嘅返工，運動員按情況保護充足開始重新投入訓練。唔想有下次拗柴就練腳指練平衡，不過我做咁多人都係唔痛就走左唔會有人練，所以唔寫啦。
☐ 最近兩個拗柴運動員年齡一樣，第一個受傷後無復位第二朝腫到豬咁踩唔到地，之後再用多好幾日等佢消腫先可以復位，佢又照去訓練下結果又拗多次，又復位又好啲咁來來回回維持左差不多兩個月；另一個運動員係上面呢個同學就醒目仔啦，受傷當晚馬上揾我復位+固定，第二朝落到地但痛，第三日手球比賽第四日籃球比賽全部無痛充足保護下打足全場，仲要大炒添吹漲，後續未知因為已經唔痛唔腫所以無返嚟睇， 以為好返就唔會練架啦， 呢個受傷後總共睇左兩次；仲有個朋友拗柴後，聽個醫生講叫佢頭兩星期唔好睇物理治療，結果腫足一個月行路仲係拐下拐下，近幾日揾跌打針完就鬆好多，係呀其實真係唔駛揾我架，我想講嘅重點係:

**拗柴頭幾日做岩野，之後會慳好多時間慳好多錢，否則之後大部分時間都係用嚟處理你傻傻的二次傷害嘅後果**，完。

P.s. 片中板仔都係拗柴常客以前成日嚟睇我，自從係我度學識左拗柴後扭皮鬆動法，佢話而家佢每次拗柴都係自己醫自己幾日就好返，仲可以勁到即場醫埋佢其他板友，佢話即場行唔到扭完皮就行到喎，我自問就無把握做到啦，天才好似去左澳洲讀書。

02/01/2024

唔開心做咩動作好


你有無試過唔開心時, 有人同你講: 唔好唔開心啦, 咁? 有試過既人都會明白呢句說話既威力就好似原子彈, 會令你可以下定決心做好多衰野, 無論係對自己定對講果個人。 所以唔知做咩好時, 千祈唔好嘗試安慰人, 收聲, 陪伴就好。其實睇到呢度就好夠, 但假如你硬係想做D唔知咩野幫佢既話, 你可以試下叫佢做以下呢個動作。

今日講隔肋底, 豬呢個部分叫不見天, 濕, 熱, 有毛, 臭味。今日突然間知道左原來人類收埋左好多悲傷係自己隔肋底入面, 你有無見過一個唔開心既人會露出隔肋底? 你又有無見過一個露出隔肋底既人係唔開心既? 喊緊既人都會縮埋隔肋底, 寒背, 五十肩的人不會開朗, 舉唔到手又想開心咁點算? 平臥大字形打開雙手向天晒太陽, 利用熱力蒸發抑鬱。自己做唔到叫朋友做比自己睇效果相同, 對鏡做比自己睇效果加倍, 三個人一齊做三倍, 如此類推。

唔開心時做呢個動作, 重點係舉手露出隔肋底, 每日一分鐘, 有益身心呀。以後搭地鐵與其同人搶位坐或者鬥快挨住條柱然後拎個電話出嚟, 不如搵兩個把手或用條橫BAR, 舉高雙手, 低調地放走你既悲傷。

其實你能夠睇到呢度我都佩服你, 九唔搭八, 條友真係痴Q左線, 係架完全無科學根據, ......科學你老豆咩咁聽佢話, 我淨係睇效果既啫。你唔駛信我, 但你下次有種揮之不去既唔開心時, 即管試試囉, no harm right? 試左有用無用話返我知。祝你有個開心2024。